閒日晚餐包房飯局, 失望到極

部屋咖啡室 (旺角)

早一日打黎booking book左21位, 當晚一上到去第一個感覺係極之污糟, 走廊有死曱甴(雖然唔係大隻, 但都唔係唔清楚扮睇唔到掛?), ok fine... 個waiter一帶入房, 嘩, 陣味冤到想嘔... d 黑色梳化上面有d飲品既漬, 白色既地板滿佈住黑色既鞋印(代表住地都唔識拖?), 都算啦, 諗住問一問waiter有冇空氣清新劑噴一噴啦, 見佢一臉問號既樣子, 都估到冇, 最後佢幫我開左個風閘散緊d味就算數...

好啦, 電話入面同我講有k唱...其實只係notebook開多個mon播player, 俾兩支咪你set大少少個音響就係? fine... 聽歌算... 聽聽下hang機真係火都黎埋... 冇人搞返好既情況下就自己整啦, 都係電腦姐...?

事關我地book左21人... 咁我都expect你整既野食係夠21人份量...so far去到最後我地有一個人甩底冇到, 即係實際係20人去左呢間cafe玩, 即係話我地20個人食21個人既份量... d小食同主菜, 3爬2撥d野食已經消失晒, 最重要係, 佢d小食 菠蘿腸仔, 一食落有陣雪水味; 炭燒雞肉串, 除左個盛載食物既木兜係熱之外, 全部雞肉串都係凍既, 有d仲痴住舊冰塊, 然後我地問咩事啦, 佢個老闆既答法: "d腸仔我地已經煮過架啦, 如果你食落有雪水味我都冇辦法, 最多我幫你再漉下啦; 至於d雞肉串, 我地都係放入微波爐叮熟佢, 咁可能係同事叮既時候冇整好啦, 不過我地都有d客人係鐘意凍食架" (鐘意凍食既食物都唔係仲有冰粒痴住掛? 真係凍食既你叮黎做乜野?)

好啦小食唔掂都算, 主菜d意粉既味道係可以接受既, 一兜分開平時裝蛋糕果D紙碟, 分左5-7碟就已經冇晒, 問有冇得refill啦...佢同我講淨係可以refill主菜...即係意粉, refill左2次個老闆就入黎黑我面話冇得再refill話已經refill左好多俾我地...再唔夠食真係你地大食, 唔係我地準備唔夠... 你真係都仲唔夠食既話就每人加多$5數, 我俾多盆你地啦...

最後真係黎多盆啦, d意粉係中間硬崩崩(即係又係未煮熟...), 食左少少已經唔想食, 但係我地個肚仍然係餓緊... 真係無奈到唔想再出聲投訴, 結果最後自己玩算

佢成間cafe d cardgame boardgame全部都好齊, 叫佢俾個層層疊我, 我地疊完之後得6層, 如果唔係我地自己諗下可以點玩, 真係唔知佢d game俾咩人玩...

overall黎講, 好難得先會約得成20人既飯局, 大家只係想開開心心食下飯玩下...
1)野食質素本來已經唔會expect要有好高既質素, 但係絕對都唔會期望食到d根本一擺落口就想吐既食物
2)野食份量係少之極少, 重申多次我地係book左21人份量, 但係20人食...係冇一個人話飽
3)態度問題, 老闆黑你面同你講: "你地咁大食, 冇理由要我地refill refill再refill, 咁我地咪唔洗做? 你真係想食飽可以去放題丫, 唔係黎cafe", 聽到咁既說話你嬲唔嬲?
4)我地飲果d所謂任飲既飲品, 係d稀到不得之了既糖溝水? 最後淨係叫佢俾左煲過既水我地飲算
5)好多人一大班人去食個飯開個飯局, 野食都唔係main concern, 志在開開心心gathering下, 但係好老實講, 佢地餐廳俾人既感覺係極之差, 做錯野一句對唔住都冇講過, 完全冇誠意

除左老闊, 其他waiter, waitress都唔係差既至少, 起碼佢唔會同你講: "呢樣係你既問題, 唔係我地準備唔夠", 但都唔係話好既服務, $130 1位既人頭費($118 +1), 真係唔值, 人地收你+1服務費係因為有真真正正咁serve過客人, 所謂既serve唔係搬下野食收下杯杯碟碟就叫serve左, 不知所謂!