本身想食隔離間群記但無開 見呢間大蕃薯有咁多人報道就入黎試下...點知超級伏😬... 食左個羅勒汁白酒沙蜆天使麵..成餅野..又碎濕濕...唯一好係多蜆... 隨餐附送既甜品完全唔知係咩黎..我本身個人食咩都唔鍾意點醬..但佢又成pat係個甜品上面..一啲都唔美觀唔吸引..我冇食..朋友話肉桂粉味太濃..好難食(呢位朋友平時乜都食)😧 另外有人叫左午餐9號極品牛肉湯麵..一樣好極品..麵底竟然係天使麵?!呢位平時唔會浪費食物既朋友一樣食唔晒碗麵.. anyway, service是ok的，但我係黎食野唔係黎享受個service的....

星期日六個人的晚餐。餐廳唔算熱鬧，可能因為咁，可以慢慢上菜，每次食完一味先黎第二味。

長腳蟹叫左半隻，好鮮好好食。籠仔蒸芥蘭，一般炒菜味啦，係中上既。芝士龍蝦伊麵，隻芝士係好淡好淡味個隻，記得一定要撈埋啲汁食，否則係完全無味。啲龍蝦好好食。個人喜歡食淡啲，同埋佢食完唔會滯。如果喜歡濃咪啲既，可以叫佢加啲鹽。蒜蓉包，係送既，好香好脆好好食。芝士焗蠔，因為都係用淡味芝士，所以無平時食開既咁野咪，但佢加左啲煙肉都有少少咸味既。隻蠔似生蠔多啲，好鮮好大隻好好食。不過我下次會試下薯蓉焗蠔，老闆都推介。白酒煮藍貝，每人有2隻，都好新鮮。砵酒煮鮑魚，個鮑魚夠軟係好好食既，不過我prefer第二隻汁。芝士海鮮焗飯，一樣係淡味芝士，飯唔係炒飯底，食到最尾又唔夠汁變左食白飯。啲海鮮好好食。芒果布甸，無影相，不過真係好好食，無膠布甸味，雖然一上菜個布甸黑黑地嚇親我，但食落口真係好好食，又唔會太甜，一定要食。

情侶兩口子，晚餐，半飽。

是日由於我倆不太肚餓，而且之前幫襯過兩次，食過主菜都覺得普普通通，所以今日主攻小食。夜晚七點到九龍城，仲未需要等位。環境方面，唯一要批評的是醬油小碟和餐碟都有污漬。順帶一提，因為今次揸車黎可以兩手空空，之前揹住個背囊真係無位放。最後我倆叫左３輪共８個小食：特選刺身拼盤
帶子比我家裡常吃的小隻，鮮味亦不夠；蟹籽的味道好奇怪，酸酸的...（可能係俾墊底的青瓜污染左）其他刺身就好新鮮，但味道並不是最頂尖。三文魚壽司
個飯團好軟好有日本飯的味道，舊飯唔會太冰凍但又唔似出面個啲直頭係熱既..好喜歡舊飯入口的感覺，不過，三文魚無上面拼盤個啲咁有三文魚既味道...一舊得一舊唔得，下次未必會再叫壽司。青瓜仔拌八爪魚
望落似酸辣，食落其實一啲都唔辣，開胃小菜，讚！廣島蠔懷石燒
個蠔好鮮，芝士味好濃，好彩無再落檸檬汁，因為啲芝士本身就有酸味，我食到啲芝士汁一滴不漏。日式炒雜菜
望落個賣相唔太討好...睇極都唔知有咩夾得上手..但食落又幾惹味，望落好似好多油但食落完全無油味，亦都無好大陣好臭既炒野味。三文魚他他多士
每次黎必食！今次覺得特別好食，個多士口感超脆，但又唔會食到啲碎周圍都係，淨係食個多士都已經覺得好好味，上面既碎蛋加蟹籽夠凍，用啲碎蛋痴住啲蟹籽保證唔會食到周圍都係。食到有三文魚果啖最感動。迷你芝士火鍋
芝士係臭個隻芝士味，未必人人接受到，一開始個火好大，啲芝士直頭跳埋出黎，要小心被彈親整污糟，但個火亦熄得好快，唔想食得太傑就要食快啲了。配菜方面少左啲，只有麵包同西蘭花，不過５６蚊滾下滾下算係咁啦..奶茶布甸
本人唔飲奶茶，但都覺得好易入口，味道當然唔係港式茶餐廳既奶茶味道，而上面既cream多啲會更好，否則食到最底下面啲味就會好寡了。

總結，之前黎食都係一人叫一個主菜再叫一兩個小食，但呢度啲主菜實在麻麻，特別係拉麵，食到我好飽都無心機試啲小食，今次淨係食小食就感到非常滿足，但價錢就貴左好多。左右兩邊既情侶主攻主菜埋單只係200多，我倆就要400多，所以我下次都會同今次一樣，唔太肚餓先黎食小食。

情侶二人用餐，肚餓，brunch。

是日落雨，難得西貢好少人但呢間小鋪還是爆滿，所以要迫係細小的簷蓬下，仲要開住把遮先唔會滴水，坐既係木凳，唔適宜長坐。

等餐時間都幾耐，因為只有一位法國廚師老闆，但個人認為食得法國小菜就要感受埋法國的悠閒，唔可以當係快餐咁食。

招呼我地既係mix既靚仔侍應哥哥，態度好好，亦好風趣。

我地兩個人叫左兩個套餐，價錢係西貢黎講相當相宜，我地以為會好細碟，點知最後棒住個肚走。法式芝士奄列+多士
多士好脆，整個菜式既味道都好淡，如果喜歡食濃味野既人未必岩。但我個人說好喜歡，個奄列外脆內軟唔會一pat野，淡淡既芝士味，仲有menu無寫既火腿係入面，整體味道好食。法式田園煙肉薯仔奄列+多士
呢個奄列比上一個更有口感，硬身一點。薯仔係爽口的而非粉薯，唔會一叉就散，入面有些許香料好香，食落無芝士奄列咁漏，食材更加豐富，更香口。熱鮮奶朱古力
上面兩粒綿花糖好甜，下面啲朱古力唔濃，但唔知係咪我兩粒綿花糖放左好耐先食，所以淡淡既朱古力充滿住甜味，唔係話超好飲，但都好飲既。

0

鮮奶咖啡冰雪
無鮮奶味，普通咖啡感覺，似沖粉咖啡。

整體而言，menu仲有好多我想試既野，我下次會再黎試其他野。

一間以足球小將為題的餐廳，環境不錯，由餐紙，杯墊到紙巾都有特色，仲有紙板公仔比大家影相。

叫餐時，侍應（經理）態度頗差，令我地都唔想叫多幾樣。最後兩個人點了三文魚（五片），芝士焗美國生蠔，石鍋豬軟骨鮮茄湯烏冬和炸軟殼蟹親籽炒飯。一入門口見到啲三文魚好肥美，點知食落口完全無味，不值得試，還好價錢不算太貴。成餐最好味既食物。芝士味好香，同生蠔好夾，色香味俱全，非常值得食。望落好濃，實際無乜蕃茄味…烏冬頗彈牙，有好多舊豬軟骨，切得幾大舊，唔易食。軟殼蟹唔錯，個飯都幾足料，有蟹柳，蟹籽都唔少，乾身夠熱，不妨一試。

整體而言，我唔會再黎，都唔會介紹朋友黎試。