鹿苑粉麵餐廳 (大圍)

細個時間中嚟食，但當時仲未識分咩叫好嘢，
而家食返真係有少少想揼心口。

佢嘅食品質素其實普普通通啦，
例如牛雜咁樣都OK嘅，
唔係難食，
但點解我要畀個喊呢？
就係因為佢個湯濃到呀媽都唔認得，
每次都涸喉加頭痛，
而我食完味精係會頭痛嘅，
所以各位客倌自己參透下啦……
唔係有時屋企人想食我真係唔會再去。

不過咁，
佢嗰度嘅雲吞係做得唔錯嘅，
但唔係巨型雲吞，但有大地魚香味，
亦都有豬肉香，唔係全粒都係蝦蝦蝦，
間中我都會去買打生雲吞嘅。

唔知係咪生意冇咁好定係老闆決心要改革喇，
以前佢哋成班都好串，有啲伙記態度差到好似撩交打咁，
落單又求求其其，又要催你，又呼呼喝喝，
擺低碗嘢又彈啲湯出嚟，對啲客評頭品足，
試過有個客走咗就即刻講嗰個客個樣點點點點，
收錢多謝都冇聲好似老奉咁，
佢找錢俾我我講聲唔該，都反問返自己做咩要對佢咁好禮貌，
呢啲咁嘅員工同管理係咪有病架？
不過咁，始終係過咗去嘅事，最近都有改善
由細幫襯到而家都唔希望佢執嘅，
希望逐樣改善，越做越好啦。

屋子咖啡 (大圍)

大圍開咗好多新舖頭，要試晒佢都有排試，
今日就揀咗呢間屋子。

門口望入去覺得裝修幾靚，
一大扇木趟門，兩旁係落地玻璃，
但呢個設計有一個缺點……
佢哋嘅餐牌放喺左邊玻璃，
度木門又係趟去左邊，
照餐牌嘅燈又唔算太光，
哄埋少少睇咁啱又有人開門的話都幾危險，
見過有位女士差啲俾度門撞到，
開門嗰兩位後生仔可能唔為意左邊發生咗咩事，
又開多兩次門望下入面有冇位，
應該兩邊都要有告示提下客人。

入到去覺得有少少細，唔可以好Relax咁坐但都叫做OK嘅。

一行兩人，
叫咗個和風沙律、海老天婦羅冷烏冬同埋炸牛肉餅。

先上枱嘅係烏冬，上面鋪咗好多菜，
雖然同個沙律重疊咗……
但食多啲菜都好嘅健健康康，
之後係底下嘅烏冬，
彈牙有嚼勁，真係做得唔錯，
但成碗嘢嘅敗筆喺兩隻蝦天婦羅度，
首先，真係好細隻，
我上到嚟睇返人哋啲相，啲蝦好大隻喎，
對比我嗰晚食嘅，大約得一半咁大（都未必有添），
其次，可能個漿粉開得唔好，
一望落去，舊嘢好扁，
唔係普通天婦羅咁向四方八面鬆開，
個皮好硬，要用力咬落去，
同鬆脆嘅天婦羅完全係兩回事，非常差。

至於個沙律，普普通通，冇咩缺點亦冇咩驚喜。

炸牛肉餅，
可能之前嗰兩隻天婦羅令我太失望，
所以我對佢冇咩期望啦，
但呢個又整得幾好食喎，
份量又夠，炸得鬆脆，
可能個天婦羅真係漿粉累事。

之後就叫咗兩杯嘢飲，
同埋一個栗子窩夫，
由於兩杯飲品好普通……我對佢哋已經冇乜印象，連名都唔記得。
相對地個窩夫整得好好，
外脆內軟，又夠香，上面嘅栗子茸亦都夠濃唔失禮，
呢度嘅甜品可以再試。

可能樓面得一個嘅關係，好多時佢做到踼晒腳都冇乜心情同時間留意細節，
兩個人share一個麵，叫咗佢幾次先拎到個碗仔，
另外做到木無表情，睇得出佢好緊張了……

博多拉麵龍亭 (大圍)

開咗咁耐都未食過，
咁啱得閒，入面又冇乜人就決定入去試下。

叫咗個最基本嘅豚骨拉麵，
以下係我嘅選擇：
味道：普通
麵質：硬
蔥：要

另外叫咗個半熟蛋同炸海老餃子。

碗麵好快就嚟到，
一試啖湯，嗯……點解咁淡嘅？
明明記得自己要普通濃度，可能呢間做得淡一啲，
下次會試下最濃嘅可能比較啱我心水。
但整體嚟講香味都算夠嘅。

至於啲麵，
一咬落去嗰下真係幾失望……
我要硬麵但係唔似硬麵，冇咗嗰種質感，
可能係麵身較幼嘅關係……
加上一落湯，麵就會一直索水變軟，
呢方面希望可以再改進。

配料方面，
黑木耳，幾爽，可以考慮另加。
蔥花，多得濟……雖然香口，但食完飲咗好多杯水個口都仲係幾大陣味。
叉燒，不過不失，但好薄，我唔介意碗麵收得貴啲，我都想跟麵上嘅係厚度似樣少少嘅叉燒。

反而小食又做得幾好，
半熟蛋做得好香又真係流心，值得一試，
炸海老餃子外脆內軟，配上芝麻醬非常香口。

雖然個麵同（尤其係）叉燒，令我對呢間舖頭嘅評價只係一般，
但我會再去試其他口味睇下有冇驚喜。

德記潮州菜館 (西環)

咁啱入開西環，又唔知邊間好食，
就求其搵間就腳嘅，點知咁就搵到一間會令我再返嚟食嘅舖頭。

去到已經八點，見門口有人都驚要等位等好耐，
點知兩個人就啱啱好有枱，真好彩。

由於得兩個人，今次試嘅菜式並唔多，
但款款都令我幾滿意。

蠔仔粥，配料味道唔會太重太多，
蠔仔唔會煮到成隻實晒，又夠多，都有好多算係巨型蠔「仔」，
整鍋粥相當清甜唔重口味。

蒸蟶子皇，
蒸嘅時間啱啱好、易咬又有少少爽，
蒜蓉粉絲都夠多。

例牌鹵水鵝，
味道唔錯，墊底嘅豆腐都好食，
但唔知點解鵝肉好林，
林到冇咗嚼勁，有啲失敗。

蘿蔔烙，我願意為呢碟菜再返嚟。
咁大個人第一次食呢道菜，
外層炸得香香脆脆，蘿蔔條又夠甜，
加上啲配料令到成舊嘢更香口，好好食。

另外侍應嘅態度大多值得一讚，
好積極、有禮貌，
唔會好似其他餐廳啲侍應咁，
望到你舉手即刻擰歪面當睇唔到。

下次同朋友再嚟試多啲菜式，
尤其係見到啲蠔餅好似好鬆脆，
希望唔會令我失望。