Tung Chung Pizza (東涌)

話說一心諗住去東薈城個Outlet行街，睇下有無野岩買
咁山長水遠一場去到，梗係順便食埋餐飯啦
之前睇過條片係寶欣介紹有間隱世小店，咁就一於過黎試試啦
但係佢真係太隱世既關係，我開車過黎係Miss過一次既，再掉頭行多次先搵到我黎到先發現原來係外國人開架喎，好有外國風味
仲要只係得我地一台，個感覺好似有少少中伏咁
咁但係一場黎到點都要試下啦
我地一坐低佢就擺低左幾個包俾我地食~免費！
一拎上手，熱辣辣，真係辣手果隻，個包個質感同Pizza好似
真係好好食，一食完呢個包我就覺得呢間野唔簡單

見到佢有d set dinner，一個Pizza 加個 Burger + 2罐汽水 $2xx
再叫左1個咖哩雜菜飯 + 肉醬千層闊條麵
等左一陣Pizza就到喇！個Pizza即焗起即食真係好正，熱辣辣，Pizza底又好鬆軟，超好食
真係同果D連鎖既掙10條街呢個包個Size都好大個，塊牛肉都好Juicy
2百幾蚊可以有一個大Pizza + 呢個Burger真係好抵食呢個肉醬千層闊條麵都好好食
好食在佢D肉醬真係超多，好足料！最後仲有呢個咖哩雜菜飯
真係好有印度風味，食得出裡面有好多香料
連個白飯裡面佢都mix左D香料係入面
而且個咖哩唔辣的，大人小朋友都岩食
總括黎講，呢個隱世小店真係好得，絕對值得Encore
唯一缺點就係地點有D偏遠啦

其實佢主力係做外賣，不過我相信現場食應該會好食好多！

棕櫚閣西餐廳 (旺角)

朋友同我慶祝生日，請我食自助餐慶祝
早幾年前都有黎過呢度食Buffet
今次黎度覺得佢地環境好似靚左D
佢地今次個主題係蒸海鮮，現場即叫即蒸自己D海鮮夾落個籠度，有師父會幫你蒸
蒸完仲會直接送去你張台度，真係唔錯
有樣野真係唔可以錯過，就係鮑魚都係任食架！
D鮑魚須然唔係好大隻，但係勝在都幾鮮味，而且係任食丫嘛
我地蒸左幾籠鮑魚食，真係好過引，配埋D辣椒豉油無得彈
其他既話我最鐘意就係蒸成條魚食，佢係細細條倉魚仔，都好鮮味
除左蒸海鮮之外，仲有鐵板燒D羊架都好正，唔係好羶，仲有蝦
不得不提下D刺身，D三文魚好厚切架，我朋友都夾左2,3轉
仲有D熱盤賣相都幾好，我好鐘意食果個冬陰公青口，真係好有泰式風味
仲有個龍蝦湯又係不得不試
最後甜品其實都唔係好食得落，但係有芝士蛋糕我真係忍唔到手
好好食呀~ 食埋杯雪糕真係要收工，飽到上心口。

黎呢度食飯仲有個好處就係免費泊車！

唐宮中餐廳 (旺角)

早幾日同朋友去食晚飯，朋友住附近，成日都過黎食飯的
佢覺得唔錯所以今次叫埋我一齊黎食飯
餐廳而家做緊大江南北美食，意思即係集合左好多中國唔同地方的美食
例如有廣東、杭州、敦煌、北京、重慶、海南等等等既美食，各有特色
一講起大江南北，我個腦就響起一首歌，拿啦喇喇拿啦喇, 拿啦喇喇拿啦喇，哈哈
Youtube竟然搵到呢首歌，真係洩露年齡

講返呢餐飯先，真係有好多好多選擇，每樣都想試下

好彩我地有4個人，都可以試多幾個菜式。


江西五彩手絲羊
手撕雞就食得多，手撕羊就真係第一次喇，小小辣辣地，配埋調味，真係好開胃，而且有芝麻，真係好香


安徽墨魚大(火靠)
墨魚大大件，但係完全唔覺得un，真係好好食~


上海銀芽炒鱔糊

我好鐘意食鱔糊，呢個味道好好，如果有菜飯配黎食就更好


譚家干燒海參
呢碟海參都係開胃菜，海參煮得岩岩好，個汁有少少辣辣地，配上有大量既蔥，菇粒，真係好搶飯


北京黃燒魚肚
魚肚真係好厚，我未試過食魚肚係有咁既口感，仲有個汁唔會太濃味，配起魚肚一齊食真係好Match


順德大良炒鮮奶
真心覺得呢個好好食，印像中炒鮮奶好難炒得好食，D奶炒到脹卜卜，裡面仲有蟹肉，配埋松子仁真係好好食，而且一D都唔會覺得膩

真心覺得呢餐大江南北好特別，一次過可以食到咁多唔同地方既菜式，岩晒我呢D為食既朋友。

建議叫多幾個朋友一齊食，咁就可以點多幾個菜式試下

村爺爺龍蝦湯.泡飯.燉湯專家 (油麻地)

同老婆做完檢查，諗住過黎村爺爺食餐飯啦

之前都有黎過架喇，不過就係食龍蝦湯飯
都好好味~ 跟住上次見到好多人都係食雞煲翅
望一望，原來只係$68，有成半隻雞，仲要有花膠
相當抵食咁既樣，於是咪諗住今次就去試下啦
點知一去到就知出事喇，點解多人左咁多
之前都唔駛排隊既，今次有條長龍
跟住發現原來之前黃秋生黎過試呢個雞煲翅搞到出晒名
就係咁一直等等等，等左成個鐘
終於可以有位喇
梗係就係叫呢個花膠縲頭雞煲翅啦

好快就送到上台
佢好細心，仲俾埋手套我食
始終食呢d雞，都係落手食會方便好多既
不過我都第一啖都係要試下個湯底先
一飲真係不得了好濃既雞湯味，真係唔係hea你喎
花膠老實講就唔係太出色喇，咁$68又無得要求太多，算ok
隻雞先好野，我開頭都會驚隻雞會唔會鞋呀
佢又完全出乎我意料咁嫩滑喎
而且都幾好肉
將個飯放埋落個湯度真係一流
呢個湯飯真係高級

味道就真係唔錯既，價錢又抵，經濟實惠

但係如果可以唔駛等咁耐會更好囉

象庭 (馬鞍山)

其實呢間餐廳都開左段時間
一直都想試下，但係又覺得佢價錢set得有d貴
所以一直都未去幫襯過
有一次同老婆未諗到食乜，又岩岩經過間餐廳
見佢8:30後有折喎，於是就入去試下啦~
好多野食都好想試
最終點左2樣野
炒貴刁 + 軟殼蟹咖哩包
先講炒貴刁
一睇個賣相就知不得了啦竟然咁有心機整個蛋膜包住個貴刁
而且面頭果隻蝦一D都唔欺場呀
味道好好食，唔會太油膩！讚


跟住到呢個軟殼蟹咖哩包
我一見到真係嘩左出聲
個賣相真係好吸引個包基本上已經索左好多咖哩汁
軟殼蟹又炸得岩岩好
而且真係唔細個
我諗3,4個人share都得
2個人食就真係飽左d
淨係食呢2樣野已經覺得好好食
遲d真係要試下其他野先~