上個月月尾放咗成個星期假，咁啱老死又放假，上咗佢屋企打機，打打下有啲肚餓，老死話不如落樓下食個tea，問我想食乜。我話想飲杯咖啡食件餅，不如去Starbucks，老死話唔鍾意佢哋D咖啡淡謬謬，所以帶咗我去附近呢間小店，老死話幾掂的。
見佢哋啲cake好似幾得，本來想叫嚟試試。點知見到有嚿香噴噴既黃色物體飄過咗隔離枱，一問之下原來叫黑松露蛋卷。我最鍾意食蛋，所以叫咗一客試試。黑白松露未食已經香氣撲鼻，加埋蛋香真係做得幾好味。老死就好滋陰，叫咗個沙律，我無試，但老死話味道唔錯。
講真，我一向好少幫襯小店，唔係話小店唔好，但係質素參差，除非有朋友食過話好先會幫襯。試過呢間之後，質素唔錯，可以回頭再幫襯。

好耐都無食過焗豬扒飯，星期五晚一支弓開飯，突然好想食，咁啱係朗豪坊嗰頭，咪去咗附近既翠華試試。聽就聽得多啦，話佢地嗰位老闆試咗好多款焗爐，先至搵啱適合既嚟焗，又話佢地既焗豬扒飯有酒店水準，咪叫咗一個。見到餐牌推介夏日特飲，睇相個「黄金夢特飲」好似好得，咪叫嚟試下囉。
飲品先嚟，一飲知中伏，原來只係芬達加嚿芒果雪糕，雪糕味道仲要偏淡，賣2X蚊唔值，下次都係飲翻凍奶茶算。之後等下等，等下又等，等等再等，唔知等咗大約15定係20分鐘後終於見到個焗豬扒飯。
論賣相OK，試咗第一啖飯，發覺都焗得唔錯，唔會太乾，略嫌蕃茄少咗D，茄味唔及大快活。不過呢，D豬扒就真係好得，有幾嚿仲帶少少肥，最驚喜既係落在西梅，酸酸甜甜真係要like爆。最後一提，飯量就一般，唔夠大家樂同大快活多，我呢D死肥仔就唔多夠啦。