今日經過石門做野，見開咗咁多餐廳忍唔住叫老公過嚟食飯😝 行到京瑞廣場一期二樓見到呢間舖有花膠雞煲，即刻覺得好正咁，即刻入去食啦！呢個二人餐都幾多野食，最吸睛梗係兩舊大花膠同埋金黃色嘅雞湯！等湯滾起左先飲一碗湯，雞味超濃郁，應該熬左好耐，全部精華都喺晒啖湯入面，感覺好滋補🤤 跟住職員就剪細舊花膠擺入湯度煮，等多陣先食得花膠。先食新鮮炸起嘅響鈴，仲係暖暖地，好香好脆口，浸落湯淥3秒先食仲有濃濃豆味！我地揀左安格斯封門柳，牛肉味濃，唔會太肥太漏，份量都好多！
手打鮮蝦丸同鮮墨丸，好彈牙，蝦丸味道比墨丸更突出。
湯入面已經有原隻芝麻雞，就算煲耐左肉質都無變鞋，仲好嫩滑！
新鮮白鱔唔係薄切，係厚切架，啖啖肉之餘仲係無骨！黑松露花膠水餃入面非常足料，帶有爽口嘅感覺，仲有淡淡嘅黑松露味，絕對係皮薄餡靚！ 食完烏冬就食甜品3.6牛乳奶凍，口感順滑，奶味好濃，有啲似日本便利店買戈隻牛乳奶凍，每人一杯有啲唔夠喉🤤🤤

媽媽睇咗毛姐介紹，所以兩三個月前已經話要訂枱慶祝我生日，梗係去試吓啦！ 因為係復活節假期第一日，只可訂到Lunch時段 2:30pm，因為食咗early lunch，所以都唔係好肚餓。 Menu上款式唔算多，我哋一行五人，點晒想食嘅前菜主食都未夠最低消費$300（店員喺落單時提醒）。 第一次食雞肝醬，感覺無鵝肝醬咁油膩，質地輕d，降低邪惡感。 第一次食牛肉他他，好似食緊吞拿魚咁，撈咗生蛋後好滑溜，味道清新。 沙律好新鮮，醋汁酸酸地好開胃。 炸菇好酥脆，但有啲油膩感。 內裡充滿薯蓉，條條都好厚實，唔錯！ 鯛魚皮好脆，魚肉嫩滑。 鴨胸唔鞋口，肉質軟稔，好鍾意食燒番薯，甘筍蓉都好鮮甜。 手切通粉，用pesto做醬汁，通粉Al dente，好特別！ 3粒Madeleines，新鮮焗製充滿好香牛油味，入口鬆化。 店員推介我哋食呢個天鵝puff，都算大個，入面嘅吉士醬唔算甜，質地輕身唔覺膩，pastry部份都好鬆化，唔錯，但menu上無寫價錢，埋單先知每粒$118😂，都幾貴，不過生日丫嘛，多謝媽媽！❤️❤️

搬左嚟深井後都好少食呢度嘅小店，之前等巴士見到呢間新開嘅舖，覺得幾吸引，就決定今晚買外賣！ 見到門外standee餐牌價錢幾吸引，麻辣雞米線只係$50，午市晚市同價，點知落單時竟然收$70！已經覺得有d唔妥，返去拎外賣時再睇下門外餐牌，真係$50！ 拎外賣時忍唔住同店員講價錢唔同出面個餐牌，點知佢話個餐牌係舊，會同老細講！😡😡 本人都係餐飲從業員，客人見到有唔同一定會投訴，餐廳都應該要以客為先，擺明係自己唔著，就應該俾返戈個價錢客人😤 我無發癲已經好好，但越諗越嬲！ 呢個就係$70嘅麻辣雞米線，非常普通！我就唔會再食喇🙂

放左工同honey去佐敦恆豐中心波鞋outlet睇波鞋，波鞋就揀唔啱，但突然想食日本野，就開「開飯」睇吓附近有咩好食，見到呢間食評唔錯，就行10分鐘過到嚟廟街喇~

一嚟到就被S2築地壽司杯吸引咗，因為有齊我哋至愛嘅牡丹蝦、海膽、三文魚，仲有磯煮鮑魚﹗頭三樣都好新鮮，牡丹蝦夠大隻，海膽味道甘甜，有入口即溶嘅感覺，三文魚夠晒肥美，磯煮鮑魚又夠彈牙，另外嘅吞拿魚蓉味道都唔錯，令平時唔鍾意食吞拿魚嘅我都要爭住食﹗


淨係食壽司杯又點可以滿足我哋食刺身嘅心呢﹖我哋仲叫咗丼瀛豐盛爆丼，因為有帶子、海膽同埋比目魚﹗帶子中間夾住幾片檸檬，令帶子充滿檸檬香味，感覺好清新。第一次食無灸燒過嘅比目魚，原來都係入口即溶架~食完一舊有幸福嘅感覺﹗

食完丼飯原來下面仲有冷麵，原來係蒟蒻冷麵，都好彈牙爽口架wor﹗



食咗咁多生冷野梗係要食番D熱野啦﹗叫咗燒明太子雞翼、燒牛舌，雞翼裡面釀咗明太子，但略嫌味道唔夠，牛舌都算厚切，又彈牙，唔錯﹗


其實食咗咁多飯已經好飽，眼闊肚窄嘅我哋仲有個安格斯牛肉壽喜鍋未食，湯底甜甜地，好多料，仲有好似薯粉嘅麵，索晒湯底精華，食完勁暖胃，啱晒食完咁多凍野先食﹗

呢度仲有一個好貼心嘅服務，就係每當我想拎電話影相戈陣，侍應就會拎手提燈幫我打燈，所以今次D相先咁靚架咋，佢哋真係好NICE，要同佢哋講聲唔該晒﹗支持小店﹗

嚟到旺角行街突然想食梳乎喱pancake，搵搵開飯睇吓附近有咩好野食，發現原來白布街有呢間I Love You，之前已經知道佢地幾出名，仲攞埋米芝蓮推介餐廳，所以冒住熱辣辣嘅氣溫行到呢度搵好野食😁 行到嚟發現原來呢間小店真係得兩個門口位，好多客人都係企喺鋪頭食，但既然嚟到又熱辣辣，唯有買番上車食啦！落完單後大約等半個鐘左右就ready，等嘅時間去波鞋街行下嘆下冷氣，時間好快就過。 樣樣都想食嘅我哋，兩個人三個cake😂 原味梳乎喱班戟首先ready好，將pancake遞俾honey後我繼續等其他，到我搞掂晒，行出鋪頭見到honey個驚為天人樣講「好好食呀！」我真係嚇一跳😂😂 即刻忍唔住食番啖，果然，有入口即溶嘅感覺，蛋味好濃又唔會太甜，撈埋木糠、忌廉一齊食仲可以食出唔同層次！另外加$8嘅豆腐雪糕都好好味！喺行緊番去車嘅途中已經食晒！🤤 番左上車後就食芒果梳乎喱班戟配雲尼拿雪糕，芒果好甜，好似係熟到就爛嘅味道，不過我鍾意！pancake蛋味雖然依然濃郁，但有d被芒果蓋過，不過都好好味！ 最後仲有我哋最鍾意嘅抹茶，但呢個抹茶忌廉芝士梳乎喱pancake就有d失望，先Lam Lam 綠茶醬，苦的，少少甜味都無，再食埋忌廉芝士pancake，綠茶醬同芝士味道唔多夾，苦苦地鹹鹹地，怪怪地… 呢度每份pancake都係$50左右，比起日本過江龍戈幾間平一倍有多，而且性價比超高！而喺旺角區除左隔離戈間外，好似無咩地方有梳乎喱pancake好食或者出名，所以如果嚟到旺角又想食pancake的話，我一定會再嚟食，誠意推介俾大家！😋

同朋友約咗去做運動，運動做唔成，唯有由圓洲角市政大廈行去石門 - 搵野食
行到商場發現有間細細cafe，二話不說即刻入去﹗呢度唔大，仲有d迫，落單係採取自助型式，所以要先搵位再出去落單，或落咗單先去搵位坐。因為我地無做運動但又去食tea實在太有罪惡感，唯有淨係叫一個pancake開心share啦﹗

過咗15分鐘左右就有侍應送上pancake，今日試咗黑糖抹茶厚鬆餅，賣相唔錯，蛋味突出，不過唔夠滑，但幾欣賞佢嘅綠茶cream，綠茶味濃又唔太甜，黑糖糖漿都唔錯，一啖pancake一啖cream，好快就食晒，仲有d唔夠喉。如果下次再嚟石門一定會再嚟tea一tea﹗

星期日搵節目，梗係要嚟最新文青熱點南豐紗廠行下﹗下午茶時間過到嚟，要搵吓野食先開始行街﹗記起朋友介紹過呢間cafe，所以跟住地圖行過嚟，但呢度實在太大又覆雜，都要搵咗陣先搵到。

呢度有幾張大枱share坐，都可以坐bar枱，好彩行早一步，如果唔係就要等位。好鍾意呢度嘅布置，感覺夠晒relax﹗ 呢度係採用自助型式，要先去cashier order，飲品/食物準備好後會有侍應送上。見到menu有牛油果蛋沙律法包，作為牛油果控當然要試﹗法包焗得好脆，每啖都有好多蛋同牛油果，好好味，搞到我都想自己整嚟食﹗ 另外，仲叫咗 iced green tea latte，而honey就叫咗 hot latte，green tea latte 比較有驚喜，綠茶同奶嘅味道好balance，綠茶好香但 hot latte就比較普通。

公公生日，媽媽提議食榮哥私房菜，呢次係全家人第一次食私房菜，Whatsapp訂枱時已經俾左menu我哋揀，前一日要俾每位$100訂金，我哋12個人，揀左特選海陸鮮味豐盛宴。 頭盤: 本地有機水耕菜伴老陳醋麻花青瓜 + 涼拌黑木耳 + 雙色墨魚仔 + 茶燻流心蛋伴黑魚子醬配厚切茄子 先講青瓜，一上枱已被呢個特別嘅造型吸引左，究竟點整到呢? 青瓜口感好爽，充滿麻油香，而水耕菜感覺好新鮮好爽。流心蛋伴黑魚子醬配厚切茄子都好好，真係有流心，茄子好juicy，配埋甜甜地嘅醬汁好夾﹗反而雙色墨魚仔就無咩特別。 自選燉湯: 哈密瓜螺頭黑毛豚肉湯 好足料，成個湯都好鮮甜，飲完成身暖笠笠。
香煎北海道帶子海中寶
似係將帶子釀入蝦肉丸，無乜特別。 遠年新會陳皮骨 第一次呢道菜，最鍾意佢每一啖都有陳皮香，肉質夠稔又唔會太多骨，大愛﹗ 原隻龍蝦開邊上湯煮 (每位半隻)
肉質都算爽口，都幾入味，咁多隻龍蝦排開影相好震撼﹗
黑松露醬炒花尾龍躉配鮮蘆筍
啖啖肉嘅龍躉肉，用黑松露醬炒過好香，而蘆筍亦好鮮甜。
招牌茶王燻雞
最期待嘅雞果然名不虛傳，肉質好嫩滑，帶有淡淡嘅茶香，雞皮仲燒得好脆。通常我哋一家都唔會食雞胸肉，但好難得成隻雞可以消滅晒，證明真係好食﹗
因為訂位時有問過生日有無野送，收唔收切餅費 (係唔收嘅﹗)，所以餐廳好窩心地送左椰汁布甸俾我哋，仲有埋生日牌，加分﹗而個布甸味道都好好味架﹗ 其實仲有魚湯有機時令鮮蔬同埋寶貝鮑魚仔極尚金牌福建炒飯，但因已經太飽無食，而且只可放12張相喺食評，所以不作評論，但睇福建炒飯嘅材料係豐富，味道應該唔會太差嘅﹗

荃灣有好多間車仔麵店，但就無一間近荃灣西鐵附近，今日食lunch經過呢間孖寶車仔麵新開，梗係叫埋同事嚟試下啦！ 原來呢間鋪頭係分店，仲入圍左OpenRice熱店，應該唔會伏嘅！喺order紙剔好食咩後，就拎去cashier落單俾錢。 今次我揀左油麵、墨魚丸、齋、魚肉春卷，湯底係秘製醬。先講湯底，以前食開嘅秘製醬通常都會辣、惹味，但呢度嘅秘製醬唔會辣，反而有種唔識形容、鹹鹹地嘅味道，幾特別！呢度嘅齋唔係甜酸齋，係似咖哩齋戈款面根，但個人鍾意甜酸齋多d。最驚喜都係魚肉春卷，新鮮炸起，好似有d芋頭味，好香口！ 其實仲叫左腸粉，都好滑，有sir落喉嚨嘅感覺。同事們都對呢度有高度評價，肯定會再嚟食lunch！😊

之前睇Facebook已經見到有唔同媒體報道呢間船麵店，身為泰菜粉絲嘅我一早就想嚟食，不過因為地點問題，所以一直未有機會嚟試，今日機緣巧合下第一次嚟到石門，咁就嚟試吓啦！ 今日我哋食左雙拼檬粉 - 札肉+魚蛋，另一碗係泰式牛丸，先飲一啖湯，味道過得去，可能我食慣自己用船麵醬嘅湯底，所以個人認為未夠濃厚，魚蛋都幾彈牙，而牛丸亦好夠牛肉味，最突出嘅我覺得反而係炸豬皮，脆卜卜，浸湯食更加香口。 一碗船麵係$30，雙拼$37，價錢都幾抵食，可以一試！