L’Occitane Café (新馬路)

新的一年試下最近好旺場的cafe,位於議事亭前地,人流奇多,今天是蒙口碑而來。
等了大約20分鐘,內里裝修幾靚,好歐風,但人太多好嘈吵...
在樓下點餐后侍應會送到你跟前,我們點了四道食物。
第一道是法式三文治,點知...好失望,
首先買相非常不討好,好似凍冰冰擺左好耐硬柴柴的麵包,
不新鮮的感覺,味道不好,真的不推介。
第二道是紅酒燴牛尾飯,$88,白米摻雜了紅糙米,感覺健康d,口感本人尚可接受,
先生覺得好生硬,而且唔熱又唔香,牛尾方面就好冧,但無牛鮮味無紅酒味,
連個汁都無紅酒味...
第三道是枱枱都點的法式燉蛋,非常甜,一般般,$46一啲都唔值。
最後是牛奶啡,泡沫好稀,好普通的一杯咖啡。

熊貓葡國餐廳 (氹仔舊城區)

準備迎接新的一年,但太遲訂位周圍的葡餐都無位,WALK IN只有熊貓有位,即時食得。
尼到環境好舊,好似電視上八十年代的餐廳一樣,裝飾都好舊。
首先上枱的是薯茸青菜湯和牛尾湯,稀稀的,不像平日葡餐湯的濃郁,
牛尾湯完全無牛鮮味，很一般。
第二個是忌廉馬介休,里面有好多蘑菇片,但感覺不停出水,令這道餸口感很怪,
無芝士味,馬介休就食到一大舊一大舊,不太均勻。
第三道是很多人推介的燒乳豬,隻豬仔好肥下,有少許豬腥味,
口感燒得岩岩好,皮薄脆,味道偏咸,算是今晚最好食的一道餸。
最後一道是葡式焗海鮮飯,不推介不推介,飯濕冧冧且無味,海鮮又好唔新鮮咁,
尼餐令人頗為失望!

Upper Modern Bistro (上環)

適逢Boxing day及結婚周年紀念，在openrice看了數篇食評後決定選擇尼間餐廳，
係上環食完就方便我們搭船返澳。
提前一天才訂座，幸好7：00有位，位置比較偏僻，時間尚早，店內只有兩位人客，
侍應不斷問我們有咩需要，味道如何，非常親切，感覺他們對自己餐廳亦相當自信。
前菜點了"Pig's trotter & oyster toast with green salad"，感受到蠔是微暖的，新鮮飽滿，加上偏咸的幼滑的豬肉醬和脆卜卜的多士，配搭一流。
第二道係63 degree egg...,低溫烹調的食物第一次嘗試，好新鮮嫩滑連比較咸香咬口的火腿和雜菜菇菌，口感好特別，不過真係咸左啲，食完即刻飲完一杯水。
接著係蘑菇湯，他們先把cream放在碗內，再在你面前倒入蘑菇湯，好creamy好好飲，底部有啲＂臭臭＂的芝士，本人不太喜歡，丈夫就非常欣賞，感覺不飽膩。
主菜是"Char grilled 40 days aged grass US beef striploin"五成熟，wonderful是形容這道菜的，雖然40天牛仔俾人劏好可憐，但真的實在太好食啦！嬌嫩的紅肉肉質很嫩滑，少許肥肉使口感更佳，我覺得選五成熟真的很明智，非常juicy，三百多元能吃到這道菜真的值了！口感不膩但食完真係有點飽。
滿心期待的甜品到了，"Lemon Pannacotta"這道甜品包含幾款奶凍，口感都很幼滑很清新，柚子、檸檬的味道酸酸的，口適合當飯後甜品，幾片薄脆片則帶來另類的口感。
另一道upper chocolate，是一碗非常濃郁的朱古力醬，配上雪糕，口感軟滑中帶少少脆脆，好hevay好罪惡，好似食左一大盒麥提莎和瑞士連朱古力般，最後以一杯hot latte完滿劃上句號。
最後離開時廚師叫我行埋聖誕樹，我以為他叫我拍照留念，原來是取薑餅人，可愛極了！還問了我們對食物的意見，其實每道菜食完侍應都會來問，服務周到，當然是非常滿意！

環境和音樂比較嘈，包任食水任飲

喜蓮咖啡麵食 (氹仔舊城區)

常常聽到人話喜蓮係澳門最好食的茶餐廳，每次經過都超多人無等，某周六中午決定等下，等左大約20分鐘。
點左最出名的牛尾通，真係好足料，好多牛，鮮甜味香，通粉就係普通的通粉，食完仲要飲晒個湯。
紅豆冰18蚊一杯，超多紅豆大大粒，不過甜左啲...
另一位點左嚤囉雞飯，好香好入味，
奶茶就普普通通。
總括黎講真係不錯，值得等待。

卡夫卡 (馬場)

今個禮拜突登約埋班朋友黎，多啲人可以試多啲麻，
飲品叫了兩款茶，歌劇及黃金山脈，聞落去真係好多果味，
歌劇充滿莓同車厘子的香味，但飲落好淡口，後來吃了意粉後再飲就感覺中和的味道清新減膩，
黃金山岸就濃少少，更適合我們的口味。
另外叫了cappuccino,熱朱古力和焦糖味的飲品，沒有太特別，不多作介紹。
重頭戲來了一卡邦拿意粉，芝士味濃而完全不飽膩，意粉唔會冧，做到尼種程度真係無法唔讚佢，
個個都讚不絕口，另一個葡汁雞肉意粉就普普通通，葡汁偏濃而雞肉無咩味。
再來甜品朱古力香蕉窩夫，焦糖窩夫，抹茶紅豆吐司，朱古力窩夫的朱古力醬幾好味但有少少膩，而焦糖哥個味道就比較好，窩夫亦較之前個鬆，口感較佳。
吐司感覺有啲似隔夜麵包叮暖左，個心比較好食，外面哥層真係好大陣隔夜味，而且抹茶紅豆比較少，份量不足以沾成個包，都係試一次啦。