叫咗四個餸，炸豬手點略沒有太多調味，算係好食嘅。蒸蟶子同炒通菜就一搬，偏咸。 想講一下隻炸子雞，係過熟，髀位都係鞋嘅。同侍應反映一下，佢好似唔識溝通一樣，佢話公司標準係鞋 （direct quote呀），我問係唔係公司標準啲雞骨唔可以有紅色呀？佢冇直接答。其實我都幫緊佢解釋啦。佢再話炸過一隻都係咁架喇。呢間莆田點值米芝蓮一星呢，咁嘅服務態度。佢叫我地一係轉其他，ok, 轉其他都唔該畀本menu吖。都係要囑咐先識做。我都未講炸蒜係林嘅。一個字，差。講完。

今次已經係第二次喺獅子樓high tea。 依然美味。 佢嘅high tea咸甜點各佔一半, 滿足了女士愛食甜品之餘, 咸點又可以中和一下, 唔會咁膩口。 美中不足係, 咖啡唔得。 我選了latte, 冇咖啡味, milk foam太厚。

因為唔太肚餓，諗住食少少野滿足一下口腹之慾，見到有糖水鋪就入去。我地見字"雪年"，不其然想起雪蓮。咁就叫左百合雪"年"燉雪梨。點知黎到是雪耳，雪"年"不是雪蓮。Waitress態度傲慢，說道是雪耳，不是雪蓮，menu係錯，斯斯然走了。呢個糖水係死甜，一d都唔好食，百合又未溶。

當晚係為妹好慶祝生日，佢Request要食蠔，佢就choose左呢間。後來發覺原來佢之前已經黎食過。水準都keep到。是日有六種oysters係做買一送一o既，咁我地就黎左一round先。如圖，waiter就叫我地由最淡味o既食起 - namibia, scoland pearl, arousa, st vasst, mermaid, divine。一向都鐘意濃海水味o既蠔，divine真係唔錯。喜出望外o既係not on menu list o既namibia，佢清得黎係好有蠔味，creamy得黎唔會膩口，而佢真係好似cream咁架。

另外值得推介o既係個鴨肝意粉，真係好香口，又唔膩。

我同友人點咗松露mushroom risotto同燴豬腳，兩樣都好好味，而且價錢相宜。我覺得平時嘅risotto好膩口，食少少就好飽，但呢個冇呢個感覺，份量啱啱好。友人就過如果松露可以多返啲就更好。

今次係專程要黎試下坐南港島線去西環，順便去搵下嘢食。之後喺薄扶林返工，成日都會黎呢一頭食飯，轉工後就少之又少lu。

間餐廳唔係好大，所以一定要BOOK枱，esp weekends. 我地係book咗8:30pm嘅時段，不過我地早到，店員(其實似係老闆feel就安排我地喺bar枱飲住野先，好細心嘅服務，唔洗我地喺出面食風)

入正題，我係好怕睇menu，無論係中係英都怕，有選擇困難症。呢度唔係好多嘢選擇，免卻煩惱。未落order嗰陣，見到隔離枱叫咗洋蔥湯，好香，我地都follow suit叫左兩個share。堅好味，好cheesy，but一d都唔膩口。仲叫左pate黎送bread，d pickles唔會太酸，同pate好夾。另外，最欣賞就係紅酒燉beef cheek，好腍，好入味，最鐘意佢有一層薄薄嘅肥膏帶出肉香。

原本我地冇諗住叫甜品，不過waitor拎左個疏乎里出黎，又食指大動。係橙酒味嘅，好香，連唔太鐘意食疏乎里嘅我都喜出望外。

甜品作結真係一個完美的句號。

如果唔係同事收到宣傳單張，一定唔會知道香港歷史博物館入面有間茶室。亦因為咁，午市都唔係有好多人，坐得好舒服。裡面有好多舊時香港嘅裝潢，有卡位，雀籠之類，不過呢d位就畀人把住lu。

d野食就一般，可以接受。份量夠食，價錢都相宜，同出面茶餐廳嘅選擇差唔多。我o個日食左個豬扒set lunch，意粉夠爽口，不過塊豬扒唔食好熱。我比教欣賞佢杯lemon tea，唔係用茶精，都幾香茶味。

之前都喺雞煲食過一次，佢地嘅雞煲翅湯底，真係一試難忘，尤其是我係咁鐘意飲湯。湯底對於打邊爐真係有畫龍點精嘅作用。
不過，今次係朋友想食雞煲，即係食完啲雞，再加湯打邊爐嗰種。其實唔係好唔好食嘅問題，係鐘唔鐘意食嘅問題。我地唔係好食得辣，所以叫咗唔辣嘅雞煲，完全唔係兩回事，冇哂d麻辣料，就好似食一個小炒一樣，雖然佢都仲有好多garlin，薑，干蔥等，尚算夠味，不過同重慶風味嘅雞煲，相距甚遠。可幸d火鍋料係好新鮮，都ok有80分。

阿里水之前已經食過好多次，果然係米之蓮餐廳，不負眾望。我平時鐘意食佢嘅套餐，都幾抵食。今次因為唔太肚餓，所以都係隨便叫左幾樣，有海鮮湯，水冷麵，再加白飯同紫菜，已經好滿足了。

好鐘意食韓國菜嘅前菜，伴飯一流。可能係睇得韓劇多嘅關係，成日都心思思想食hahah。

之前老豆生日已經黎過，今次再黎，都冇令我地失望。你知好多時d餐廳第一次去食好味，第二，三次都唔係o個回事，只怪香港生意難做。

我係好鐘意飲湯架，打邊爐湯底好緊要。選呢個搖柱雞湯魚翅湯就serve到我個要求。先飲啖湯，食下雞，之後其他火鍋料慢慢送上。呢度好多嘢都好好味，推介牛拼盤，樣樣都有得試下 - 牛舌，牛展, 牛粒etc...好重牛味，正! 魚標又係另一推介。不過今次都有野要挑剔下，就係個響鈴炸得未夠時候，其他餐廳o既響鈴係一早整定，呢度係即叫即炸，附上甜酸sauce，你可以either放湯食or點個sauce就食。今次就係可能油唔夠熱，都未係炸起就上，內裡有d太油膩嘅感覺。放左湯食就ok嘅。