之前推過大公館飲茶，一家非常值得推薦的中式餐廳，菜式全都係隱打隱紮，餐廳又坐得舒適，一個非常適合家庭聚餐和商務宴客的場所，因此同屋企人做母親節飯，係一個好好嘅選擇。 佢有幾個為左母親節而推出嘅限定菜式，清香柚子凍鮑魚，脆米蒜香雞同西班牙火腿金芙蓉蒸星斑球，全都係好高興嘅菜式，最啱孝敬媽媽。 講下呢幾個菜，清香柚子凍鮑魚打卡二百分，如墮仙境般嘅感覺，口感鲜嫩，柚子的清凍大大開啟你嘅味蕾。 西班牙火腿金芙蓉蒸星斑球的星斑肉質鮮嫩，加上西班牙火腿的香味後，味道添了鹹香，佢個蒸蛋仲要加左酒香，層次有多重，又高貴又好食，大概係完美嘅給媽媽媽禮物菜式。 脆米蒜香雞就係多左個特別嘅外層以外，多左蒜香味仲要有勁脆嘅雞皮，雞肉又滑，無野可以挑剔。 幾道開胃菜如話梅鐵棍准山，金甲脆魚皮都開了個好頭，話梅鐵棍准山的內裡軟嫩，搭配上酸甜的話梅，十分開胃。金甲脆魚皮你成日見，但魚皮脆嫩加上個黃金醬好美味，前菜已經好好發揮，另外點的麻香萵荀就正常水準，春夏最啱食。 除了這些菜，我們還點了三色藜麥金沙蝦球和家鄉生拆魚茸羹。三色藜麥金沙蝦球的外皮炸得非常酥脆，蝦肉鮮甜，非常適合作為下酒菜。家鄉生拆魚茸羹的湯汁濃郁，魚茸鮮甜，愛魚者一定要試。 加少少菜，食左豆漿杞子鮮黑腐竹浸時蔬，黑腐竹好少見，浸時蔬後嘅湯真心好飲。 清心柚子糕，清爽無比，柚子糕的口感非常綿密，當然仲有上次食過同方太差不多的芝麻卷，也是不能錯過的項目。 單尾的金瑤樱花蝦蛋白炒飯老士講句，絕對分明。

伊利近街係中環我最鐘意嘅一條街，餐廳好多，之前有間意大利菜（可惜已經執左），有cultivate，有間幾好嘅日式居酒屋，基本上一條好短嘅街，有著唔同嘅國家風情。 須佐之男係朋友介紹，原來呢間餐廳喺呢度已經開咗兩年，但係完全唔覺，可能呢一年都已經少係呢頭蒲，完全察覺唔到呢度有間咁好嘅嘢。 睇返啲舊相呢度可以有好多outdoor area枱，夜晚喺呢個開放式嘅居酒屋食飯飲酒氣氛應該好好，食完之後我相信應該可以約中環嘅朋友嚟食吓晚飯。 呢度得一個師傅，佢放棄左事業，追尋夢想，原來係因為佢好鍾意食一間日本菜，鍾意食到跟左個廚學師，然之後開咗一間咁嘅居酒屋。 聽完都覺得幾勵志，當我再睇返師傅好鍾意嗰間日本餐廳之後，我除咗好想去嗰間試吓個間日本餐廳，仲好驚嘆原來有人鍾意食嘢鍾意到呢個地步，唔好講咁多，睇下啲野食先。 前菜已經係幾令人醒神之作A5夢之和牛他他，個種牛味嘅濃可以話係難忘之數一數二。 唔可以話食完好精彩，但川蔥蛋花清雞湯個種感覺叫人有種家的溫暖，呢個開頭感覺真係成個人溫暖哂。 呢度嘅串燒用上了軍雞，當晚食左雞翼、雞掌心、雞心，三串串燒。雞翼係最出色，個晚水準燒得比Yardbird更強，雞掌心應該大家都無乜點見過，玩味好濃，雞心燒得好生，愛呢個texture應該會好鐘意。 有第二個揚物做前菜，松葉蟹海膽薯蓉球，雖然個樣唔係好靚，但係食落去口感強烈濃郁。 主菜試兩個飯我覺得有少少奇怪，不過食完我就明，日式叉燒香蔥豬油飯同櫻花木煙燻香辣牛舌飯 ，決一不可。前者嘅叉燒就好似拉麵舖嘅叉燒一樣肥都可以話係入口即溶，但係佢燒過之後個香氣令人好難忘，最重要加咗佢秘製嘅辣椒醬，撈埋個飯，好夾。而換左主角係櫻花木煙燻香辣牛舌，好食內臟應該會更開心，你問我兩個會揀邊個，我會兩個都要。 尾聲的日本燒芝士年糕，聽講係師傅拿手好戲，不過可能當晚太悶，水準相對冇想像中咁好，不過年糕都非常煙韌無比。 雖然唔係食咗好多嘢，但係食到師傅嘅心機，最重要係可以欣賞到佢追尋夢想嗰個勇氣。

記得之前朋友係新加坡工作，我去旅行探C小姐，同佢plan行程嘅時候佢問我有乜想食，我第一個答案，唔需要猶豫，即刻答天天海南雞飯。 食過一次之後，當然非常難忘，因此佢剛剛來港的時間我都真係好期待，希望尋回那天在food centre的感動。 不過開頭好多人都話佢質素完全唔及新加坡，而且水準唔隱定，但近來幾個朋友都話，近來改頭換面，生色不少 。 原來佢包左四個品牌，全部都有名有姓，好多都係米芝蓮推介，有老街坊，有五十年代，超好麵，當然仲有取得大中華區的獨家永久經營權嘅天天海南雞飯，基本上佢唔係叫海南雞飯，佢叫Tian Tian Authentic。 你以為好單一嘅食物？錯啦，呢到有黑松露墨魚蝦多士，迷迭香火焰黑金叉燒同鮮大蝦冬陰功湯，你應該都無諗過有咁泰同中式嘅食物，最緊要個冬陰功湯係堂弄，酸辣都強勁。火焰黑金叉燒好睇又好食，黑松露墨魚蝦多士個種fusion感，印象都好深刻。 古法肉骨茶就好似帶咗你去新加坡嘅黃亞細肉骨茶一樣，強烈嘅胡椒香，仲要有吸盡所有肉骨茶嘅腐竹同有大大條肉骨你享受。 老街坊呢個品牌好多人都知，但原來佢嘅牛筋牛腩煲原來都出色過好多香港嘅地道柱侯腩。 天天海南雞當然係主角，只不過相對其他咁出色嘅食物，呢個即刻唔係我嘅終極目標。 南海青咖喱有好多海鮮如青口、蝦、魷魚等等，不過重點係勁好送飯嘅青咖喱。 新加坡辣椒炒肉蟹配鹹煎餅係我當晚食過嘅私心推介，個辣椒汁當然好，但鹹煎餅點上之後味道簡直係昇華十倍，食完你真係好懷念新加坡式嘅海鮮。 尾聲的食神魚子海鮮炒雞油飯，地道甜品如芒果三色糯米椰漿甜飯同新加坡原味豆腐花都有著唔少當地特色，香港其他地方比較少見。 而最後的一杯50 年代南洋咖啡，又係另一個米芝蓮品牌，一間餐廳可以試咁多間米芝蓮嘅水準，唔拖馬過嚟都食唔晒 ，一次滿足四個願望，貪心過見到神燈。

喜歡飲茶的朋友除左對茶葉執著之外，點心靚唔靚應該都係其中一個要點，特別係追開星嘅朋友，食過澳門8又食過紅糖又食過萬豪，應該都唔會唔喜歡大公館。

好簡單，相對價錢佢一啲都唔算貴，而且又冇嗰堆星級餐廳咁難book，記得荔枝角佢哋好似仲係行會員制，而家就唔駛，仲更加容易食到。

同一班朋友下午飲茶，轉選一啲靚嘅點心食，當日最愛係芹香鮮蝦金魚餃，呢個水準真係直達澳門8，靚而且個蝦餃皮做得非常出色。

豬仔賣相鹹水角，佢無論耳仔鼻哥豬尾都炸得好脆，好好食，不能錯過。

刺蝟脆香叉燒包，又係吸睛之作，不過相對叉燒包黎講，我覺得芹香鮮蝦金魚餃會吸引d。

意想不到嘅係呢個胡椒豬肚鮮竹卷，配搭係幾得意同有趣，平時嘅鮮竹卷只係最普通嘅汁，但呢個有胡椒豬肚嘅香氣同味道。

牛肉燒賣就一定有試過，但係加咗10年陳皮你又有冇？十年陳皮牛肉燒賣嘅感覺係精美得多。

龍皇脆米腸粉雖然冇靚靚嘅造型，但食落去當然脆如紙那種感受。

我自己好鍾意XO醬炒腸粉，呢度XO醬炒腸粉擺得非常之精美。

其他炸野如春卷同蘿蔔絲酥都係水準之上。

招牌黑毛豬叉燒相對唔算太肥，較為薄身，叉燒同蜜糖可以話係渾然天成，平時食叉燒你最多食一兩舊，但係呢件叉燒食多少少都唔怕。

有點暖胃的薑米酒炒芥蘭，我諗如果有炒菜心可能更好，不過個芥蘭真係好靚好甜。

方姐之後我吃過而又喜歡的就係呢個金箔懷舊芝麻卷，滿滿的芝麻香，仲有金箔咁高貴，一定不能錯過。

距離上次黎呢度食weekend brunch，都應該有差唔多三年嘅時間。 朋友約食飯一講起再約喺朗廷酒店嘅呢間海鮮餐廳食飯，二話不說即跟。 呢度嘅海鮮platter 基本上係長青推薦，每次叫都唔會失望。 Seafood platter 有龍蝦、有法國的生蠔、有煙三魚、有大蝦、有帶子、有蟹，仲要有我勁愛嘅翡翠螺。 不過我覺得最精彩係佢嘅Grill，當晚食嘅Iberian Pork同牛肉係好難忘。 一人叫一個龍蝦湯，可能人強馬壯，仲有得堂弄，加過VSOP之後，真係香氣撲鼻得多。 而家仲要有個special crab Menu，愛蟹嘅都不要錯過。 咁耐無黎先知，原來呢度有米芝蓮必比登推薦，遲來總好過無到啦，想食靚海鮮同Grill扒類，呢度絕對係一個好選擇。 仲有同W小姐講多聲，生日快樂。

好少去荃灣會無諗食乜，太多好嘢可以食，但因為ad hoc去朋友屋企，於是就去咗呢間餐廳飲茶。 前日去大公館飲酒，全因朋友話呢度有啲好靚嘅點心，話係荃灣都差唔多。 朋友咁講，我當然信，因為咁啱喺荃灣有嘢做，就咁決定啦，就去逸月軒。 呢度值得一讚好多茶葉選擇，然之後個茶壺都好靚。 估唔到呢間地區酒樓，雖然唔係好出名，都有咁多得意點心。 唔同類型嘅燒賣，仲要有魚翅燒賣，然後又有好靚嘅豆沙包，蝦餃亦都非常大隻，仲要有好可愛嘅樣嘅豬仔，全部都好似澳門8咁，當然呢度平好多。 除咗點心之外，都試咗佢個燒味，叫咗個油雞河粉，中規中矩。 出奇地荃灣咁多住客，但係呢度飲茶都唔算話逼得好驚人，等位亦都唔算等咗太耐。

好多年無食過粵軒嘅黯然銷魂飯，因為好受歡迎好易爆，之前幾年都錯過左deadline，無食左兩次，幸好今年extend左去到4月16日，尋晚有機會食到。 無記錯黯然銷魂飯來到第四個version，經過左好多次對叉燒，飯，蛋甚至豉油嘅改良，呢個係餐廳最滿意嘅形式，事實上都係好精彩嘅一個版本。 個叉燒勁厚身又燒得好靚，好食過好多米芝蓮餐廳嘅叉燒，甜甜嘅外層加上左勁靚嘅燶邊日本蛋，仲有香港本地出名嘅豉油，又有好新鮮嘅紫洋蔥撈係個飯入面，一啖飯包哂叉燒同蛋，真係好大滿足感。 除左個飯之外，個餐仲有前菜醋珠沙律菜，中段有個甜甜的芹香梅菜蒸龍躉球，松茸螺頭燉雪雁，再加大紅袍茶皇糕金腿玫瑰酥甜品都係$388，記得之前都係$430以上，價錢平左，但野食多左，咁係唔係應該襯最後機會試下，酒店話今年一定唔會再出番，想食要快啦。

年頭搞左次飯局，有人問Matthew 有冇特別menu，結果問左一張地道山東菜單出黎。 而由於太多人話有興趣，結果就當晚搞左四圍，仲要四圍都唔同menu，辛苦Fiona同Matthew，我估都係史上第一個客咁煩。 當日應該食左大部分佢地嘅signature，龍蝦同象拔蚌真係想食好耐，終於都食到，而呢個酸辣薄荷象拔蚌真係不能錯過，醉辣汁加左薄荷葉後，味道昇華不少，勁厚身嘅象拔蚌絕對不能錯過。 偷左隔離枱嘅避風塘龍蝦球，我覺得食得好爽，大隻到一個點，而家上枱嘅震撼唔會少過佢個賽磅蟹粉signature 。 當晚精彩嘅還有全香港獨有的藏紅花藥膳白玉，大白菜豬肉水餃同老山東炸醬拌麵呢個當日整嘅手工菜都好深刻。 加左茅台嘅陳皮紅豆沙，比起平時當然好得多。 前排又有人問有冇枱，不過主理人話而家去到2025了。

繼皇仁之後，我食左另一個人生數一數二嘅佛跳牆。 呢種福州version，同平時食嘅好唔同，個種濃度同材料嘅精彩，真係我近年食過嘅最好，當晚冇食過嘅朋友全部一致讚好，多謝朋友安排。 呢個傳统名菜，它的主要原料包括海參、鮑魚、魚翅、花菇、鴿蛋等等，最緊要如果你有威士忌或者干邑，你加落去或者一啖湯一啖酒咁飲，好爽。 福洲佛跳牆（每位） 懷舊蝦多士伴沙律菜 雙蔥炒斑球 原隻脆皮乳鴿(每位1隻) 濃湯肉粒腐竹浸莧菜苗 堂煎珍珠飯(位) 陳皮燉雪梨 當晚菜單都係$1000位，仲要有好好嘅設備，所以我即刻再book枱食。

好多人問我，係公司有冇食蛇食到怕，因為又躁又熱，剩係冬天先食得，記得舊年試過一星期係公司食三日蛇，基本上完全無任何唔好嘅感覺，食完仲完好暖好滿足。 上星期食左四季芬芳個新菜式，燕窩蛇湯燉節瓜盅拼紫椰菜臘味粒蟹肉蛋白炒飯，呢個絕對適合一年四季食。以「蛇王芬」的經典蛇羹作為基本，佢嘅蛇湯用上蛇骨、雞肉、豬肉等新鮮食材煮左半日，之後再用節瓜去瓜肉，加入帶子、蝦仁、瑤柱和袪濕的生熟薏仁等，仲有潤肺滋陰嘅燕窩，絕對係好適合春夏悶熱嘅天氣食，疏肝解鬱又不燥。 另外配搭嘅臘味粒蟹肉蛋白炒飯，炒得爽口得很，減低臘腸的油膩感，每啖都叫有蟹肉同蛋白，又唔會好油，飲完個湯再食個飯就超滿足。 新的太史蛇羹酥都真係眼前一亮，蛇羹湯水凝固成為啫喱肉凍，用酥皮包起並炸到金黃色，外層香脆可口，好似食緊一件蛇羹咁。 前菜食左個藥膳醉乳鴿王，話係呢度嘅signature ，吃下去就知，藥膳同酒嘅crossover ，好入味，而且乳鴿雖然不似好大隻，但好有肉地。 當日仲食左幾個新點心，翡翠蘆筍餃、紅菜頭素餃、菊花蝦餃、太子參帶子餃全部都有不錯的表現。 菊花蝦餃用菊花做皮，蝦又夠大隻。 太子參帶子餃，我最愛，珍貴又係最傳統嘅蝦餃味。 翡翠蘆筍餃用上新鮮豬肉、雞髀菇、秀珍菇及蘆筍切碎，加上餃皮晶瑩翠綠，又靚又精美。 紅菜頭素餃同樣因紅菜頭而搶鏡，唔係好食咁簡單，仲要滋補肝腎，養肝明目。 黑芝麻豆沙包同橙皮蓉柑桔包、又係打卡好正。前者係甜品，後者係外層脆內層有肉汁同熱辣辣嘅餡料，都係好嘅點心。 剩係呢啲新野，就算食過都要再訪一次，對嗎？