薄荷葉泰國菜 (元朗)

今日去左元朗行街，去到圖書館附近見到一間裝修得唔錯既泰菜餐廳。

 
入面有酒飲有野食，坐出面又得，坐入面又得。
 

時間尚早，餐廳入面冇乜人。一坐底，侍應就推介生蝦刺身。

 
生蝦刺身　$１９８

食落口新鮮，肉質唔會梅。
睇得出生蝦既精緻，我同朋友都特別用心品嘗珍貴的蝦。


之後我就叫左個二人餐：入面有生菜包，炸魔鬼魚，馬介休炒菜，同埋燒豬脾仔。
 



生菜包既肉碎炒得多汁又入味，生菜夠大塊，點埋汁就好好味，推薦！



炸魔鬼魚冇乜骨，炸得脆口，加埋佢既醬就好有泰國味，可以試下。

 
馬介休炒菜，有唔同既菜可以比你揀，我地揀左通菜，有鑊氣。

 
燒豬脾真係好有風味，唔係煮熟左先搵火機燒兩下果Ｄ，想食肉又想試下惹味既，推薦！

醬料有3款。

依間餐廳擺盤有心機，岩哂影相。

尚鮮海鮮料理 (佐敦)

今日係佐敦行街，行到熱熱地搵到間樓上鋪坐左陣。


叫左個串燒拼盤，$１６８係抵食，有牛脷，蠔，大蝦，獅子狗，安格斯牛同埋粟米。


串燒落左好多香料，燒到好香，一放落枱我口水都流埋。


燒蠔真係抵，出面食既蠔係燒到蠔肉好細粒，但依間既蠔肉好大舊，好有蠔味，新鮮。
 
兩隻串燒蝦d皮脆到我可以連皮食埋，蝦味夠，唔會燒到乾哂，好食。
 
安格斯牛柳真係經典，好軟熟，多汁，食一串係唔夠，一定要食番兩三串先夠，佢調味得好好。
 


牛脷彈牙，拎黎送酒慢慢食就岩。


 
跟住我就叫左個毛血旺。


 
最主要我想講既就係佢好夠麻味！個湯順喉，飲少少都唔怕。不過豬皮可以剪細舊少少就最好。　我最鐘意食佢既豬紅，豬紅有豬紅味唔係咁易，唔會一夾就散，真係幾唔錯。

炻板燒 (屯門)

其實出面有好多食石板燒牛既地方，佢地既賣點多數都係大件夾抵食，幾十蚊有大舊肉。

但屯門依間黃店唔同，佢係賣靚牛。

今日我早收工就早去，差唔多６點就開餐，做左佢第一枱客。本身想試下佢個鰻魚飯，但諗諗下佢招牌菜係石板燒，唔試又好傻，所以我同我朋友都揀左石板燒。

我自己就揀左牛小排，另外店員就推介左封門柳，佢話出面好少有得食，叫我地試下，咁我地就叫左。封門柳其實係牛橫隔膜肌肉，每隻牛都係得一舊，唔怪得話出面少有。
上菜既時候，店員話深色既係封門柳，淺色既係牛小排，影左幾張相之後就拿拿臨開始燒。

十幾蚊一小片既牛肉真係唔同，唔係要令你飽，係要令你食品質。封門柳食入口，肉味極濃，油花少，鐘意有口感既就要叫下。依塊肉我個人認為每邊燒五六秒就夠，熟度岩岩好，唔會太老。

另外既牛小排都唔可以睇少，見到佢油脂都幾豐富，所以每邊我煎左兩秒左右，將佢既油花煎香佢就夠。一放入口就未個即溶，但都十分幾嫩口。

依個套餐仲有鹽燒三文魚腩邊送，佢都燒得唔錯，燒到個魚香好出。

想試燒靚肉既就應該來依到啦！
支持下黃店！

立体派拉麵 (中環)

其實我本身就唔係拉面粉絲，但依次去朝勝下，主要係想食下係拉面王國—日本入面拎冠軍，即係全日本最好食既拉面到底係點樣。

林隆臣係日本人，非常後生，佢出名既地方係創意拉面，當中又以味增拉面最出色。

所以我今次黎到一就叫左個黃金味噌拉面。其實一個廚師要發明一款新菜式，係好辛苦，要失敗幾百次先會成功。依款拉面都唔例外，湯底以免治豬肉、蒜頭、醬油、砂糖同埋牛奶煮成，甜中帶辣，有少少擔擔面既感覺。兩塊薄薄既叉燒，入口即化。原來佢係用慢煮既方法，煮足４個鐘先係有咁既效果。碗面上面仲有個福袋，好有過年既氣氛。林師傅將傳統既拉面，用新既煮法拼湊，果然有畢卡索既影子。

另外我朋友就叫左碗特級白湯，湯既味道鮮甜，當然沒有味噌拉面既濃味，但食得出好多層既味道，唔係得咸味。不過個面我就覺得可以再Fing乾少少，因為我食出左鹼水味。不過少少既失誤並無影響到我對碗拉面既感覺，因為果三塊叉燒實在太出色。果然係招牌貨。

最後叫左碟煎餃子，脆卜卜，肉味好出。

最後叫多支啤酒或者波子汽水黎一齊食，簡直係最佳享受！

廚十三老壇酸菜魚 (銅鑼灣)

我怕的是同一種腿法練了一萬次的人 李小龍


香港每條街都是餐廳，在外面一看，寫著日式、西日式和粵式全部有得供應。心裡想著，那麼多菜都會做，做得一定半桶水，怎麼會好食呢？
但在銅鑼灣的這一家，專門做酸菜魚，店主還說專研了十三種地道的煮法。


地道的酸菜魚非試不可。走進去，地方寬敞，絕對坐得舒服。

這是一家叫「 廚十三老壇酸菜魚 」的餐廳，特製四川江湖菜，粗支大葉的酸菜魚，侍者用一個大盆，熱騰騰的放在桌的中心。

魚的是鱸魚，魚肉肥大結實，煮過後仍不會散開。廚十三選魚選得好，不然若是小器一點的話，整盆菜就毀了。

嚐了一口，味道果然好，真材實料，絕對沒下味精，這是四川的味道。大串的泡椒，青花椒和乾辣椒哂在盆上，這不像沒文化的笑話只令你爽一會，而是有強烈的後勁，讓你吃著不覺得，但味道不停在喉嚨發上來。

酸菜煮湯後，精華已在湯中，一口酸菜一啖湯，有咬口之餘味道亦有層次，所以四川人自古就用酸菜做湯不是沒道理的。

眾多配料最令我覺得驚喜的是青荀片，廚師把他切成薄片狀，青爽之餘亦與酸菜魚很匹配，是外面難得一見的組合，若要只挑一種配料，選這個好了。

其實菜式貴精不貴雜，只要有絕招，食客自然放不下筷子。