之前睇到呢間有好多隻味嘅梳乎厘好似好吸引，尋日經開觀塘食lunch就諗住試試佢 . 都驚梳乎厘太大，所以兩個人叫咗個黑松露燴飯同一個梳乎厘同薯條share食，比較大食嘅我覺得呢個份量啱啱好細食啲嘅女仔可能就會覺得太多 . 本身個燴飯係諗住填肚only，所以無影到相就食😂但一入口真係有少少驚艷到我，除咗黑松露味好香之外，隱約仲帶有少少酒味散開嚟，唔會話好濃，但就令個飯多咗啲層次。（定係有機會佢哋用嘅黑松露本身係自帶呢隻味？我無研究開所以唔太了解😂）為咗呢個飯我會想再嚟呢間餐廳食 . 食完飯就上梳乎厘，我揀咗焦糖吉士味。上到枱個份量真係唔細同埋好打卡able😂，不過食落就無咁驚艷。焦糖夠脆唔黐牙，但吉士味就略嫌不足。因為本人好鍾意吉士，呢個位就有少少失望。 . 另外我哋叫咗杯Dirty同芝士奶蓋桂花烏龍少甜。我本身飲奶蓋習慣唔用飲筒，一開頭飲個陣覺得完全無甜味，以為係比錯杯走甜嘅我，但費事浪費就無叫人換，飲到最底先發現原來糖漿係個底無攪勻。 呢個有小小建議畀餐廳，可以攪勻咗茶同糖先落奶蓋，因為好多飲開奶蓋嘅人都唔會一嚟就攪勻啲奶蓋同茶一齊飲，變相就唔知個底仲有糖漿，呢個位可以改善一下。

聽講呢間主打fusion拉麵，第一次見有花雕雞白湯拉麵，本身我好鍾意食醉雞又好鍾意雞白湯，不過上網睇一係話好好食一係話伏到爆，冇乜中間cm😂唯有自己親身去試下。 因為自己好鍾意酒味濃，就叫咗「參重」花雕酒，應該係3倍咁解？ 上菜時原來本身係就咁雞白湯拉麵，酒另上要自己淋落去咁樣，仲以為係成個湯都係用酒煮添，不過咁就可以試咗原味先再加酒，一次試勻兩隻味。 先飲啖湯底，其實都算濃郁，係幾香嘅雞白湯嚟，都忍唔住飲多兩啖先落酒。 落完酒頭個幾啖唔知點解唔太覺酒味，本身仲嫌唔夠酒味，點知越食到底酒味越濃，好彩冇再問有冇得加酒； 麵都係正正常常，配搭嘅雞叉燒同鴨叉燒就驚喜得多，一碗入面有3塊雞1塊鴨，雞胸肉叉燒煮得幾嫩，但味道嚟講鴨叉燒出色好多，可惜唔係兩塊雞兩塊鴨 整體嚟講呢個拉麵幾啱我口味，唔覺有人哋講到咁伏。不過成個拉麵計埋加一要成$130，啲服務又未算好好，啲侍應唔算醒目，點餐埋單都等咗好耐先有人嚟，你話係咪抵食就真係唔算，偶然食下過下口癮就ok

呢間台灣菜都Bookmark咗一段時間一直好鍾意佢嘅懷舊風裝修，不過懶得特登出港島食，今次終於夾到一日嚟呢度食啦。 本身以為有午間套餐，可能太晏過咗時段，就叫咗個花雕牛肉麵同埋茶香貢丸。 個花雕麵好濃酒香味，超鍾意😂最後忍唔住飲晒。佢仲附有啲小菜同酸菜，尤其係將油炸鬼浸軟食，索晒啲湯超正 相比之下個貢丸有啲失色，雖然個蔥油汁幾好味，但唔太食得出茶香，呢到扣咗少少分。 呢到個環境都幾舒服，加上平日下午茶時段冇乜人，可以一個人靜靜地慢慢食～

經過葵廣想買杯嘢飲，見到好耐冇飲過嘅開心檸檬嘅menu同之前唔同咗，就買咗杯桂花荔枝綠茶試下，估唔到佢係成個茶包丟入杯入面，雖然茶味都ok嘅，但咁嘅設計我都唔知話佢真材實料定求其好 同埋佢除咗茶包之外仲加咗啲水果片（橙同蘋果之類）落去，似落係幾fresh，不過我本身無expect過係有其他水果，有啲搶過咗本身嘅桂花同荔枝味，似飲緊一般水果茶多啲，如果佢喺menu到有寫明包埋水果就好，可以畀啲唔中意水果嘅人知提前叫定走水果。

之前碌ig見呢間新開烏冬店，有時都會經過下個頭，有時間就試下。 之前試過一次雞白湯味，係無乜記憶點嘅雞白湯，普普通通又有啲水。 今日試佢嘅蝦湯，比起雞白湯好啲，湯底夠濃有蝦味，不過都係想像到嘅味道，未去到好驚艷。 佢哋係用電子mon自助落單，但撳嘅時候驟眼睇似乎冇走蔥的選擇，本身唔食蔥的我表示呢到又扣了少少分 加咗個抹茶罐裝蛋糕，抹茶味都唔錯，不過食到底有啲太濕潤，有啲水係底唔知係唔係啲慕絲？ 下次想試埋明太子撈烏冬，希望會比蝦湯更有驚喜啦。

疫情啱啱開始個期，見到台灣萬波有出過「雞蛋糕珍珠奶茶」，睇台灣啲foodie介紹話好似吉士布蕾咁味已經好想試，但疫情拖下拖下就三年都無得去台灣，以為呢啲期間限定嘢應該無緣試啦⋯⋯點知原來香港都有出！本身諗住飲奶蓋都即轉飲呢個 其實都驚吉士本身就甜，點知半糖少冰又啱啱好。啲吉士味超香，有飲過兩三間其他舖頭嘅布蕾奶茶，暫時呢到係最好味嘅 之前呢間在旺角有分店時已經好鍾意飲佢哋嘅奶蓋，執咗之後一直到好掛住，下次再試奶蓋睇下水準有冇變先！

Bookmark咗好耐的cafe，終於趁假期可以試吓～ 最期待係佢個慢煮牛板腱飯，睇ig啲圖啲肉又足料又粉粉嫩嫩 上到嚟都同圖片相符，但食起嚟就發現有個問題，就係圓形碗好難切開舊肉…而且把刀都唔太利 但作為女仔又唔想大大啖咬，唯有慢慢切，切到手軟（因為碗形難就力），另外可能因為牛板腱的部位有筋，近筋位比較韌難咬開，最後都係切走咗就算，但感覺有啲浪費 另外叫了個甜品—焦糖海鹽髒髒Tiramisu 呢個好有驚喜！海鹽同焦糖本身就夾，配埋浸咗咖啡嘅餅底同吉士醬，整個配搭好正，不過份量比較大，建議可以二人share~

話說以前未搬嘅時候成日飲呢間，最愛佢嘅芝士荔枝紅茶，差唔多次次飲親都係揀呢個， 不過好多朋友係咁推薦我飲蛋糕奶茶，今次出旺角終於可以試試佢 個奶茶底一如既往地好，茶同奶好夾，啲oreo碎勁多，好似飲緊曲奇雪糕咁！雖然我都係最中意佢個奶蓋，但得閒轉下口味都唔錯XD 佢有分中杯同大杯，而家仲做緊減4蚊優惠，我諗對女仔嚟講相信$20中杯已經夠晒飽（我自己飲完飽到連晚飯都唔使食XD） 呢個價錢而家真心少見了唔知下次再嚟個陣仲有冇

本人超級喜愛番茄湯，所以有任何蕃茄專門店新開都會想去試一下。見ig話有間深水埗新開的番茄湯專門店，今日就去試了。 間店得5種番茄麵選擇，我揀咗最平嘅「滑一滑」，其實唔係因為佢最平所以揀佢XD，係因為想食茄牛麵，但係佢只得呢款同「犇犇有禮」係牛...本人好鐘意食滑牛但對牛腩冇興趣，所以就係佢喇！ 有四款麵揀，拉麵、烏冬、米線同埋上海麵，唔知揀咩麵好既時候啲姐姐會比意見你，同埋你碗麵太耐未到會幫你追單，超nice 碗麵啲蛋係真係好滑，啲牛亦都幾有牛味。我聽咗服務員姐姐建議揀烏冬，啲烏冬係幾掛湯，同番茄味好夾，同埋碗湯真係好多蕃茄蓉，好足料好好飲，整體來講唔錯。 （其實我仲嗌左一客炸墨魚蝦條，賣相普通但係幾彈牙好味，冇影到相XD） 總括來講個麵係足料同幾好食，服務姐姐嘅態度又nice，不過唔少鋪頭新開張都係咁，希望佢哋以後都可以keep住呢個質素啦！

今日係紀念日 男友俾我決定晚飯吃D咩
我同佢都中意吃日本野 就決定去吃放題
不過旺角既放題何其多 尤其係兆萬果邊成堆放題店
試過幾間 有辣有唔辣 諗揀邊間真係頭都大
結果我地行到附近見到對面都有間放題 就去試下啦
可能係因為非假日 一上去就即刻有位
d order紙分左好多張 叫野吃有d麻煩
btw我地一叫過寫 一次過俾人 都唔會慢得去邊既
不過order左唔夠15分鐘 d野吃就黎齊曬 成張桌連手機都就黎擺唔到
冇咩漏單~~~~除左最後想吃多次個芝士撈烏冬催左n次先俾之外(因為真係好中意吃)
基本上呢個優點係勝過好多間放題店
d刺身係冰鎮上既 感覺好正~~~~
 
先推介一下小妹認為好好味既美食先~

1.芝士撈烏冬
呢間店好多菜色都有芝士
我地都點左一d黎吃(因為本人唔太好芝士...)
不過呢個芝士撈烏冬係我係呢間店到最中意吃~
佢唔只有芝士撈係面 仲會有芝士粉、粟米同煙肉
吃落去口感好正好香~~~
就算怕滯都吃左兩份

2.魚生(拼盆)
黎放題最緊要就係吃魚生
所以我點左好多 差唔多每樣都10件10件咁叫
佢黎果陣都嚇左一跳~原來係冰鎮一盆咁上
去其他地方吃都未見過呢
不過應該係叫得多先會咁上 因此見到隔離桌係用長木板上既

d魚生普遍算平算吃開咁既味道 不過不失咁啦
三文魚都ok厚 感覺唔錯
希靈魚唔知點解係紅色唔係黃色的..有d O咀 但味道冇咩唔同
不過特別要提既就係甜蝦...我係呢到睇食評知道佢係連頭上既
但估唔到連殼都冇去到 要自己剝....

推介完好既 就要講下唔店既野啦....

1.炸蠔
我唔知係d蠔唔店定係d汁唔店......吃落有陣腥味
搞到我吃左一口就丟掉了
平時我地吃開既炸蠔係配沙律醬嫁嘛...但佢就係配一d好似燒汁咁既物體
兩隻味一d都唔match,d汁仲搞到隻蠔淋左.........................
下次一定唔會再點

2.飲品
飲品既選擇好少...............得汽水&啤酒俾你揀
同埋去到茶都冇杯 可能要叫先有