最近公司附近開了間日本菜，成日都想去試下，今日老闆話一齊去食lunch，同事都不約而同揀左呢間

推開黑色好型的大門，同reception講已訂枱，之後好快帶我地坐底，menu有好多野食揀，同同事研究完都係試下個Set Lunch先，價錢由百幾蚊起至二百幾蚊。 經過侍應的細心介紹，我好唔客氣最後揀左牛肉蒸籠套餐。

等左一陣我既set黎到，實在好豐富，有沙律、刺身、蒸蛋、飯、主菜牛肉蒸籠同湯烏冬，我急不及待先食個茶碗蒸，蛋味重，非常滑漏，裏面仲有冬菇同蝦，好好味！個沙律好清新，番茄好清甜，很開胃！ 食完前菜，係時候食美味刺身，有蝦、金目鯛同Toro。金目鯛好肥美，味道較濃郁，食完餘味都幾持久，好回味。蝦都肥嘟嘟，好新鮮。最後Toro如預期中豐腴，入口即溶，好正！麵豉湯（唔記得影）絕對不係行貨好好飲，裡頭的豆腐粒好有豆香，應該係日本貨。之後黎到萬眾期待的牛肉蒸籠(A4和牛)，侍應將已放了兩大片的牛肉同蔬菜的木盒置在一人火爐上，唔使五分鐘，牛肉片已半熟，侍應姐姐解釋牛肉最好唔好太熟，同埋捲住蔬菜黎食好食好多，之後她好快手已將一塊牛肉捲好並放在我碗上，仲提議我點芝麻汁仲好味，於是跟足佢做，果然好好味，牛肉好軟滑，肉味濃郁，送飯食一流。順帶一提佢地啲飯粒粒晶瑩，好香食落軟綿綿，日本米真係好好食。到最後差唔多飽既時候，嚟碗熱燙燙啱啱煮好的湯烏冬（好細心喔），鳥冬滑嘟嘟，湯底好清，就算原本飽飽地的我唔使三分鐘清晒，　好滿足！總結來說，食物好正宗，環境好華麗，天花有白色半透明吊燈，地方寬敞，枱與枱之間好闊落，感覺唔拘緊好舒服，相信不久將來會再來過，試下佢地天婦羅，因為佢地counter座位有兩個天婦羅炸鍋，價值不菲，係正宗天婦羅店先有。

自從數年前有位朋友去了印度修練Yoga一個月後，變了素食者，之後每次同佢食飯都會揀素菜餐廳去食飯。對於偶然食下全素菜的我，每次食完個人都感覺light啲

當晚餐單朋友預訂，6位起，可能因為咁啲食物真係好新鮮，同埋食得出係有心機的。

首先個湯非常清甜，個小包湯餃內裡有好多料，如切得細細的不同菇粒，各人一路食一路讚好味。之後來個金菇腐皮卷，好鍾意個腐皮，有少少厚身，啲汁索哂然後啖啖菇入口，我最後食左2條脆皮春卷雖然相對之前既金菇腐皮卷爭啲(因為怕熱氣)，但內餡都係甚足料，有唔同既甘筍絲、菇等。紫菜豆容卷面頭有酸甜汁，豆腐外層香脆，大家食食下都用黎撈飯食，very good! 香松仁炒飯上枱時大家都好期待，之後食落大家真係停唔到，個飯炒得好香，同埋最重點係'粒粒'皆好味！甜品係柚子嗜喱，面頭有少許蜜糖，好好味! 飲品開頭點了咖啡，後來朋友話茶都好正，果然黎到有驚喜，杯茶滿哂朵朵菊花，飲落好暖好窩心總結，餐飯好完美，個個食到真係好滿足咁捧住個肚走！