Lunch time 去到 order 咗酸菜魚米缐 lunch set，要小辣，但同我想像中有D出入，雖然配料多，有秀珍菇、豆卜、炸支竹，但欠缺平日食開嘅濃香味，唔知係咪因為係湯麵煮法嘅關係，所以做法唔同咗。食完後醒起，似乎冇落蒜子，於是冇咗蒜子香味。 三小碟叫咗白切肉丶豬耳及木耳，白切肉卷住咗一小條應該係青瓜物體，增加口感減少肥膩，不錯。但汁料鹹咗少許。

原本好想去敏華，但係附近睇醫生，見要等半個鐘，於是走去呢度食個早餐，但除咗價錢合埋，無原因再黎食早餐。 話係牛乳炒蛋，完全無特別，蛋又無味又唔香，沙爹牛肉麵D麵淋咗D，湯太糊，沙爹牛肉無沙爹，於是食剩晒，即磨咖啡都唔好飲，因為好似係落花奶。

今日同ＢＢ、老公、阿姨同表妺去西貢，打算飲杯咖啡，過一個悠閒的下午。

食完晏，想係附近揾一間咖啡店，上 openrice，揾到呢間。好不幸地，睇唔到上一個 comment。

揾咗二十分鐘，先揾到呢度。一入到去，係吧枱裏面嘅男人已經對我地講冇位，而當時仲有三個空位, 仲有兩位客人準備埋單走。

呢個時候老公聽到吧枱裏面嘅男人面帶不屑咁同前面坐係吧枱嘅兩個人客講：「呢Ｄ唔係我地嘅客源，以為我地呢度係茶餐廳。」

老公聽到，立即話個男人:「咩唔係你嘅客源。」然後叫我地走。

呢世人未見過有Ｄ咁狗眼看人低嘅食肆，即使你咖啡沖得有幾好，你嘅人格亦唔值得人光顧。

如果唔歡迎帶小朋友入去嘅，唔該係門口貼上不招待小孩。

唔通帶小朋友嘅，只可以去茶餐廳。

你又憑乜嘢睇低香港嘅茶餐廳文化，我寧願去飲深水埗明哥嘅港式咖啡，都唔飲你呢Ｄ冇人情味嘅咖啡。

老公生日但佢唔鍾意大肆慶祝, 由於上次去中環嘅大喜屋食放題, 超滿意, 於是再搵咗間放題, 係咁宜食餐生日飯.
之前見到有食評話, 環境OK, 地板無立黏黏, 又有其他好評, 滿心歡喜食一餐放題, 點知大失望而回.
一去到等咗五分鐘, 因為將我嘅手提同另一個 booking 調轉咗, 要稍為等咗一陣. 安排咗我地坐最入面, 行到入去, 地板立黏黏, 已經心感不妙, 又唔敢同老公講, 只可以繼續硬著頭皮點菜, 全餐飯都將對腳"郎"係檯腳度。
飲品包氣水、啤酒, 啤酒係日本 Orion.
第一輪點咗三文魚、甜蝦、帶子、油甘魚, 第一輪上的魚生係OK嘅, 但唔算係好得, 因為唔明點解帶子要碎上, 可以接受帶子一開二, 但唔可以碎上.
仲叫咗軟殼蟹手卷、海膽手卷、花之戀壽司、鰻魚芝士卷、吉列炸蝦卷、火灸牛柳壽司、韓式炒蜆、韓式豬頸肉、味增大腸、天婦羅蝦、 天婦羅冬菇、天婦羅南瓜、天婦羅蕃薯、炒雜菜、羊架、燒粟米。 海膽手卷只有一小粒海膽, 而火灸牛柳壽司嘅手柳叫牛肉乾會貼切D. 韓式炒蜆、韓式豬頸肉無嚟到, 反而同一張單嘅味增大腸有嚟, 但味增大腸食唔到味增味, 反而好似車仔麵嘅豬大腸. 最好味嘅係天婦羅蝦、 天婦羅冬菇、天婦羅南瓜、天婦羅蕃薯, 唔太油, 熱辣辣。炒雜菜好細碟, 而且唔太惹味, 出面食嘅會加黑胡椒, 但呢度無. 燒粟米係超甜粟, 好味! 但我地無叫燒菠蘿, 佢又俾咗D燒菠蘿我地, 好酸!  羊架唔係羊架, 而似係羊扒薄切.
第一輪食完, 叫第二輪, 叫咗韓式炒蜆、韓式豬頸肉, 因為之前無嚟到, 再 encore 咗三文魚、甜蝦、油甘魚、牛肉烏冬、火灸三文魚壽司、火灸油甘魚壽司、火灸鰻魚壽司、香蒜牛柳. 落完第二次單, 等咗半個鐘先有得食。 OK嘅有火灸三文魚蒜壽司、火灸油甘魚壽司、火灸鰻魚壽司、花之戀壽司、香蒜牛柳, 牛柳有牛味及肉質鮮, 但奇怪在唔係蒜片牛柳, 而落炸蒜粒. 第二輪花之戀壽司點咗四件, 但只嚟咗兩件, 魚生亦開始薄切, 油甘魚薄咗三分一,唔知係咪開始擔心食物供應不足。呢次甜蝦嘅肉有D散散地, 好似唔太新鮮. 牛肉烏冬無嚟過. 韓式炒蜆、韓式豬頸肉唔夠熱, 只係微溫, 唔敢食. 
第二輪食完, 再叫第三輪, 叫咗一直無嚟過嘅牛肉烏冬、encore天婦羅蝦、 天婦羅冬菇、天婦羅南瓜、天婦羅蕃薯, 再等另外半個鐘, 其間開始聽到其他檯有投訴, 有一檯國內同胞投訴點咗食物但無嚟, 隔離檯點咗天婦羅幾次都無到, 仲有一檯都係投訴點咗食物但無嚟但嚟咗無點嘅.  天婦羅蝦點咗四件, 但只嚟咗兩件.  而我地點咗兩次嘅牛肉烏冬都係無嚟過.  卒之, 好不滿地埋單離開.

Manager 請食lunch, 原本想 book 7/F, 但 full 晒, 於是 book 咗呢間  Bondi, 因為之前食過都OK嘅.一入到去已經覺得非常嘈, 好似去咗大排檔.  我Booked 咗1:00pm五位, 去到仲要等一陣, 因為有人正在埋單, 但見有張六人檯, 問侍應可唔可以坐果張, 佢話有人Booked 咗, 安排我地坐四人檯加一個主席位.
我地有三個人都 order 咗Risotto+煎盲鰽魚, 落完order 後, 發現+$20可以加是日甜品, 問男侍應係咩甜品, 佢話係cake, 如果要 dessert menu 上的甜品, 就係原價, 講完果個男侍應就走開咗. 想知係邊隻 cake, 再問另一個女侍應, 但佢似乎唔係好知, 要問男侍應, 係邊隻
cake, 於是都係由男侍應解答.
Order 晒之後, 侍應放低咗五個麵包, 三舊牛油同三把牛油刀, 於是問佢攞多兩舊牛油同兩把牛油刀, 男侍應給多咗兩舊牛油, 但牛油刀要我地五個人 share 三把牛油刀. 之後上咗個是日餐湯-南瓜湯, 味道OK, 但比較稀同少許咸. 等主菜時候留意到佢地係一次去幾碟同樣嘅主菜, 即係佢地一次過做一樣主菜, 如果同檯每個人叫不同的主菜, 唔知要等幾耐. 
先上的係同事的沙律主茶, 因為唔需要煮, 所以最快上菜, 同事話唔太似沙律, 因為係豆蓉嚟嘅. 
之後上嘅係豬頸肉炒意粉, 但個樣比較似中式. 
最後終於到我地嘅Risotto+煎盲鰽魚, 盲鰽煎得幾香, 表面有 D Crispy, 但個 Risotto 就好生, 而 Risotto 加咗D 豆, 食唔出係豆定係米, 要不停嚼. 雖知 Risotto 唔會太稔, 但亦唔應該生成咁. 
唔知係咪臨近聖誕, 太多Booking, 隔離舖又包場, 所以人手唔夠, 令食物水準下降. 以今日嘅水準, 係一定唔會再嚟. 
最後上嘅餐飲係最好的, 可以選擇 cappacino、espresso...等等. 但奇在見到水吧有檸檬, 但無熱檸檬供應.

今日中午專登嚟呢度試下，但極之失望！
我 ordered 咗喇沙同多士套餐。 因為好怕半生孰蛋嘅水汪汪， 已經同收銀嘅女仔講明我要熟蛋。收銀嘅女仔問我咖啡需唔需要少甜，我話要。
同 Toastbox 一樣，ordered 完會俾個號碼牌放枱上，由 food runner 送餐。
先到嘅係兩杯咖啡，同我地講係少糖，當時發覺佢咁講好奇怪，因為南洋咖啡唔應該加糖，而係加練奶。呷咗一啖，發覺同飲開嘅南洋咖啡好唔同，落嘅係花奶而唔係煉奶，好似茶餐廳嘅咖啡。
之後嚟嘅係喇沙，味道ok，但只有椰汁味，欠缺咗蝦米嘅香味。
再嚟嘅係牛油咖椰多士，多士切成四件，細細件食得方便。有大量咖椰，不過較稀，容易漏出，但味道不錯。
食完以上食物，都未送隻熟蛋嚟，於是再研究一下餐牌，發現咖啡可以加甜奶、淡奶同黑白奶，老公話原來張單打咗淡奶。於是走去收銀問剛才嘅女仔，點解俾淡奶我，唔俾鍊奶，收銀嘅女仔話因為今日冇煉奶。唔怪之送餐果女仔話係少糖喇。但咁點解剛才我order 嘅時候唔同我講，咁我就唔會要咖啡，而加錢改為要薏米水。比佢激死！
最後兩隻蛋同豉油、胡椒粉到咗。噢！變咗生熟蛋，同送餐果位男仔講，我要熟蛋咖喎，送餐嘅話，佢地嘅熟蛋係烚蛋。於是我又走去收銀問佢，我要熟蛋，點解俾生熟蛋我，女仔話佢地嘅熟蛋係烚蛋，問我係咪要。我當然要喇。於是又要再等，等到唔耐煩仲未有人拎隻蛋嚟，老公自己去攞。老公話食完快D走，又發現豉油唔係星加坡嘅甜豉油，冇甜味只有咸味，極其量老抽嚟。
好多嘢貨不對辦，service 又麻麻，個餐仲要貴過第二間星咖坡咖央多店，一定唔會再幫襯。

都知新年流流, 搵嘢食好麻煩... 初二諗住食少少嘢先拜年, 係轉車點, 是但搵個地方食嘢, 原本打算去吉野家食下午茶餐, 點知要3點先有得食, 仲有幾個字先到3點, 又好肚餓, 見到對面有下午茶餐, 即刻入去叫嘢食. 叫咗豬扒炒烏冬同雞扒焗飯.
先嚟嘅係豬扒炒烏冬, 碟烏冬細碟到不得了, 而且仲只係微溫, 唔好食... 先後嚟焗飯, 因為要焗嘅關係, 所以係熱嘅, 但雞扒無咩味, 都係唔好食, 埋單$87, 走咗先醒起, 個下午茶餐一個$35, 一個$38, 點解收咗$87, 唔通要加二?

最愉快的結婚週年紀念晚餐, 服務態度令我地食得開心、舒服, 上菜速度不快不慢剛剛好, 又無因為我地買嘅係 coupon 而服務態度欠佳. 反而叫我地可以買多啲, 因為好少做 promotion.
4 選 1 意法晚餐
==========
法國有機紅 / 白葡萄酒
精選法式燉湯 - 燉雜菜牛肉湯非常清甜
自家製法式農家香麵包 - 香草醬口味清新, 而非一般餐廳常用的蒜蓉包.
樂活有機新鮮亞麻籽田園沙律 - 沙律醬非常特別, 味道一流.
羅西尼亞牛柳配藍莓汁 / 佩里戈盒仔烤羊仔柳 / 巴黎葡萄酒香燒豬仔排骨 / 法式焗深海銀雪魚 - 選擇咗羅西尼亞牛柳配藍莓汁及法式焗深海銀雪魚, 兩個都好味, 我較喜歡牛柳, 因為銀雪魚的汁稍為甜了少許, 但煎得非常香口, 份量亦多. 配菜並好味.
手作法式甜品 - 奶涷配熱情果汁, 最喜歡係果個汁, 配奶涷味道剛剛好, 不會太漏.
(公平貿易) 咖啡 - 比較一般, 但唔係差嘅.

上一次同朋友嚟食, 一直念念不忘不望佢嘅欖角蜜汁烤义燒, 呢閱特登要老公揸車入去食多一次. 我地六點半已經去到, 未有好多人, 不過我地都係嚟之前訂咗位.
我都係叫番我鍾意嘅欖角蜜汁烤义燒同上次試過嘅葡汁海鮮焗飯, 再試一個新嘢"鼓汁南瓜鰻魚煲". 原來order 炒粉飯可以加$3要一個例湯, 我地要咗一個再另加一個 extra 嘅, 額外嘅要$8一碗. 個湯嚟咗就後悔, 原來都幾大碗, 早知要一碗.... 呢度嘅例湯標榜沒有味精, 我都相信係無嘅, 但無肉嘅湯, 都可以咁好飲, 真係意想不到. 欖角蜜汁烤义燒同葡汁海鮮焗飯都同我上一次食嘅一樣咁好味, 义燒好重蜜汁味、又香又硊. 葡汁海鮮焗飯, 好重榔香味, 多汁又多料, 停唔到口. 不過鼓汁南瓜鰻魚煲就比較平平無奇, 同上次食嘅素鰻魚唔同, 今次食嘅係鰻魚變成紫菜卷, 無咩鼓汁香味. 下次再試另一個.
呀, 仲有... 原來屯門都有分店, 早知唔駛專登入去喇, 因為好難搵到咪錶位泊車.

果晚媽咪無煮飯, 去探完婆婆後, 係旺角是但搵地方食嘢. 因為好耐無食過紅螞蟻, 於是就搵咗呢間...

佢有啲二人套餐, 好似幾抵食, 於是揀咗個最抵食嘅… Order 咗:
芝士銀雪魚焗釀冬菇
芝士咖哩牛柳條飯
芝士白汁煙三文魚時蔬天使麵
咖啡或茶
Total: HK$158.00 + 10% = HK$173.80

首先嚟咗芝士銀雪魚焗釀冬菇. 嘩! 難食到呢, 可以三樣嘢完全配合唔到, 好似將一堆芝士粉、一堆銀雪魚碎加一個冬菇放咗入個口度. 芝士係拉唔開果隻, 銀雪魚乾爭爭咁. 咬咗一啖, 發現有嘢係芝士裏面. 即刻叫個待應埋嚟, 換過俾我, 我要求轉其他嘢, 叫咗炸魷魚鬚.
之後, 嚟咗芝士咖哩牛柳條飯, 明明記得餐牌寫住係焗飯, 點知係白飯另上. 啲白色汁就係芝士, 但無芝士味喎. 咖喱又唔夠咸, 無晒啲濃、香嘅咖哩味.
跟住上咗芝士白汁煙三文魚時蔬天使麵, 我以為煙三文魚係好似buffet果啲, 點知係熟嘅. 不過好在都算多三文魚, 不過都係好淡. 最後, replace 芝士銀雪魚焗釀冬菇嘅炸魷魚鬚嚟咗, 最 ok 呢個, 不過好吸油呀…
其實佢嘅下午茶餐係比較好, 我會推介日式雞中翼米線圈(要椰香海鮮湯底), 但應該唔會再嚟食晚餐.