梨花苑韓國料理(上環)

每年除夕或元旦都想吃韓國燒烤，今年(2008)除夕便到了梨花苑。

選了五花腩及牛肉燒烤，多加一客秋刀魚。

燒烤包湯與飯，另不可缺的是韓國特有的八小碟。八小碟水準不錯，主要以菜為主，只有一碟小魚，這種前菜正好平衡燒烤的"熱氣"。

由生到熟的燒烤要看材料是否有好的質素，這裡質素不錯，唯一的是若要生菜及大蒜，要另付$70，這個可為美中不足之處，一般韓國菜是已包在餐裡。

秋刀魚一客有兩條，從中斬開兩截，冬天真是吃秋刀魚的好日子，非常肥美！

埋單$363，價錢合理，最主要是頗為跟從韓國菜的傳統，能達到我嘗正宗韓國菜的心願！

鐵匠(九龍灣)

裝修後的匠沒有甚麼特別，今晚Boxing Day，去試下，睇下水準有無改變。

頭盤選左蟹子沙律，味道清新料足，掂！

當然唔少得必食ge 匠卷，塊三文魚越黎越薄，但總算材料足，收貨！

個仔叫個匠海鮮拉面，好足料，大隻蝦，又有扇貝，加七味粉，一流！

我叫左個秋刀魚加八蚊，有面豉湯同飯，條秋刀魚非常肥大，非常好食。

另外，要多個北海道拉面俾老婆，多春魚天婦羅，埋單$275，比想像中便宜！

匠係淘大十幾年，第D食肆摺左唔少，佢仲依然存在，證明足料好食係一定有人欣賞！

蛇王海(西環)

每年都會過來品嘗蛇王海的蛇羹套餐，今年第一次，發覺加價了。

蛇羹套餐包括一碗蛇羹、一碗蛇湯、一碗單腸糯米飯、單腸另上，有幾條菜墊底。

用料依然，多蛇肉，夠味，伴埋薄脆、檸檬葉，一流！

糯米飯一般，但潤腸好惹味，食得好飽！套餐今年$52一個，老板話無辦法，來料貴左，加小小價。

老婆其實唔食蛇，次次都要食第D野，今次食羊腩飯；因飯另上，可以要少D，適合OL，我老婆真係要左小半碗咋！羊腩好滑，仲好大碟，老婆話今年食3次，連酒樓羊腩煲都唔夠呢度二十幾蚊羊腩件數多！

因今次想影張全套餐相，所以一齊上，食到最後碗蛇湯唔熱，差少少！其實一般呢度套餐先上蛇羹，食完用番隻碗裝番蛇湯，熱辣辣，去食記得講"蛇湯後上"。

仲有碟油菜，好關照，問清多定少定走油，蠔油又可以另碟上，服務親切又殷勤。

埋單原價$97，今次減$5，收$92，雖然套餐加價，但係都仲係覺得物有所值！

咖啡空間(鰂魚涌)

今日同事唔舒服，應該食清淡D，佢又帶個朋友一齊食飯，睇完Openrice，見食評話呢度幾清幾淡，就來這裡一試。

同事個朋友黎過，話真係幾淡...D 白醬汁，所以要大蝦拿破侖汁Angel Hair。我地分開買，但結果食同樣野，可想而知選擇唔多，濃味更少！

食落味道幾好bor！係D 蝦普通D，好耐無食Angel Hair，份量對我尼講係食得飽，所以同事個朋友(係女仔)就有餘。

呢度最好係易搵位又清淨，同新相識朋友傾下食下，加多杯即磨Coffee，好快又夠鐘返工。埋單我個份$42，OK 價！

望著同事個朋友臨走前個可愛笑容，相信都幾滿意！同事呢？佢要清淡，叫個沙律，一般喇。

泰笠碰(北角)

泰笠碰真係好細間舖，加埋坐唔夠八個人，所以都係外賣好D。

有時夜晚行過，因為泰笠碰門口係小巴站，成日見到有人邊等車，邊買隻$10 雞脾醫肚，串燒都有，應該幾多熟客。

今日去食午飯，叫蝦醬炒飯加酸辣豬肉湯；個湯底同冬蔭公一樣，係一個加蝦、一個加豬肉。飲啖湯，好正！夠味，酸辣平均，飲完真係會出身汗，好過飲去濕茶！

蝦醬炒飯係我至愛，呢度因為即炒，所以熱辣辣！蝦醬味唔太濃，不過好足料，有臘腸、有細蝦米、有蛋、有辣椒仔、仲有泰菜有辣時必配的兩片青瓜。

炒飯最重要乾身，佢做得到！唔覺唔覺成盒食晒，好滿足。水準以上的一湯一飯收費$33，抵!

以前我仲試過無骨海南雞飯，又係一流水準。

係呢度食要有耐性，因為家庭式作業，真係等好耐，要食好野，無法喇，等緊個陣咪整串串燒先囉！

Beira Rio Wine Bar-Grill(西灣河)

今日同同事Farewell，中午去呢度食飯，Lunch 有兩set，1 set 50之內，1 set 60以上。最後我選左鴨胸羊扒。

餐湯未點餐先黎，老板話驚我地肚餓喎！好！我受！餐前沙律有兩款，都係唔駛選，擺低自已調到。餐前有湯有前菜，仲有面包，味道都OK。

到主菜，擺得幾好，唔係求其放上碟果D，觀感唔錯。老板仲親自俾Mustard 同Peppermint Jelly 我地，好過擺桌面自助式。

食件羊扒，幾正！扒面仲有少少脆，半生熟又幾準，正正！再食鴨胸，嘩！我平時唔鐘意食超市D鴨胸，原來鴨胸係可以咁好食架，正正正！

最後無甜品，不過有杯brewed-coffee，待應同我講，我地高級餐廳，唔用即溶架，好！有誠意。

食飯中段，老板見我地有戴相機，主動幫我地影相，後來仲同我地合照。影完話晒張相俾佢，下次黎食，番張相俾佢，食飯打個折俾我地。

咁Hard sell 的手法，都係第一次見到，不過，幾有綽頭。

食得非常滿意，我個餐就$72，加一，$80度喇！

金加利餐廳(九龍灣)

夜晚一家三口，睇完OpenRice D 食家文章，決定去金加利食晚飯！

七點幾去到，差不多滿座，不過都有三個位，睇過第D客，見鐵板餐都好多人食，仲幾好Tim。

我心中有數要乜，就叫左咖厘羊腩飯，仲要指定大辣Tim；另介紹老婆食豬肋骨沙律，諗住個仔要扒餐，點知原來佢都有睇Openrice，想食芝士海鮮肉醬公仔面。

先黎面包，係多，一人有兩塊，一蒜蓉，一餐飽，不過全部唔熱，無想象好食。不過，我就留左個餐飽，遲D "Yum" 咖厘。

終於咖厘羊腩飯到，一食，好味，羊腩夠稔，仲連皮，夠滑，咖厘口味，夠開胃，最後係好快食晒碟飯！"Yum" 埋個餐飽，飽飽！

個仔個芝士海鮮肉醬公仔面，幾多料，仲有螺肉，試左啖，唔錯。最後，個仔話太"漏"，雖然好食，但係食唔晒，因為芝士加肉醬，真係好易飽。

豬肋骨又係燒得幾好，食得津津有味，得！

所有餐都包飲品，特飲加五蚊；食完有甜品，不過個Jelly 唔好味，有D 衰收尾。

埋單，$203，但係原來淘大街坊有九折喎！$183 搞掂！不愧為淘大紮根的餐廳

榮記(東成)飯店(灣仔)

夜晚黎鵝一頸橋食飯都係第一次，試下呢間榮記。

叫兩個菜，一個海參鵝掌、一個椒鹽魷魚鬚；本來叫椒鹽鱔片，不過佢話係黃鱔，聽落麻麻，所以無要。

好快黎左海參鵝掌，裡面仲有冬菇同勁多生菜墊底，足料。味道好好，海參當然唔係高價貨，不過稔，好！鵝掌唔係急凍料，唔知係咪朝早清真惠記D燒鵝有剩D掌，都係好好味！

到椒鹽魷魚鬚，炸得唔算[漏]，好火候，最正係配甜酸醬，好特別，好過點汁。

叫多兩碗飯，加支大啤，總共$106，抵!

車仔麵之家(灣仔)

每次若午飯時在Wanchai，都會把握機會到這車仔麵幫襯。

禮拜六下晝兩點幾，依然排長龍，最後叫左基本野，幼麵、豬皮、豬腸、辣魚蛋，當然有我必要ge 酸齋！

呢度D車仔麵食左大大話話超過十八年，講真，水準真係保持到。豬皮爽夾滑、豬腸無異味，係魚蛋就應該可以更好。

但係講到個酸齋，就真係無得頂，我食過ge 酸齋，呢度Number 1！

價錢就平均五蚊一個，其實都幾貴，我個碗都要$25，隨時貴過一個飯盒。

不過，好食呀嗎，貴少少都值架！仲有佢地係香港[立食]代表，應該支持！

＊[立食]即企係度食，無坐位餐廳

金寶泰國菜館(九龍城)

原先睇 OpenRice.com 已經話呢度水準下降，不過個仔要食活蝦刺身同炸蝦頭，呢度好似穩陣D。

坐低即叫活蝦刺身($70)同炸蝦頭($35)，另外一個雲吞翅($128)，無骨鳳爪加埋咖厘蟹同法飽，應該夠喇！

先上活蝦刺身，嘩！得個十隻唔夠，以前多D 架！仲有比以前細左。跟著無骨鳳爪，正！辣得黎又接受到。

再上咖厘蟹，死喇，乜唔辣ge ？食落D 肉地應該係急凍，OK，不過因為唔辣，汁配法飽當飯食更非我想像般美味。

再黎炸蝦頭上場，無得頂，夠多，夠脆，好快清晒。個翅就麻麻，百幾蚊，個仔話早知叫多兩碟炸蝦頭。個翅好淡，好少翅，唔掂！

不過另叫支啤酒 - Singha，好耐無飲，味道好正！建議一試！

食完埋單，$476，真係一般抵，唉！盛名所累，係咁架la。

走個陣，行過其他細泰菜館，下次都要試下D 細舖。當然，活蝦刺身同炸蝦頭就大舖會隱陣D。

八方雲集鍋貼水餃專門店(太子)

夜晚七點幾等左接近半個鐘，都幾多人。

叫左招牌水餃同鍋貼，套餐送個湯，貢丸湯OK，酸辣湯好淡，最唔鐘意放左紅蘿蔔絲，唔合格！

招牌鍋貼好食過水餃，可能香口關係，有足夠料；水餃一樣料，但個皮無乜特別，一般。

30零蚊套餐唔太飽，見鍋貼幾得，叫多五隻咖厘、五隻辣泡菜，3蚊隻，即係$30。

咖厘餃味道似咖厘角，不過層皮轉左，辣泡菜唔錯，煎得香，不過都係招牌D 料好D。

食完埋單$93，價錢可以接受，不過坐車番歸時覺得好口渴，咁好味會唔會因為味精呢？

皇室宴會廳(香港迪士尼樂園)(大嶼山)

去迪士尼樂園玩，預左貴夾唔好食，午飯係尼間皇室宴會廳食，一睇大部份整定。

老婆貪得意，叫米奇老鼠Pizza，個仔要鋸扒，我左睇右睇，搵個叫做唔係好整定ge 漢堡飽。

Pizza 唔使講，硬！可能要make sure 隻老鼠耳唔好軟，食就一般到唔怕恨！

牛扒OK，比我仔學校飯堂好少少，收貨喇！

我個漢堡又係可以自己加醬汁，我好彩，連薯條都炸起，肉汁唔錯，下次再黎都會揀佢！

盛惠$180總數，OK! 另外，尼度(香港迪士尼樂園)食肆可以拉咭。

The Big Bite(北角)

第一次黎主要想試下漢堡飽，點知面包機壞左，淨得熱狗、薯條同魚。見佢咁認真，唔求其煎下個飽黎呃錢，咁有Heart，熱狗就熱狗喇！

等緊即叫即做時間，睇到原來有個調味盆，入面有五種配料任配，印象唔錯，因為自已鐘意食洋蔥。

叫左Jumbo Chilli Hot Dog，黎到落配料，其實唔落得幾多，因為條腸都佔左隻熱狗大部份空間。

食番啖，因為自已加配料，一定胃口，正！試埋芝士薯條，原來加芝士都好配合，好好味！

朋友食炸魚，試左塊，都OK，D 脆漿唔算[漏]，下次自已叫番客食。

我個Combo 有杯麻麻地Lemon Tea，要差唔多$60蚊，都唔平。

不過，無漢堡飽，熱狗因為自已配料，都叫好食。希望面包機快D整番好，下次有得試埋佢。

金滿庭京川滬菜館(大角咀)

上星期六小弟生日，老婆建議去奧運站金滿庭食，下晝五點幾起程，六點三到，已經等位等十個號碼。周圍行到七點終於等到！

一早係外面睇定菜單，即刻落單如下: 紅油抄手、小籠飽(八隻)、春卷、榨菜肉崧配燒餅、1/4份砂鍋雲吞雞，好豐富呀！

食品逐樣評:

1. 紅油抄手 - 好紅、好似好辣，但一D 都唔辣，不過好食。
2. 小籠飽 - 有一定水準，皮薄、熱，好！不過碟醋無薑絲，扣少少分。
3. 春卷 - 炸起，好熱，建議攤凍至好食，因為好熱氣。
4. 榨菜肉崧配燒餅 - 即係塞D料入燒餅食，以前D燒餅無咁闊、無咁大，而家改良左，易入易食，不過四件真係入唔晒D料。
5. 1/4份砂鍋雲吞雞 - 又雲吞，不過好似呢個鮮味過紅油抄手。唔知兩隻雲吞真係有分別定唔同師傅？個湯幾甜，正！

飽到食唔晒，要打包食淨D榨菜肉崧同砂鍋雞；第日榨菜肉崧煮麵同砂鍋雞煲粥，仲係好好食呀！一餐飯食兩餐，抵！

唔記得添，個餐食左$290。

美味車仔麵(九龍灣)

呢間美味車仔麵肯定係前平記位置，改名幾耐真係唔知。

當然，平記時代都唔覺特別出色，但係D 車仔配料應該認真好多，而家食落好似[行]左D。

今次食$17蚊同$18套餐，$17硬掘豬紅、蘿蔔、翼尖、魚蛋同麵；$18任揀四味加麵。我要$18要辣，D辣係紅色，一般車仔麵會用咖喱，唔鐘意！仲有，好似唔係認真醃出黎，有好大人造色素成份。

車仔麵點叫好，可能無準則，但食落真係一般過一般，仲一定係以前平記認真D。起碼咖喱魚蛋同魷魚都入味D。

另外，點左炸物，不過因為我只鐘情炸雲吞，其餘都無法comment。炸雲吞OK 喇，係同其他炸物同價就好似食水深D，不過家陣度度係咁gar la。

最後，套餐都送豆漿，不過我個飲到底有好多粒粒，唔知係唔係隻杯問題，我老婆個杯又好似無！算喇，橫掂最後都無肚痛，可能真材實料磨出黎，天然野，係咁gar la。

埋單加埋$5炸雲吞，總共$40，一般偏平價錢，話晒套餐，當然價law！