為食小花 等級4 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2024-04-12
平時唔太喜歡食拉麵, 因為覺得一般的豬骨湯拉麵個湯底好肥好油, 早排經過奧海城見到呢間新開的日本過江龍鹿兒島拉麵店係用雞湯做湯底, 個樣都幾吸引, 就入去試下啦. 我點咗一碗檸檬牛油雞白湯拉麵 ($98), 再加幾個小食同老公 share. 我都係第一次食拉麵加檸檬, 估唔到又幾夾喎, 酸酸地有陣陣清香的味道, 個雞湯底打到起泡, 好濃郁, 又滑溜, 兩片慢煮日本雞肉軟腍入味, 仲有成隻溏心蛋, 麵質彈牙, 好食! 另外幾個小食都有驚喜, 尤其是個雞皮餃子 ($48), 酥脆香口, 好特別. 日式香酥雞珍 ($58) 份量都幾多, 好爽口, 調味恰到好處, 一口接一口追住食. 月揚庵魚餅 ($48) 係鹿兒島名物, 我之前去鹿兒島旅行都有買返黎做手信, 一路食D回憶返晒黎, 攪到我好想即刻飛返轉添. 評分: 味道 5 環境 5 服務 4 衛生 5 抵食 4
2024-02-28
想試好耐,次次經過都要排隊,今日晏咗食 lunch,去到終於唔洗排隊,一個人坐低,睇 menu,叫咗碗砂鍋鮮牛肉粥,個侍應好識 upsell,每一個點粥嘅客人,個侍應都會問客人加唔加皮蛋,我加咗,另外想食埋魚蛋蘿蔔,我問個侍應可唔可以雙拼,佢話冇,要分開點,佢話份量唔多,可以叫幾款,我驚一個人食唔晒,只點咗蘿蔔,上枱時見到個份量,真係極細兜,得五小件蘿蔔,細碟都算啦,物價高漲,但一啲都唔好食,太淋 pat pat,輕輕一夾都爛晒,個牛肉粥更加係超級難食,又係好細碗,隻皮蛋幾靚,但係啲牛肉真係勁唔掂,「拿」到一啲味都冇,質地好似擦膠,完全冇牛肉味的,好似食橡根咁,冇下次。
評分: 味道 1 環境 2 服務 2 衛生 2 抵食 1
2023-05-28
見到網上咁多好評,同屋企人黎試下,但係食完之後有啲失望,啲芡汁太濃,全部嘢都好鹹。 飛天通菜 - 勁鹹,個蝦膏醬浸住晒啲通菜,要撈白飯一齊食先無咁鹹。 啫啫雞煲 - 份量好少,個汁杰撻撻咁,又係好鹹。 避風塘鮮魷 - 炸漿好厚粉,炸到過咗火,有少少燶味。 脆皮炸豬手 - 呢味最好食,起晒肉,砌得好靚,皮夠脆,切到一條條,方便食。 芝士琵琶豆腐 - 好創新嘅食法,但味道麻麻地,又係好鹹。 好爆場,晚上十點幾入座,限時90分鐘,有夜鳥優惠 88折,係幾抵食嘅。
評分: 味道 2 環境 3 服務 3 衛生 3 抵食 4
2023-05-26
就算天氣幾熱都好,一年四季日日都可以打邊爐,最近去咗挑戰呢間在銅鑼灣新開的四川火鍋店。 開爐之前熱熱身,先來幾道四川小食,招牌辣子雞、雷椒皮蛋、夫妻肺片、紅油蒜泥白肉、四川臘腸… 是正宗川菜的味道。 人多可以開兩個爐,一辣一唔辣,今晚試咗四川麻辣鍋和椰子雞鍋。先來一個超級海鮮拼盆,有蟶子皇、鮑魚、海蝦,美侖美奐,震撼眼球。再來鱔片、手切牛肉、手打三寶丸… 令人目不暇給之際出現了一般火鍋店少有的熊本天草大王雞,塊塊手掌咁大的雞柳,可想而知呢隻大王雞的真身有多大,再來一碟鮮嫩滑溜雞頸肉,超有驚喜。 食得津津有味突然來了一道騰雲駕霧的「冰川鵝腸」,用冰彫成的冰壺盛載爽脆鵝腸,連本身平平無奇的薯仔和蒿筍都變得非同凡響,精細刀功堆砌成藝術品一樣!最后奉上的甜點紅糖流心糍粑令人留下甜蜜蜜的深刻印象。
評分: 味道 5 環境 4 服務 5 衛生 4 抵食 4
2023-05-17
呢度好近我公司,啲嘢又幾好食,所以老細成日都請我哋去呢度食 lunch。今日五個人叫咗好多嘢,食唔晒要打包。 我最鍾意食香口嘢,叫咗蝦多士同椒鹽白飯魚,蝦多士係幾好食的,夠脆,唔會油淋淋,不過成 $40 一件,我覺得都幾貴。佢啲蒸點心都好食,蝦餃燒賣大大粒,皮薄饀靚,啲蝦又新鮮,個黑松露帶子餃用料十足,配搭得宜,超讚。炒粉麵都好正,亁炒本地牛河好夠鑊氣,啲牛肉好腍好軟熟,懷舊肉絲炒麵啲麵脆卜卜,掂!奶黃煎堆仔圓轆轆,好飽滿,流心奶黃爆晒饀,外脆內軟。
評分: 味道 5 環境 4 服務 4 衛生 4 抵食 4
|