OT夜咗喺公司嗰頭四圍搵食，記得某一晏晝同同事叫咗個四人餐全部菜式都好滿意，今晚獨剩一人就膽粗粗返嚟再回味。

時近22:30仍然高朋滿座，眼見人人都係叫差唔多嘅菜式我就嚟館新嘗試叫啲冷門啲嘅小炒嘢啦！平時無人陪我食苦瓜今次就先叫碟涼瓜炒牛肉加個鹹菜炒豬肚啦！點知過咗一陣佢拎咗一湯碗胡椒豬肚湯擺低，其實我心入面本來係想叫喱味但由於太過清醒理智嘅關係，也不得不叫伙記換返碟炒嘢俾我啦！斷估喱類熱門招牌菜式佢唔會成碗倒咗咁折墮嗎？

跟住戲玉嚟喇…

佢拎咗碟炒好咗嘅涼瓜炒牛肉…走牛肉至問我「無牛肉有無問題？」換著任何人都唔會話「無問題」咁大方吧！但問題係佢問著我依類環保人士，立場上唔希望因為落錯單或人為錯誤而造成大量廚餘浪費，而且佢已經炒好咗先嚟問我我亦唔想叫佢換第樣再炒一次，萬一OverCooked我咪攞嚟衰？算啦！成23:00如果再轉相信唔會有人會要我唯有捱義氣要咗佢啦！豈料部份切得比較厚身嘅炒得唔夠火喉，苦唔緊要但係個心生得滯真係接受唔到，今鋪真係瀨曬嘢叫埋曬啲冷門嘢玩自己一鑊。

過程中我只係唔明白，落單時清楚俾埋餐牌上菜式嘅Num把廚房都可以搞得錯係湯定炒嘢！佢俾錯我嗰樣價錢貴$30蚊我其實可以照食但係唔想咁易妥協屈服囉！到嗰碟炒好咗至同客人講無牛肉無啦啦變咗食齋成個口感當堂差曬，佢夠鑊氣都話呀炒到半生不熟咁，我座角落單丁卡位冷氣唔算大點解食唔夠五件成碟嘢咁快就放涼雖然味菜有個涼字啫！碟鹹菜豬肚啲鹹菜就偏淡要靠辣汁稍為托返起個味否則都唔知食梗乜，唯一最可取嘅仍然係豬肚依啲熱門食材係夠水準之外，感覺廚房同伙記之間協調不足令食客引起混亂同尷尬，上次嚟叫凍飲強調講明要「走膠飲管」因我自備不鏽鋼飲管都擺定喺枱面但伙記都無跟足指示走筒，陷我依種完全唔用即棄餐具嘅環保人士於不義迫人破戒，如果我叫少甜少冰係咪廚房又扮聽唔到照舊機械式咁出Order呢？機會嘅嘢俾兩次已經係人至義盡，今次一個人嚟食被忽視到如此程度就算埋單你平得幾蚊俾我…就算你平一半俾我我成個過程都係食得十分之不愉快，希望店家能作出改善否則第三次嘅時候再重複犯錯定必將被列入黑名單之內，即使其他招牌菜幾好食都好，一個客都係客，廚房先斬後奏之舉實在唔要得。

小弟揀咗日平日嚟Buddies食嘢希望無咁多人等位！不過嚟到門口都係要等一等，無法啦！

深水埗呢帶有邊間食肆中午唔駛等位架又~~，更何況間嘢開喺黃金高登後面咁鬼就腳，仲

要係幾乎獨市生意咁做(注：佢對面馬路都有間食差唔多嘢嘅餐廳不過就茶餐快餐Feel咗啲)

先講環境呀！樓底都OK夠髙就算地方唔算大亦未有焗束嘅不安感覺，同時亦無嗰種兜頭吹

暴力式散熱嘅風冷裝置，可以舒舒服服咁同朋友慢慢傾慢慢坐，偶然見一大班OL十幾廿人

坐埋一枱亦未出現渲鬧情況，好明顯餐廳環境都引來一班愛乾淨、愛舒適寧靜嘅食客呢！

樓面都起用後生仔女做侍應而且全套制服感覺良好，舉頭欣賞多幅名畫之際.....轉頭至發現

....原來自己仲喺呢間深水埗「街邊」食肆啊！

唔係任何意大利菜都係「賣飛佛」，例如份量少又食到嘔嘅意大利飯一般都唔會叫

，所以是日午餐主菜我揀咗： 什菌/煙肉芝士意大利扁意 配 椰菜忌廉湯

扁意粉面頭應該有輕輕灑上啲芝士粉吊一吊味，個汁嘅熱力將芝士同煙肉香味散發出來，

即時引起食慾，煙肉同什菌都切成薄薄小塊容易入口，扁意粉口感稍硬但有個靚汁補翻數

整體尚算合格，上菜器皿亦未有學啲大酒店餐廳用啲King Size碟"邊"嗰款(注：外型酷似

韓國儒生頭戴嗰款闊邊帽咁)，視覺上較為實際未有被騙嘅感覺。椰菜忌廉湯濃度適中亦

鹹得有道理，不過不失。

餐飲： 凍檸茶(小甜)，特登叫小甜試吓啲檸檬同茶靚唔靚仔，OK唔太酸唔太苦嘅~~

(餐飲冷熱同價是為一大驚喜)

是日甜點： 雲呢拿雪糕糯米糍，呢個先係全份午餐最正嘅位，小小一包

未開封嘅糯米糍(Packing無品牌亦應該非自家製)，外層實在冰感配以軟心雲呢拿味雪糕

，在炎炎夏日一嚐立即暑氣全消啊！心諗：「可唔可以俾多包呀姐姐？」

小小意見：如果有啲單叫飲品或者小食嘅餐牌睇就更加好，講真呀！意大利菜嘅份量....

大胃王實在唔夠皮呀！況且對好多人嚟講價錢唔係首要考慮嘅時候.....就不如賺盡D啦！

明冇？

早幾日有位前輩拎咗盒蛋撻上嚟公司探我老闆，本來一人分一個，有人話On Diet唔肯吔，

由於我最遲行埋嚟咁做細嘅通常都要執手尾，要硬啃兩件心諗呢個禮拜又要行山消耗返喇！

心灰灰之際點知前輩一開盒就未見撻先聞其味，好香呀~~ 一拿上手有無搞錯層酥皮仲暖嘅？

原來熱嘅係入便啲蛋好明顯係等到新鮮出爐至外賣，真係好食到難以形容，依位老前輩真係

有我哋心呀！最後梗係好滿足咁執手尾食埋嗰個啦！臨清理時上前問問前輩原來新華呢間嘢

喺興華街嗰便青山道咁「近」唔怪得盒蛋撻可以以最佳狀態見人啦！超讚！


長沙灣區工作咁多年中午跟班同事唔係食大排檔就係啲垃垃圾圾嘅雲南米線，貪平貪就腳

就係佢哋嘅飲食態度，同我依啲鐘意周圍走嘅後生細仔取向完全相反，雖然係深水埗區，

但好食起上嚟5-60蚊一餐晏我都肯濟架！而且仲要係食到一坐低就俾人認得「見樣就落單」

嗰隻，「焗意粉呀嗎？」係呀係呀係呀....「凍檸蜜小冰架啦！」係呀唔該唔該，幾方便呀！

今日偶然過荔枝角做嘢行梗返公司之際，途經新華茶餐廳門口見到盤蛋撻新鮮出爐.....其實係

唔覺意聞到香味之後至轉頭望到，咁情況整定我要入去幫襯吓佢啦！本來後生細仔(又題)

嘅我見到呢類閣樓式被視為老餅至去嘅老牌茶餐廳，係一定唔會幫襯嘅，而且本身對嗰啲乜嘢

快餐常餐午餐來來去去咪又係食嗰啲嘢！跟住我就學麥兜咁叫咗個快餐同常餐差唔多嘅特餐

特餐係"沙嗲牛肉麵"配"火腿奄列同牛油餐飽"加"蛋撻"，蛋撻先上梗係拿拿臨「翻撻」回味吓

(呢期娛樂界都興翻撻~~)！點不知唔熱禾....而且凍嘅添，明明見佢成盤新鮮出爐....不過唔緊要

個腦一便諗都唔夠把口快個蛋撻都食得七七八八，唔通家吓至叫人換咁賤精咩？況且原來凍咗

嘅酥皮入口依然鬆化，凍嘅蛋質依然係「賣飛佛」，似乎又令我體驗到另一種食法。牛油餐飽

牛油份量唔算多但食得出牛油香味(注：如果之前食過濃味食物記得飲啖茶至食個飽會更完美)

，唔似得有啲餐廳將餐飽整到菠蘿油王子咁款就諠賓奪主喇！火腿奄列cut 四份一夾入個餐飽

，讓淡淡嘅蛋汁與飽融為一體特別可口，要注意嘅係佢叫火腿奄列即係火腿夾喺兩層既薄且滑

嘅蛋身入面(唔係D快餐店火腿擺面就算...)，啲火腿仲要一絲絲咁可以拆開逐條品嚐，其餘部份

我就將佢撈落沙嗲牛肉麵整熱嚟食。沙嗲汁輕辣少少鹹無搶到麵本身嘅味道.....麵本身可能根本

無味道，食嘅係爽口彈牙質感同埋牛肉本身混和沙嗲湯底嘅味道，湯底濃得嚟無嗰啲重重嘅鹹

味而且食完個飽灘一灘溫度啱啱好易入口，無錯食物嘅溫度對入口嘅質素係有好大分別o架！

你總唔想食完一餐好好嘅之後個口燙到損哂嚟俾「讚」啩？真係要「讚」嘅一個就夠！亦相信

嚟梗呢半年都會當呢道係首選嘅「飯堂」架喇！(唔駛陪班同事食垃圾嘅話)

今日我都為咗毒害公司班同事特登外買咗一盒熱辣辣酥皮蛋撻返嚟請大家食(出公數嘅)，希望

日後受我感染多啲陪我試埋佢其他嘅食品啦！

(抱歉未能提供美食靚相~~)

恰巧舊生聚會成班「九」男女要搵間就腳得嚟又可以座幾粒鐘吹水嘅地步，
某人揀左MK呢間上樓Cafe檯都訂埋就膽粗粗即管一試。旺角登打士街呢種
地帶真係最就得人，玩夜咗就算住天咁遠都唔駛搭N車返屋企，旺角實屬
舊區重建重點發展區，D樓齡分分鐘同個Friend加埋都唔夠佢高，不過勝左
樓底高地方夠大幾適合開設呢類上樓蒲點，大到樓下竟然開到間傢電連鎖店
.........廢話講完！

一嚟到樓下兩部電梯衰咗一部，成班o靚妹仔迫哂入去仲有位涉就唔好意試
入喇！自己踩四層梯樓當練氣吧！旺角上樓俾我嘅印像好多時唔係呢邊婦科
診所就嗰邊幾間掛滿顏色招牌各有各做咁，呢道好彩無呢D野環境算唔錯，
唔怕教壞我哋依班咁乖嘅同學仔~~

小弟向來對食肆都係以食物嘅質素作評比標準為First Priority，本來食咗個
盤菜宴先嚟Meet佢哋都唔住食嘢叫杯特飲算，點知俾個女侍應兇多我兩兇
(建議啫~建議啫)話最低消費每人$80蚊叫埋嘢食o架要！見佢咁認真咁我都
揀咗份「帆立貝芝士西蘭花長通粉」同埋"賣飛佛"思樂冰類飲品「石板街」
沙冰，面頭堆滿細細粒棉花糖夾雜住朱古力沙冰香滑得來有咬口，口感唔錯
........但其實我根本無飲到因為同朋友掉轉左杯凍啡，香滑、口感呢D形容詞
係從佢表情喘摩出嚟嘅啫！反觀我飲錯呢杯Latta定Cappuccino嘅味道以及
溫度都俾到我驚喜，啡、奶份量尚算恰到好處，同時亦都欣賞飲品面頭的
那些「藝術」，令本來平時唔飲啡嘅我都忽然地愛上。

吹咗一陣水見大家點嘅主菜都仲未嚟，"劉丹"嘅情況時有出現反正出得嚟係
HEA問題不大，要讚一讚之後嚟嘅「帆立貝芝士西蘭花長通粉」，個汁我會
將佢同"紅螞蟻"的長通粉比較，長通粉同個汁嘅比例都恰到好處夠我點乾佢
，只是略嫌粉身唔夠爽口，但有兩大隻帆立貝同芝士西蘭花在前已能奪回
不少分數，相比起"紅螞蟻"那個白汁煎雞雞柳長通粉份量磪有過之而無不及
，不過人哋唔駛每人最低消費$80蚊至食到差唔多質素嘅佳餚美點。

最後都有遇到其他食評遇到嘅疑似趕客個案------越夜就越熱，講到High我哋
都唔夠隔離班廿幾叁人玩得咁高漲，越食越熱只可能飯氣攻心又或者杯冰已
消化咗情有可原。之後阿Sir召位女侍應過來幫手影張大合照，結果出來嘅
相片質素鬆郁矇水準令大家有D唔開心，我相信佢呢D情況要佢做呢類搭單
工作已經麻木，所以相片嘅質素可從佢面上麻木嘅表情反映出來，唔可以怪
人，俾著你咁嘅鐘數見人哋HeHe哈哈自己仲要任勞任怨，撐得起依份工簡直
係EQ訓練場。最後最後忽然嚟個一人一小碟Cheese Cake甜品，水準係OK
得嘅~ 至起碼唔似會凍傷條脷又或者倒汗水蛋糕咁款我哋已經幾滿意架喇！

鐘情於思樂冰類飲品的我早已對那些乜茶物茶街邊凍飲「說不」，
皆因無一個固定舒適的地步也難以享受到高質素的飲料。
正值炎夏，碰巧上環都有仙跡岩，見三點三無乜人就即刻走入去
來個Tea歎杯冰啦！點返平日我既「飛佛」----- 波羅朱古力雪吧，
仲有叫左個雞飯，呢D都係平日係新都會廣場間仙跡岩叫慣既菜式
無走雞啦！等左四個字成廿幾分鐘之後乜都未黎，我叫佢幫我跟跟
佢係有應我，但係現場無乜人都要成十分鐘後至俾到野我，之前係
水都無俾杯我喎！唔緊要喇！漏單唔通知連唔好意思都無句既，都
唔緊要喇！一上檯杯波羅朱古力雪吧好似已經溶左一半咁，無口感
想畢都畢唔起喇！杯野橫掂都溶食左碗雞飯先啦！D飯同雞竟然係
唔熱既，真係諗唔到點解會差成咁，唔食喇剛巧有人Call有野做，
拿拿臨飲埋杯到底都係溶既「冰」就走左喇！
事後至諗返起呢間都係新都會個間o者~~點解質素會差咁遠？上環
呢間正在對正西港城大單邊又係電車轉彎位，景觀算唔錯，但食物
質素都要見得人先至會有客路呀！真的要改善改善。

食左咁多年九記牛腩，幾十年來獨孤一味淨食「腩伊、
齋伊、咖哩伊」，食極都唔厭的一群仍然每日中午食飯
時間甘願排幾個字長龍來個堂食(外賣過左氣邊好食架~)
，受傳媒吹捧及明星效應等因素影響之下，香港人似乎
對此等場面早已司空見慣。

仲記得n年前一套電台廣播劇《巴治奧》一集情節，講呀
Sammi鄭飾演一個中環OL食在九記，隔離一把戇直男士一
坐低講左句：「一碟油~油~油菜呀唔該。」好明顯係新
o黎，熟客仔Sammi當然知道九記只賣牛腩，其他免問。
後來，九記就有提供油菜這項"名菜"了。

自此多年以後九記依然客似雲來..情況最近卻起了變化
。受近期通脹急劇糧油麵粉價格急升影響，所有食肆都
將增加的經營成本轉嫁到食客身上，生意越來越難做，
早前更有傳牛肉供應短缺，曾令不少嚐牛客食過返尋味
，話怕日後食唔返咁o既價錢同擔心牛腩質素下降等，
情況就好似呢期鬧米荒超市D米被人搶購哂的羊群心態。

正值此時，九記並唔係無牛腩賣，反而於咁o既時勢推出
新口味------"肥牛"，一碗清湯肥牛河價格照舊與一碗
腩河同價，伊麵底照舊貴兩蚊，咖哩汁照舊只可配根腩
一樣無肥牛份，反而最有興趣單叫淨清湯肥牛配碗齋伊
，再獨立加碗咖哩汁，睇下九記腩汁Crossover咖哩肥牛
會起到甚麼化學作用，唯當日無帶相機拍下，但係事後
整體印象仍是美好的，如硬要同外面D茶餐廳肥牛快餐
比較的話，就算九記唔係特別好味至少都會有份新鮮感
，睇在佢多年來罕有地有此新嘗試，或許會吸引到一班
已經左食厭九記的人，再一次被那股效應影響再番尋味
。

記得十多年前母親因為工作關係，經常要帶埋我們當時年紀仲細的
兩姐弟返工，由於公司後街就係九如坊，食晏去九記已成不二之選
，基本上所有配搭都試過哂(事實上來來去去咪又係個幾味～)，不
過唔知點解，每件牛腩食落口的感覺件件都好似食緊爽腩咁好味，
可能係因為有至親陪伴時的心情和氣氛所感染啦！

到左自己出來社會做野，多年來遊走於中上環新舊區之間拍攝，總
會不自覺地(好唔順路地)走到九記這條街，與店內各人雖不算很熟
絡，但其實由細到大我已對他們營造那種渲鬧的氣氛十分適應，就
如親人在你耳邊訴說著昔日的歡欣故事般，每次我再把牛腩咀嚼時
都總會記起許多童年往事，仲會記得母親多年辛苦工作的日子裡，
就如今天自力更新的過程，肉汁與湯底的濃都不及那份溫馨回憶咁
濃厚。我嘗試過尋找其他類似的食肆總找不回那一份味道，這可能
就是一個人對某樣事物的情意結吧！以前非繁忙時間座低曾經見過
任賢齊、譚詠麟等大明星經常拉大隊來光顧，唔知將來又會有幾多
個死硬派為尋找某種回憶而去尋找味道呢？

發覺近年D腩身無以前咁易入口的關係，近年一律已轉為咖哩筋腩伊
+齋伊全走咁食法，有時中午前見條龍排到街尾咁滯唔入去食都會走
去後欄聞幾聞吊下癮既～