老點點心竹筒飯 (旺角)

排隊排左半個鐘頭，而且叫號既過程好混亂，幾經辛苦先至可以入座，幸好有先比點餐紙我地劃定食咩，一入座就幫我地落單，縮減等候時間。

我地叫左灌湯餃、燒賣、斑蘭馬拉糕、安格斯牛肉腸粉﹑高湯小棠菜﹑海蝦肉餅竹筒飯。

灌湯餃質素幾好，餃皮唔係太厚，質感都唔錯，可惜魚肚有點漂過的味道，打了一點折扣。燒賣不過不失，感覺上蓮香居或香港仔周記既燒賣都好食過佢，價錢仲有點貴。安格斯牛肉腸粉，有牛味有肉味，完成唔係平時牛肉腸既肉質，但係腸粉唔夠滑，我覺得鮮上肉響鈴腸可能會好味Ｄ，下次會試下。馬拉糕加入斑蘭葉，味道清香唔太甜，好味。

小棠菜既高湯幾好，食唔太到味精味。

竹筒飯望落細細個，但都有成碗幾飯，但我地都唔太鍾意用紅米飯，影響左蒸飯本應有既米香綿綿既口感。不過個海蝦肉餅味道不錯，唔會太油膩整體上幾好，價錢偏貴，但都可以接受。不過要企係馬路邊等好耐位，大熱天時就咪預我喇。

金雀餐廳 (銅鑼灣)

以前仲係學生既時候，經常都會同屋企人黎到呢度鋸扒。
無論環境、服務抑或係食物都令人非常滿意。
事隔數年，再次到訪，獨剩一片唏噓。

話說這裏曾是電影花樣年華以及2046取景的地方，而且歷史悠久，所以一直都有很多人慕名拜訪，當年我和家人都是這裏的捧場客。可惜時至今日，甫踏入餐廳就有一片違和感侵襲。過去的侍應叔叔嬸嬸全都不見了，而且感覺冷冷清清的，即便景物依舊，人面卻已全非。

食物方面，過去的食材，不論是牛扒類的肉眼、西冷或是雞扒、羊扒等，入口時均有豐富的肉味及肉汁，鮮嫰而有口感。這次我們點了牛柳及西冷，菜一上枱便知不妙，西冷不在話下，牛柳一下刀便發現整塊是「霉霉爛爛」的，有點像煲老火湯的「豬展」，一入口便有一陣濃烈的蘇打粉苦澀味，吃了數口便已不能下嚥了。相信現在餐廳對食材的處理手法便是用大量的蘇打粉把肉質弄得疏泡，其實坊間大部分食肆都會作相同的手法，是可以接受的，但這裏卻下手太重，把味道都破壞了。還有的是，因為男友不喜歡鐵板上碟，落單時特地叫侍應將西冷扒改用碟上，侍應卻將它們掉轉了，畢竟不想浪費食物，本想通知他們一聲便算了，那一位女侍應卻粗魯地回應：「咁你想點丫。」，實在是叫人難以忍受。這次重臨金雀，唯一較可取的是餐湯，羅宋湯材料豐富，喝後還會有淡淡的牛尾味餘香；忌廉湯濃淡相宜，很讚。總括而言，金雀已經不再是以前的金雀，要是想扒房享受一頓美好的晚餐，本港實在有更多更好的選擇。

美味餃子店 (太子)

落住大雨過黎食碗熱辣辣既餃子，叫左一碟雲耳椰菜煎餃同一碗白菜湯餃。餃子皮稍嫌厚實，味道不過不失，煎餃很油，值得一讚既係湯餃既老火涼茶靚湯，係野葛菜生魚豬骨湯，清甜無味精，黎親食既都會飲個碗底朝天。另外佢既獨門辣醬，加入左菜甫，令到味道稍嫌太淡既餃子生色不少。
有時間會再黎幫襯