cafe TOO (金鐘)

第一次黎cafe too食buffet, 甫入門口就已經見到個海鮮bar係度歡迎我地~好吸引!!

第一轉我就先食頭盤, 食左煙3文魚, parma ham+哈密瓜, 仲有d沙律菜.
全部質素都幾好, 連我平時唔鐘意食沙律菜都覺得好食!

之後到海鮮, 拎左麵包蟹, 蟹腳同龍蝦. 龍蝦最好~新鮮~d肉彈口. 蟹腳我自己就覺得麻麻地, 而且拆肉好麻煩(龍蝦個d係一起就一大塊肉!). 麵包蟹, 好多膏, 真係成個蓋都係, 好正!! 

之後各式熱盤, 反而睇落一般般, 好多都無試到

日本section個度都幾多選擇, 刺身有3文魚/北寄貝/八爪魚. 北寄貝, 新鮮唔錯~八爪魚就麻麻地~另外佢地有多種sushi, 但我唔想食個舊飯, 所以都無食...

每晚7:45/8:15都會出燉湯, 好清甜, 不過都好大碗~但都真係值得一試!

另有好多人排既鵝肝牛肉, 其實食得咁飽, 出去排下隊企下都唔錯(等15分鐘到)~第一轉d鵝肝麻麻地, 第二轉好好食(睇彩數), 牛肉就一直都係麻麻地~如果係帶子就好啦~

點心, 流沙包同菜苗帶子餃好好食, 反宜小籠包就一般.

燒味, 有乳豬/燒肉/燒雞等, 但水準都係一般

仲有本身想試炸蝦天婦羅, 不過成日都比人拎晒...食唔到

而甜品有好多選擇, 真係花多眼亂, 而且好多都好好味!

cafe too d食物真係好多選擇同好多元化, 正~! 不果如果要去記得book台, 個日平日去都全場爆滿呢!

Cambo ขุนทอง (尖沙咀)

與朋友相聚, 朋友提議食泰菜. 由於去九龍城太遠, 最後選址位於尖咀既cambo.

一行3人order左以下食物share食:
泰式拼盤(細) - 每款食物都有3件(共有4款, 有魚餅/蝦餅/雞...), 3個人岩岩好. 食物呢, 炸野就真係好少話差ge, 除非凍/唔熟...依個算滿意啦, 係d魚餅辣左d

串燒沙爹半打(雞、牛、豬各2條) - 全晚最唔得依個, d肉唔好食又有d怪味咁, 個沙o爹醬好味都補唔返!

青咖哩軟殼蟹(配法包) - 之前我未試過青咖哩所以特登試下, 但淡得黎味道亦都麻麻地..入面有少少豆同唔知菜...全部無味的..法包亦都只屬一般...軟殼蟹反宜好少少, 炸得透, 味道又ok(點咖哩)

炒芥蘭 - 做得最好係依個, d菜幾靚, 又炒得惹味

最後加多3碗飯, $362埋單(連加一). 其實食物水準真係好一般, 唔值依個價. 

紅椒力量 (屯門)

V City岩岩開幕, 同朋友們黎到湊一湊熱鬧. 由於太多人, 附近所有食肆都全部爆滿, 牛角更要等過百張台.咁依間就相對上少人, 睇過MENU, D野食都好似幾吸引咁, 最後就入左黎啦.

由於佢地新開張, 佢地D野好似都未READY咁, 本身想試青咖哩同小食拼盤都無...

最後點左:雞肉喇沙 - 湯底算好食, 不過其實同百勝廚個隻喇沙麵差唔多...算唔想出式
咖哩牛腩 - D牛腩好un...curry又麻麻地...差
鮑魚豬頸肉炒飯 - 超一般

食物真係非常麻麻, 雖然環境/服務都ok, 價錢亦都唔貴, 不過唔會encore. 

稻香 (天水圍)

老爸放假, 今日一於陪佢黎稻香飲早茶 . 雖然係平日朝早, 但都一樣人山人海. 依度有樣唔好, 2個人一定要搭台, 就算搭, 都要等成35分鐘先有位.

2人叫左5個點心, 包括:
鳳爪排骨飯 - 我平時去酒樓必食點心之一 , 依度水準算ok, 不過d飯濕左d...有改善空間
紫薯卷 - 奶皇馬拉卷既紫薯版, 我都幾鐘意
三色餃 - 蝦餃, 菜苗餃同潮州粉果, 整得幾好, 依個非常滿意~
叉燒腸併炸兩 - d腸粉餡太少, 皮多, 麻麻地. 炸兩, 我覺得唔合格
魚片頭併炸蝦角 - 魚片頭, 真係普通到唔普通...蝦角都係非常一般...想食炸野, 蒜蓉蝦春卷反而更好..

點心大致上都滿意, 埋單~$60. 每人都係$30, 幾平(茶記早餐都係依d價, 不過飲茶感覺多野食d)~ 如果唔係要等咁耐位, 真係會去多d.

肯德基家鄉雞 (KFC) (金鐘)

咁岩肚餓, 醒起依度有間KFC, 就特意過黎醫醫肚

本身睇完廣告都想試$20 雞皇桶飯餐, 今日有機會啦~睇落真係幾大桶, 平時既白汁雞皇飯加幾粒炸雞粒~
雞粒一如以往麻麻地, 皮太多, 不過我接受到~雞皇飯都係正常水準~不過雞絲好少(好似得1-2條), 如果唔係有雞粒搭夠, 我會覺得唔OK. 另外, D汁唔係好夠, 食到底個陣無咩汁.

雖然唔係話好好食, 但我接受到, 有時覺得M記熱氣得濟黎食下飯都唔錯, $20仲包埋野飲真係食得過