chopper 等級3 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2019-01-05
每逢節日出外食飯慶祝,大多數餐廳都會推出指定套餐要求你揀,尤其係聖誕節~ 但記得前年嚟呢度慶祝平安夜,佢地不用限叫聖誕套餐之餘,兼又可用正常價揀餐牌内之食物。今年打去詢問後依舊無限制,所以我地一家決定再次嚟呢度慶祝平安夜~ 非常巧合,又坐回前年同一張枱~ 今次多了一位成員,所以我地點了兩個頭盤及兩個主菜分享。 叫了一份龍蝦湯,雞翼,牛扒,蝴蝶粉同焗棉花糖甜品。如圖示,各樣都幾好味。 仲有個煙三文魚蝴蝶粉都幾好食,但主要個粉係叫俾小朋友食,所以無影低。 整晚對服務,氣紛同食物質素都好滿意,一家人都食得好開心~一定會再嚟幫襯。
評分: 味道 4 環境 5 服務 5 衛生 4 抵食 3
2018-12-21
今日無咩胃口,於是下午想簡簡單單食碗麵。 依家石門多咗好多食肆,今日一於試下呢間清湯腩王嘅丸記先。 叫咗個牛腩魚片頭麵,賣相唔錯!先試下個湯,好清甜,同有一陣好濃烈嘅藥材味。 我個人覺得都還可以,諗住個牛腩都應該唔錯啦…點知,出事了~ 個牛腩無牛味,基本上無咩味~ 肉質好韌,黐牙。魚皮頭都無咩特别~街市貨式。 好在無咩胃口,本住“好又一餐唔好又一餐”嘅心態,諗住食完個麵就走。見碗麵有一件蘿白,又本住順手食埋嘅心態,點知有驚喜!個蘿白清甜非常,好入味,無渣~係我今年食過最好食嘅蘿白~ 結果我都係食曬食碗麵。 埋單連凍飲要五十五蚊,算幾貴下,唔係咁值~ 評分: 味道 2 環境 4 服務 3 衛生 4 抵食 1
2018-12-13
港式鐵板鋸扒,我個人比較鍾意食午餐;因食材份量跟晚餐點的一樣,但通常比較便宜。 食鐵板扒我鍾意去港式扒房,因肉質通常都會較茶餐廳優勝,但價錢相差唔遠~ 今日下午就嚟到花園餐廳獨樂樂,一入到餐廳,可能時間尚早…約十一點半,人未算多。待應們都好有禮貌地招呼入座。 點了個鐵板肉眼餐,五成熟。 先到餐湯及餐飽,羅宋湯味道正常,飽用微波爐翻熱…係…無咩特别~ 再到鐵板,肉眼好大塊,真係五成熟,正! 雖然肉味不太突出,但勝在鐵板熱辣辣,配上黑椒汁,都有好香黑椒味同有少少辣,成個配合係絶對可以接受 ! 叫埋餐茶凍飲,埋單73蚊。午餐嚟講算貴!但整體配搭加上待應有禮貌之招呼,我認為係值得一試再試! 評分: 味道 3 環境 3 服務 4 衛生 3 抵食 4
2018-11-24
假日成日都要諗節目,帶住啲小朋友去嘅地方都係玩,玩同玩。 通常假日無咩機會食餐好,因要照顧小朋友為先,食嘅都以方便為主,一係就會專登去親子餐廳俾佢地玩同食。今次就試下同佢地食Brunch,嘗試享受下久遺嘅Hea爆生活模式… 呢度有個專區可以俾小朋友畫下畫睇下書,咁好彩我地被安排坐在這專區附近,所以小朋友們一到步就已自動自覺去探索呢個區域了~ 由於到步時間尚早,所以我們點了一份All Day Breakfast及一份Egg Benedict。呢度每個小朋友(唔記得幾歲内…)餐廳會提供一份免費餐。呢個造法其實喺美國好常見,係香港比較少。。 呢個All Day Breakfast好豐富,似美式,各項食材也可以。Egg Benedict同小朋友嘅免費餐影唔切相… 味道方面還可以,無驚亦無喜。 其實,呢度最好就係可以俾小朋友自由活動下,我地大人又可以慢慢歎返杯茶。 最後埋單兩百左右,算係性價比高。 出面有個停車場,用電子消費就有泊車優惠,真係幾方便一家大細嚟嘅。 評分: 味道 3 環境 5 服務 4 衛生 4 抵食 4
2018-11-19
今日在荃灣區工作,下午茶時間有啲肚餓,行到路得圍揀嘢食。 成個路得圍都係食肆,見呢間車仔麵好似新開張,間舖幾乾淨下,一於試試。 食車仔麵我鍾意試辣汁,唔係間間好食。有啲辣都唔辣,有啲就死辣。見店員推介呢度有隻叫魔鬼辣,一於試下。 以為佢會幫我落,原來要自己落,份量幾多隨意,呢個安排又幾好wor。 第一次食,唔好咁貪心,落少少試下先。 食前先試下個湯,幾鮮甜。再撈埋啲辣醬食。。。好在落少少,個辣好勁,第一啖無咩嘢,但跟住慢慢嚟料。有啲層次,正! 麵條好爽口,啲餸唔錯。個魷魚入味爽口。仲有個糖心蛋,配車仔麵都幾work!唔錯!其他配料都可以嘅。 價錢都算合理,食車仔麵我通常唔理幾錢,合理同好食就得啦~ 佢都有好多配料,下次會返去試下其他配料同回味下佢個魔鬼辣汁先。 推介美食: 魔鬼辣汁 評分: 味道 5 環境 5 服務 3 衛生 5 抵食 3
|