好耐冇行過旺中，見到呢間雞蛋仔menu吸引，口痕痕就買個班蘭雞蛋仔（$21）試吓啦。 見號碼只係四個，點知等等等等等，等咗20分鐘先有，原來中間仲有個foodpanda整成六七個雞蛋仔。早講要咁耐，我就行吓再返嚟啦。 等咁耐，以為慢工出細貨，點知一拎上手係咁： 整得咁肉酸嘅 再睇落啲…… 嘩！直頭蓮蓬圖咁 根本冇心機整。趕交貨都唔係整到咁吖。 味道方面好驚喜，係驚喜地差。 外脆內軟做唔到，完全係空心雞蛋仔，班蘭味係香精味。 $21唔算平，賣相唔得又難食再加等咁耐，冇下次。中晒伏。

服務：1/5 7:30am開門，做第一個客買外賣， 居然等咗足足20分鐘先有得攞！ 問店員點解咁耐，佢答：「因為啱啱開鋪。」 原來7:30開門，廚房員工7:30先返工㗎？！ 食物：1/5 叫咗個韓式炒粉絲跟熱檸水： 圖片好多料，又菜又蛋絲又冬菇絲。 現實得幾條菜，蛋同冬菇欠奉；都算。 諗住兜嘢整咗20分鐘，慢工應該出細貨， 結果鹹到飛起！食咗幾羹鹽咁，同埋好油 成餐最正常就係杯檸水，多謝晒。 呢間嘢冇下次，奉勸大家唔好中伏。

是日同一班朋友嚟午餐。
食物水準係唔錯的，不過發生咗件事，大大影響對呢間鋪嘅印象。
詳細可以睇最下面。
午餐包餐湯同主菜，
是日餐湯係甘荀湯，打得幾creamy，但唔夠熱。

主菜叫咗紅酒汁鴨胸配意粉。
估唔到$53有咁大件鴨胸
煎得幾香，不過個意粉煮得有Ｄ油，早知配飯啦。

另外加咗杯熱即磨咖啡，+$8。 杯啡就差D喇，細杯到好似espresso咁，
而且奶唔係自己落，佢落咗好多奶，成杯啡得返奶味。
唔值得俾多$8加杯咖啡。

好喇，講完食物，講吓服務。
有個好似係老闆、鬼鬼地嘅男子，服務唔錯嘅。不過… 話說我地有幾個朋友分別外遊完，
飲完湯，主菜未嚟，咪分吓手信囉。全部係獨立包裝嘅零食。
分完我地放住Ｄ手信係枱面先，但掂都冇掂過，莫講話食。

然後有個身型頗胖嘅女店員行埋嚟，指住枱上嘅零食，
語氣麻麻咁話我地唔准食外來食物！

嘩，咩事呀，放係度冇掂過都老屈我地食？
我地即刻話「分手信啫，完全冇食過，亦冇打算而家食」
佢仲兜話「提醒吓啫。」

即係咁，我去過唔少餐廳度聚會，當中都有分發手信環節，
但今次係第一次遇到咁嘅事。仲要俾人老屈。好有趣。

我地廢事個肥店員再阿支阿左，唯有收返埋Ｄ零食先。
奉勸大家，如果買咗咩零食或者買完餸，再嚟呢間鋪，
千其千其唔好放上枱面呀，會俾人老屈你食外來食物架！！

尋日去開屯門，諗住食牛一。

去到係1640，明明寫住午餐時段至1700，但工作人員換緊晚餐牌！
仲唔再俾客入去，話而家開始係排1700入場食晚餐嘅。
有冇搞錯？仲有20分鐘先五點，可以咁快截人？好唔老實囉！

唔想俾優惠d客，不如直接寫午餐到兩點，兩點打後全部計晚餐啦！
見到咁樣，我地即走！

係屯門行完山，時間尚早，想試吓華都嘅小店，就嚟咗呢間。
由於未到六點，仲可以叫午市“套餐”，但所謂套餐其實係得碗粉，野飲都係要加錢嘅。

兩個人叫咗一碗雞絲湯檬，一碗香茅雞翼湯檬，加兩杯鹹檸蜜。
湯底好重味精，冇鮮味。
餸極少，雞絲得幾條而且好鞋。
雞翼居然得兩隻，仲唔可以另上，俾味精湯浸到淋晒，幾脆都食唔出啦。
係杯鹹檸蜜叫做特別少少，鹹鹹酸酸幾開胃。

好喇食完埋單，咦點解比計出嚟貴4蚊呢？
睇單先知原來檬粉要加2蚊！問題係menu完全冇寫過要加錢！落單個阿姐都冇講！
即係咁，加錢唔緊要，你大大隻字寫明或者講明囉，咁樣同呃客有咩分別呢？
一碗冇料嘅味精粉，居然要40蚊一碗，又貴又唔好食！咁唔老實，冇下次囉！！

落咗好多日雨終於放晴，適逢復活節長假，決定嚟東龍島行吓。

環島行足一圈，上埋山頂再落返露營區，係時候食個下午茶，於是去假日士多搵位坐低。兩個人叫咗一碗紅腸魚片麵($26)，一碗水餃麵($34)，整多罐冰凍忌廉($8)解渴。

是日東龍島好多遊客，士多生意極好，所以都等咗幾個字先有麵食，

不過唔緊要啦！放假就係要relax吓嘛～唔使咩都趕。

紅腸魚片麵賣相唔錯，排得靚靚仔仔。紅腸幾厚，魚片彈牙水餃係自家製，有冬菇餃同"九"菜餃。個人鍾意冬菇餃多d，冬菇夠香啊。另外麵底都係出前一丁，絕對唔欺場架。唔食一丁可以揀米粉。

其實嚟假日士多，味道都係其次，最重要係老闆娘同店員嘅人情味。

雖然人多做到踢晒腳，仍然態度一流，好好心機教我地行邊條路會落到燈塔。

仲介紹船家俾我地添(for平日入島用)。睇得出佢地好用心經營小店，亦用心對每位客人。

而且離島士多嚟講，價格絕對相宜，絕唔會劏到一頸血。

下次入開東龍島，大家都不妨嚟假日食碗自製水餃，感受吓小店嘅人情味啦。

（先聲明：呢篇食評係食完近兩個月先寫，記憶有限，只供參考～）

好耐冇嚟過MIKIKI了，咁啱去附近sportsoho攞完野，就嚟醫肚。
鋪頭幾多沖繩style裝飾，例如shisa (獅子)。
沖繩菜最出名係苦瓜炒蛋同海鮮，而呢度嘅特色菜就似乎同沖繩冇乜關係。

叫咗個芝士炊飯鍋燒定食（豚肉），有得揀湯底，辣同唔辣任君選擇。
有好幾塊豚肉，亦有加入大量蔬菜，湯底清甜，健康之選。而呢個芝士炊飯鍋既特色呢，就係食晒d餸先，到時湯底已經蒸發得七七八八喇。
趁機將幾舊飯連芝士倒入鍋入面再煮，最後就會變芝士撈飯喇！
好幸運地，第一次嚟整就已經成功，1 take pass!!!
食完個清湯小火鍋，再食個芝士味濃厚嘅撈飯，感覺幾唔錯！芝士好香但又唔會太漏

另外跟餐有杯熱蜜桃茶，太甜喇。寧願飲熱水／熱茶好過。

食飽咗，店員話而家做緊推廣，會送甜品！
好快就上埋枱，簡直係冰火交融～上層係凍冰冰但香滑嘅雲呢拿雪糕
下層係炸沖繩包(?)，外面香脆，裡面軟綿綿，雖然係炸物但唔會好油
兩層一齊食好正呀～幾飽都要食晒佢！

每人只係六十幾蚊，又正餐又甜品，大滿足～～

是日諗住同兩老試吓柏林人，但用餐經驗唔係咁愉快。

首先由於成個商場仲有幾間鋪裝修緊，要聽住裝修聲同聞住沙塵味咁食飯。
（唔好問我點解隔離有裝修仲入去食，我地入座時D裝修未開工架！食食吓先開始！）

然後間鋪係收唔到電話嘅！見到餐廳有WIFI，諗住問職員攞密碼，佢話部機(ROUTER?)未搞掂，冇！
大家知對現代人嚟講，電話／上網係幾咁重要架啦！食餐飯搞到與世隔絕咁。

埋單時問係咪有得儲埋ASIAMILES，又係冇，因為部機未SET好！
亦冇得後補返MILES！感覺蝕咗好多囉！

平心而論，個別職員態度幾好，野食質素就好一般。
但間鋪好似咩都未準備好就開張咁，黃埔咁多食肆選擇，我就唔會再嚟喇。

終於等到壁球中心間Cafe裝修完，就同附近返工嘅友人試試。
lunch有意粉餐同商務午餐，叫咗個商務午餐B：鴨胸配意粉，冇另外加錢要野飲。先黎意粉再黎湯，咁唯有講咗意粉先啦意粉用蕃茄醬煮，幾好味，不過份量太少喇
鴨胸有四大件，厚切，冇雪藏味但醬汁偏鹹，食完好口渴。
西蘭花有少少牛油味，唔會白烚咁寡。湯係足料既西式薯仔蕃茄湯，薯仔蕃茄都打晒蓉，幾好味
但如果食意粉餐要另加$10先有，略嫌貴。

餐飲都有段故既。話說想問個講英文嘅店員呢度咖啡係咪即磨，
佢答呢度冇咖啡，得奶茶…咁點解餐牌有咖啡嘅……
冇咖啡飲，就想叫店員俾杯水，佢問係咪要汽水，我地話暖水啦，點知佢上完湯就算，成餐飯冇水飲……
又食唔飽又口渴，最後要去附近咖啡店買咖啡返公司……

總結：呢度食物質素尚可，但份量、選擇同服務方面有待改善。

重陽假期，諗住登高前入元朗食個飯先，見呢間好評幾多諗住試吓，點知食到一肚氣！

十一點半去到，覺得早餐餐牌唔吸引（一個English breakfast成舊水？！）
店員話可以等到十二點先落單叫午餐。
準時十二點叫個蘑菇漢堡（$64加一），跟餐湯同餐飲。

先上麵包，烘得熱辣辣，可以點黑醋或橄欖油，味道ok嘅。
上包時店員話轉頭俾餐湯，結果食完個包等成個字都冇湯，要催先有。原來店員唔記得咗。

食完包飲完湯，見其他遲過落單我地嘅客人都已經食緊主菜，我地係度齋等。
最後上主菜既時間係12:35，係落單後35分鐘！！！
嘩，用咁多時間煮，真係要食真D個漢堡係咩味呀。首先，一上菜已經呆咗，齋睇餐牌「蘑菇漢堡」以為好似某高級快餐店咁，係漢堡扒+蘑菇嘅配搭；
點知呢度既蘑菇漢堡，係冇肉既！餡料係兩塊厚蘑菇！今餐無啦啦變咗食齋…點解餐牌唔寫明素食呢？
然後成個漢堡，除咗塊只溶一半嘅芝士外，其他餡料都係冇味架！「清淡」到呢～～～
成個餐最有味係薯條，不過支茄汁係少到就快唧唔出嘅（大家睇相都會估到），而且未食完就俾人成支收咗，完全冇問仲需唔需要！

餐飲方面呢，飲即磨咖啡係要+$3嘅，老實講完全唔抵，大把Cafe、西餐即磨唔加錢啦！
不過飲完就覺得成餐最滿意嘅，反而係杯咖啡囉。
咁嘅價錢係元朗食午餐有大把選擇，呢間野冇下次呀！