朋友推介天后嘅叁不館，懷舊風格嘅邊爐店，入到去枱同枱之間擺得好闊落，地面乾淨唔痴笠笠，first impression好好～ 醬料選擇幾豐富，必揀自家製沙爹醬同葱頭油，加咗葱頭油個醬即刻香十倍！ 揀咗雙拼湯底，蕃茄清清地幾舒服，沙爹香濃但唔會過鹹。 手切牛頸脊爽滑好食，蔬菜都唔貴又新鮮，海鮮擺盤靚又冇沙，重點推介蝦膠油炸鬼，出面好少見，好有特色。 仲有必食嘅就係即炸響鈴喇，一啲都唔油，吸滿沙爹湯就更加好食。

平時好鍾意食泰菜，但就唔想去九龍城啲舊餐廳食，畢竟環境都好影響成個用餐體驗！今日揀咗新城市嘅Here Thai Market，停車場一上嚟就見到，而且裝修光猛又有熱帶風情，好鍾意～ 嘢飲唔會過甜，菊花冰有用個竹製嘅飲品套裝住好有心意，而椰青係冰鎮住咁上桌，涼浸浸超爽 食物方面船河嘅湯底會係比較舒服唔太鹹，炒闊河粉就相對惹味啲，個人鍾意炒河多啲🤣🤣 串燒豬頸肉個汁係重點，去除晒油膩感仲有魚露香茅嘅香味 芒果糯米飯煙韌好食，芒果量多又夠甜，推介～

之前嚟過Harlan’s參加朋友婚宴，已經對佢嘅無敵維港景心心眼，所以今次就自己訂枱同另一半嚟個fine dining~ 晚餐有四道菜同六道菜套餐選擇，後者前菜同主菜可以各揀多一款，一場嚟到我地就叫晒兩款套餐，咁就可以食晒成個餐牌嘅嘢食😍😍 餐包可refill，夠熱夠脆 頭盤藍龍蝦沙律加入話梅汁好開胃，香煎北海道配上脆西米夠特別，龍井煙燻鵝肝去晒啲油膩感同內臟腥味，就算平時唔太食鵝肝都覺得眼前一亮。 餐湯係牛肝菌湯，侍應會先送上裝有菇菌嘅湯碟，再倒入湯，湯打得好幼滑。 主菜紅蝦扁意粉醬汁香濃蝦肉鮮甜，西班牙黑毛豬腩入口即溶，配埋紫薯蓉平衡油感，牛腹扒肉香吸引但牛肝菌薯泥更有驚喜。 甜品賣相精緻，紅豆雪糕冰感較重，綠茶慕絲食落唔甜好啱女仔～

朋友推介呢間omakase，離Time Square唔遠，位置都幾方便。 師傅一人主理，環境雅緻，一共10個座位。 今晚師傅精選唔少春日食材，先上頭盤，黑豆嘅甜好襯托到其他食材嘅鮮味，烏魚子配蘿蔔呢個食法幾特別。 同其他omakase唔同，食完開胃前菜先飲碗大蜆湯，來自三重縣嘅蜆肉鮮甜無沙，師傅話個湯冇落一粒鹽但都好夠味。 刺身有真羽太、縞鰺、白蝦、赤貝、白見貝同埋水八爪魚二食，樣樣都好新鮮，最深刻係水八爪魚嘅爽脆吸管，配埋勁度十足嘅wasabi漬，非常好食👍🏻 炸沙甸魚魚苗作為間場小食幾有趣，脆到好似薯片咁～ 煮物有魚肉同大根，大根煮得好入味 海老真丈冇平時啲蝦丸咁熱氣，但食得出真材實料鮮蝦味 壽司有針魚、金目鯛、平貝、櫻鱒、池魚、關鯖、魷魚同拖羅等，最後亦有海膽手卷，當中關鯖最有驚喜，鮮甜嫩滑程度完全扭轉平時對鯖魚嘅印象。 麵豉湯唔會過鹹，亦有好多蔬菜。 甜品有士多啤梨同芒果芝士蛋糕，蛋糕唔甜，面層係芒果蓉好清新👍🏻 呢間omakase定價合理，師傅友善健談，係聚腳好地方～

嚟過flames幾次，貪呢度泊車方便，食滿$200已可泊2小時，同埋餐牌啲選擇真係幾啱食，次次唔重覆都仲有嘢想試🤣🤣 呢度嘅沙律冇得輸，沙律汁清新開胃，今次叫咗seared tuna呢款，吞拿魚份量多到係平時啲餐廳嘅double😂😂😂就算多啲人食都ok 小食雞翼非常香脆，好似加咗少量麵包糠去炸咁，好好食～ Pasta揀咗蟹肉penne，個蕃茄忌廉汁好creamy，長通粉軟硬度適中，掛汁力高。 同埋叫咗杯港式奶茶奶昔，有香濃茶味但下次可叫少甜～ 佢呢間仲有戶外用餐區，就算唔食飯嚟happy hour chill下都正～

唔知關唔關事，但窩子整窩夫真係有一手，非常鬆脆又有蛋香，今晚叫咗個手撕豬腩窩夫三文治，嚟到真係嚇親，超！大！碟！平時啲cafe只會俾一半份量，呢度無論窩夫定手撕豬嘅份量都超多😍😍😍 欣賞呢度嘅手撕豬非常juicy，加埋蕃茄一齊煮冇咁膩，配埋窩夫一齊食真係食唔停口 最近窩夫新推出咗款酥皮pizza，幾得意似係用春卷皮摺咗個碗咁，脆卜卜，我地叫咗大阪燒口味，亦都有濃香照燒汁同大量椰菜👍🏻 最後叫咗個拿破崙同杯mocha，mocha香濃拿破崙嘅custard cream亦都夠滑，不過食得落的話我會建議叫多份甜味窩夫，因為佢個窩夫實在太正了🥹🥹🥹🥹

食西餐好多時候小店會有更大驚喜，今日放工揸車嚟到Quayside食Mano，餐廳面積唔大但座位擺得好闊落，裝修亦都雅緻舒服。 今日專程嚟食佢嘅手工pizza，見有成10吋咁大我地就剩係再嗌多個沙律同tiramisu share 沙律揀咗burrata cheese蜜桃火箭菜沙律，cheese好creamy, 火箭菜嘅olive oil dressing好香，加埋酸酸地嘅車厘茄成個配搭無得輸～ 手工pizza我地揀咗carbonara口味，醬汁好食餅底又夠脆，驚喜位係每隻蛋都係流心，薄餅邊都非常煙韌。 Tiramisu嘅水準都唔錯，好creamy，手指餅夠濕潤但唔會去到水浸level🤣

Chatterbox分店越來越多，仲開咗間喺airside! 呢間分店開喺mtr層超方便，入面嘅座位都幾多幾闊落，裝修亦係一貫嘅南洋風情。 個人好鍾意佢個喇沙湯底，今日嗌咗雞肉喇沙米線，雞肉係海南雞嘅質地超嫩滑，仲有超索汁嘅豆卜，連炸魚片都好好食😆😆 海南雞飯當然係呢度名物，可以揀雞胸，啱晒女仔食，油飯夠熱好香，仲有碗湯跟埋。 夜晚出街食都係想嗌碟菜，冇諗過呢度嘅小棠菜炒得咁好食，好多蒜蓉每條都好爽脆，推介～

We love trying Indian restaurants in Hong Kong and Chutney is our favorite. With nice interior decors and nice services, Chutney serves great food and beverages. We are not super fan of alcohols and the staff recommended us one cocktail with less percentage of alcohol. And it turned out taste soooooo well! Usually cocktails are found to have artificial tastes of different syrups but in Chutney this problem doesnt exist. To start with the beetroot and broccoli-cauliflower hybrid veggie tartare was a fresh pick. The sauteed prawn was a bit like Chinese style but of course it tastes absolutely amazing. As for the main course we love the curry and naan here. The naan is soft and served hot. I love the coconut-based curry with barramundi and my husband deemed that the tomato-pureed one with Indian cheese tasted ever better🤣🤣

九龍城呢間茶餐廳企理乾淨，裝修仲唔差添，今晚嚟叫兩個小菜食，包例湯、白飯同熱飲，每人～$80到，價錢合理。 例湯幾香濃，呢啲天氣飲碗熱湯真係即刻舒服晒。 叉燒炒蛋調味唔重，係家常嘅味道，有時出街食嘢最怕重油重鹽，呢度就唔會有呢個問題🙌🏻 蜜椒薯仔牛柳粒牛嘅份量唔少，薯仔好酥脆，加埋蜜味醬汁送飯一流。 比起傳統茶餐廳呢度熱飲選擇較多，仲要唔駛加錢，今晚叫咗杯熱嘅韓式紅棗茶，甜甜地幾好飲👍🏻👍🏻 紅豆冰唔算太甜口感幾幼滑，都係唔錯嘅選擇