即興黎堅尼地城食飯。19:00見到呢間勁多人等位，佢係Michelin Guide 2018-2021，就等埋一份試下係咪好好食。 等左1個鐘多d終於可以入坐。我們叫左個大澳蝦乾肉餅煲仔飯、香芋油鴨煲、魚湯鮮菌浸豆苗、清蒸筍殻魚，蒜蓉粉絲蒸蟶子 餐廳標榜自己無味精，食落都真係無咩味精既。個湯都算甜，鮮菌唔會話落牛油炒過，無咁肥，份量都多。 個蝦干好香，佢既煲仔飯應該係招牌，食落都真係好正。佢既飯係粒粒分明，有d煲仔飯個水米比例唔好就會太爛，佢係剛剛好；因為水米比例ok, 加上火喉既掌握不錯，到底既飯焦都好脆口（我試過食d爛飯既飯焦好痴牙），同埋佢真係有焦香，唔係燶左會苦，佢個煲仔飯既技巧真係好好 想食下貝類，得返蟶子，$60一隻，黎到見到係蟶子皇，價錢都算公道，洗得乾淨，大隻又甜，好食 我由細到大食既油鴨/臘鴨都好咸又乾爭爭，所以我一直都覺得只係拎個咸香吊味。見佢有油鴨芋頭煲覺得d芋頭應該好香好食，就叫左個。點知黎到個油鴨一d都唔咸，雖然較硬身（始終係風乾野），但都可以食啖啖肉。推返左由細到大油鴨係咸到pk 即觀念，我覺得都真係好好食。 筍殻最後先黎。平時少食呢種魚，$198我覺得價錢都可以接受，叫左條。佢蒸到超滑，魚皮無鱗，啖啖肉勁大條。我覺得蒸魚最緊要就係唔好過火，唔好過咸。佢2樣都合格，正 總結我覺得佢價錢算公道，真係無味精，份量算多，無茶錢，無加一，味道好食。等一個鐘我覺得都ok

星期日的下午一個人午餐，自己一個又有時間時我都會去cafe, 一來我喜歡嘆咖啡，二來可以hea耐d。響希慎見到有間未試過既cafe, 都幾開揚，就去試下。 去到都好多人，但呢間餐廳大部份都係bar檯，得3張正常高度的三角檯，自己一個通常都係bar檯，因為近窗的位置已滿，我坐左響貼住廚房水吧既吧檯。不過我估可能佢無考慮過檯既高度同張bar凳既高度，檯與凳的距離太近，其實坐在上面很難食野。一係wui 到低，一係就拎住隻碟食，如果唔係隻頸會唔舒服，或者容易彈起d汁整污糟d衫。 去到想叫野食，自助服務，不過我係靠個八達通機去識別收銀既地方，而且佢話係2間餐廳，食物同飲品要分開買，我覺得呢點比較有趣，但都覺得幾麻煩，尤其是自己一個，要走2邊去拎野食。 我最想食既龍蝦意粉賣哂，得返卡邦尼，叫了個卡邦尼同latte。 個卡邦尼比較淡口，但會食到少少橙花香。佢既煙肉好似炸過，不過我個人唔喜歡寬條麵既質感，如果佢唔係寬條麵可能好一點。咖啡都幾香，飲落fruity, 都ok。 環境光猛，無乜人理。想自己me time也不錯的，但cafe都係想坐得舒服去hea, 如果計舒服，我會鍾意4/F果間多d

早2星期經過，見到好多人排隊，又有象拔蚌刺身，昨天打算同朋友食老公生日飯，就即刻book左。佢$258有9款海鮮，再加打邊爐任食，很高性價比。 去到落單時，店員說今天沒有象鼻蚌，只有瀨尿蝦，心諗最重要想食既野無左，但都係生日免費送，也沒法，照要。 套餐內的蟹，又話無，變左貴妃蚌，心諗，價錢差好遠喎？但都坐低左，唔緊要啦。再黎套餐寫有元貝/蟶子王，但原來只有元貝，帶子/象鼻蚌仔，但原來又只有帶子。如果你個menu咁多野無得揀，或者你根本無果樣海鮮，你就唔好寫出黎啦？我覺得menu好多寫有選擇但原來都係無既，已經覺得麻麻地，但算啦，雖然海鮮差d但個價都仲係高性價比既，照食。海鮮中規中矩，都算新鮮。但係size 上，就真係一般。 食完轉自助打邊爐，食食下到22:30開始比人催，我以為佢收00:00，我們20:15去到食尾場，都唔滿人，以為可以直坐到00:00，點知店員話：不是幾點收工的問題，係你只係食2小時而已。噢！原來是只有2小時，完全overlook左，因為個2小時完美地同個「任食」logo融合左，但你都已經無人入黎，食耐左係咪都可以呢？你話你已經過左收工時間我就唔啱啫，但你仲開住門架喎？好啦，唔緊要，我們快快手食。本身加左$20任飲，那我仲食緊，咪去拎野飲，點知比個店員鬧，話你已經埋左單，唔可以再拎野飲。如果你係以埋單時間計算我可唔可以拎野飲，那我是否要遲d先可以埋單？你做得任飲，多一罐有幾多？但又小器人地過左時間唔想比人拎野飲，一罐要幾多錢？我比返你好無？但你咁既態度咪做衰自己個朵，我係唔會再返轉頭食，我亦唔會推介比朋友食。我寧願比多$50-$60，另一間海鮮又大又靚又新鮮，重點係個老闆人好又不拘小節。服務態度對餐廳黎講真係好重要，你間餐廳又細又逼，海鮮又換d平既無得比人揀，仲要態度差，你覺得憑咩呢？ 所以而家咪星期六都唔需要排隊囉～ 仲有小分享，個餐廳廁所門係壞既，我個男仔朋友要幫佢安裝返度門先去廁所，女仔朋友直頭唔想去～ 大家要小心了

朋友想食好耐, 諗住同佢一齊試下。我們無book位, 原來佢有指定用餐時段, 但佢又唔係自助餐, 佢既指定用餐時段令個餐飲體驗唔多好。 我寧願佢任何時間入座都係限食1.5小時, 好過佢指定8:30交枱。 我們去到7:30, 佢話只可以食1小時, 我同朋友食野都快, 諗住食完轉場啦, 但佢要30分鐘才出哂2個main course, 實際得30分鐘食野, 真係好唔夠時間。 不過裝修文青風, 食物質素都ok, 係比較多炸野, 小食全是炸類, 無叫啦~ 餐具都靚, 西班牙風格.... 打卡係好既, 如果用餐時間可改善更好, 話哂都唔算平。

以前男朋友去美國出trip時會到burger店食美式漢堡，今日男朋友想食burger，黎到位於soho的Burger Circus。食burger個個都諗住食牛，但男朋友本身唔食牛，所我們點了炸雞堡同魚柳堡。佢有combo, 加$50左右多一杯野飲同薯條～ 黎到見到佢個炸雞堡好黑，諗住佢d油可能用左好耐，亦預左佢既肉有d hai.... 點知原來勁嫩滑，佢個外表同佢既口感完全唔一致... 而且cheese都濃郁，好好味～ 個炸魚就無咩特別，但塊魚既質感都幾好食，都ok既。佢既飲品唔止汽水，仲有奶昔，lemonade, 檸茶，soda~ 配合返港人口味～ 不過一讚佢既檸檬茶無咩糖，唔使叫少甜。餐廳裝修係美式快餐格局，加上用環保紙飲管，很不錯

星期日的夜晚，很多餐廳食肆一係好多人，一係就因為無上班族而好早收。但位處於金鐘呢間既 bricklane係一個例外。金鐘的食肆假期通常都好早收，尤其比較經濟既大家樂，canteen，甚至係 super sandwiches都無一幸免要8:00pm收工。但呢間中信大廈既 bricklane罕有地收11:00pm~ 而閒日更收12:00am~ 為我呢d唔想同人逼又想食得舒服既人提供多一個悠閒的空間。
當然bricklane既價錢同大家樂比未必好實惠~ 但一個有露天望夜景既地方~ 一個普通既 all day breakfast (咩都有)都係$118，呢個價錢同出面大街無景睇既小品 cafe既 all day breakfast差不多~叫左杯 Strawberry tea latte~ 味道好似士多啤梨奶昔~ 都okall day breakfast everything 有炒蛋，薯餅，紅椒多士，德國腸，煙肉，蕃茄半個，火腿，煙三文魚，沙律菜同茄汁豆~ 不過對於一向食得清既我最大問題係過咸~ 如果可以無咁咸就 perfect~ 最後叫多個白酒香草蜆意粉~ 佢既蜆大隻同幾肥~ 個味都ok~ 落左檸檬感覺無咁咸同清新d~ 但弊在d蜆未吐沙~ 有好幾隻都好多沙....
總括而言我覺得呢度既環境係ok~ 價錢配呢個環境可接受~ 食物當然有待改善，不過集團式黎講算係咁。最近做緊復活節推廣~ 食單點食物有機會參加抽獎，可以有機會有免費 table for 2~ 希望我有份中啦~

今年的生日飯，諗唔到食咩~ 2015年5月由西班牙回來後也沒吃過西班牙菜，於是同家人黎這裡試一試~ book左晚上8:00六位，一入去就坐低，唔使等。我們望了望餐牌，其實這裡的食品也頗貴~ 份量也不算多，以性價比來說不算高~ 我們先點了一Jar Red Sangria ($288)~ 有6杯~ jar入面都有好多水果，不過呢~ 個侍應倒酒技巧需有待改善...我們點了: 黑松露薯條、西班牙蛋餅、西班牙海鮮飯(2人份)、芝士龍蝦忌廉意粉、牛柳配鮑魚沙律、黑松露忌廉蘑菇飯，最後唔夠再加個西班牙豬仔脾~ 個黑松露薯條個醬幾好味~ 而且薯條即炸，好脆口~ 當然都好熱氣...~  之後黎個西班牙蛋餅就扣分啦~ 其實佢個蛋餅入面係蛋汁，個味都唔錯，但就多蛋殼囉... 咁0岩我界左6份，D蛋殼集中響其中一份，有成半隻蛋既蛋殼響度，我媽媽食左勁嬲，即時同個侍應講，初時侍應個態度懶懶閒咁話幫我們反映，以為佢唔會做D咩，點知有個女仔走出黎講對唔住，話會送個窩夫比我們，同埋全單9折。果下我們係有驚喜既~ 因為佢肯作出賠償之餘，個賠償比我們預期既多~ 所以原本嬲嬲地，而家掉返轉想讚佢地服務好~ 不過呢... 如果個廚師小心D就唔使咁囉~飯意粉因為都係用忌廉煮，所以比較漏，龍蝦可以食既部份唔算多~ 有半隻，算係咁啦~但個西班牙海鮮飯比我們想像中辣，如果辣度降低少少就好D個豬仔脾超好味~ 啖啖肉，唔會太咸，焗得剛剛好，肉質唔hai，反而呢個最好味~最後食埋個免費既mix fruit waffle，呢度既窩夫都出名，果然好食~ 佢有鮮無花果同桑莓，呢D都係窩夫中較少見的生果，所以都抵食~ 呢個原價好似都要$1XX。我們免左個窩夫打左個9折，合計每人都要$250~ 如果份量大D，會抵D~

今天同同事Farewell lunch，每每總是去飲茶的我們想來一點不一樣，於是找到這間吃日本菜式的西餐廳，便進來試試。

我們一早已經book左檯，所以都唔使等位。lunch set價錢介乎$78-$128，套餐包一客沙律或餐湯及一杯飲品。我叫了一客煎魚柳配火龍果汁，其他同事叫了牛扒、冷烏冬及黃薑雞脾仔。這塊應是龍利，配上火龍果汁，甜甜地，幾得意。另外佢先響碟面上已淋上醬汁，之後放魚柳上面，再淋多次醬汁上面，這樣醬汁比較均勻的沾在魚柳上，很體貼。而旁邊的薯蓉也很好吃，應落左少少黑松露醬及開心果，再加左少少忌廉或牛油煮，雖然好吃，但罪惡感大增... 

另外同事們的冷稻庭烏冬我感覺一般，因為佢既醬汁唔係分開上，比客人沾著吃，而是撈埋落果碗烏冬入面，有點敗筆。而黃薑仔$92但有5隻，都OK，幾飽。可惜沒影相....

而且佢lunch免加一，都算OK啦~

今天男友忽然想吃潮州菜~ 當時在中環的我們最近搜尋到上環有潮州菜~ 坐叮叮去試~

去到上環文娛中心，往上走到皇后大道中，跟巴士綫向前走約5分鐘，就見到有3個鋪位的尚興。這裡是很老式的中餐館，侍應也是上了年紀的，茶壺也是鋁質那種舊茶壺。我們走上2樓坐下，看了看餐牌，因為得2個人，點了個芋頭香飯煲及潮州拼盤已飽到不行了~芋頭香飯煲有芋頭、蝦米及五花腩粒炒香，一打開蓋已勁香~ 仲有少許豬肉及蔥花，好好味~ 而且份量都多，足4碗飯，好飽~本身餐館沒有拼盤的，話想拼要自己拼。我們想吃鵝片，又想試下墨魚及豬大腸，侍應話要$180，我們話OK啦~ 事後我估計佢既計法係: 最貴的用例牌價+其他半份價格: 一碟例牌鵝片$120+半份墨魚$30+半份豬大腸$30=$180，所以呢如果大家想自己拼其他野可以試下用這個計法估算大約價錢~
份量都算ok，唔算太少。不過較咸，點些醋好吃些。這裡茶芥$5/位，前菜$10/位，仲有加一，不過埋單時有糖水送，而且侍應態度也不錯~ 又唔會趕你走，整體感覺都不錯的~ 

這天原本想去這條街旁邊的一品雞煲與家人慶生的，但一品實在太多人，未齊人又唔入得，又要限時限刻，所以改了去旁邊的餐廳吃飯。這間泰國菜不用等位，又可容納6人一檯，就這間吧!

入內，餐廳佈置就是典型的泰國餐廳，會有畫像在牆上的那種，內在的檯也算大，所以空間感欠奉，坐得較擠逼。我們有個蛋榚，這裡不用收切餅費，可以幫忙雪蛋糕，讚! 

我們看看餐牌後，點了幾道在泰國餐廳必食的菜式︰泰式生蝦，蝦大大隻肉質又爽脆，其實都好好食! 不過呢，看到有一隻的蝦腸挑得不夠乾淨，而且醬汁太辣，如是嗜辣的朋友應該會喜歡。豬肉唔算"hai"口，配合生菜包中和濃味感，加上辣椒碎、香茅等，味道不錯。但是這度菜也太辣，本人一家也不是太吃得辣，這裡的辣度已是極限，如辣度略低會更好一點。這個蠔仔蛋是推介，熱辣辣上檯，蛋和蠔的比例很好，不會有太多蛋而沒有蠔的情況出現；而且蠔大大隻，絕不是"蠔仔"，配上泰式的粗芽菜墊底減少油膩感，而且又唔辣，這個很好吃~! 這個馬拉棧炒椰菜苗，在別的泰式餐館吃是一個個球形的，這裡的切到碎哂，上桌的賣相不夠好。而且炒得略嫌過火，所以不夠嫰。而且這度菜也是辣了點...  這個泰式炒粉絲，餐牌上已顯示是2隻辣椒，應該頗辣，故下單時已叫侍應走辣，點知侍應忘了跟廚房說，一吃就辣到咳，即時叫人換左佢，完全食唔到.... 那個侍應都說自己忘記了，就幫我們換過碟走辣的，服務都OK啦。其實這碟餸也不錯，海鮮多過粉絲，而且粉絲不算油膩，都幾好食!我們點了個蝦餅，以為是圓圓一餅的形狀，點知是一條條的~ 這個很熱氣，但內裡有些蝦粒，而且有口感，不會太爛，又彈牙，這個也不錯~~ 最後的泰式炒飯，味道沒什麼特別，加了些臘腸，旁邊有些肉鬆及花生魚干比你撈埋食，但味道略咸了點。最後還有個綠式的大菜糕送做甜品，我們吃蛋糕時又幫你執碗又比碟你，都唔使收切餅費，這裡的"性價比"也幾高的! 這裡的食物不錯，只是辣度調低一點客路會更廣~