上星期六,我嘅好姊妹完成咗佢嘅人生大事--結婚。今個星期我哋姊妹團出嚟食飯慶功加慶祝生日. 呢間餐廳我之前都試過,不過已經成年前啦,新娘子一早訂咗位,所以去到就有枱唔使等。

間餐廳裝修過,成間依家以木色為主,格調唔同咗。我咃坐係酒吧前嘅位置, 見到前面有個蛋糕櫃放咗個大蛋糕,就趁去洗手間時望下,原來係個結婚蛋糕,好靚同幾精緻。

坐定定就叫嘢食啦, 首先我咃一人要咗一個湯, 我要咗南瓜湯,味道好香好滑。跟住當然係必食嘅頭盤蟹餅, 呢到嘅蟹餅都幾大份,食落好足料有好多蟹肉,而且唔係伴他他醬而係伴個酸酸地嘅汁好開胃,仲有青蘋果,好夾唔覺得膩,保持到水準。輪到主菜,我哋叫咗兩個Main同三個Pasta, 主菜係牛柳拼大蝦同黑豚肉卷南瓜意大利飯,芝士蝦好濃味好爽口，牛肉約六七成熟有牛味亦夠淋， 伴碟嘅大蘑菇我最喜歡!
黑豚肉卷並不是豬扒， 係半肥瘦，我就麻麻， 不過D 姊妹就食到 lam lam脷！意粉方面就係大蝦薯仔粉,蟹肉長通粉同Carbonara， portion 好大但有水準，不過都係食唔晒!最後雖然好飽但都要甜品, 因為同行有位姊妹下星期生日就當然慶祝埋啦, order咗軟心朱古力蛋糕同芒果拿破倫, 我哋同個小姐講有朋友生日,佢哋就係個甜品到加蠟燭,醒目。
軟心朱古力蛋糕即係心太軟, 有好濃朱古力醬流出嚟,唔太甜好香酒味。芒果拿破倫就食得有啲論盡,因為太脆一切就散晒,但有好多custard,唔會覺得乾爭爭。

同老公拍拖11週年紀念，當然要搵間好餐廳食餐好啦，老公想据扒，知道呢間扒房好出名，就打去訂枱。
接電話小姐好有禮貌，仲主動問我要慶祝咩節日，佢話會有個甜品送返俾我哋，好細心。之後仲有email confirm booking。

當日去到，佢哋安排咗張窗邊枱俾我咃，雖然無海景但望住個太空館都好好。首先就當然要開支酒慶祝下啦，之後就見到個好大個麵包送上，係洋蔥包，好香好鬆軟，食到得唔到口。個Menu都係tailor made會有印上Happy Anniversary架,可以留為紀念。

頭盤我哋仍然叫番我哋至愛吞拿魚他他同蟹餅，先講下個他他，呢到會跟幾塊薄脆俾你一齊食，幾特別。新鮮吞拿魚同牛油梨伴薄脆，感覺好好。到個蟹餅，都好新鮮但略嫌配沙津醬有少少失色，整體都算好。

終於到主菜，牛扒出場，我食唔到太多所以就叫咗個８oz牛柳，老公就叫１６oz牛扒，見到都覺得好juicy，有肉汁流出嚟，好香炭燒味，肉質好嫩，好味道，結果兩個都食清晒。

最後甜品出場, 梳乎厘, 仲同我咃寫咗字係碟邊, 仲會同我哋影張相放入咭到送俾我哋,入面係全體員工簽名,太窩心啦!我哋自己都叫多個朱古力慕思,好滑,朱古力味濃。

一餐浪漫又窩心晚餐!

同朋友行街街，週圍搵地方食飯，經過K11就入去搵食，睇緊衫時忽然見到有間餐廳，門口都幾難搵到，見仲有枱於是就決定試呢間。

因為我哋無訂枱所以要坐室外，好彩唔太熱，但有陣廚房油塵味，全餐飯就食聞住油塵食。至於食物，
我哋無叫SET，叫咗頭盤海鮮餅，一個帶子意粉同牛扒。海鮮餅唔清楚有咩海鮮，味道一般唔難食但又唔算突出。帶子意大利粉份量好少同得一粒帶子，雖然都幾大粒但好似唔抵食。牛扒成數過晒同有啲鞋，感覺唔好。

整體而言俾我印象麻麻，環境食物都係好普通。

開番個ACCOUNT先發現自己無寫食評成年, 之前實在太忙啦,而家總算有番啲私人時間,要一口氣寫幾篇。
雖然過咗結婚紀念日兩個幾月,但始終未好好慶祝過,老公就訂咗枱食餐好嘅。

呢間餐廳情調都幾好,不過有少許嘈可能星期六啦。因為我哋訂9點所以都唔需要等。坐底就叫咗兩杯白酒飲下先, 然後就揀食物, 我哋揀咗吞拿魚帶子他他同蟹餅做頭盤, 主菜係兩人份量牛扒。

首先講下個吞拿魚他他, 好鮮甜,好清新, 下面伴有牛油梨,好味道, 個汁酸酸地好醒胃。跟住就試蟹餅, 感覺一般,唔會有太大驚喜. 食完兩個頭盤都飽飽地, 一見到個主菜即時嚇一跳,因為都真係幾大件。

牛扒有幾款汁伴食,有黑椒，蘑菇同燒汁,可以一次過試勻。牛扒我哋叫咗MEDIUM, 有少少過咗但都仲有肉汁同血水, 有好香炭燒味, 但份量都算大而且想留肚食甜品所以都完成唔到。

甜品揀咗蘋果金寶同一款朱古力,名就唔記得啦, PORTION唔大同唔伯太甜,所以都可KO晒。
APPLE CRUMBER暖暖地加球雪糕,正!
朱古力嗰款係MOUSSE咁,唔太膩,好滿足!! 

上星期約朋友仔食飯,見呢間有好多食物都啱食就 預早book咗枱. 去到唔使等就有枱, 無耐就有暖暖麵包送到.
頭盤我哋就叫咗Caesar salad, d菜好新鮮, 汁又夠.

主菜就試豬豚肉同肉眼扒, 個豬豚肉賣相幾靚,墊底嘅蘋果蓉好match個肉.
肉眼扒就普通d, 唔鞋.

當然唔可以唔食甜品, 見到有我喜愛嘅拿破倫,必點!!
好多士多啤梨同raspberry 係面, custard又唔太甜, 所以都唔會太膩.

整體氣氛服務都唔錯,好舒服!!

之前見雜誌介紹過又咁啱行到尖東就一於去試下, 去到時已經full晒,好彩咁啱有人埋單.
坐低後我哋叫咗兩杯德國啤酒,我本身就對啤酒麻麻,不過呢款酒有特別香味,唔太苦.
呢到有室內同室外,我哋坐係室外,吹住海風,幾舒服!!
食物選擇唔算多,大部份都係德國特色菜, 我哋叫咗一個小食同一個主菜.小食叫咗德國香腸配酸菜/薯仔沙律, 無咩特別,都好味.主菜當然辰試德國豬手, 份量好大,已經知道無可能食得晒.個豬手皮好脆,平時我都唔多食豬,不過呢個幾香口幾好味,仲有啲啫喱狀得意,感覺唔會太膩,但我哋兩個只可完成半隻,要包走.
呢到啲服務唔錯,會介紹食物又唔會要我哋order好多,知道我哋未必食到都建議我哋叫兩樣就夠.
呢丁係一個傾計飲嘢好地方!!

星期六同老公睇完戲就去呢到宵夜, 呢到真係越夜越多人,不過好彩佢哋有好多個鋪所以都唔使等好耐.
一坐低即刻叫嘢食, 我哋叫咗鵝肝,鮑魚,虎蝦,雞翼,牛肉同腎,除咗串燒仲會有其他小食,例如三文魚剌身,泰式鳳爪.

首先試店員推介鵝肝,鵝肝份量唔少配脆法包,好味!!跟住就係招牌虎蝦, 確實幾大隻仲係游緊水唔係死蝦,肉質彈牙有蝦味.再一人一隻鮑魚, 都係好新鮮.其實配菜不過不失,總括都幾好,價錢唔係平,可以接受啦.下次可以同多啲人嚟就可以試多幾款.