美味故事 (旺角)

誤打誤撞試咗呢間新開餐廳，餐廳所在大廈入口好細，好易miss。餐廳用QR code 自助點餐，不一定要用WeChat，過程簡單清楚。餐牌選擇唔多。


跟餐磨菇湯好足料，味道同質感俱佳。意粉好夠份量，排盤靚。煙三文魚好standard 味道，個意粉汁如果light 啲更好，而家食完感覺有點膩。

是日水果茶係荔枝茶，偏甜。

餐廳環境好舒服，可能客人未係好多都係其中因素。裝潢有舒適感覺。近窗三張「卡位」有咕𠱸，傾計飲野幾好。

三星台菜食堂 (沙田)

兩個人，6點入座食晚飯，唔使等位。但有點驚訝的是其實餐廳在這時間已經坐到差不多滿座了。

枱排得比較密，加上是商場入面開放式設計的餐廳，要傾計就爭啲，都係快快手手食完野就算。

野食上菜上得好快。招牌紅燒三星牛麵 — 牛肚牛筋牛腩都好入味同好腍；麵底揀了幼麵，我覺得質感麻麻地；湯底微辣，唔算好出色但都唔差。


台灣腸唔錯，味道幾好。餐廳跟蒜蓉不是蒜片，個人喜歡蒜片多啲，蒜蓉好難夾上腸片度一齊食⋯⋯


碟菜就好一般了，面頭啲炸蒜腍咗，質感好怪。


這樣的份量兩個人食有點唔夠喉，但又諗唔到想食咩，唯有轉場再食。

BHC (旺角)

Walk in 幫襯。餐廳應該未領到酒牌，未有酒供應。service 方面，有waiter 唔清楚menu 入面combo嘅細節，我地俾佢點到陀陀令⋯

Anyway 講番食物。上菜速度適中，食物似新鮮煮起。招牌芝士炸雞好味喎，我覺得我食過附近幾間。食落唔會一口炸粉，芝士夠，雞肉仲嫩，仲有肉汁，份量二人夠，食完仲唔會有油膩感。讚



套餐沙律用料新鮮，份量足，dressing 稍嫌太多，整體滿意～



炸芝士波同薯條都ok，有點炸過龍但唔算太過份，不過冷氣太凍所以所有炸物都凍得好快而變硬，有點浪費了原本的質感



值得一提，薯條上面coat 咗層蜜糖的，所以味道唔止芝士醬，而選用之蜜糖又唔會太甜，加分！

BRICK LANE Deli (沙田)

首先我覺得個領班係最冇禮貌嘅。你間店如果係半自助，你叫得個客自己去搵位，作為客人我入到店搵位又比你哋同事截停，感覺其實已經好難受。你叫我自己去搵位其實你可以順手交帶同事話呢位客人幾多位咁其實成件事會好流暢⋯

好啦，坐低左之後反而埋枱招呼嘅同事係有禮貌嘅。

出到去點嘢食，又見番頭先個領班。你如果唔係負責收錢你就唔好企係個收銀機前邊囉。我行到埋你你又話「我唔係做嘢你唔好煩我」喂大佬我點知你係咪做緊野㗎。而家我好想黎煩你咩？同埋我點知你哋有兩部收銀機呢。聽到咁樣對客人嘅態度我真係打咗個突。

食物質素方面，其實同其他店譬如尖沙咀店係爭少少嘅，可能真係因為整定左一部份啦，所以上菜時間好快。但係整體來講都唔算差。最有驚喜嘅係個龍蝦benedict蛋，定價$168 ，叫嘅時候係有少少猶豫，但好彩都冇失望。佢話係鹹蛋黃醬其實鹹蛋味就唔係好突出啦，反而最有驚喜係裏邊有青蘋果粒，同成件事有幾夾喎。龍蝦肉都唔少～


杯果茶就甜咗啲，如果冇咁甜清啲就好了。

三文魚benedict同其他店嘅質素差唔多


環境方面就好嘈，喺商場入邊冇辦法啦，想傾計就搵過第二個地方。

Green Common (旺角)

餐牌睇落係好吸引嘅，新派素食，款式多，好多野都想試。但食完之後嘅conclusion 係⋯ 無下次！

幫襯時人不算多，但等俾錢落單同等野食有點耐。期間限定主餐牌滿$100 加$1 可以試夾包一件。

野食賣相係好ok 的，但⋯


未來漢堡 deluxe - 所有材料好似各有各咁，仿肉餅好濃烈仿肉味。重點係，全個包+餡都唔熱。


炸羽衣甘藍 - 份量算多，炸得夠輕身，但用益咗嘅油係一大敗筆。


海南雞飯 - 全碟都係凍嘅，個飯有少少餘溫，但係好僵硬⋯ 味道非常一般⋯


最驚喜算係呢個$1 包，但都唔叫好食