咖啡百科館 (荃灣)

呢間cafe其實想去好耐，過星期六又好早close，難得放假就去試下。

唔係話太難搵，不過同地鐵站有一段距離，我諗太大約行20分鐘啦。


去到好大個牌寫住，真係very good




又一間工廈式cafe。

Cafe 唔係好大，枱大約5張，有一張特別大，可容納4-5人，其他枱就2-3人，有音樂播放，好寫意嘅環境。

店內擺放好多咖啡豆同咖啡用具







當然仲有個廚房啦






Cafe有唔同種類嘅厚多士，亦有coffee同甜品，好多選擇。我揀咗芝腿厚多士，暖暖地，芝士有少少熔，好好食而且又大件同平，唯一係燶咗d




榛子咖啡，唔駛再落糖，啱啱好，老闆強調唔落糖，叫我試下咖啡原味。特別一提，2位老闆好nice，好好人，好talkative，只可惜時間好難就。

南龍冰室 (銅鑼灣)

本人一向覺得港式茶餐廳有特別既喜好，無論係菠蘿油或者咖央，總覺得有一番情意結，而今次就要試下呢間特式既茶餐廳。

呢間餐廳分上下兩層，標榜既係舊社會(七、八十年代)既特式，所以全間餐廳天花板都吊住d舊式雀籠。地下層右側仲有d藥材櫃，的確，decoration好有趣。Environment: 7/10

由於樓下坐滿人，只好選擇樓上。坐低冇幾耐，揀食物時，突然有個男客人好大聲嘈，原來佢話有位waitress對佢老婆無禮(details就唔提，只係可以講，女職員話過客蠢，無論係點，都唔應該咁對客人，嘈完2位客人走咗)，我亦繼續點餐，見到佢有金磚套餐(炸雞翼3位/吉列魚柳/吉列豬(手八)/炸雞脾(其中一樣)配金磚(西多士)，但係waiter話賣哂(心諗有冇咁快呀)，只好揀沙嗲牛肉包配薯條(個menu有錯字)。等左超過20分鐘，仲係未黎，只係黎咗杯熱奶茶，於是問下個waitress，點知佢話我知冇哂沙嗲牛肉，下......茶餐廳竟然可以連基本既沙嗲牛肉都可以冇，都算喇，最緊要係冇點解唔一早出聲呢，結果最要改食豬(手八)包配薯條，應該等多咗10分鐘啦先上到個餐，真係未試過囉咁耐。包還可以，冇話咩特別好食定唔好食，薯條係凍既，我都唔係好明佢點整可以整到咁。至於杯熱奶茶，唔夠茶味，又唔滑，好一般。當我望到d 職員圍埋一齊食飯，但周圍枱係冇人執冇人理，心諗呢間係間乜餐廳黎架!!!!

Foods & Beverages: 2/10

Service: 2/10不過值得一提係，佢地個多士似乎幾好食，見到身邊客人既咖央，或者係呢間野既亮點(或者咋!!!)

Kuc Space (佐敦)

超過一年冇寫過食評，由於太忙既關係，只係不斷拜訪不停食堂，好多謝open rice既各位食家介紹。

今次要寫既係呢間Kuc Space，雖然細少，但係寧靜帶外國家庭feel，好like呢種感覺。聽講，呢間食店既員工係教會自願性既員工，的確難得。

店內白色既環境令人舒服，簡單擺設亦令人冇太迫既感覺，幾位外籍員工好有善，Service is Good。Serivce: 8/10

這裏既食物款式唔多，平時應該有幾款cake，carrot cake、chocolate cashew cake 同lemon cake，今日只係得lemon cake，咁我都冇得揀啦(有中東包食添喎)。個cake好重lemon味，真係名符其實既lemon cake，cake底有d濕濕地，應該係吸收咗d lemon，2件cake都係2x蚊，抵到爛!!!

至於飲品，佢地有茶啦，奶茶，朱古力，咖啡，茶有洛神花茶、黑糖薑茶、蜂蜜薑茶、玫瑰奶茶、檸檬薑茶、印度奶茶、熱鮮奶、英式紅茶、latte、Espresso、Cappuccino.......太多了，我揀咗latte。相信呢度唔係咖啡做主打，咖啡一般，如果下次再試，會考慮試試佢既茶，應該會好d。Foods & Beverages: 6/10

呢度既英式既佈置，枱與枱之間亦有足夠空間，唔太迫，光線充足，最緊要係響呢度既客人都好relax同寧靜，令人感覺好舒服。Environment: 8/10

呢度最特別係，人客食完野係要將用餐既用具要自己放回收集車(令我諗起韓國)

西村咖啡室 (銅鑼灣)

少人去唔代表唔好，少人介紹唔代表唔特別，西村咖啡室就係好特別。西村咖啡室係一間樓上cafe，地點離地鐵站不遠，不難找。

上到去只得西村先生一人，同友人去到以為要用英文溝通，點知西村先生既廣東話勁到呢，真係要俾隻手指公佢。聽起黎好好笑既廣東話同佢間唔中都會講既日文同英文，溝通完全冇問題。我最like係西村先生既笑容。令人都開心d。店內人客不多，環境寧靜，有d英式既Chair，而叫得bar & cafe，酒bar擺設當然唔少得，牆上放咗d長方形既架，雖然唔知係乜，但係整合起黎都幾靚。店內有好多款咖啡，所以有好多咖啡豆同咖啡儀器，專業!!!仲有既一個特別之處，咖啡室竟然有outdoor，正!!!有好多咖啡同茶揀，我鍾意飤咖啡，當然揀咖啡啦，但係咖啡都有24種揀，有blue mountain、kopi luwak、Brazil Santos呢d有名既咖啡。正正!!!

Order咗個set，所以只係飲咗個Original Blend，而友人就揀咗個Dark Blend。

先黎既係個日式沙律，開一開胃，菜好新鮮，唔錯唔錯。

跟住係個和風汁煮洋蔥牛肉飯，牛肉一般，反而我想講講佢個汁幾好，汁夠多，就算牛肉好快俾我食哂都仲有個汁，唔會有食白飯既感覺，而且飯係用珍珠米(如果我冇食錯既話)~成個飯變得好味好多，亦都特別好多!!!

接著落黎，個cake我就揀咗據聞係西村太太整既cheese cake同友人揀既brownie，全係home-made，點都要試試。Cheese Cake味唔太夠，但幾fresh，細細件又唔甜，算ok。而友人既brownie呢，同友人一致覺得甜咗少少，而少咗brownie獨有既朱古力粉，不過，自家製既，可能就係咁先夠特色。

最後當然要試下佢既咖啡，由西村先生親手沖製，雖然只係set既coffee，但都幾好欱，至少我唔落糖，都已經夠濃。

同友人坐陣，柔和既意樂，獨特既擺設，熱誠既招待，親切既笑容，再埋舒適既環境，一定可以再黎試西村先生既酒同咖啡!!!!!!

鬼小姐 (灣仔)

Ghost Cafe，一個幾特別既名，報紙都有介紹，原來係model Zelia開既，見佢既環境同野食都幾得意，可以去試試。

想約友人試試，搵咗好耐先搵到，地點其實係馬場對面，環境寧靜，唔錯唔錯。

可惜，入到去一個人都冇︳連店員都冇，有d奇怪，再行入到，終於見到2位店員出黎，佢地應該係試整緊d餅，另外見到佢有d餅整緊，好用心，只係在於客人而言，有d難睇。擺設幾好，老實講幾適合女生，Cafe雖然細，但decoration卻係夢幻般。食咗杯Latte，咖啡一般。Cake好似唔錯，於是我揀咗佢地既情迷歌劇院，而友人就揀咗佢既鬼脆拿破倫。情迷歌劇院: 英文係Opera Chocolate Cake，同我食開既Opera有d出入，如果站響Chocolate Cake黎講，佢唔錯，但係如果響Opera角度，佢係唔夠朱古力粉，朱古力味唔夠重，咁Opera Chocolate Cake即係點呢?而呢個甜品既藝術角度，8分。

鬼脆拿破倫: 唔敢comment太多，聽友人講，classic拿破倫，但我反而諗，係唔係又好似個名咁，脆呢!?

由於人好少，我同友人坐咗好耐先走，環境舒服，一個人少既地方，係一個好relax既cafe，甜品亦特別(我最想知點解有個叫中女愛粉紅)，我知道店主亦好有心咁不斷試食以求有更多既選擇俾客人，呢個係值得我尊敬既，亦深信呢間cafe將會有更多更好既甜品面世。