利華超級三文治店(北角)

9月26日, 因為剪咗張報紙嘅coupon, 襯今日係到期前就黎食下, 呀菲又想試佢地嘅焗薯, 近近地喺炮台山度食啦, 真係水靜鵝飛, 星期六晚飯時間都冇人… 都好, 我地可以靜靜地食個晚餐~

::: 挪威三文魚白汁碎蛋意大利包 + 凱撒沙律 ::: $39 + $4
跟餐仲有個什菌忌廉湯, $39優惠算係十分平~ 忌廉湯真係超多什菌, 味道可能多什菌嘅關係, 有少少藥材味咁, 不過整體算creamy, 可以接受~ 跟住有半份意大利包同半份沙律. 意大利包十分軟熟, 挪威三文魚都ok新鮮, 加埋白汁碎蛋個配搭尚算match~ 欣賞佢嘅凱撒沙律麵包夠脆, 沙律汁夠fresh, 加少少煙肉粒, 令本身唔係好新鮮嘅生菜變得都叫做可以入口~ 另外, 加$4跟杯凍檸茶, 茶味比較澀, 麻麻地…

::: 雞肉忌廉粟米焗薯 ::: $30
小小的焗薯塞滿雞肉同忌廉粟米, 面頭仲有少少粟米同煙肉粒. 雞肉都頗嫩, 味道尚可. 忌廉粟米係罐頭貨, 甜味同焗薯融和一齊, 好似食甜品咁~ 美中不足係個焗薯唔夠熱, d toppings係近乎室溫以下…

餐廳座位大多都用梳化, 坐起上黎好舒服, 又冇乜人, 可以慢慢食~ 其實我都幾鍾意食呢類型嘅麵包, 不過真係唔太抵食, 同埋食唔飽, 所以都係等下次有coupon先再食啦~

尼斯餐廳(西環)

9月20日, 食尼斯餐廳嘅外賣意粉就食得多~ 不過坐低堂食就真係第一次!

::: 鮮茄牛脷焗意粉 ::: $30
跟餐要咗羅宋湯, 合格喇~ 即焗嘅蒜茸包品質參差, 隔離台好香脆, 但我地就焗得唔夠耐, 再隔離台就燶晒… 味道尚算合格!
我個鮮茄牛脷焗意粉, 平時外賣都有食過, 不過今次覺得無平時用錫紙兜焗得咁香. 牛脷切咗條, 煮到好淋, 但有欠牛味. 鮮茄汁加埋洋蔥, 味道酸甜醒胃, 意粉亦不過不失, 唔係彈牙但亦未至一patpat啦.
送的甜品芒果布甸味道不錯. 不過餐飲凍華田多口叫咗少甜, 成杯野即刻又稀又淡… 明明上次呀比飲過普通凍華田係超濃超好味架嘛…

::: 馬來焗咖哩雞飯 ::: $33
忌廉湯比羅宋湯好少少, 味道都可以接受~
而個飯呢, 見到面頭只係有少少燶, 所以都係焗得唔夠耐, 所以出黎唔太香… 食落其實好香咖哩味, 撈飯好好食, 但係d雞吸唔到咖哩, 明顯係雪藏雞所以都冇肉味…
凍檸茶唔夠凍華田好飲, 中規中矩…

其實尼斯都幾抵食~ 如此價錢包晒湯+包+主菜+甜品+餐飲! 不過除主菜外其他水準只屬一般. 所以都係買外賣食好d~ 用錫紙兜食焗野風味更好!

Buddha Hut(九龍灣)

9月19日, 夜晚由將軍澳出番黎九龍灣~ 聽聞喺淘大有間幾特別嘅素食店, 果然好多人食~ 整間店舖都好快餐店feel, 排隊買飛再去攞食物, 連位都要自己搵, 但係舖面頗細令到好迫夾, 好彩我地等咗一陣就有位喇~

::: 叉燒豆腐扒飯 + 凍檸茶::: $36 + $4
叉燒做到味道真係好似真咁! 有蜜汁嘅味道, 雖然真係冇乜燒過, 但係表面都有少少燶~ 豆腐扒係煎過黎, 感覺非常清淡, 不過煎咗亦帶番出少少甘香味~ 除咗叉燒同豆腐之外, 底下仲有大量蔬菜, 有翠玉瓜, 蘿蔔咁~ 完全唔似快餐wor, 真係好似啱啱新鮮炒出黎, 配上健康嘅五色糙米飯, 整餐都十分健康~ 加$4就有凍檸茶, 十分超值~

::: 奇妙醬三絲冷麵 + 南瓜湯::: $34
要先讚南瓜湯十分香濃! 啖啖都係南瓜茸, 甜味自然無添加, 感覺良好!
三絲冷麵主要有青瓜, 蘿蔔同芽菜 , 全部材料都切成幼絲, 睇得出係用心處理過~ 另外仲有少少海帶同芝麻作點綴. 冷麵醬清新帶麻油香, 濃杰適中又唔會過膩. 麵條夠凍而且柔軟, 份量亦頗多~ 雖然好齋但係好好味~ 而且好飽肚!

可能比較少食素, 感覺呢間食物款式多又用心, 味道都好好~ 只係環境幾迫下, 要自己搵位可能會做成混亂, 同埋攞餐嗰陣都好亂, 如果佢地真係咁好生意可以考慮換間大d嘅舖~ 下次有機會想試下佢地嘅甜品~

聰嫂私房甜品(將軍澳)

9月19日, 同呀比入咗將軍澳閒逛~ 未食午飯的我, skip咗個lunch直接就食甜品! 久聞梁思浩開咗間極受歡迎嘅甜品舖, 今日就一於去試下! 星期六開晏晝3點, 嘩~ 原來好多人都好似我地咁, tea time走黎食甜品架!

::: 榴槤水晶珠 ::: $25
榴槤水晶珠, 勁勁勁大陣榴槤味! 大味到成個舖頭都知你叫咗榴槤野囉! 哈哈哈哈哈~ 但我鐘意聞! 榴槤水晶珠賣相好靚~ 好似個小山丘咁. 最底係非常滑溜, 口感醇厚兼有濃郁榴槤加奶味嘅東東. 質地介乎雪糕同mousse… 同榴槤強烈嘅味道天造地設! 上面係一大舊新鮮榴槤肉, 絕對係頂上貨色, 味道在口內凝繞不散. 水晶珠清新煙韌有咬口, 又為榴槤雪糕中和了一份甜膩.
因為呀比唔食榴槤的~ 我一個人KO了呢個榴槤水晶珠真係ok飽… 真係漏架! 所以同榴槤同好者分食會更開心~

::: 蜜瓜西米露 ::: $20
呀比就叫咗個蜜瓜西米露, 咪以為好普通好似出面咁得d西米露加蜜瓜, 一黎到第一個感覺係: 乜呢個叫蜜瓜西米露? 但係又真係特別得黎係非常可以接受~ 先係一大碗嘅蜜瓜雪糕上加上一d蜜瓜粒, 食起上黎已經非常透心涼, 蜜瓜粒雖然唔多不過都好新鮮~ 另外嘅西米係另上, 喺我懷疑緊點解佢地唔一齊淋上蜜瓜雪糕嘅時候, 就聽到有個呀組解釋俾隔離枱原來西米放喺凍嘅野上面會好快硬, 就會唔好食~ 哦, 係喎, 硬咗會變到好似d硬飯咁, 要即撈即食~ 創意真係十足不過尚有改良餘地, 畢竟蜜瓜西米露係應該一齊擺, 咁樣個感覺只係好似蜜瓜雪糕加西米…

聰嫂嘅甜品好特別呀! 其他地方都無食過呢種質地嘅生果甜品~ 酷愛榴槤的我對榴槤水晶珠真係印象深刻, 完全係值一個笑!! 唸起都好想再食!!! 可以在港島區開分店嗎?

金隆雲南米線大王(銅鑼灣)

9月12日, 今日出咗銅鑼灣, 但係唔知食乜好, 最後揀咗黎新開喺渣甸坊嘅雲南米線, 因為太熱嘅關係其實我唔想食辣野, 但係佢都有客飯套餐, 咁呀菲又可以食拌米線, 一舉兩得~

::: 咖哩牛腩飯 ::: $32
叫飯跟個例湯, 今日係菜乾豬展, 麻麻地冇乜味好淡勝在夠清, 菜乾亦都冇味, 算啦對呢d餐廳嘅例湯冇期望, 志在有淡水落肚…咖哩牛腩飯嘅咖哩色水好淡, 椰汁明顯過多, 搞到冇咖哩味, 牛腩偏韌, 亦索唔到咖哩, 反而薯仔過多, 一碗都係! 拌白飯嘅椰茶味道反而ok, 都幾新鮮~

::: 雞絲涼拌米線 + 凍檸茶 ::: $30 + $5
拌米線d雞絲好碎濕濕, 肉質偏老… 其他材料仲有肉碎, 花生同酸豆角. 其實米線本身尚算彈牙, 但材料扣分! 雞濕又乾又鹹, 肉碎普通, 酸豆角鹹酸味一般, 只有香脆花生比較可取…

如果係黎食米線價錢都真係幾貴, 不過如果我地食個飯餐$32喺銅鑼灣都叫做ok… 環境確實十分迫夾, 櫈亦好細張, 不過都唔知點解好多人食, 可能俾佢個木薯粉吸引咗, 下次食雲南米線都係去第二度… 要稱皇? 尚遠……

Balalaika(中環)

9月11日, 呀比嘅生日大餐, 唸咗好耐應該帶佢去邊… 千挑萬選, 最後揀咗呢間位於soho, 不論環境氣氛都甚有特色嘅balalaika俄國餐廳! *V*

::: 豬肉餡包 ::: $10
大概只有半個手掌咁大~ 微嫩, 外面硬硬的… 入面嘅豬肉餡都唔少, 都係免治豬肉, 調味特別. 麵包都幾軟熟. 不過細個咗d, 唔係好抵食!

::: 椰菜卷焗芝士蘑菇 ::: $130
好大份! 好多芝士鋪面! 椰菜略老, 頭尾有dd焦, 但煮得夠淋甜. 裡面包著嘅蘑菇十分足料~ 香嫩鮮甜! 椰菜加蘑菇加芝士味道極配~ 好好味!!

::: 俄羅斯特式羊架串燒 ::: $210
成個生日大餐嘅重頭戲~! 可自選一款醬汁, 侍應推介下我地揀咗black plum sauce. 佢地拎d串燒埋黎時, 會敲響噹噹等所有人都知道佢地準備做野! 好喇~ 跟住就係放火嘅時候!! 侍應都好識做地幫我地合照~ 只見佢地先淋上酒, 再點一下火, 嘩! 紅紅大火立即點起!! 不過只係燒咗一陣, 應該揮發晒d酒精就熄火喇… 不過可能因為d火太猛, 羊架局部有d焦乾… 可幸是羊架本身調味不多, 點d sauce更能夠帶出濃濃羊味~ 不得不提, d燒配菜夠鮮甜, 反而比羊架更出色!

::: 豬肉腸伴酸椰菜及燒薯仔 ::: $65
豬肉腸長長兩條, 但食味一般. 感覺上其實同平時buffet可以食到嘅sausage platter差唔多, 無乜特別, 亦唔抵食. 不過薯仔好食!

::: 雪糕蛋糕 ::: $100
為咗呀比大人特登訂製嘅雪糕蛋糕, 只有一磅size. 訂位時可以順便預訂. 亦可以寫上壽星名字. 雪糕味道無得揀的, 好似係榛子杏仁味. 外表簡簡單單的以忌廉同士多啤梨裝飾, 用栗茸寫字. 蛋糕邊圍上烤過嘅杏仁, 又香脆又有咬口, 配埋雪糕食一流!

::: 火焰雪山生日蛋糕 ::: 送嘅
呢個係本身生日會送嘅蛋糕~ 都係有放火嘅環節! 其實係蛋白包雪糕,淋上酒再點火. 外面層蛋白好重酒精味… 麻麻地. 入面嘅雲呢拿雪糕就唔錯~ heehee, 梗係唔夠我特登訂嘅咁好味啦!

今次呢個生日大餐, 食物真係頗有俄國特色 不過味道就唔係話好特別. 要讚嘅係呢道一流嘅環境, 木造裝修好有風味. 而且服務好好~ 上串燒, 生日蛋糕時佢地都大鑼大鼓, 仲有兩位駐場歌手為我嘅壽星大人唱生日歌, 連聲祝賀~ 氣氛真係滿分!

噹噹燒(尖沙咀)

9月11日, 今日我生日呀, 睇下呀菲帶我去邊到食飯先~ 神神祕祕咁帶我黎尖吵咀, 原來係黎食日式燒餅~ 其實好耐之前都食過一次, 嗰時未轉大舖, 比較有日本feel, 今次黎雖然舖頭大咗, 掛咗d木牌咁扮番d日本feel, 不過感覺都總係怪怪地~

::: 噹噹燒set + 白桃汁 ::: $49 + $9
當然叫番個招牌日式燒餅啦, 一個set有燒餅, 沙律同甜品~ 我地要咗個海鮮燒餅, 份量其實好少, 得一個手掌咁大, 一個正常男士應該唔夠食, 味道黎講係照燒汁蓋過晒整個燒餅嘅味道, 照燒汁太濃烈喇! 裏面海鮮唔算多, 有d蝦, 魚, 魷魚咁啦, 味道亦唔算特出… 跟餐嘅沙律係中華沙律加生菜絲, 中規中矩, 甜品亦係~ 加$9要嘅白桃汁都係幾失望, 好細杯仲要係罐裝飲品…

::: 芝士咖喱牛肉飯 ::: $40
見個名幾特別就就試下, 賣相都ok~ 咖哩比較稀, 唔係好似日式咖哩… 味道都可以, 唔辣又幾香, 撈飯係唔錯~ 牛肉就係肥牛黎嘅, 即係急凍野, 有肉地不過冇咩肉味… 最唔特別係芝士, 凝固晒跟本溶唔到落咖喱, 咖喱還咖喱, 芝士還芝士, 唔係難食不過唔好味…

今次黎好似水準下降同冇驚喜… 環境除咗2,3張bar枱仲keep住少少日本feel, 其他嘅都變咗好似茶餐廳. 午市時間人亦唔多… 而家開咗咁多日式燒餅店, 我地都難再encore…

甘味讚岐手打烏冬(大角咀)

9月9日, 睇完某飲食雜誌介紹烏冬, 已經勁想食溫泉蛋加滑嘟嘟嘅冷烏冬! 今晚去開奧海城睇戲, 竟然見到佢有!! 即刻拉同呀比衝入去試下!

::: 溫泉蛋冷烏冬 ::: $36
烏冬係幼身的, 麵身好清涼~ 配以木魚乾、蔥粒、紫菜絲、青瓜片, 最唔少得嘅梗係隻震下震下嘅溫泉蛋啦! Wasabi同薑茸分開盛上, 體貼了我呢d唔食辣嘅人~ 淋上一大壺的冷烏冬汁, 伴勻雞蛋, 蔥粒, 紫菜絲… 夾一條烏冬放入口… 咦? 點解無乜蛋味架! 雖然烏冬麵身係好滑同埋爽口彈牙, 但味道真係好淡… 又因為淡, 再淋上梗多的冷烏冬汁… 結果完全蓋上了蛋味… oh! 不過, 冷烏冬比熱烏冬更能嘗到手打烏冬的彈牙就一定的~

::: 滑蛋蟹籽蟹柳湯烏冬 ::: $42
蟹柳係真係鮮蟹腳嘅蟹柳, 肉質好豐富, 咬一口好有蟹鮮味, 啖啖肉大快人心~ 滑蛋喺湯烏冬上面怪怪地, 亦唔算係太滑, 可能d蛋浸咗喺湯度熟咗d… 烏冬湯底味道尚算清甜, 但係多數係味精湯底, 木魚味唔夠… 烏冬反而都幾好, 少少煙韌, 作為烏冬專門店可以接受咁啦~ 整個烏冬看似好細, 不過食完又飽飽地wor…

::: 三文魚壽司 ::: $10
晚市特價小食~ $10小小的兩件. 三文魚薄切, 但尚算新鮮. 飯亦唔會散開~ 合格啦!

時時lunch time唸唔到食咩就會去食的烏冬~ 熱湯同撈都試過, 反而覺得今次冷烏冬最能突出手打烏冬的彈性. 不過除了烏冬本身, 其他湯底同材料質素都只屬一般. 估唔到佢會執!

Restaurante ESCADA(新馬路)

9月6日, 臨走前食埋個最後晚餐, 我地嘅8週年sweetsweet之旅就到尾聲喇~ 喺搵下有咩選擇之際, 最後都係想食多一次葡國菜, 食埋我地想食又未食嘅菜色, 所以我地黎到ESCADA~ 冇BOOK枱, 都驚住冇位~ 好在侍應都好好咁安排到樓梯底嘅座位俾我地~ 不過如果可以坐樓上就好喇~ 環境會再靚d!

::: Bread :::
都係有餐前小包, 比較細小, 不過都幾鬆軟, 小小地唔會食到滯~

::: Octopus Salad ::: $48
先叫一個沙律開開胃, 八爪魚好多,同沙律菜同等份量, 食落好鮮味, 肉地好彈牙, 雖然應該係雪嘅, 不過一d雪味都冇~ 沙律菜係以生菜為主, 點上好似醋咁嘅沙律汁酸酸地又帶少少蒜味好開胃~ 而且有咁多八爪魚, 一個細食嘅人用黎做主菜都可以~

::: Gomez Da Sa ::: $128
中文叫馬介休金莎, 上次食葡國菜冇叫馬介休, 作為葡國名菜今次一定要叫! 係用咗薯仔, 薯蓉同烚蛋撈馬介休黎焗, 焗出黎好香薯仔味同馬介休嘅鹹味~ 一咬落馬介休同薯仔份量佔8:2, 一d都唔會魚目混珠, 好好味嘅馬介休, 就咁食鹹咗d, 一定要混埋薯仔一齊食~ 不過佢都有少少骨, 食嘅時候要小心~

::: Chicken Clam Nagar + Rice ::: $98 + $10
中文好似叫葡式蜆肉雞, 都唔係好知係點樣一味菜, 黎到其實個賣相又麻麻, 不過味道就真係好有驚喜! 先講雞其實麻麻, 俾晒d雞搥, 一睇就知係急凍野, 味道冇乜, 又索唔到個汁, 份量亦小. 不過蜆就好ok! 鮮味食得出之餘略帶少少海水味, 應該係新鮮嘅, 份量比雞多, 又索到d汁~ 最後一定要提個汁, 係芝士味加少少白酒, 芝士味非常濃厚, 白酒唔會太搶味, 所以我地都忍唔住叫個白飯黎撈, 真係超正!~

::: Cold Tea w/ Lemon::: $20
因為我地見到佢地唔會俾開水, 叫水都要開支礦泉水, 所以叫杯貴得黎冇特別嘅凍檸茶, 普普通通, 正常貨式…

終於試埋馬介休, 我地嘅旅程都完滿結束, 今次食葡國菜真係有d驚喜, 希望可以再黎食過~

莫義記(氹仔)

9月6日, 食完水蟹粥, 繼續掃落官也街聞名甜品!

::: 榴槤雪糕 ::: $10
堅正!!! 雖然好細杯… 但一打開已經好大陣榴槤味! 質地好滑, 仲食出舊舊榴槤肉, 好正好正好正呀!!!

::: 木糠布甸 ::: $10
好夠凍! 可能雪住質地比較硬身, 有d似雪糕咁~ 味道都唔錯, 喺條咁熱嘅街上食一杯降溫也不錯~

好好味~~~ 其實可以食兩杯! 去官也街必食!!

誠昌飯店(氹仔)

9月6日, 晏晝我地就黎咗官也街, 搵唔到我地原本想食嘅緬甸麵, 所以又黎食過番尋味嘅誠昌食水蟹粥~

::: 水蟹粥 ::: $95
比上次黎加咗價, 加幅都唔少, 可能真係幾特別又好味啦~ 一大碗足2人份, 淨食呢個都夠~ 用料足, 有一大隻蟹, 金黃色嘅蟹糕仲溶晒落d粥度, 每一啖都食到好鮮嘅蟹味, 一d都唔腥~ 隻蟹鉗都仲大隻添, d肉味又唔會話走晒去粥度~ 有得食, 有得飲, 水準都保持到, ok~

其實除咗水蟹粥, 都想試下佢地其他野, 不過我地得2個人, 食一個水蟹粥都已經飽咗… 所以如果佢個蟹粥可以有d一人份量版就更加好喇~ 環境算光猛, 係坐位迫咗d, 同d呀姐服務態度麻麻…

盛事餐廳(新口岸)

9月6日, 豪住MGM, 所以我地一覺訓醒就落去食個豐富早餐先! 酒店嘅環境本身已經好靚~ 連餐廳內裡嘅裝修都十分有style~ 仲有一大個open kitchen, 等你一入都去已經聞到新鮮食物嘅香味!

::: 沙律冷盤 :::
沙律款式唔多, 但d菜就好新鮮! 另外仲有3、4款凍肉如火腿、煙肉、煙三文魚同埋d番茄、粟米、松子仁、麵包粒、芝士等~

::: 西式熱盤 :::
其中最吸引嘅就係即整蛋物!! 煎、炒、奄列乜都得~ 仲有火腿、磨菇、洋蔥、番茄、芝士、青紅椒等比你配搭~ 廚師手勢好好~ 我個奄列又大又軟~ 好好味!
另一個推介係蜜糖燒豬脾~! 一大隻豬脾即叫即切, 仲可以揀mustard或蘋果醬~ 豬脾微微帶甜肉質頗嫩, 一早起身食到d咁啖啖肉嘅野真係開心~
另外一列排開嘅西式早點煙肉、火腿、雞肉腸、豬肉腸、焗番茄、炒磨菇、茄汁豆… 你完全係可以整番一個full English breakfast出黎!

::: 中式點心 :::
一籠籠點心疊起好有舊酒樓風味~ 我地食咗燒賣同叉燒飽, 味道亦不錯!
白粥底夠厚夠綿, 仲有大把料如肉鬆、瘦肉、皮蛋、鹹蛋、油炸鬼、菜甫、蔥粒等比你加~ 好好味!

::: 麵包酥餅 :::
超出色嘅pastry!! 雖然係整好咗擺係度, 而且已經唔係熱辣辣, 但d包仲係十分鬆軟, 蛋糕好香牛油蛋味~ 另外我要咗個fruit tart, 係勁脆!!! 而且睇到超多層酥皮咬完識得彈番起~ 好神奇!! D生果夠fresh, pastry甜度適中, 雖然份量唔細但我成個食晒!!! 因為實在太好食啦~~~!
唔少得嘅仲有大量各式麵包, 你可以烘多士, 搽牛油, 配cheese platter食亦得~ 最有誠意嘅係每張台上面都有一set 5樽全新嘅jam比你搽包… 極想試晒佢地! 不過因為佢地係全新的, 每樽試一啖好似好過份… 但我相信有人係會拎走d jam…

::: 鮮果乳酪 :::
想健康d, 呢度仲有獨立包裝嘅唔同味道乳酪放在冰上任君選擇! 仲有新鮮生果, 原支益力多, 各式cereal, 鮮奶, 果汁… 太多喇~ 不能盡錄!

如此豐富早餐仲包一杯餐茶, 真係不論肚仔定心靈, 一大清早就滿足晒!! 如果唔係因為嘆完早餐仲要去樓上個infinity pool曬下太陽, 真係會食到唔捨得走~

海灣餐廳(媽閣)

9月5日, 我們的8週年快樂!
終於都黎到我地正式慶祝8週年大餐, 當然唔可以馬虎! 黎得澳門, 一定要食番餐正宗葡國菜啦, 幾間出名嘅葡國餐館都係喺媽閣廟附近, 我地就揀咗呢間, 因為D環境好似靚d~

::: 餐前麵包 :::
一人一個, 有手心咁大, 表面又有少少脆, 搽埋牛油又香又鬆軟~ 作為開胃小食十分滿足~

::: 焗蟹蓋 (2個) ::: $160
呀菲十分想食~ 賣相十分精緻,係釀蟹蓋上面加2粒橄欖, 做到好似一隻蟹咁, cute爆!加埋d配菜, 真係有d唔捨得食~ 真係齋望都覺得叫呢個係冇錯~ 俾足200分! 用小匙羹吃一口, 香脆, 熱辣, 新鮮蟹肉味, 全混在口裏, 味道十分豐富! 最滿足嘅係啖啖純蟹肉, 無乜點溝其他野去做, 又唔會炸得太油膩, 混咗d白汁又好好帶出蟹肉嘅味道! 不愧為葡國出名菜~ 唔大食嘅人食完其實都應該飽咗一半~ ***超級推介***

::: 燒牛肋骨 ::: $128
叫嘅時候以為係好似嗰d西式餐廳嘅燒豬肋骨咁, 點知原來係用中式牛仔骨嘅切法, 上枱嗰陣有d心驚, 以為好普通. 好在食落唔差, 係高級肉地嘅牛仔骨, 半肥瘦得剛好, 大慨5-6成熟, 外面熟得黎好香, 而內裏生得黎又肉味夠, 一d都唔韌~ 而且咬落勁牛脂味超濃郁, 真係鋸扒都無試過咁濃牛味嘅牛仔骨!!

::: 葡式焗鴨飯 ::: $148
呢個反而冇想像中咁好, 飯偏乾, 飯焗到起焦係好, 不過中間嘅飯都有一種乾硬感, 可能係佢葡國嘅特色啦… 鴨肉同葡國腸都過鹹, 除咗面頭幾塊看上幾肥, 裏面撈咗喺飯嘅鴨肉都偏瘦. 整體個感覺乾爭爭. 同埋其實個飯都幾油… 不過作為葡國特色菜, 叫做試過就算…

::: 木糠布甸 :::
意外地我地坐嘅船公司可以換一杯紅酒或木糠布甸, 咁我地就要咗木糠布甸啦~ 細細杯味道都唔錯, 質地比較creamy, 雲呢拿味濃d~

其實呢餐已經十分滿足, 起碼食到d好特別嘅菜式, 尤其是焗蟹蓋! 服務十分周到, 環境衛生都好好~ 看到很多外國人黎食, 不枉我地揀咗呢到黎慶祝我地嘅8週年!~

瑪嘉烈蛋撻店(新馬路)

9月5日, check in 酒店過後又繼續我地嘅為食之旅! 瑪嘉烈身處後巷, 位置唔太難搵, 但真係要特登去一去條馬統領街先得! 去到咁啱比我地搵到位wor~ 真好彩!!

::: 葡撻 ::: $7@
暖暖的葡撻兩大個~ 香噴噴十分吸引! 多層酥皮滲出牛油香味, 夠脆! 焦糖蛋味濃, 但略嫌過甜~ 個撻底則難免油膩同埋淋淋地…

::: 凍奶茶 ::: $10
茶味好足~ 奶味輕輕點綴~ 我幾喜歡呢個比例! 質地滑滑的, 飲落又好thick, 唔錯! 而且係雪凍的, 唔洗加冰, 唔會溝稀d奶茶. 不過飲晒成杯就有d漏~

雖然一地都係蛋撻碎, 不過檯凳都幾乾淨, 而且有d花仔擺下~ 都幾靚丫! 而且都預咗知佢無冷氣係會熱, 不過黎到發現佢有d噴水系統同大風扇降下溫~ 又唔係真係好熱咋wor~!

禮記雪糕(中區)

9月5日, 由大三巴一直落, 到荷蘭園大馬路, 進行我地嘅下午茶甜品之旅~ 就係黎到呢間好特別嘅甜品店, 主要賣自製雪糕, 有各式各樣味道, 又有唔同整法~

::: 雪糕三文治 ::: $8.5
因為係預早整好, 所以唔可以要求選擇味道… 打開先知係乜味… 但係又係推介wor, 所以有點冇得揀嘅感覺… 味道有三種, 我地今次應該係椰子, 芒果同蜜瓜. 三隻雪糕味道都好淡好淡, 唔認真食好難分得出味道. 另外嗰塊威化餅亦唔脆, 成舊野好淋, 食時仲左跣右跣呢咁hea… 大失所望…

::: 雪糕紅豆冰 ::: $13
雪糕味道都無得揀, 係云呢拿, 但係個色水就比平時d云呢拿雪糕黃… 杯紅豆冰就真係好純, 係真嘅純紅豆同冰, 唔同我地平時飲開有椰汁嘅, 所以好唔慣… 啖啖杰杰嘅紅豆, 好有屋企自家製雪條嘅感覺, 好懷念~ 不過可能太甜, 飲完仲口乾. 云呢拿雪糕同樣都係啖啖地. 只可講一句, 唔係地杯茶…

禮記咁出名… 但食完就真係好失望, 仲非常口乾! 環境都尚可, 舊式冰室格局好有懷舊風格, 不過侍應全是十零歲又無所事事圍埋傾計嘅年青人, 實在好大對比… 食完呢餐等食下一餐~