唔係聽老友講起
都唔知道原來麥明記係天后開左分店
放假黎開呢面
當然要趁機食返個麵

店面相當新淨清潔
仲比西環老舖寬闊
都幾舒服

佢呢度都有套餐
雲吞麵+個菜，或者粥+粽
兩款麵係四十零蚊
比散叫平左十蚊左右
好抵食
呢個價真係地踎污污糟糟又難食果D麵店都未必得

想叫個麵餐
但又想試多D野
聞到隔離個牛腩好鬼香
所以叫左個腩撈+淨雲吞

個牛腩堅正，
睇落唔散，
但又好林好滑
炆到入晒味
正到飛起
麵都好爽，抵讚

雲吞都好好味
蝦肉大大粒又彈牙
湯麵好香好有鮮味

以呢個價黎講
味道環境都咁好
真係食得過

自從轉左工之後
好耐都無係港島呢邊食野
呢日舊地重遊
見到正街開左間新野
一睇原來係食雲吞麵
見仲有D時間又餓餓地
食返個細蓉就剛剛好

入去坐低，即刻俾杯茶飲下
地方都乾淨企理
服務都唔錯

好快個細蓉都黎左
湯、雲吞同麵
三者都好有水準
口感味道都好好
都真係好耐都無食過咁好味既雲吞麵啦!!
不過可能太耐無食麵，唔記得左叫多韭黃添...

埋單都唔貴，比出面仲平D
呢間都真係唔錯，下次黎開可以再幫襯

早幾日過左海去旅行社荼會
之後食左個麵,行左陣街
點知夜晚又話食放題
早知之前就唔好食咁多野啦~哈哈

去左吉壽食
好耐都無黎喇~
朋友之間都覺得呢間幾ok,
野食算多,味道幾好
d野唔會點漏單,而且都唔太貴,整體評分好
幾抵食下

不過唯一唔好就係
地方太迫喇
講真好似我咁鍾意食野既人
身型都有返咁上下
坐起黎就真係唔多自在啦

講返野食
點左好多串燒
全部一齊一大碟上
除左d蝦今日麻麻之外
其他雞串、牛肉都幾好
魚生就無乜點食
不過都幾新鮮
反而菜就叫左好多次,健康d嘛~~~

汽水都飲左好多罐
今次肥死....
以前食自助餐好多都唔包野飲
但放題就多數都有任飲
真係一大優點黎!!

早幾日同女王過左海
去中旅社總行聽旅行既茶會
全程都悶悶地,冷氣又凍
茶會又無乜野好食,淨係飲左杯茶暖下身算

搞左都個零鐘,餓餓地想話睇下附近有乜野好食
諗住都係過返電車路果面先啦
點知行過中保對面,見到開左間新麵店叫做「麥記」
心諗似係麥氏一系既雲吞麵喎,唔知有乜關係?
唔知見到先咁諗定點,好似本來都想上上面食雲吞麵
凍凍地食個麵都好

入到去坐低,見到原來係麥奀之子開既店
間鋪幾光猛,簡簡潔潔幾乾淨咁,勝在夠新
不過d冷氣都係凍左d

講返正題,一入去叫左個細蓉先
$29蚊話平唔平,
不過計返佢地麥字頭,同埋附近d價黎講都唔算貴
好似仲平過上面幾蚊
女王叫左個牛腩雲吞撈

d野食即叫即做,可能咁岩人少,都無整定先
但係都好快上枱
試下個麵,唔錯喎,幾彈牙
d湯都好正,好香韮黃味(唔記得叫多韮黃...好彩都夠味)
雲吞蝦爽,有地魚香,有麥奀水準
試埋女王個撈麵,
d腩幾入味,汁香濃,但掛住傾返去旅行d野
放到d麵凍左,會有輕微皂水味,但湯麵/ 落返湯就無事

整體黎講都幾好味,水準不遜於老爸,又平幾蚊
服務都好好,食食下會拎紙巾比人
反而麥奀除左總店之外,分店好似越做越麻麻地

一直都好少黎到中染呢面食晏
今日本來想去薩利亞食意粉pizza
但臨時轉軚話試下呢間,都好丫~

見佢個名真係幾得意
又唔知點解
同埋又法國又越南咁,真係搞唔明有咩食呢~

入到去睇到佢d介紹,原來碌冧係指類似魚露既調味料喎
忽然諗起唔知越南定泰國果頭
有一種又係好猛料既調味料,叫做「桂花蟬油」,
好似話落一滴落去煮野,就成味野都增鮮不少,聽落仲堅過一滴香
睇黎果d地方既香料都好出色
不過而家都無乜天然既桂花蟬油喇,比人搞到越黎越少,d油就升到幾滴一美金咁貴....

講返正題,呢間碌冧個名就好特別
但原來d野食呢,就唔算好令人驚喜
叫左個豬扒飯，好細塊下,又唔係好出色
有d似以前公司can果d汁撈飯咁
同埋價錢都比較貴啦
最大齋就係講左咁耐
都唔記得試下d魚露添!!!!!

不過佢個環境係幾好既
坐得好鬆動
如果閒時同朋友黎吹下水都唔錯
見佢晚餐好似正好多
下次有機會黎試下先~

重陽節過左黎跑馬地,
之後無乜野做,同家人周圍行下
行行下有d肚餓,自己竄左去中環九記食返個麵先

嘩~都真係好耐無黎過!!!
d水準都仲保持到
d腩好香好夠味
有時第間d牛腩,唔一定有腩味,可能得d汁味
佢就唔同,好正好香,唔怪得咁出名
但d麵同湯就好似無以前咁正
哈哈~其實我黎呢間主力都係d牛腩既啫
不過價格就升左好多lu~
無計啦,呢家連街市d牛肉都貴晒
遲d可能要用牛肉汁/腩汁撈飯算喇

跟住仲係唔夠喉
叫多個淨腩,
忽然又想飲檸樂
今次肥死喇~!!!!
夜晚仲話要一齊食多餐添...!!!

重陽節難得家人共聚
一行8人周圍行下遊下車河
夜晚黎左三聖食海鮮

講起三聖食野,
近幾年真係開多左好多間食店
以前都係屯門碼頭住過幾年,
偶爾都黎食下野,
名門海天果d都仲未有

而要話最抵食
就覺得一樓酒樓、大排檔比較便宜一d
以前都鍾意食海灘果間,
d蟹炒得幾正,不過後尾唔知搬左定摺左

咁今日就去左興記食
近來都係食呢間多
買海鮮就去左牌坊第一間，不過聽講最尾果間(好似叫忠仔記)幾抵,下次可以試下

第一件事就叫左隻燒鵝先
雖然話主力係同出名係海鮮
不過其實佢幾鵝真係好正
唔食唔得!!!!
佢勝在係隻鵝本身,d肉好夠味,d皮又係我最鍾意,好鬆化,有2至3mm厚果種
但講真,佢d汁就唔算做得好好,不過材料靚,燒得好,已經令人流晒口水

另外仲有鮑魚、聖子、瀨尿蝦果d,都係正常整法:果皮蒸豉汁椒鹽咁
唔會有咩太突出/失準
只係特別要讚下佢隻鵝啦

以附近幾間黎講
大排檔感覺上會抵d
加工費唔算貴
叫蔬菜亦唔係乘機掠水
未計買料,10個人5,6道海鮮,加埋2個菜同肉,又飲埋啤酒,
要六百幾蚊,除返開計都ok啦

一間唔錯既餐廳仔
d野幾好食
款式都算多
不過都幾多人下（午餐時候）
所以要等耐d

叫左個扒飯
味道唔算太特別
不過足料抵食
但個汁有少少酸味

不過佢d飯如果加返條配菜就好睇好多
而家睇落好似寡左少少

值得一讚既係d飲品幾好飲
而且又大大杯
同埋d焗飯都好味

返工既日子
去左和食食晏

呢間野都幾得意,
成日禮拜三會休息
但又唔知係邊個禮拜會休
有時會摸門釘
返工日子都唔開
真係唔憂做咁

佢d價錢都好得意
好似豬扒飯本身平過牛肉飯好多
但一齊加左蛋之後,又會變左差唔多
真係摸唔清個規律

講返野食
個牛肉飯都算唔錯
有洋蔥,金菇同冬菇做配菜
幾豐富下

d汁就煮左即落既香d
但比你自己再加果d
唔知係放耐左定唔係最熱時加
會無咁好味,或者太濃太搶,總之唔岩時候咁啦

豬扒飯就無咁鍾意食
因為得塊肉,好乾好寡咁
但牛肉飯就真係唔錯
或者加咖哩汁/蛋會好d既
不過如果配多條菜就仲好啦~

午餐食飯,有時都鍾意黎呢間食
佢有一大優點就係無乜人唔駛等位....
同埋佢環境係同區比較舒服
荃灣廣場d食店都係整得靚d,同埋又鬆動d既~~

不過唔知點解,明明無乜人
但d野食都要等好耐先到

一直食開佢個薄燒牛肉定食
未加一$45
入面d蔥蒜好香,不過淡左少少,自己點返豉油就岩岩好
仲會跟d炒雜菜,但有時會油左少少,一般情況下都幾好味
都係有菜有肉,係我至愛啦

但佢d牛肉越來越少
一兩年前最初食佢好似有六件,
後尾變四件
岩岩上星期食得返2件(不過大件左少少,大約係以前既1.5件)
雖然味道唔錯,但定食得兩舊仔,好似好唔抵,又唔多好睇 (又唔係鱈魚又唔係和牛....)

仲有千祈唔好試牛仔骨
次次都中伏,一係好生,一係就好韌
講真出街呢d雪藏肉,真係唔多想佢太生
穩陣d好嘛