壁球和網球中心以前有間小食店，疫情後就無開，宜家終於開返，仲開咗間新店添！對於打波嘅人方便咗，對於附近街坊亦係喜訊！ 可能係小店關係，one man band，星期六、日只有簡單麵餐和三文治之類。平日lunch就有3款飯餐。 假日10點去試吓早餐，未有客人。叫左碗餐蛋麵，熱奶茶。保證即整，等左10分鐘就有得食啦！當然餐蛋公仔麵難度有限，煮出嚟自然問題不大，但亦沒有驚喜！另外，奶茶熱度不夠，但味道不錯！30蚊一個早餐，算係平平哋，唔可以要求太多😅 呢個時勢，小店經營困難，當然要支持支持，希望小店可以越做越好，自然生意就會多啦！

溫度驟降，得十二、三度，1個人响附近做完嘢，搵地方食lunch, 响樓下見到招牌介紹，就被酸菜魚吸引咗上去。 上到去見環境都幾好，地方寬躺，又有大玻璃窗，望向對面公園，幾舒服。平日lunch time人唔多，坐左一半枱。侍應招呼唔錯，開咗壺茶俾我，坐低飲杯熱茶，即時暖晒。 平日午市有套餐，米線套餐仲有9折。於是我就叫咗個酸菜魚米線。 酸菜魚米線上枱都幾好樣，熱辣辣，都有好多片魚片。魚片新鮮，浸埋啲湯酸酸辣辣幾好食。雖然天氣凍，但係食辣嘢，緊係要飲汽水啦！食完飲完好滿足😋

香港仔算係有齊各式各樣嘅食肆，中、西、日、韓和泰都有，有連鎖店，亦有小店。之前有間開咗好多年嘅韓國餐廳結業後，只有間連鎖店食韓國燒肉，宜家舊街開左間韓式小店，又可以有多一個選擇啦！ 我哋星期日嚟食lunch, 間舖剛剛開，店內座位不算太多，所以都等咗十幾分鐘先有位入座。可能新開嘅關係，老闆和職員有啲混亂，不過最緊要嘢食ok. 我哋試咗3個lunch set, 軟滑豆腐湯飯, 人參雞湯和石鍋豬肉拌飯。當日凍凍地，三個餐都熱辣辣，好暖身，好啱冬天食。味道方面都唔錯，有少少地道口味，唔重味精，唔似連鎖店嘅味道。特別係人參雞湯，湯味好濃，隻雞幾滑，份量又足，有半隻雞，夠晒食。Lunch 唔收加一，3個set剛好二百蚊，價錢都算ok.

真係好鍾意呢間酒店，鍾意佢夠大、夠舒服，好有渡假feel. 之前嚟過tea, 知道宜家有afternoon tea set, 所以再嚟試吓！ 坐响大堂隔離，可能平日關係，人流唔多，好正！ Afternoon tea都幾豐富，咸點好食，甜點都唔係好甜，scone好香好鬆，仲有蛋糕。最後食唔駛都攞走咗啲返屋企繼續食😋 比起好多好難book嘅high tea, 或者要排長龍先有得食，呢度嚟得簡單舒服，周圍環境又正，好配合relax嘅主題。生活咁忙，有時都係想舒舒服服，坐低食吓嘢，飲吓嘢，傾吓計，呢度個環境、氣氛完全配合到，食物質素和服務都乎合期望，食完仲可以出平台行吓，吹下海風，望住個海，簡直perfect!

當我知道海洋公園開新酒店後，就上網訂佢哋嘅中菜廳試吓。周未最快都要訂到8月中，唯有慢慢等！ 終於等到訂位嘅日子啦！酒店裝修好有渡假feel, 入到去已經好開心！中菜廳個名得一個字「玉」，位於酒店二樓。雖然訂位時要求要窗口位，但係到訪當日就安排咗我哋坐入面嘅梳化位。如果可以坐响窗邊，望住個無敵海景食點心就非常正啦！ 由於得2個人，見到點心樣樣都想食，但係又食唔到咁多，就打算叫套餐。好彩叫嘅時候多口問聲經理點心可唔可以跟人頭上，經理好好咁話特別安排比我哋，咁我哋最後就叫左散點心啦！ 幾款點心都唔錯，達酒店中菜水準。肉骨茶小籠包有肉骨茶味，但係我覺得味道唔係同小籠包咁夾，原味應該好啲。XO醬腸粉炒得好惹味，軟硬適中。蟹蓋方面，價錢都算貴，但係好足料，蟹肉好鮮味。龍帶玉梨香個名好特別，原來係裡面好似蝦丸夾左片新鮮梨炸，食落口感幾得意。我哋食完點心冇叫炒嘢，不過又擔心轉頭好快餓，就叫碗魚湯稻庭麵打下底，都幾好味。最後，緊係要食埋甜品先完美啦！總結嚟講，成餐好滿意！環境新，裝修靚，坐得舒服唔在講，望出去仲有個無敵海景。嘢食方面，一般高級酒店價錢，食物質素都達標，蟹蓋係有驚喜！服務都係酒店水準，招呼周到。食完今餐，我已經book定下餐啦！因為都幾full, 唔係咁容易book到架！

每次去開附近做嘢，都會心思思想去幫襯。有時未必夾啱時間，食完飯又未必食得落。況且，疫情持續兩年幾，好難即買即响街邊食😆今次又經過，當然又心思思啦！😂 宜家好多舊式小店會隨時間而結業，為免傳出結業先去排長龍，我都把握機會回味下先。其實，小店生意都唔錯，keep住有人幫襯架！我今次叫左個魚柳包，魚柳炸起熱辣辣，加埋啲沙律醬同茄汁，再配個軟軟嘅包，好味道！同連鎖店嘅比較，我覺得呢度個魚柳質感好好多，同埋新鮮啲又夠熱辣辣！食完好滿足呀！

酒店7月試業，見到YouTube 介紹有自助餐，環境非常靚，好有渡假feel😍 疫情已經兩年幾，好耐無食自助餐，自然心思思想去試吓啦！ 心諗環境咁好，枱與枱之間又隔得開，縱使近日疫情又上升，都照去食餐buffet啦！ Lunch buffet由12點至3點，時間都算充足！去到未開始食嘢已經心情大好啦！😄 首先行個轉，見到食物種類都幾多，樣樣都有啲👍由於地方大，攞食物嘅地方與餐枱有好明顯嘅分隔，而且放食物嘅地方都好大，絕對唔會感覺到攞食物嘅時候周圍係人，呢個環境係香港自助餐都算少見，值得一讚！ 行咗個轉，就快快脆脆去攞搶手嘅凍海鮮啦！有蟹腳、小龍蝦、蜆、麵包蟹和蝦五樣，職員都keep咗refill, 唔駛擔心被人攞晒就無！ 🦀蟹腳幾肥美，同埋都幾鮮味，又唔太咸，好好食！其他海鮮就一般啦！無蟹腳咁鮮味！ 慢慢食完咁大碟海鮮之後，就食下熱食，飲咗盅燉蟲草花豬展湯，都算幾真材實料，好味！ 跟住就試吓點心和其他熱食，點心就過得去啦！不過唔食亦無損失！ 但係其他熱食就唔多吸引，叫做每樣試一舊，但係真係一般！雖然唔係難食，但我期望呢個價錢，水準應該有返咁上下啦！無一樣嘢食完想再食，可想而知就真係一般啦😅 見到有師傅即場煮麵，就叫碗喇沙試吓！碗麵湯底唔錯，幾好味！可以試吓！ 魚生方面，有三文魚、油甘魚和甜蝦，食落係新鮮，不過三文魚有啲根。 慢慢食，眨吓眼就兩個鐘啦！都食到飽飽哋，係時候要食下甜品啦！攞咗3件蛋糕試吓，個樣幾靚，味道亦都唔錯，達酒店水準！後來响旁邊cafe見到，每件$32，即係呢碟成一百蚊啦！😜雪糕唔係咩牌子杯裝雪糕，似乎係自家製，味道幾清新，質感又滑，唔會太甜，值得試食！最後加埋杯咖啡，好飽啦！ 總結嚟講，酒店環境非常好，有渡假feel, 去到已經感覺良好！而且坐得好舒服，唔會有壓迫感！我相信有一半嘅價錢係食環境，而食物只係一般，不過選擇亦算多，應有盡有！如果問呢餐抵唔抵，我就覺得見人見智啦！我只會講性價比唔高！但食得好開心！好relax! 當然講食物，呢個價錢有好多更好嘅選擇，但講環境，我未去過一間酒店食buffet係咁舒服😌

疫情又嚴重咗，盡量減少堂食，但係始終要開餐，唯有買外賣返屋企食安全啲！ 之前食過華記午市嘅酸菜桂花魚米線，覺得幾夠味！啲柱花魚幾滑，份量又多！米粉幼身爽口！😋 今日又想食，就外賣一碗返屋企慢慢食啦！10分鐘路程返到屋企，打開碗米粉仍然熱辣辣，米粉浸住咁耐仍然爽口👍桂花魚啖啖肉，加埋酸菜同雜菇好夾，個湯辣辣地好正，差不多飲晒！$68一大碗，再包飲品，食完好飽！其實細食，2個人share都得，價錢都算抵！有時如果一、兩個人想食酸菜魚，都可以食呢個頂吓癮😂

香港仔有好幾間酒樓，假日都有好多人等位飲茶！最近有一間執咗，等咗個幾月，終於開返間新嘢！雖然話係潮洲飯館，但係早午市都有點心食。 趁聖誕節假期，就湊熱鬧嚟試啡新嘢。12點幾都有好多人等位，好彩預先响網上攞咗飛，去到等咗10分鐘就有位啦！我哋3個人竟然被安排咗去一間獨立麻雀房，只放咗塊圓枱板响張電動麻雀枱上面，3個人坐得好舒服。話時話，我哋雖然坐咗入房，但無比人冷待，招呼仲好好添！ 我哋叫咗幾款點心，有蝦餃、燒賣、雞扎、鳳爪和义燒包，樣樣都幾好食，above average. 另外，緊係試吓潮洲嘢，叫咗滷水拼盤、蠔仔粥和海蜇手撕雞。滷水有鵝片、紅腸、腩肉、鵝腎和豆腐。鵝片有啲「鞋」，但係滷水都夠入味！蠔仔粥嘅蠔仔都算大隻，有鮮味，不過如果比多啲方魚可能再鹹啲，鮮味再出啲就再好味啲！ 整體上，第一印象唔錯！點心比潮洲嘢好食！新裝修，服務又幾好。雖然價錢中上，但可以再幫襯！如果下次都安排坐獨立房就好啦！

平時經過見到新開咗間「大排檔」，都諗住搵日試吓。原來「大排檔」只係得個名，但裝修間隔似茶餐廳😅。見到牆上面貼咗好多小菜嘅相，好有大排檔風味，幾吸引！不過今日嚟食lunch, 試吓味道先。午市只供應4款午餐，或者小菜。我哋叫咗沙薑雞飯和海皇泡飯，午餐包例湯和飲品。 今日例湯係西洋菜湯，飲落無咩味精，幾清甜。沙薑雞竟然有隻髀，份量算多。肉質夠滑，不過沙薑味略淡，沙薑汁較為水。海皇湯飯嘅海鮮只有蝦和魷魚，略欠其他海鮮，不過啖湯都夠清甜。 整體上不過不失！以$50嘅價錢有湯、有餸、有飯和飲品算係咁上下！因為中午食客不多，唔夠一半枱有人坐，尚算坐得舒服啦！期待下次搵機會嚟叫小菜食晚飯，睇吓有冇大排檔風味！