是日主公生日,去左海洋公哈囉喂,玩完就黎左風月堂食生日晚餐。

黎到都接近10點,好彩唔駛等位,不過待應話無左dinner set,即係只可散叫。

第一次黎風月堂,環境好乾淨企理,又光猛,但枱就排得比較密,如果情侶想談心此處不是個好選擇,因為隔離一定聽到晒。坐低研究menu,食品款式不少,尤其甜品,三思後都係點左正餐先再決定食唔食甜品。

最後點左呢幾様
芝士波菜焗海鮮飯(個名大約係咁,唔記得影相......):雖然差唔多成舊水,但一分錢一分貨,成碟野用料充足,味道濃郁,d汁又唔會整到d飯淋晒,水準之作。日式炒烏冬:呢碟炒烏冬賣相食平平,睇落同茶記炒烏冬分別不大,不過味道唔錯,d烏冬食落都幾滑。燒牛舌:我覺得好好食,口感一流,咬落剛剛好,不太淋亦不太韌,味道又入味,好食。士多啤梨特飲:飲落有少少似奶昔,清香士多啤梨味,不太甜,唔似出面有d餐廰糖漿加水,幾好飲。

食完已經好飽,個肚再無空間食甜品,好彩無一早叫定,唔係一定食唔落。

總括風月堂既質素係水準之上,雖然同隔離女人街d餐廳比價錢唔算平,但絕對係值回票價。

接完主公收工又要出發去搵食,由於對荃灣人生路不熟,行了一段時間仍未找到心目中的餐廳,係又餓又攰既情況下,最後求其係附近搵間食算,結果就黎到富都。

一入門口九點左右仍有數張枱吉位,無需等位,選了四人卡位諗住坐得舒舒服服又有電視睇,點知坐左一陣就發現泠氣機滴水,被迫要轉去二人卡位。

坐底諗食乜,睇完個menu都係二人小菜套餐最fit我地,於是乎就點左椒鹽豬扒同蜆蚧牛肉煲。落完order之後唔駛5mins就上晒所有野,仲要全部都熱辣辣,咁有效率都係第一次見。快還快,味道又如何呢?基本上兩個字可以總結晒-好咸
蜆蚧牛肉煲:葱同姜已經佔左一半,成煲野都咸到不得了,用黎送飯都嫌咸,更加唔好講就咁食。
椒鹽豬扒:雖然無蜆蚧牛肉煲咁咸,不過仍然偏咸,口感都有少少韌,食兩塊已經唔想食。

平時食飯都會堅持食晒避免浪費食物,不過今次真係要放棄,自問自己已經算食得咸,但都接受唔到。
呢間野價錢唔算貴,服務都還可以,不過食物真係完全唔惦,絕對never again。

第一次寫食評,決定獻俾王子廚房

星期五晚接完主公收工,去荃昌中心搵野食,本來諗住去試下和食快餐,不過有唔少人等位,最後主公發板試下呢間王子廚房

王子廚房環境淺窄,一眼已經望晒成間舖,星期五晚正路坐滿人,雖然要搭位但勝在唔駛等。坐低首先當然睇下menu,有唔少咖喱選擇,一睇發現比預計中平得多,set dinner連湯、飲品and雪米滋都係四,五十左右,再望下小食,平均都係廿零。落單果陣等左陣,因為收銀同傳菜都係疑似老闆娘既人一腳錫,小本經營就將就下,至少服務都幾nice下。
最後主公叫左沙律伴春卷,我就試左個黒咖喱龍脷柳,再加多雞軟骨、煎大蝦同牛柳粒,等左一陣好快就到講左小食先:
雞軟骨幾好食,咬落剛好唔會話硬,而且都幾入味,份量又充足
牛柳粒賣相平平,但食落都唔差,不過我都係比鐘意黑椒煎多d
煎大蝦睇落都唔細隻,味道也不錯

之後到主菜
沙律伴春卷賣相很好,春卷咬落脆口又好味
黒咖喱龍脷柳,味道比較奇怪,有少少甜,好難形容,只係奇怪,唔算難食,老實講食完都唔知咩係黒咖哩.........

食完最後埋單都只係$151,絕對係抵到爛,主公讚不絕口,下次再試下其它菜式