星期六與老公駕車到南生圍，拍照觀鳥看日落!!
接著來到加州花園的大使館餐廳食晚飯，揀呢度係因為知道佢有免費泊車，而且星期六有人唱歌，想感受吓係咩Feel，所以決定一試。由南生圍過去非常方便只需5分鐘。

未入到餐廳已經聽到音樂有人唱緊歌，入到餐廳聽到首好熟既英文歌，但唔記得歌名。望吓四週，覺得個環境同氣氛唔錯，最後揀咗個可以看到歌手的座位。我地叫咗兩個SET DINNER，再加一個頭盤。頭盤揀咗個巴馬火煺伴蜜瓜，啲火煺有酒店水準，新鮮好味，就連啲蜜瓜都好甜(十個讚)。餐沙律係雜菜沙律，啲雜菜好新鮮，老公叫個餐湯係雜菇忌廉湯，料多忌廉味香濃!!主菜我叫咗個扒海鮮而老公就叫咗個燒德國鹹豬手。海鮮味道OK，隻蝦好新鮮爽口、帶子及青口都好味，魷魚一般；老公話個鹹豬手好得，皮脆肉嫩，配埋啲酸菜及一杯比利時生啤，佢話無得頂!!食到咁上吓，我叫老公點唱，佢點咗首Can’t Help Falling In Love, 個歌手叫Ricky, 佢唱之前讀出老公名, 話首歌係點俾我聽，好冧!

是日甜品係雪糕，侍應姐姐特別强調呢度既雪糕係蘇絲黃推介過的意大利雪糕，又叫我一定要試士多啤梨味，而老公就揀咗芒果。嚟到硬係會交換嚟食啦，雪糕真係好滑，而我從未食過咁好食既士多啤梨雪糕，個味道好Raw帶酸甜，好正! 食完好開心，覺得自己選擇正確。

心諗如果呢間餐廳開喺市區, 一定會好爆，因為食物水準得、環境得、氣氛得，惟一係唔太就腳，有車除外!!