表妹生日，其實依間都食過好幾次，都算唔錯，但擒晚才發覺有點問題..... 今晚共4個人，但朋友10分鐘內到，所以叫表妹用QR Code叫定嘢食先，誰不知，依頭落完單，唔洗5分鐘，個咖哩軟殼蟹就上到枱 到朋友啱啱坐低，差唔多共8款食物已經上齊晒........ 咖哩軟殼蟹....咖哩唔熱 菠蘿炒飯....唔熱，炒飯少....... 炸蝦餅.....都係唔熱 豬頸肉.....煙韌咗啲..... 連湯，薄餅，共8款食物，滿枱好有睇頭，但食物份量唔多，個人認為唔夠飽肚滿足，+埋1，$1000有找$9，唔算好抵食......

上手~(大集團期下的)~"龍門一番"川滬上海菜未做滿一年就黯然離去(雖然味道唔錯，但食物又少又要加一😑)，轉了手比藍鳥葡國餐廳附屬，開了都係上海菜，叫鳥巢~ 7/10，試業後幾日，同阿媽嚟個晚餐，餐廳基本無乜大裝修，原用番上手嘅枱櫈同深綠色嘅碟~ 不嬲至愛上海菜，今晚試吓~~ 上海排骨湯麵~ 阿媽話湯，麵，好食，排骨亦好熱脆，好好味~ 招牌糖醋排骨(例)~ 酸甜度啱啱好，值得推介 上海粗炒~ 阿媽話佢落咗啲麻油去炒，仲味道都係唔夠兼油膩咗少少 上湯小籠包x2~ 基本無得輸啦，但嫌佢個醋唔好味 生煎窩貼~ 形狀比較細隻，但都好好食，食時小心熱同小心一咬飛汁~ 豆沙窩餅~ 好食，但我連同其他食物一同上，下一次可以飯後才叫，可保持熱香脆~

有位同事即將離職，連同另外2位同事一齊係18/10，同佢嚟個Farewell lunch啦~ 曾經路經見都多人幫襯，所以靚女同事預早Book定12點，4位~ 外觀及裡面環境唔錯，座位尚算寬敞，中午12點可能係工業區嚟講食飯係早咗少少，所以暫時未見太多人入座。 Lunch set，有飯，有意粉，有麵包~類，靚女同事嚟食過一次，話Menu好似好少轉款式..... （其實餐廳可以諗諗一至兩個月轉吓餐單~~） 今次我哋叫咗~ 黃金沙蟹肉意粉 ~ 幾好味，不過太乾，如果有啲醬汁點綴(例如fing啲沙律醬/千島醬上面)，應該色香味嘅層次會好好多~ 泰式冬陰公大蝦意粉 ~ 擺盆，顏色靚，大蝦有4隻，同事話係唔錯嘅選擇~ 帶子香料鍋飯 ~ 好香，8粒帶子連同日式拌飯料係飯面形成感覺好豐富兼顏色悅目~ 凍鮮果紅茶 ×2~ 味道唔錯，如果大杯少少會好一點~ 熱伯爵茶×2 ~ 係，伯爵茶😆 法式焦糖燉旦x2 ~ （開心share食） 依個真係無得輸，外觀~啡色瓷杯，一set木蓋木盆木茶匙好靚，一打開有條迷迭香係面而下面好靚嘅燒焦糖面，好Creamy又夠味~ 是日精選旦糕x2~ Tiramisù~ (開心share食) 都係好好味，有層次，個略嫌個旦糕底乾，如果噴番啲香濃咖啡/咖啡酒，相信味道層次再會提升~ Set Lunch連同甜品起碼都要$150+，係工業區嚟講算係貴咗少少嘅，但食品性價比高，值得一試 ~~

今日紅日放假，下午1點度同阿媽行咗過隔離屋邨食台灣嘢,(屋企樓下商場有佢又唔食，不過食評又真係差啲)，阿媽話好似唔係開咗好耐，之前佢買外賣回家食過一次唔錯，今日親身嚟試試~ 酥炸排骨擔擔湯配刀削麵~ 排骨剛炸起，香脆大塊兼肉夠鬆軟，擔擔湯配刀削麵唔錯~ 凍珍珠奶茶~ 我嫌佢唔夠甜，但都幾好飲 雙丸（貢丸&花枝丸）擔擔湯配新竹米粉~ 阿媽話貢丸同米粉唔錯，但嫌佢湯底濃咗啲，食飽飽後有啲濟 熱珍珠奶茶~ 原來已+埋甜，所以阿媽話要少甜 滷大腸~ 夠入味，大腸部分都有好多，不過滷得唔夠耐同淋，失色咗少少 整睇嚟講算唔錯，有下次~~

阿媽話擒日才新開張，今日放假，2點幾同阿媽去商場試吓~ 望入去，座位算寬敞，見入右埋邊有2人位，出右邊係4人卡位，而左邊甚至6-8人卡位都有~ 新開張，始終人手應該未夠，等了4張枱，一入座就嗱嗱聲叫嘢食，所以唔算等好耐~ 一坐低，侍應該哥哥就話有茶包選擇，每位$9，亦可選擇唔飲，（見佢餐牌都多啲特飲品揀）咁就試吓啦，一人一盅，阿媽飲鐵觀音，我飲龍珠茉莉，蓋變做杯，而暖水壺蓋亦有温度顯示，公司夠細心❤~唯一美中不足嘅，係當您斟茶時，會倒到一枱都係茶😂 上海粗炒~夠味，但份量好似少咗啲，唔夠太熱 生煎包~包好鬆軟，煎得夠脆~ 上湯小龍包~超熱，多汁~👍 窩貼~感覺好細隻😆，皮薄肉嫩~ 另唯一缺點就係，進駐屋邨商場，要加一，就.......😅😅😅😅😅

話說，今個8月，有2位同事生日，而fb成日彈出佢依間嘅廣告，咁叫同事幫手訂位~ 我哋一共8人，原來當月生日就4送1，咁我哋8個就2個生日免費啦，當然去到要出示一吓張I.D，比人知道您生日啦~ 同事打電話訂位，要比$500按金，咁我哋真係預咗去嘅，比就緊係無問題啦~ 首先上枱係剌身拼盤，我係唔食生食物嘅我，但對於佢哋帶子剌身同甜蝦，我竟然唔會放過佢，唔醒，好鮮甜~ 然後就上一盆有名牌嘅肉類拼盤，每款細細舊上，多款式，又好新鮮~ 基本上佢嘅食物一流，上菜快，出面仲有飲品任食，另外個有紅白酒，柚子酒，梅酒，清酒，無得頂呀~ 雪糕有榴槤雪糕，但班榴槤友話無咩味，仲有我至愛嘅movenpick~ 限時2.5小時，咁嘅價錢咁嘅質素，超值喔… 不過小心謹慎點，如果超時，佢唔會提您，會另收附加費喔~

如果訂位前有睇吓評嘅話，我諗我都唔會………… 因為朋友係廣華醫院做完物理治療，就諗住近近哋搜尋一吓醫院附近Cafe，點知最近就搵到依間… 等Lift都等咗好耐，沿Lift上去12樓，先發覺12以下幾層開Lift門見都有幾間Cafe 係Openrice原先Book咗4:30，但我2人早咗，3:50就到，上到去，幾個職員坐正門口張枱食緊飯，而裡面仲有2枱客同一張未清理嘅枱，我話我book咗枱但早咗嚟，有個職員先淡淡然起身，安排我哋過隔離另一間黑布遮窗房，我朋友問可唔可以坐您哋嗰邊房？而職員就話要搭枱，去坐到黑布房，我話幾好呀，得我哋2個，又唔洗怕人多，係無陽光開明啫…… 其實佢哋啲食物，飲品唔錯，上樓價同地舖價其實價錢差唔多，下午茶折咗都要$299…… 至在係Openrice訂枱有飛行里數儲分同95折優惠……記得，睇食評唔好淨睇好評，劣評都要望吓，相無比真身真係咁環境優美咁囉…… 如果職員態度，面口，寛容多點，兼有多少少禮貌，積極主動多少少，我相信這個場會做越做越多客，始終上樓Cafe，點都要靠口碑先生存得長存嘅……

擒日下午1點幾，難得同2位同事可收早半日，一同入南丫島諗住行吓，Hea吓…(我都有成10-20+年都無入過南丫島了 詳盡行程唔多講住，主要想講吓，Hea完準備回市區前，去品嚐一吓甜品先~ 店舖細細，一入門口右前水平線高少少牆嘅方向，有塊黑板寫了是日推介~ 首先，當然一定會揀~"招牌豆腐芝士旦糕"~啦 再揀~原味巴斯克半熟芝士旦糕~ 同事想食雪糕，然後揀了~香蕉船，因為可選擇3球雪糕/純素雪 葩，而經靚靚老闆娘推介，我哋揀了~柚子味蘋果批味同紫薯味~ 基於我哋3個女子都超愛甜品，加上自己又算係做同類行業，根本無需要睇咩價錢，想食就盡情地嗌~ 再點了~2熱1凍美式咖啡~ 首先上枱係~ 招牌豆腐芝士旦糕，感觀望落去旦糕純潔軟滑，旦糕面上絕不馬虎地灑上玫瑰花茶嘅玫瑰花瓣係前方，而後方插上一朵完整的玫瑰花茶，再用花紋碟盛上，由此可見，老闆娘用心良苦~ 口感軟綿綿，滑溜，我食到嘅豆腐味竟然能遮蓋到大部份嘅芝士味，究竟我係食緊豆腐定係芝士旦糕呢？感覺非常之出奇~ 然後再嚟~ 原味巴斯克半熟芝士旦糕，一來本人對靜岡焙茶味不多太大好感，二來亦認為所有嘢首先品嚐原味係最原始美好啲~ 一落叉，咦…？比我想像中更軟熟，芝士味濃郁，口感超Creamy而不膩，焙焗技巧遠遠高超於ig有啲商店，加埋個忌廉波波再淋上朱古力醬，形成強烈對比，型~勁~正~ 再再再嚟個超靚嘅香蕉船~ 一上枱，個個嘩嘩聲，感觀夠震撼，老闆娘亦講解一吓，請先品嚐最上面嗰球係清香柚子味，然後蘋果批味，再嚟就係薯紫味~ 淡淡清香柚子味加上有粒粒糖漬柚子皮，感覺好Fresh~ 肉桂味配上粒粒蘋果肉然後再溶入埋金寶牛油粒粒，層次感好豐富，閉上眼食，會覺得食緊個冰凍嘅蘋果批~ 美式咖啡~ 我選擇凍的，因為我太熱血了，濃濃而不苦澀咖啡味，對於熱愛重奶味咖啡嘅我，算係一種新嘗試~唔錯~唔錯~ 其實我哋入座時間都差不多接近6點，仲怕老闆娘6點後無堂食，但佢話都只會大約做到7點~ 堂食除了我哋3人，之前亦有2位年青女性，相信佢哋都係冒名而來品嚐的~ 店舖主要係由遊客生意，但眼見亦有街坊偶遇幫襯~ 老闆娘有空餘時間出嚟同我哋閒聊幾句，感受得到老闆娘雖然店舖開了15年，但還充滿一種堅毅，滿腔熱誠，為自己店舖，產品，食物，一絲不苟，繼續用心經營，不是原居民的她，在一個原本不屬於自己的地方創辦了自己品牌，加上疫情關係，不多不少亦影響店舖營運…… 在此，本人作為小小嗜好食嘅小食家想分享一吓…… 他人在學習時投入了多少時間心機心力及金錢，請尊重各行業的專業同技術。

上星期同女朋友幫襯咗第一次，原本都唔想講，但今晚同埋8個同事再去幫襯，今次點都要講吓…… 其實$168+10%，晚上6點開始，2小時任飲任食係唔錯，再一次幫襯係覺得食物新鮮，選擇頗多，但有點麻煩係又要用手機嘟QR Code去落單，但普通飲品，丸類嘢，糖水，雪糕，就可以自己出去攞…… 第一次去食，係晚上7點幾，而今晚就準備晚上6點前等入座。 係，可能似住多客嚟食唔憂做定係將會感覺到多客會每晚做到炆嘅關係，啲侍應態度超差，由其係企櫃臺嗰位女子，樣子不算差，但態度無禮貌，其實咁樣對待客，我都唔怕用番同等態度去對待番您哋…… 第一次食，女侍應帶位，女朋友先行，帶女朋友去第二張卡位，等女朋友剛攝去入座，女侍應然後行去第一張枱回頭而語氣差到好似凶女朋友，而講…“唔係座依張呀”，我即刻回應，唔係依張咁您帶我哋埋枱 而今晚依次，9個人一個爐兼坐正門口位，的確係擠迫啲，問咗個女侍應可唔可以轉枱，一句得埋嚟話訂晒位，無……。我同事再問佢另一位男侍應(應該高級點)，對方即時幫我哋轉2張細枱…… 其實一間公司營運，多客，食評想好，都好靠職員同事合作，客人比錢去消費亦唔係要包括嚟睇您面色做人，希望會改善吓

話說，女友要慶祝農曆生日，而上一次係Yoho食過一次飯同睇過一場戲，而今次都搵吓Yoho有咩好食~ 係Openrice睇吓，開頭諗住食Outback，搵搵吓，就見到有B.Duck Cafe，睇吓人家啲食評同相，睇落去又唔錯窩，咁就試吓啦~ 搞笑:~離一離題先~係Openrice訂座，原本訂晚上6:30，㩒錯16:30，好彩職員幫我搞番掂，咁就可以儲番飛行里數啦~ 餐廳位置偏僻咗少少，可能係商場大兼又分咗區啩~ 餐廳門面好靚，女友一見到B.Duck好開心，餐廳係開放式，所以好似無咩冷氣咁，可能係早嘅關係，我哋係第一枱，所以可以無遮擋咁影吓相~ 餐廳雖然細細，但環境裝飾都好靚~ 我哋叫咗~ 叉燒烏冬套餐，+$20配件果仁朱古力旦糕，有碗餐忌廉湯，+$21升級特飲~(女友飲)~櫻花白朱古力牛奶 烏冬似係手打烏冬，夠煙韌彈牙，豬骨湯底夠濃味，隻旦旦仲要係隻鴨，正 至尊牛肉漢堡薯條，一上菜，不禁~“嘩”咗一聲，個漢堡超大個包，仲烙印有B.Duck個樣，有超厚牛肉，有超大片洋蔥，有超大片厚蕃茄同菠蘿，仲有隻旦同2片煙肉+生菜，配埋脆粗薯條，簡直無得輸~ 我就飲~B.Duck菠蘿奇冰樂，沙冰好夠菠蘿味，裡面仲有幾舊新鮮菠蘿片，另外仲有一個B.Duck樣嘅蒟蒻，影相超一流~ 雖然已經好飽飽，始終生日都要食番件旦糕嘅~外型雖則無咩特別，但勝在整件旦糕有外脆皮兼唔算太甜，亦好好味窩~ 開頭準備叫嘢食時，女友一早睇中杯~朱古力珍寶芭菲，到而家我真係相信，女子食甜品係有另一個胃了……好，就叫埋佢啦…~ 話明~珍寶芭菲，真係非浪得虛名，大杯到呢~有超厚B.Duck樣朱古力，有一角窩夫，有繽紛樂，有朱古力棒棒，有綿花糖，有香蕉，有宏哩嗱雪糕，有粟米片，有麥片，有朱古力醬，超邪惡喔~，問職員姐姐有無蠟燭，竟然又有窩，咁杯珍寶芭菲就變咗成~“生日旦糕”被影相啦~ 今餐整體嚟講係好好食喔~主題餐廳，但又唔算好貴，再夜少少，就見好多家長帶小朋友嚟食~不錯的生日餐喔~