紅豆烘焙 (佐敦)

早前見咁多人派隊，加上係媒體見過，好似覺幾好食咁，於是今日趁有機會，買左兩個試下

外形就好吸引，味道我就覺一般，只係大碗吉士咁.... 咁佢D吉士都好滑，香味就一般般，食一個就好飽肚，如果本身食量不多，咁$15當午餐都可以的 (但佢要4點才出爐，下午茶又好似太飽)，但可能之前期望太高，所以食落又唔係覺好好好好味，要排咁長隊就有點誇，個麵包有少少硬，咁個包同吉士紫薯就唔太甜，甜度剛剛好

只是如果係鬆餅或撻皮可能會更好食.... 可以一試，但就唔好抱太大期望，只可以說OK啦，不過不失，但如果排大隊，專登走去，日曬雨淋咁等去買就唔值了，剛巧路過，又有點肚餓，就可以買過來試既，始終都$15一個，夠車錢坐巴士返新界了。

集眾菜館 (太子)

今日難得去開深水埗太子，有機會來依間集眾菜館，都無失望而回

小食是一碟花生，非常香口，停不了口，但小心食得太多會生痱滋，喉痛或出暗瘡。 (少食多滋味)

首先講下隻雞都算有雞味，口感幾好，連埋內藏比人睇得出是新鮮雞，價錢雖然有點貴，半隻成$238，都唔係唔值既。

值得一試，同埋佢份量都OK架，2-3個人食就剛剛好。

同晚仲試左小炒王，份量十足，佢D蝦乾好香口好好食呀，芋頭又炸得非常之脆和香口，真係食到有點停不了口，唯一唔好是多油膩左D，同有少少味精，但用來送飯就真係幾好，就算食哂成碗飯，都仲有好多剩，加上家中唔會煮小炒王依D 香炒炸食品，所以抵食程度算好高。

最後仲試了一道咕嚕拔絲蝦球，蝦球非常香口彈牙，個漿入面仲好熱辣辣，個漿唔會太厚，太乾，仲帶點脆，但小心第一口咬落去非常熱氣，雖然係好香口好食，而拔絲又不會令食客食得好論盡，剛剛送到去碗就斷絲，唔會斬絲不斷，絲帶絲又痴筷子，再痴碗，入到口都唔會成口絲，加上拔絲甜要適中，唔會甜到喉「確」，伴菜的菠蘿片都好甜，唔酸的，所以依道菜都是可以一試。 (我見同場的食客就試拔絲咕嚕肉多。)

整體來講是感覺幾好，有機會晚上去開深水埗或太子會再試的。

有位小妹妹好落力嘗試幫媽媽落單，雖然未夠經驗同火喉，但睇出一片孝心，希望將來日後真係可以分輕媽媽的擔子，幫菜館服務攪得更上手，生意更上一層樓。

綠茵閣 (北角)

因為肺炎疫情關係，原有自助餐改為畫紙仔 (類似放題......)落單，

雖然沒有了自行離開座位，選擇餐盆上的食物樂趣(除了飲料及甜品)，但用料及味道方面都不俗，至少食完不用覺好口渴，不用要狂飲水，

加上費用$250全包(已包加一)，都算係抵食的 (晚餐就$388連加一，多餐紙上*的食物)，理論上感覺午餐比晚餐抵食(晚餐每人要多付$138)。

餐單中，本人覺最好食是馬來叻沙 (不辣，味濃，看似油膩及辣，但其實不是，食了兩碗，都能夠食很多其他的食物)。

中式炖湯好飲，美味得來，又吃了後都不口渴。

反而肉眼就比較難嚼，加上無咩味，

而刺身拼盆就要叫多幾件才可連冰奉上，味道就一般，不過不失，只是款式少D。

用餐時間亦相當充裕，官方說90分鐘用膳，但12:00食到2:15都沒有叫走，及付款，收碟又收得快，用膳食得舒服。

泉章居 (銅鑼灣)

煎炆釀豆腐

炸豆腐夠滑,沒有油膩的味道, 內裡釀了豬肉,冬菇粒, 但豬肉味道不算很突出.

口感很好, 蠔油汁的味道與豆腐, 豬肉的本身味道, 沒有那一方掩蓋其中一方的味道....

伴著的白菜吃得出爽口的菜味道 及沒有爛葉, 沙粒.......

梅菜扣肉

採用半肥瘦的扣肉, 以瘦既肉為多, 非常入味, 內裡的扣肉汁雖則偏鹹, 但如果用來送飯吃,就剛好中和

但肉的本身略嫌乾身, 如果瘦得來帶軟身, 會增加口感

花膠海參煲

花膠,海參非常彈牙及軟身! 同埋夠大塊, 上菜時非常熱, 若不歎涼一點才吃, 有點熱氣的感覺.

冬菇非常入味, 一口咬進去, 會感到內裡的蠔油鮮汁滲出來

Bubble Green (灣仔)

皇牌煎蛋焗意粉

一上餐雖覺份量比較細小, 但其實內裡包含了很多食料.

(煎蛋,香腸,牛扒,雜菜,雞)

採用即棄錫紙器皿, 但可令到意粉更透熱熱乎的, 送到食客面前,

一般餐廳都採用碟上, 但送到食客時已涼了....

一翻開芝士層, 意粉內裡的煙已洶湧而出 (未翻開前還以為這盒意粉, 半熱半涼)

香腸鹹味適中及有兩條, 雞肉煎得夠香帶略鹹, 雖則乾身了一點.

牛扒容易用口撕開, 帶有一點點的黑椒味, 及帶一點肉汁

雜菜沒有採用冰鮮的, 而新鮮得來, 沒有灼得過時, 焗出來時仍口感脅爽

難得的是所有伴菜都沒有帶有雪味.

反則,我較喜歡芝士味不是很濃(偏淡), 但就好多, 所以吃完都會覺一定程度的飽.