老實說，其實好耐都冇出街打邊爐，尤其是係放題。因為本身對牛肉嘅要求都幾高，而好多時出街食，一係就好貴，叫一碟靚嘅牛二百幾蚊，但係份量又得好少，覺得唔係幾划算。不過呢一日係想同屋企人慶祝生日，所以諗住出街食開心吓，無意中就搵到呢間大將，一人一鍋自己可以揀自己喜歡嘅湯底，食物種類睇落去都好多，所以決定試一試佢。 呢度環境相當闊落，裝修係用木色風格，帶少少日系。店員們都好友善，一直都有幫忙收拾枱面。我哋揀咗中間嘅價格，一開始會有個頭盤，一份澳洲和牛牛小排，一份拼盤包括有和牛胸複眼，牛舌同埋墨魚。之後想追加嘅話就另外叫店員幫手落單，可以追加嘅食品都唔少，再加埋出面有自助食品區，可以自己選擇蔬菜，丸類，粉麵類。仲要有味噌湯，炸物同一啲餐前小食任食，真係幾正幾豐富。 我揀嘅係海老蕃茄湯底，個人私心推介可以出去再拎蕃茄同埋芫荽落去繼續煲個湯，係超級好味😋 $388呢個價錢有得揀嘅和牛胸複眼完美地解決晒我心目中擔心任食火鍋啲牛唔夠靚嘅疑慮，油花均勻，叫咗幾盆都覺得質素非常好，淨係食呢個我都覺得值回票價。如果鍾意冇咁肥嘅，澳洲和牛牛小排質素都幾好，不過就冰咗少少。 一開始放低嗰份頭盤嘅墨魚，又係一大驚喜，係細緻到預先𠝹左花，目測開咗花就可以食，口感彈牙，好重墨魚味，好正！諗住再叫先發現原來墨魚係要最貴嗰個餐先有得任食。不過講到海鮮，呢個餐有花膠，沙白，同帶子，幾樣都有水準，沙白粒粒都有返咁上下大隻㗎。 最後想讚一讚呢度嘅服務，因為我哋慶祝生日放低咗個蛋糕，同店員講想上蛋糕，我係冇諗過佢哋會咁貼心幫我哋完全清理好張枱，想蛋糕嘅時候仲點埋蠟燭，播埋生日歌，仲有啲生日牌可以俾我哋拎住影相。其中有個笑位係店員話幫我哋影相，但係我哋發現佢拎住個相機唔係我哋㗎😳影完第一張先至再問我哋拎手機，之後先知道原來佢哋勁sweet咁即是製造左張生日卡送俾壽星女，就係用返我哋嗰張相，勁有心，係一個意外收穫🥰👍🏻👍🏻 呢一餐食得好開心 🤗

位於銅鑼灣登龍街嘅日式居酒屋-一瀧，由兩位日本福岡主廚主理，設計團隊用上古江戶時代做背景，一出Lift已經有好多好靚嘅怖置，打卡一流。 餐廳非常闊落，近門口的用餐區遇見宛如穿梭到日本江戶時代的傳統料亭，配搭雅致的格子門窗，店內最後排有美輪美奐嘅浮世繪，我坐嘅位置喺中間，以木色為主嘅日式榻榻米位，真係好似返咗「鄉下」 率先上枱嘅係特上刺身8點盛，擺盤超級靚，白身魚居多，仲有甜蝦，海膽，帶子，全部都好鮮甜好好食。然後有我至愛嘅甲羅燒，配上四塊多士，雖然唔係即場燒俾你，同埋我哋影咗好耐相，已經凍晒，但係個味道依然好濃郁，一啲都唔腥。 火炙左口魚邊加州卷，呢個性價比高，每一件上面都有塊厚身嘅左口魚，上面好啲類似飯素嘅調味，好正，簡單齒頰留香。日本海膽豆腐皮味道簡單，就係海膽嘅鮮甜，配豆腐皮嘅豆香，調味類似鰹魚汁咁，十分清新。 和牛壽喜燒，冇揀到棉花糖因為驚會太甜，叫左牛眼肉，睇落去有片肥肉，但係入口唔會好油膩，非常軟滑，好食到忍唔住再追加左兩片。鍋中仲有好多日本蔬菜， 蘑菇、鴻喜菇、洋蔥、白菜、豆腐、京蔥，同埋一啲好似芋絲咁嘅麵條，好足料。 最後真係要大讚呢度嘅服務，事前同餐廳聯絡好，呢餐飯係慶祝紀念日，想喺送上甜品嘅時候可以喺甜品碟上面寫字，點知最後佢哋直程呢兩客一瀧布甸都係請我哋食，就好似一份賀禮咁，好Sweet好貼心。

位於黃大仙中心北館地下嘅呢間韓閣佔地廣闊，用上大量韓國電影/電視劇海報作裝飾，仲有啲懷舊復古元素作設計佈置，特設多個木系打卡位，寬敞舒適。入口右手邊仲有一棵色彩繽紛嘅大樹，配以霓虹燈牌，打卡一流。 餐廳主打親民價地道韓菜，晚市時間我地叫左兩份韓閣精選客飯套餐，因為主打想試呢度嘅招牌阿之媽炸雞，套餐就正正有得揀炸雞餐，仲可以一次過試到三款口味，包括黑蔥蒜醬油，甜辣醬，蜜糖牛油醬。一份$88，兩份 $168，包一個飯，碗湯同一杯熱歛。性價比超級高！每件雞都好大件，邪惡嘅蜜糖牛油口味，上枱時見到勁大塊牛油，香到不得了。蔥蒜黑醬油味道濃厚，上面嘅京蔥帶出少少辛辣。甜辣醬則最惹味最地道。 另外單點左個部隊鍋，配有特選牛肉、五花腩片、雞肉腸、韓國午餐肉，年糕，泡麵同大量蔬菜，既足料又好味。眼闊肚窄嘅我地仲忍唔住叫埋燒蟹膏軟殼蟹手卷，因為成個配搭實在太吸引喇，輕輕燒過嘅焦香，配上蟹膏嘅鮮味，蟹子，軟殼蟹同卷內嘅醃蘿蔔都帶黎爽脆口感，果然無令我地失望。 Menu上仲有好多特式韓國料理，例如三兄弟鍋，歡樂盆等，下次叫多啲朋友一齊黎試多啲野先得。

觀塘駱駝漆大廈一向都係臥虎藏龍之地，有好多好嘢食，今日晚餐黎試呢一間喰樂，係食A5和牛壽喜燒嘅。 網上訂咗位，準時6:00去到，餐廳環境一眼睇晒,只有四張枱，每張枱都有一個屏風遮住，而且非常寬敞，枱面上已經預先準備好壽喜燒嘅爐具。套餐包括前菜三味，一款牛，一個蔬菜盛合，炊飯同甜品。 牛肉可以揀赤身，霜降，或者兩樣都有嘅和牛盛宴，我哋揀咗霜降，上枱見到牛嘅紋路非常之靚，睇落份量似乎唔多,不過以食壽喜燒黎講，因為會配飯（呢度嘅白飯係可以任添嘅）加埋啲蔬菜，其實都夠晒飽。 前菜三樣嘢都好好食，分別有冰菜沙律，茶碗蒸，同帶子裙邊。 食完前菜店員就會埋黎開始燒，佢好友善，見我哋係咁影相，仲問我哋係咪FOODIES。佢一路燒會一路介紹每一款牛嘅部位，分別有西冷，牛肩肉，沙巴當，牛板鍵。食和牛難免會有啲油膩，所以會間斷地燒蔬菜俾我哋，有娃娃菜，皇帝菜，芋絲，雜菌等等，食得出所有食材都新鮮同高質。 完成晒所有牛肉同蔬菜之後，會有一個炊飯。呢個真係好驚喜，就好似一個壽喜燒味嘅燴飯咁，落咗少少和牛粒，加入壽喜燒汁去煮個飯，差唔多就會熄火，打入生雞蛋再保持喺熱鍋上攪拌，煮好後再加入紫菜芝麻碎，蔥花，拌混黎食，好正！ 作結嘅甜品係雪糕，今日係綠茶味，都幾唔錯。成餐飯無論食物質素同服務都相當高質，性價比超高！

喺呢一區返工返咗咁多年，唔多唔少都儲埋一系列嘅推介餐廳，講到食牛腩牛什，就一定係黎近住九龍城廣場嘅呢間金豪茶餐廳，感謝佢喺疫情下仍能企穩！ 呢度一直保持乾淨企理，好光猛，無論地板定係座位都好整潔。同一般茶餐廳一樣，好多Menu都貼在牆上。 粉面套餐大約50幾蚊一碗，跟一杯熱飲，凍飲加兩蚊 今次我叫咗牛腩粗麵，另外加$10要牛筋，再加$10要牛膀，超級豐富。碗麵嚟到第一時間要喺未加醋同辣椒油之前飲兩啖湯，好濃味好夠熱！唔好睇佢牛腩大大嚿好似好瘦咁，係好夠林好入味㗎！牛筋口感都非常好，唔會太硬。牛膀雖然得三片，但係好粉好軟又帶點咬口，係我必點嫁👍🏻 加埋杯凍檸茶少冰少甜，盛惠$75，都係一個幾正嘅午餐嚟㗎

位於黃大仙銀鳳街嘅味源車仔麵，相信住附近嘅街坊都一定好熟悉，呢間小店唔做晚市，0700～1800，每日大約11am-3pm黎到都會見到有人排緊隊 佢嘅形式係不論堂食定外賣都喺門口嘅車仔麵檔位到排隊揀粉麵揀餸，整好左會比客人自己落醬料，有沙嗲，咖喱，辣菜甫同蔥花都係任落嘅 車仔餸選擇十分多，有啲係menu無嘅，埋到去見到有啲特別野可以問下姐姐係咩黎嘅，呢日就見到有豬軟骨，仲叫左酸齋蘿蔔同呢度好出名嘅豬油渣 酸齋另外用碗仔上，酸甜味洽到好處，呢個酸齋好高分！豬油渣新鮮炸起，佢唔係細細條一粒粒嗰種，又長又大條，邪惡到一個點！佢炸得好脆好香口，一啲都唔覺得肥膩。豬軟骨係我喜歡嘅口感，好淋好正！ 除左車仔餸之外，我覺得佢嘅粉麵都特別好食，佢隻米粉好滑溜嫁，仲有上海麵都係，煮得啱啱好，呢度連銀針粉都有，我見到唔少人叫嫁 最後重點想講，呢度主要做街坊生意，三餸車仔麵包一杯飲品都只係賣緊$45蚊，好抵食呀

相信有黎開紅磡區搵食嘅朋友，都對蒙面呢間車仔麵店一啲都唔陌生。 一段時間冇黎，今次嚟到見到門口多咗好多勞蘇，好可愛。一如以往呢度未夠六點就開始排隊，大概等咗三四個字左右就可以入座，都係叫返以往必食嘅蕃茄湯底，個人喜好鍾意配出前一丁，牛腩，糖心滷蛋，同埋辣汁魷魚，另外叫咗個小食，就係好出名嘅即叫即燒叉燒。 辣汁魷魚同埋糖心蛋兩個雖然係車仔送，但係佢係會另外上碟唔會放落個車仔麵度。糖心蛋選用鴨蛋，糖心次次都做得好靚，永無失手，鴨蛋真係比雞蛋要香香，入味得黎唔會過咸。辣汁魷魚個汁好好食好惹味，魷魚較淋身，唔係煙靭爽口嗰種。 自家製蕃茄湯底車仔麵，呢個真係冇得頂，新鮮蕃茄每日自己煲，每一次黎食嗰個濃稠度都會有少少唔一樣，但係味道依然係世一，啲薯仔煲到入晒味，基本上我每次都會清咗成個湯，牛腩又係必須要嘅車仔送，夠晒淋夠入味，而且佢個牛肉係好新鮮好重牛味㗎。 最後係佢嘅燒叉燒，雖然$30一串，一啲都唔平，但你食過就知道高質，每一粒都燒到有燶邊位，嗰種蜜糖焦香好正，食得出真係落足功夫製同燒，而且佢個豬肉揀得好好，唔會肥，肉質爽口，咬落仲有肉汁添嫁 溫馨提示呢度嘅車仔麵係要最少叫三個餸，好多人都有叫佢哋另一個王牌，新鮮花甲，但因為我鐵膽最鍾意嘅餸已經有三個，又要食叉燒，再叫埋花甲，我一個人真係食唔晒🤣

銅鑼灣充滿少女風嘅樓上 Cafe 一入門口就見到四面花海，打咭一流 店內播住迪士尼嘅歌，成件事好夢幻呀 試食邀請係包兩份主食同兩杯飲品 一個係西日 Fusion 嘅來自地獄的意粉 上枱好香日式味噌味，食落有少少辣 🌶 配料有啲煙肉同菇，味道唔錯但都幾鹹 意粉上而食用花用點綴 🌸 另一款係拿破崙蝴蝶粉，有大量芝士粉 🧀 蝴蝶粉口感幾好，蕃茄蓉同洋蔥都好香 🍅 兩杯飲品分別係玫瑰紅茶同碟豆花綠茶 🍹 清清地唔會太甜，仲帶點輕微嘅花香味添 🌹 黎緊仲會開多間分店，都係喺銅鑼灣嘅 喺百樂中心嗰邊，叫Snow by white hse ❄ 唔知係咪用雪做主題呢？期待有多間打卡靚cafe呀

八號風球下，照樣出黎試國金軒嘅米芝蓮點心 唔知關唔關打風事，呢日人唔多，所以較靜 而且被安排坐喺闊落嘅卡位，成件事好舒服 充滿期望亦無令我失望，呢餐有兩樣野非常好食 第一係雪山菠蘿叉燒包，外皮輕微酥脆，餡料平均 鍾意佢唔會太多醬汁太甜膩，最正係真係有菠蘿嫁 第二樣係法式鵝肝荔芋角，呢個好驚喜 芋角炸得好鬆化，芋泥好滑好綿，中間有粒鵝肝 細細粒但好有油香，成個配起黎味道口感都好夾 其餘嘅都係有水準嘅，值得再黎試多幾款特式點心 松露野菌餃賣相一般但皮薄餡靚

Lunch Menu 就只有一款套餐 一份指定沙律，一份餐前麵包 揀幾多成熟嘅肉眼，然後任食薯條 沙律類似 Waldorf, 有啲核桃，唔錯 牛扒揀左 Medium well , 上枱已經切好晒 放置喺一個有支短洋燭嘅鉄架上，保持溫度 牛扒肉質好夠淋啱晒我，肉味濃又有肉汁，正 佢本身都有足夠調味，可以唔使點佢個秘製醬汁 然後想重點推介佢個薯條，真係估佢唔到咁好食 佢係幼身，唔會好真材實料薯大仔味嗰種 但佢有一種好獨特嘅香味，係無法用言語形容 加上新鮮炸起熱辣辣咁鋪上碟，係會食到停唔到嫁 我食完第二碟其實都飽嫁喇，但又忍唔住照 fill 左第三碟 題外話想高度讚揚員工嘅服務，話說我喺 openrice book 位嘅 咁我就 remark 左自己生日，但我去到先知 lunch set 無甜品 （ 可能我上網搵到嘅係舊 menu ） 當我地食到咁上下曾經有 waitress 問過我要唔要叫 Cake 嘅 咁因為食薯條都食飽晒喇，而且當日見到隔離枱生日 會有一個比較高調嘅 ring bell sing song 嘅慶祝儀式 um....所以我拒絕左無叫到 cake 打算不了了知 直到我地埋單，waitress 們喺我身後響起生日鈴鐺 omg...原來佢地履行左我 booking 有人生日嘅 remark 送左兩小杯青蘋果果汁，寫上生日快樂嘅碟比我 嗰下係有啲尷尬，但呢件事好窩心呀，so sweet thank you very much 🥰 打完呢篇食評，好掛住碟薯條呀 🍟