小肥羊 (荃灣)

約好從外國回港嘅朋友, 因為就唔到日子, 明知除夕出街食飯一定人多都冇辦法, 唯有早幾日book位, 早四日打去book, 順利book到6:30pm, 第一次去荃灣分店, 原來幾大間, 好多位, 入座起計限時兩個鐘, 不過食得唔趕, 絕對食得切, 個半鐘已經停手了

講到食物, 點了麻辣+清湯鴛鴦鍋, 叫了肥牛, 第一碟好差, 一碟份量不少的, 但係大多都唔係完整一片片, 而且肥肉比例太多, 比例係勉強先及7/3好離譜! 第二碟靚仔好多, 肥瘦係正常比例, 仲點左羊肉, 蝦滑, 芝心丸, 蟹粉丸, 滑牛, 肥羊粉, 烏冬, 豆腐, 油蜜菜, 生菜...., 最欣賞係d菜都洗得好乾淨, 好新鮮! 但湯底好咸, 呢樣真係要改善下, 我地都張壺滾水加落去減淡湯味,

仲有成晚最滿意就係員工態度, 好快手幫我地收食完嘅碟, 又密密幫我地個鍋加湯, 完全係唔洗我地出聲要求, 雖然除夕人多客滿, 都冇話服務差左, 食物都上得好快, 一定會再去荃灣店幫襯!

杏花樓甜品 (旺角)

早幾年我去開荃灣的杏花樓, 記得當年好鍾意鳳凰奶糊, 好香滑, 雖然唔算平, 但美味, 都好捨得間唔中就去食, 後來又結業, 一直都冇刻意去搵邊度仲有杏花樓, 今日去甚少行既新世紀見到有, 二話不說就決定入去食lunch

左揀右揀, 叫左牛腩飯set $53, 片頭牛腩菜飯, 合桃糊

要講清楚, 相係食到一半影, 唔係得咁少, 因為原本冇打算上黎寫, 食落真係覺得好差, 想留comment比大家作參考牛腩好好味夠林, 最衰總共得三件, 睇相都睇到唔大件啦, 仲有最慘既係魚片頭超咸, 牛腩少唔食魚片頭就冇乜餸, 搞到我食左兩件咸片頭熱合桃糊超級甜, 因為個餐都唔算平, 好勉強食左半碗
唯一好處係全部食物都夠晒熱

可能係轉左投資者啦, 食物同以前都唔同晒, 估唔到依家味道咁差, 唔會再去食喇

仲有想講, 侍應問我食乜幫我落單就好似係有禮貌(頭一句), 不過粗聲粗氣, 比我感覺好悔氣, 因為入去時係lunch, 檯上既餐牌都係午餐, 冇正式餐牌睇, 我問佢有冇鳳凰奶糊, 我未問完晒成句佢就有D悔氣冇耐性咁話"我地冇呢D野", 感覺唔好受, 我自問態度語氣都唔係差啦
除左佢, 另一個接觸過既係一位女性經理, 禮貌態度都GOOD, 正當我就快食完飯, 疑惑緊係咪糖水漏左單, 我未開聲問, 佢出黎執檯望到我就食完就叫同事上糖水比我, 醒目! 呢樣抵讚

馬家莊清真館 (太子)

態度勁寸
我係買左團購, 預早10日book位, 到左食飯當日, 下午打比我confirm, 問我係買新定舊, 都唔知佢講乜, 聽電話個女人態度好寸, 佢話我地搞左兩次團購, 你買新定舊架? 問我係新定舊, 我點知你搞左幾多次團購呢? 唔講清楚點知你講咩新舊呢?

好啦, 咁我地早左20分鐘去到, 太子mtr行過去身水身汗
我 : 我book左6:30pm, 早到左, 可唔可以入去坐住先?
佢 : 你齊人未先? 拿…我地booking好full架, 一陣要請你地走就唔好意思

佢講呢番說話係好冇禮貌好寸咀刁難人咁, 咁我地都係早少少到, book左四位, 三位都到左, 仲有一位已經黎緊, 我想話我地都係早左20分鐘, 乜佢仲會比我地預留的檯其他人咩? (入面有幾檯食緊, 有幾張吉檯)

其實佢地安排得真係好差, 到坐低左, 伙記姨姨又係問我新定舊, 根本我就唔肯定我係新定舊, 門口個女人同我講左一輪應該知啦, 又唔話比伙記知, 幸好伙記姨姨態度好好, 我同佢都好無奈, 員工食客都搞到駝駝擰, 間舖又細檯唔多, 冇咁大個頭就唔好戴咁大頂帽啦, 仲有應該搞另一次團購要同前一次分開日子, 唔好撞埋一齊就唔會自己亂又搞倒d客啦

講到食, 牛肉餅, 雞絲粉皮, 沙鍋雲吞雞, 牛腩都好食, 牛腩夠”林”, 少d油更好, 炒飯粗炒都好多油, 如果唔係態度奇差, 我都會再想去食牛肉餅, 就算正價都唔係好貴, 要去都只係會去另一分店