聆渢咖啡廳 (屯門)

SEP 29, 2009 (TUE) LUNCH

天氣還是不太好，時晴、時陰、時下雨，去食返餐嘆吓享受吓先吧！
嚟到都唔知食咩好，服務生介紹呢度有LUNCH BUFFET剛開始，於是乎行過嚟睇吓，個VIEW都唔錯，環境幽美，就試試喇！

首先飲碗湯食個飽先，選了其中一款唔記得係咩，好似係蕃茄湯，味香濃非常好味！個飽就硬咗D，都係留返個肚食其他嘢好了！

去到沙律吧，樣樣都拎嚟試了少少，蔬菜新鮮爽脆，件南瓜粒好腍好甜，但已撈好嘅沙律就略遜，除Strawberry外全都是罐頭，令味道變得好甜，唔太欣賞！
反而最欣賞嘅係D有濃厚泡菜味的大荳芽菜，真係好入味，食咗好開胃，啱哂！

冷盤種類繁多，隨意選擇一些試一試：青口、日式櫻花蝦，還有一款好似叫香芒吞拿魚卷，就講講呢款先吧！一啖放哂入口有D困難，但睇個樣覺得好似壽司咁食應該係最滋味，於是食得一口滿滿的，口感豐富，味道豐厚！
青口其實就無咩味，只係凍凍的！
樣子可愛得Q爆的櫻花蝦，蝦身晶瑩剔透，從蝦殼望入去，像似透明似的，味道甜甜地好得意，去到真係要試試呀！

行去日式魚生、壽司櫃台，發覺選擇唔多，魚生部份只有三文魚&吞拿魚，壽司方面有兩款卷物，兩款卷物有著Q版的外貌，飯味調教出色！魚生唔係屬於肥美的品種，但都唔錯還是想添食！

跟著當然要試吓食件燒牛肉喇，還有燒豬仔肉，原來切開好似一件燒腩仔咁！流哂油，仲係五層嘅燒腩肉嚟，非常正！因為仲有好多嘢未試，所以要一件薄片燒牛肉試吓味算了，睇個樣就唔係太吸引，但食落去就真係好好食，肉質嫩腍味鮮！又睇佢唔出喎！唔係仲有咁多嘢未試，真係想再嚟一件厚切呀唔該！HEHE！

熱薰中間有個小小的小食吧！有迷你春卷、咖喱角、薯粒、炸雲吞&PIZZA，跟一般買返嚟的差唔多，脆脆的、熱熱的，OK喇！PIZZA薄薄，餡料多，脆卜卜，蠻不錯！

食BUFFET嚟講，熱薰方面一向唔係我嘅選擇，隨隨便便睇咗一轉，有炒飯、干燒伊麵、蘑菇炒小唐菜、焗龍脷魚柳、瑞士豬肉、荷蘭豆炒蝦仁、燒賣、南瓜粿等等… …D菜名唔係太記得la
熱薰之中魚係我必選項目，雖然無好大條嘅蒸魚，略有失望，但件焗龍脷柳都唔錯，魚肉幾滑幾香！另外俾個名吸引住所以拎嚟試嘅係瑞士豬肉，切得好薄的豬肉片，外貌似一片午餐肉，食落唔係太特別，真係有D午餐肉FEEL呀！
樣貌標緻的南瓜粿，樣子仿真的南瓜一樣，手功細膩，極為趣緻，味道帶少少甜，內裡煙煙靱靱！我覺得做擺設都不錯呢！

雖然經已飽飽地，但都試吓碗生滾粥喇！兩個人分都應該可以應付得來的，哈哈！本來大人要揀皮蛋，但係我選了魚片配撘好似怪怪地，最終選了魚片&肉絲，不過ODRER的時候，有個小插曲，因為個WAITER細細聲同我講，妳要食粥等我入去拎D粥底出嚟先煲得，等一陣幫妳拎入去，真係好攪笑！不過整體碗粥普普通通，早知唔好麻煩人喇！唔該哂！

一入嚟的時候已經俾WAFFLE吸引住，終於係時候食佢la！唔該要兩件，WAITER靜靜地講咗一句：「我入去拎蛋漿先」。於是佢通知負責的同事，嗱嗱聲拎D蛋漿跑到出來招呼，為咗我呢個胃食女王，整完仲要洗一餐，真真超級唔好意思！勞煩哂la！見到要等就周圍影吓相先，師傅整好仲拎住行嚟叫我自己揀D醬落去先食喇！真係好NICE！分別加咗少少糖漿、花生醬&練奶，熱辣辣甜甜脆脆，好享受呀！

已經好FULL，但點寫得唔食最愛嘅甜品呢！甜品吧安排在正中央，在繁多的選擇中，選了一杯朱古力慕思，好滑不過因為係朱古力，覺得溜溜的。
2款迷你CAKE：綠茶&檸檬各一件，綠茶味濃且香滑，檸檬味同樣好香，且底層蛋糕好鬆軟！
2款迷你TART：藍莓&紅桑子各一件，兩款水果新鮮味鮮甜，但撻底唔脆略遜！

雪糕方面：係雀巢迷你杯裝雪糕，多款味道任均選擇，但好FULL la食唔落lu！
新鮮水果有3款：菠蘿、哈蜜瓜 & 西瓜，都係嗰句la食唔落lu！

最後去了自製飲料吧，大人自製一杯熱檸茶，而小妹我就要了一杯橙汁，雖然唔係鮮渣的，但都好多果肉，唔係太甜，幾好味！

服務就唔駛多講喇！好NICE，真係一流！辛苦哂！

可能今天天氣唔太好嘅關係，食咗成個下午，除了我倆之外，就只有兩個內地遊客光顧，他們怱忙食了半小時左右就離開了！
所以我哋同包場食係無分別 la，hehe！環境舒適，服務一流！真係覺得好幸福呀！好似發緊夢一樣！原來午餐都可以咁浪漫！多謝哂大人賜給我一個浪漫的午餐，但係大人係咪有D嘢做少咗呢？如果唔係真係覺得自己幸福滿瀉，哈哈！

HSBC CR Card ~ 折扣優惠，加一後 $285.60 FOR 2位，食咗一個中午，有包場嘅服務，環境清幽，食物質素OK！真係去邊度都食唔到！

海鮮生蠔吧 (尖沙咀)

AUG 22, 2009 (SAT) DINNER $1140

入到去發現有個閣樓，服務員隨即帶我們上了上層，樓底好高好開揚眼界好廣濶，感覺好舒服！位置還不錯，剛好望正下層蠔吧檯，美中不足係要好小心，如果唔係好容易趺D嘢落去擲親人！HEHE！

首先服務員貼心地介紹以下呢個優惠俾我哋，都好啱食，於是ORDER一個試一試！

中銀信用咭 5 折套餐優惠：(原價$1,460) 優惠價 $730 另收加一服務費

首先另叫咗兩杯特飲，係Buy 1 Get 1 Free嘅！$58
Bora Bora ~ 色彩繽紛，仲有一粒櫻桃襯托下更鮮豔奪目，飲落好似沙冰咁，冰涼解渴，實在太吸引，一陣就俾我飲哂！哈！

頭盤係迷你海鮮拼盤：
生蠔4隻、蘇格蘭煙三文魚 & 翡翠螺2隻
分別有澳洲蠔2隻夠鮮味，法國蠔2隻就較海水味重啱哂我！
煙三文魚鹹香味剛好！
望落蠔吧位置見到煙三文魚係師傅原舊即切片的，唔係一早切定嘅！
翡翠螺味鮮甜！
可能D海鮮太鮮美，有隻螞蟻孫仔喺個醬碟度行吓行吓，虎視眈眈預備同我搶食，好可惜俾我發現咗，唔好意思 la ！你係唔可以留底架！
希望佢哋呢一方面以後注意一下！

生蠔：
D蠔太美味唔係好夠喉，於是乎order 多每人 2 隻食吓先！
由服務員嘅專業推介，幫我哋選咗另一種澳洲生蠔 & 美國生蠔
Danial Bay 係澳洲生蠔 $48/per one ~ 雖然澳洲蠔比較清淡，但呢種明顯比之前嗰種蠔味濃少少！
Barron Point係美國生蠔 $62/per one ~ 肉質肥厚，味亦較濃郁，好Creamy口感唔錯！

特式法飽 ~ 有3款，仲熱嘅，外脆內軟，有一個仲有幾片車厘茄做餡，甜甜哋我最鍾意食呢款！

湯：
牛油梨周打魚湯配意式生帶子 ~ 新鮮生帶子鮮甜美味！湯好滑，味濃香！！

主菜：
香煎法國海鱸魚配鮮蠔白酒汁 ~ 首先我試咗伴碟嘅小黃瓜，迷你黃瓜仔係原條上，Cute爆！熱辣辣，極清甜，超超超好味！車厘茄同樣極新鮮清甜！講返個主角海鱸魚，煎得好靚，魚身實肉得嚟食落肉質還是滑，真的有點海水嘅咸味添！配搭個鮮蠔混白酒做嘅汁，出奇地夾，能帶出魚肉嘅鮮！挺不錯！

焗巴黎牛柳配砵酒汁 ~ 面層黃色嗰D其實係醬汁，醬汁被焗到微燶頗有趣！牛柳被醬汁遮蓋後，醬汁嘅味道完全浸透在牛柳裡，焗出來又是別有一番風味！肉還幾嫩喎！

甜品：
唔知點解個甜品由意大利芝士餅變咗朱古力慕絲？
朱古力慕絲配新鮮草莓 & 藍莓
朱古力味香淳，慕絲頗滑！草莓 & 藍莓幾鮮甜！

餐飲：
熱咖啡 ~ 幾香濃！
熱檸水 ~ 檸檬唔太酸，唔錯！

一邊食一邊睇住開蠔師傅唔停手咁撬開啲生蠔，手勢熟練，仲一類類分開那類別嘅生蠔進食時先後次序逐一擺放好，非常專業！
負責做沙律、切煙三文魚 & 海鮮拼盤嘅師傅一樣忙到透不過氣來，也是一個夠哂專業嘅師傅，功架了得，擺設精緻！

服務員親切有禮，夠專業！仲幫我哋影咗張相留念添！

套餐連特飲加一後，扣回套餐半價優惠 $939.80
另叫生蠔加一後，生蠔原價有8折優惠 $198

小南國 (中環)

OCT 12,2009(MON) LUNCH $325
糖醋小排骨 $45
係一個冷盤小碟，這小碟好精緻，用上兩塊葉捲成像是手卷壽司一樣，內裡藏滿凍凍的小排骨，對我嚟講好有新鮮感！
糟溜魚片 $88
面層舖了數片魚肉片，下層用上大大塊的雲耳，黑白顏色對比分明！
魚肉略有少許魚鱗，魚肉味清淡，D汁就唔係幾啱口味，可能係雲耳嘅關係，有D酸酸地！鍾意食清淡的餸菜，還是一個不錯的選擇！
宋嫂魚羹 $25(1位) x2
見到個名覺得好得意，樣子有點兒像碗仔翅似的，但是配料就是用上切粒狀的，一粒粒的魚粒多的是，啖啖口感十足，帶著一絲絲清甜嘅魚香味，唔錯！
蟹粉小籠包 $45 (5件)
Size 唔算細，不能一口將整個放入口中享受喔！所以要先輕輕咬一口外皮，然後將肉汁吸入口中，才不讓肉汁流走，皮不太薄但亦不算厚，肉嫩汁多！
蘿蔔絲酥餅 (2件)
菜牌係無呢款食物，但又想食，試試問吧！又有喎，當然要一客喇！
一客只有兩件，外面的酥皮跟一般的無異，餡料加上一點點金華火腿粒，內裡汁略多且鹹，可能因為火腿粒的關係喇！溜溜地！
上海三絲春卷 $25
春卷外型扁扁的好趣緻，外皮脆卜卜，餡料好清淡，但太油，拎開碟上的吸油紙，碟底還是一碟油！
唔知點解嚟食午餐次次都好似好趕咁，可能因為服務員成日好急咁收嘢喇！換碟喇！拎嘢嚟咁喇！攪到氣氛好緊張！我都食得好緊張，hehe！

麥當勞 (屯門)

OCT 12,2009(MON) TEA

發現買一送一優惠咭又出場，專誠去買咗一張$10，限期內無限次使用，真係好抵呀！

出咗個朱古力批都未試過，買兩個返嚟同弟弟一齊試一試！

原來都幾大件喎！比一向都是選取長方形狀嘅批，造型改變為立體三角形，頗有新鮮感，唔錯！
批的外層脆脆地，朱古力漿由批內洋溢出來，熱辣辣甜絲絲，飽肚感十足！
一定要熱食呀！不過食時小心熱烘烘的朱古力漿流出來，熱到飛起！

坤記 (屯門)

OCT 7, 2009 (WED)
昨晚專登醃咗一大舊鹹瘦肉，諗住今晚煲瑤柱皮蛋鹹瘦肉粥，所以嚟買D油器返去送粥先！
炸油條 $5、牛脷鬚 $5 、蒸蘿蔔糕 $7、叉燒腸 $11
去到都成5點半，仲見到炸緊牛脷鬚，脹卜卜真係好得意，真係見到就想食喇！等一等買件新鮮出爐嗰啲先！甜甜地、脆脆地，真係好食到無比呀！
條油炸鬼雖然係喺個保暖櫃拎出嚟，但依然好熱好脆，真係唔少得佢喇！
睇吓睇吓，發現有蒸蘿蔔糕，咁就買一件食先，因為好少地方有得賣，件蘿蔔糕唔係好大件，不過用料好足，好多蘿蔔絲，真係好香蘿蔔味，唔會好多粉，真係食得好滋味呀！
叫咗一碟叉燒腸，個呀姐幫我包好哂所有嘢先話我知係即蒸嘅！而家同我去蒸，吓！咁就一早蒸咗先包其他嘢喇！等等等，都係去行一陣先返嚟拎，本來以為要俾錢先，不過呀姐話拎先嚟俾喇！又好似幾好喎！唔驚唔返嚟咩！HEHEHE！
碟叉燒腸非常多叉燒，啖啖均可以食到，不過D粉就略厚，但都唔算太厚la！
走時見到坐門口個客食緊一舊炸蘿蔔糕，成磚咁好吸引，有機會一定要試吓！
下次要試吓個咸煎餅 & 炸煎堆！