咁岩去到上水附近搵朋友，同朋友行過見到呢間日本料理就入左去試下啦，點個知一試真係勁難忘，下次有機會一定會再返黎！
因為閒日啦同埋同朋友比較早時間就到左，所以唔洗等就入得：）我地叫左串燒，刺身同埋個甜品，首先就黎左我叫既野飲先，就係抺茶紅豆冰。綠茶味唔濃唔係好苦嗰種，對我黎講就岩哂 加埋紅豆黎飲岩岩好
之後就係當日既精選既活魚刺身 - 目張啊！賣相好靚，食落仲正！
我原本係唔太食刺身既人啦，係朋友威逼下食左一塊之後就停唔到仲搶埋朋友嗰份haha
佢既口感好煙靭，魚味好鮮甜，正！
之後就到我地叫既串燒喇～
首先係鹽燒煙肉蕃茄仔串～～～～P.S 好鐘意佢個爐，好少舖頭仲有炭爐燒，仲要好靚haha一路燒一燒聞到煙肉既香味引死我同我朋友 燒完之後既煙肉蕃茄串好香，外層既煙肉好脆，咬到內入面既蕃茄仔之後又中和左煙肉既油膩感
第一個就食佢係正確既選擇 好開胃！
之後我地就食珍寶帆立貝 佢落左少少牛油同蒜粒，燒既時候好香 入口好嫰，燒完之後都仲有鮮甜味，加埋牛油香諗起都流口水
之後就到雞翼喇，我係一個雞翼控，而呢到既串燒都無令我失望 有店員既幫忙，雞翼燒到外脆內嫰，同埋間舖腌得好好食
最後既就係鹽燒牛舌‌～～牛舌都算厚，入口好有彈性，因為可以自己燒所以自己控制燒幾耐
店員教我地燒一陣就okay所以唔會話太靭咬唔開，又多肉汁好好食！！
佢仲同我地講給如果叫六串串燒就會送啤酒，可惜同朋友食唔到咁多，下次多d人黎一定叫haha
女人就係要有甜品先哪叫食完一餐
所以我同我朋友就決定叫個蜜瓜紅豆芭菲 個蜜瓜比我地兩個想像中大好多 同朋友兩個人差d食唔哂
蜜瓜好甜，加埋呍利拿雪糕同紅豆真係好好食！
唔洗擔心會太甜因為雪糕有d中和左
我同朋友都覺得四個人share食都夠haha

總括同朋友都覺得值得再黎食
舖頭唔算大 好適合三五知己聚會，
有機會一定會再黎，又價錢公道又好味！

西灣河太安樓一向都係香港地道小食的集中地，因為我住附近的關係，所以成日都會係太安樓解決三餐的需要

而今晚係我肚餓的就快暈低的時候，我去左太安樓買宵夜醫醫肚雖然已經係凌晨的一點幾，但呢度keep住有人黎買外賣小食，見到婆婆都做到冇時停
今晚食左生菜魚肉，好滿足呀雖然生菜魚肉只係一樣好普通的街頭小食，但我對呢度的生茶魚肉真係有D偏愛
每次黎到呢度買外賣，婆婆都會即叫即整最新鮮的生菜魚肉比我，而唔係"不"一大煲煮好哂的生菜魚肉！另外，佢係先將洗好的生菜放落個碗，然後再加好熱的湯落去，再過幾次水，之後再隔水，最後先放D魚肉係面，咁樣就唔會令到D生菜同魚肉煮到好老同好"林"喇！ 加上婆婆落D麻油果D都唔會好重手，所以味道岩岩好！ 咁多魚肉都係＄12一碗咋！

下次大家經過太安樓都要試下喇，支持下香港的地道小食呀嘛！

鬧市既餐廳就算平晚，通常都一樣係咁多人，喺銅記既呢間組長日本料理亦唔例外，六點幾鐘已經幾乎坐爆~
呢間鋪其實唔大，擺放咗唔少既座位，但係又唔會感覺非常逼~ 喺商廈樓上餐廳，最鐘意就係坐窗口位，可以望番落去見住啲人走來走去，平日唔容易可以咁樣望到~~
坐低咗之後，店員已經好細心咁話最近天氣比較乾燥，問使唔使叫咗嘢飲先，然後就遞咗張飲品紙俾我地簡，呢個小小既舉動都真係幾窩心，好禮貌係基本，但係要做到想顧客所想，先真正叫做良好服務，就係咁樣我就已經對呢間鋪有咗一個良好印象!
佢講得啱既，近日天氣的確乾咗好多，所以就整咗罐蜜桃茶來飲，雖然佢都係得罐裝，但係款式上都OK既，唔會得汽水同汽水~
睇番食物，呢度既種類真係非常既多，喺我地手忙腳亂剔緊嘢既時候，好快店員又走咗埋來問使唔使幫我地收咗剔好果啲先，等我地剔完即刻有得食~ 又係咁貼心既服務，真係抵讚!
食物唔洗幾耐已經來到，而且上得都幾快~ 急不及待咁試咗啲魚生，食落同睇落都幾唔錯，啖啖肉得來又夠鮮味，good! 跟住就食咗啲甜蝦同赤貝，甜蝦雖然細隻，但係肉質嫩滑，幾隻一齊擺落口，唔洗點豉油都已經好正~ 不過到赤貝我就覺得稍為硬咗少少，雖然一樣係好有鮮味，但係平日食果啲應該比較爽脆一啲，所以第二round就冇再叫~ 因為我都唔係好食其他魚，所以對我來講，三文魚好食、蝦好食都已經幾足夠=]
到熟食方面，焗蠔、牛柳粒、串燒雞之類都相當唔錯，蠔好夠肥美多汁，鮮味非常，加咗少少既芝士同埋香草，食落真係好唔錯，其實除咗焗蠔，佢地亦都有炸蠔，不過個人覺得焗蠔比較正~ 至於牛柳粒，份量雖然唔多，得十粒八粒，但係食落好夠嫩滑多汁，而且有我最鐘意既葱花，正呀!!
但係食到天婦羅，我就覺得麻麻地，部份既炸粉比較厚身，而且炸蟹柳真係用打邊爐果種來炸，我就確實唔多鐘意，而且冇軟殼蟹….
款式真係多，無法亦都無意一一盡錄 只能講話呢度食物質素唔算太突出，但係款式多，不過重點係服務非常貼心，店員有效率亦有禮貌，做嘢好主動，抵讚!!

(試過三幾次都upload唔到相，就此作罷)

秋天又系打邊爐既時候，今次見openrice評價唔錯，決定黎呢間打邊爐~

呢間新鋪環境唔錯，裝修簡單，睇落唔多次係火鍋店，不過感覺乾淨舒服，坐得都闊落。安頓好之後，因為都唔知點咩食，所以就問下個侍應，佢推介鴛鴦鍋，一邊系可以雞煲，一邊可以唔同湯底，而雞煲重可以要既唔同部分、甚至連辣度都有得揀，真系第一次聽，好特別﹗最後我地叫左兩個煲，第一個揀左雞煲配龍蝦湯鴛鴦鍋，雞胸，小辣，第二個皮蛋芫茜配牛奶湯鴛鴦鍋。之後再睇到點菜紙，就發現佢地都幾多唔同野去食，單系牛都有唔同部位食我地就叫左D一般打邊爐既材料等既期間，侍應比左份呢間餐廳既報道，比我知道下呢間餐廳。睇過篇報道之後，我至知道原來呢間餐廳有好多種雞煲既食法，而老闆因為注重養生，並且希望改變一下「食雞煲唔健康」既傳統。呢個相信系每個雞煲愛好者既喜訊!等左無耐，個鍋到左，而其他材料都好快就到。雞煲配龍蝦湯鴛鴦鍋熟左之後，一陣陣香味直飄埋黎，系雞煲既麻辣味，亦都系龍蝦湯既香。夾起雞件，都幾大件，肉好多而骨好少，非常入味，而麻辣味都好夠(不過我自己食既話應該要再辣D)。食完雞煲，侍應加左藥膳湯落去，湯底既香味又唔同左，有D中藥味，但完全唔難聞，加入材料後，果D材料，也唔系好似中藥既味，有少少甜，亦有少少雞煲既辣。呢個我從未試到咁既味，但以我個人黎講，都幾鍾意。而個龍蝦湯好鮮甜，用黎打邊爐一流。至於另外一個鴛鴦鍋，皮蛋芫茜清淡得黎，芫茜都好重。而另一邊特別既牛奶湯，呈白色，奶味好重好香，加上材料，令材料更惹味。
咁好既湯底，令我地呢班人，一路食，一路加湯，一路加單要打邊爐既材料，食左好多輪。大家食得開心，傾得開心。睇黎又多一間打邊爐、雞煲好餐廳啦

上OPENRICE見到呢間Dazzling Cafe既食評唔錯，亦都有好多好評，所以專登黎試一試。上網睇好多人都要等好耐先有位入到去，不過今日可能唔係假期，所以唔洗等得太耐，大概40分鐘多少少就入到去。

入面環境唔錯，不過就冇期望中咁靚，不過都算係中上，感覺上都幾舒服。 吐司算係呢間既招牌菜，所以專登叫左個「抹茶紅豆蜜糖吐司」黎試下。但原來系冇咩特別，只不過系幾塊厚少少既多士，還要冷冰冰的沒有口感。整體上沒有很突出，名過於實吧這個叫什麼檸檬醬雞脾意粉之類吧，咸咸酸酸甘，雞既肉質唔嫩滑，有少少"鞋"整體唔覺得好食，特別系個醬汁。。。。

鍾意食野ge人都知，銅鑼灣登龍街，可以話系「銅鑼灣食街」。而拉麵店，都有幾間出名ge落戶呢到。試過唔少間舖又大又出名ge拉麵店，今次試間系香港未太出名但系日本個名就響當當ge拉麵店-----金田家。
去到餐廳，裝潢佈置幾有特色而簡單，分吧枱同普通枱，共廿幾個座位，重有一個開放式廚房，保留左一部份日本風。牆上掛左一D佢地曾經得攞過既獎狀同拉麵相。簡簡單單，或者就系金田家創辦人金田先生ge風格。
坐低之後，店員會用心同詳細向我介紹餐單上既食物，重會先問曾光顧與否而加以解釋應該選擇ge拉麵，服務態度一流。我揀左荳芽叉燒拉麵，硬麵，正常葱量~ 宜家一碗拉麵仲送一隻溏心蛋。
等左一陣，拉麵就到啦。賣相，真系幾吸引，湯系奶白色兼有起少少泡，叉燒整齊擺好，紫菜放系側邊，加埋隻溏心蛋，睇落都想食。麵條雖然幼身，但由於系硬麵，食落嚼勁不錯，掛湯力強，湯同麵合埋一齊，絕配也。湯質感濃稠，豬骨味好濃，肯定好足料，煲左十幾個鐘都有可能。叉燒薄薄地一塊，入口肥瘦均勻又帶醃製過ge香味，唔「乾爭爭」，咸咸地，好醒胃。大量芽菜、木耳、青蔥，香而爽口，中和湯的濃厚味道。溏心蛋甜甜地，濃郁蛋香，咬開佢就有呈半流心狀ge蛋黃流出，入味道出眾，系我食過最好味。銅鑼灣登龍街，細細ge金田家，果然名不虛傳。我相信，憑藉佢地食物質素，一定會有更多人黎食，成為呢條街ge「驚艷」。

善緣素食， 令我重拾返食肉既感覺
因為近排食素既關係，窩心既男朋友約我食飯既時候都專登簡間齋鋪黎就我。
依次男朋友同我都係第一次食齋，我望住個餐牌唔敢相信果d係素，因為同普通餐牌冇咩分別！我男朋友見我驚訝既樣就話依到冇真肉嫁，於是我就放心咁叫！之前去親邊食野，簡野食都就住就住，因為全部都係肉，今次終於可以比我無拘無束咁叫野食！最後我叫左平時我最鍾意食既咕嚕肉，男朋友就叫左琵琶豆腐。因為得兩個人所以冇點好多黎試。

首先講下我最愛既咕嚕肉仿真度極高！無論係賣相定食落去既口感，色香味都同真肉無誤！醬汁酸甜度岩岩好，加埋落青椒到，就連平時唔食椒既我都食左幾舊椒！總之酸酸甜甜，令我食慾大增！依味餸用黎餸白飯真係一流，好開胃呀！同埋真係令我重拾返食肉既感覺！

其次到琵琶豆腐食落口感好豐富！外脆內軟，仲有加左莞茜，特別香！加埋d有麻油香既茨汁，食落去就唔會淡而無味！仲有好多白菜仔塾底，吸左少少茨汁好正，仲好健康！

最後老闆好好人，送左兩碗仔椰汁西米露比我地！好warm!雖然d西米好冧，但椰香搭救！
下次一定會再去，鍾意老闆既人情味。

之前生日，但一路未約到中學好朋友食飯，今次終於約到，由朋友請！
因為係旺角諗左好耐都諗唔到食咩好，所以就想去朝聖一下，睇下點解monster sushi晚晚都排晒長籠～
我同朋友一行四人，等左半個鐘左右先坐到入去。

因為係朋友請既關係，所以冇睇價錢就亂嗌喇！諗住咩都試下，點知。。。 可能係我期望太高，所以覺得D壽司全部都好一般咋。。有D甚至腥腥地，失望！令人失望的和牛壽司，食落冇乜味，咬左幾啖就直接吞了。 總括黎講，壽司唔吸引的原因，係飯的醋味太大，甚至食落係熱熱地，有仲有魚生本身根本唔夠新鮮，有D望落去食澤已經唔夠，而且魚生食落好似係室內放了好一段時間，入口的溫度同飯一樣係太暖！FAIL！！！

不過唯一可以一讚的係佢D野飲，雖然可能只係糖水加一堆冰，但係飲落又幾好飲，係唔知點解黑加輪子味同藍莓味好似一樣味咁，不過唔緊要啦，好飲就ok！

雖然D野唔係幾好食，但個卡位又坐得幾舒服，同朋友傾左好耐，臨埋單check單既時候發現仲有個玉子壽司未上（黎D咁貴既地方嗌玉子壽司都有既，諗起都有小小後悔LOL），於是就同個waiter講啦，點知佢check完之後過黎話應該上左架喇喎，但我地真係冇食過，於是就叫佢再check下單。

點知就黎左個經理，又係話真係上左，仲指住張枱話「我頭先放左係呢個位架喎」，咁我地緊係堅持啦，因為真係冇上過，最後佢就話唔緊要啦我再上多次啦，但佢個眼神依然係好懷疑咁。

Anyway, 玉子壽司的味道冇咩特別，蛋味唔特出，感覺應該係overcooked，不夠滑，食落亦唔覺得有蛋汁，好乾，加上好似唔係好夠味！

本身已經覺得D野唔係特別好食，服務態度亦都非常惡劣！！又貴，我諗應該冇下次架喇！

休閒的下午，黎到上環街市探訪伯伯 

我已經唔係第一次黎架喇，好鐘意呢度的原因係貪呢度夠人情味，裝潢好懷舊，令人覺得好relaxing！

再一次黎到呢度，都係食左我的最愛－凍奶茶、西多士！好鐘意呢度的凍奶茶，除左因為佢用玻璃瓶裝，冇加冰唔會溝淡D奶茶味之外，仲因為佢唔會太甜，奶茶的味道亦好香濃！加上 伯伯話因為實在太好賣，所以每日都會新鮮咁做，唔會放太耐！～

另外西多士吸引的原因係佢一D都唔脆，感覺唔太熱氣，同埋因為瑞記的西多唔係落糖漿，而係加煉奶，所以唔會太甜，食落其實似奶油多XD 金黄色好吸引

不過其實... 我最鐘意瑞記的唔係呢度的野食，而係呢度的感覺！ 伯伯會同人傾計，佢今次仲主動教我睇餐牌的價錢係點睇XD呢度真係好有人情味，希望呢類型的小冰室可以繼續係香港立足啦

雖然熊貓狂熱好似已經過去，但係睇到呢間餐廳的熊貓飯咁得意，都係忍唔住要黎試下既

咖哩雞塊熊貓飯賣相真係好得意，好似幾隻肥肥地的熊貓跑去試食D咖哩咁
D咖哩真係好好食，唔算太辣但係好香咖哩味～
不過個人認為汁太多，配料（雞同薯仔果D）都太少，
雞食落都比較粗糙，感覺係煮得太耐，一D都唔滑
而熊貓飯方面，雖然只係五舊小飯團，份量唔係好多，
但係女仔食就應該岩岩好～
不過呢個飯團係凍的，係意料之外的

另外仲試左煙三文魚冷面well... 感覺上真係唔係好抵
煙三文魚，雖然卷得好靚，但係攤開就只有一塊！
冷面的味道亦唔算好特別，口感比較林
如果同熊貓飯比，我都係鐘意熊貓飯多D

呢度的set lunch會包甜品的，係布甸估唔到呢度的布甸係最好食的
小小的玻璃瓶上面的動物仔好得意
總共有三隻口味的布甸，紅豆、芒果、芋頭
我今次試左芒果呀，真係幾好食
唔係得個甜字，仲食到好香的奶味
加上有D果肉係裡面！ 值得推薦～～