今日同左兩位好友嚟到山頂 原本諗住係呢d旅遊區食飯一定好貴 點知經過呢間spaghetti 360 價錢每碟大約70-90 經濟實惠 待應原本安排我地坐室內 但係我地就要求坐出面 雖然大風 天氣有點涼 但係一場嚟到點都要睇下夜景既 所以我對餐廳環境仍然好滿意 食物方面 小食 芝士肉醬焗薯 味道好普通 薯條好唔新鮮 大部分都係唔脆 肉醬上有芝士 但係芝士唔夠多 建議落多d會香口啲 肉醬汁亦唔夠多 cover唔到每一條薯條 令人失望 白汁海鮮意粉 呢道係我最滿意既 首先白汁好香 亦都好多汁 令到意粉唔好乾 海鮮有尢魚 蝦 帶子 份量好足夠 好扺食 意粉既軟熟度調較得好好 唔會太軟太硬 海鮮墨汁焗飯 海鮮係同意粉以上既材料一樣 配上洋蔥 洋蔥未熟好生 唔食得 墨汁既味道好淡 難以就咁同飯食 所以要有多d海鮮先會冇咁淡 芥辣煙三文魚原批pizza 佢一送到眼前 立即覺得焗得唔耐 皮唔脆 煙三文魚唔夠熟 太生 叫左待應入去拎再焗多陣 焗完之後即刻唔同 賣相更吸引 咬落去好脆口 三文魚同芥末醬好夾 令魚腥消失 pizza口感豐富 材料亦多 唯一美中不足為有d三文魚太咸 冇左鮮味同香味

完左個assesment, 點都要放鬆下嘅，所以去左紅磡附近掃街 尼到都幾出名嘅紅磡雞蛋仔，當然要試下啦
呢度款式唔算太多，但基本嘅都有

要左份原味雞蛋仔，拎上手仲熱辣辣，好興奮

一咬，嘩！正！！外面層皮又熱又脆，重點係冇過左火，一d焦都冇 雞蛋仔入面唔係平時食開果d空心，而係豐富而且軟綿綿嘅蛋漿，比例岩岩好，脆得尼冇犠牲到個餡！！ 仲要都算平，一份12蚊唔錯，會再番尼食，下次試埋pan cake

食完晚飯之後仲覺得有啲肚餓，所以想食啲甜野，醒起附近有一間細鋪賣豆腐花，於是諗住試下。其實呢到都有賣台式飲料、涼粉，之前黎過一次買珍珠奶茶飲，味道都唔錯，重點係老闆同老闆娘既熱情款待令我印象深刻。再一次黎到既時候，老闆娘一樣好好笑容，呢種感覺係細鋪先感覺得到。豆腐花既質感都幾滑，加上佢嫩嫩地，食落去又甜又咼心。希望佢可以繼續做落去啦，下次一定會再光顧！

深水埗出名多好野食，至於呢間公和荳品廠聽朋友介紹就介紹得多，今日同男朋友行開涉水埗終於有機會試下佢啦~
我地一去到，樓下已經冇晒位，於是就經過隔離條好懷舊既樓梯上去二樓坐低。跟住好快就有一個叔叔上左黎同我地落單。
因為我地都係食飽先去呢到食下糖水，所以就冇叫其他荳製食品，就咁叫左兩碗佢地既招牌豆腐花。果然，可能係老字號既關係，豆腐花真係特別香特別滑。但係除左食物之外，令我最印象最深刻既真係呢到既境界好有60,70年代既感懷舊感覺，我諗宜家呢一類型既餐廳真係買少見少，所以以後行深水埗，都會再呢到懷舊一下

有一晚要係屋企趕住做project，連落街食飯都冇時間，於是就諗住買個外賣返屋企一邊食一邊做，最後我決定叫一間係屋企附近叫蕃滿門既餐廳。
於是一個人就叫左個餃子雙拼(雞軟骨+泡菜)配蕃茄湯飯。($40)將外賣拎到返屋企之後，發現餐廳都幾細心，將湯同飯分開裝，以免啲飯會"林"得好快，同埋仲附送炒蛋添😋湯撈飯以前就食得多，但蕃茄湯撈飯真係第一次食。食落感覺到味精唔重，加上有啲酸酸地開下胃，本來冇咩胃口，但食食下都食晒成個飯~如果鐘意食蕃茄既話，呢個湯飯一定更加岩你口味，因為佢地唔係得呢蕃茄碎係湯入面，而係兩大粒完整既蕃茄但係相比之下佢地既餃子就有啲遜色。餃子皮一個太"林"一個就太硬入面既料都係一般

但整體黎講，呢間餐廳不論味道、價錢、質素都幾高下次一定會再光顧

自己經常經過美孚，呢幾年黎好多做小生意既鋪仔，如魚蛋燒賣，或賣特色飲料既都做唔長。但惟獨呢間做豆品小生意既“日日鲜豆漿”堅持到5年以上，想必背後街坊既支持唔會小得去邊。


於是走去一試佢既枝裝豆漿，有一陣淡淡既豆香，唔似其他市面上既豆漿，甜味過剩；而且飲落有d沙粒既感覺，想必每一支都係新鮮榨出黎！價錢方面$12我略嫌覺得有d貴，但有老闆娘親切既笑容，令到呢支鮮豆漿再升上一級！

有一日行過韓國街，見到呢間細舖仔竟然係韓式刨冰店咁就同朋友入去試一試啦。
首先，刨冰既種類唔算多既，都係五六種，除左刨冰之外，都有其他韓式小食，舖頭細細，但非常地道。
我地就揀左兩隻味，就係紅豆味同抹荼味。 本身有一個雙拼組合，原來想搽荼配紅豆，但店員就話唔可以，後來見到就明白哂。
紅豆味就係用紅豆配上牛奶冰。 牛奶唔會太甜，而奶味其實好濃郁，感覺好fresh。 紅豆好大粒，但煮出黎已經唔硬，相對牛奶冰黎講會甜小小，但未至於太甜。
而抹茶味就係紅豆配抹荼冰，抹荼冰就無咁濃，食到底都係啖啖抹荼冰，感覺非常好。 抹荼配紅豆都係比較好既組合，所以無伏幾正！
另外，單叫一個都成五十幾蚊架，如果可以叫兩個細既，可以試多啲味之餘重慳番啲！

又起韓國街搵食既我，今次就黎到明洞express 開餐。
我最鍾意就係佢地既牛肉飯。 首先大大碗，真係食到好飽，填飽一個大食既我都無問題。 另外就係多菜，好健康。
講番個飯，牛肉都算多，汁就唔算太多，係肉味都唔錯，起碼唔會太鹹先。 加個蛋同韓式辣醬，健康得黎又幾滋味。
不過個湯就略為鹹左啲，成碗味精湯咁，淡番小小就更好。
另外如果黎食，可以試下佢地啲粉絲飯，大件夾抵食！

早前去美孚搵朋友，行行下肚餓想叫個快靚正下午茶外賣上去食~  於是我朋友就推介我去呢間茶餐廳到買！原本想叫個正路會食既豬扒飽加西多，但佢叫我一定要試呢度既酸辣米線！佢都有幾多款既餸可以揀，最後叫左個雞扒米線，1餸加杯熱飲$30都算平！食後感：
1. 配料: 有酸菜，葱同九菜，加上佢微辣既湯底，味道啱啱好，唔會偏酸/辣，又match又野味！  
2. 雞扒: 都幾滿意，主要係佢浸住係湯之後有酸辣吊味，成個味道昇華左！
3. 米線: 我比較鐘意冧d，佢又無因為分湯而變到一塊餅咁癡住，而且份量剛好！
原來茶餐廳都可以做出咁好食既米線，強烈推介身邊既人去試試！

行過尖東天橋隔離，有一間幾低調既舖仔，見到就行埋去睇下。原來只賣一種野，魚蛋。
一碗二十蚊，相對街邊五蚊一串，係有啲貴既。不過另一邊睇，又係正既。 首先魚蛋好香，遠遠已經聞到陣味。一吉落去，係幾彈手，比起便利店既魚蛋，佢係細粒小小既。
食落去，好香同魚既鮮味重起度，明顯一定唔係粉多過魚。而味道有啲潮式魚蛋既感覺但再彈牙一啲。再配合獨有既醬，唔會太多就每粒都有醬既，更加好味道。
二十蚊一碗魚蛋，我食完覺得係值得既，再加埋店員既禮貌招呼，值既！