今日天氣寒冷，最啱就係打邊爐喇！🍲 經過大角咀利奧坊，見到有間新開台式火鍋餐廳，即管試下！ 湯底： 點咗鴛鴦鍋，海膽白麵豉湯底vs椰子雞湯底，海膽白麵豉湯好惹味，出面好少見～ 椰子雞湯又好清甜，兩款就咁飲都好好味！👍🏻👍🏻👍🏻 食物： 呢間餐廳仲有個特色嘅日本蟹籽福袋，唔係出面嘅年糕福袋，口感特別都幾唔錯！😌 日本和牛再配埋美味湯底一齊食真係好夾！😋 甜品仲有窩夫選擇，好驚喜～喺出面餐廳真係未見過！

今晚同友人約定去尖沙咀睇戲，時間尚早，於是去到海港城呢間來米芝蓮拉麵店先醫肚。  日式煎餃子 $45：餃子為豬肉豆腐餡，煎得唔算香脆，質素一般。  醬油拉麵 (標準) $98：招牌拉麵之一，有松露香味但唔算濃郁，湯底清澈，叉燒得薄薄一片，肥瘦適中，惟標準份量都算少。  照燒雞辛味味玉拉麵 (標準) $131：麵份量少，照燒雞還可以，湯底帶微辛但唔算十分辣，反而味玉 (滷溏心蛋) 既流心效果不錯。  期間有段小插曲，話說友人碗拉麵貴啲比較多料，理應有四片照燒雞﹑味玉同其他配料，但拉麵上枱時無味玉不特只，仲只得兩片碎雞肉，好明顯上錯食物。所以即時向店鋪有位身型瘦削專做落單/傳菜既大嬸侍應查詢，大嬸侍應拎住我地既點菜單望住黎對，佢重覆讀個名幾次“照燒雞辛味味玉拉麵”，然後講話 “岩啊, 無問題, 係呢個拉麵”，我地話無隻蛋喎？之後佢先好似突然醒覺發現問題，但居然帶住懷疑既眼光問我地有無食到？拉麵上枱已經即時查詢，何來食左？朋友已經開始不爽。第二，同大嬸侍應講：除左隻蛋，碗拉麵應該有四片雞，但而家得兩片係咪應該比少左呢？大嬸侍應答“可能個麵底有呢”。朋友已經忟忟地，可能?! 反轉個麵，數來數去都係得兩片碎濕濕既雞肉，Bar枱師傳聽到我地呢邊對話都覺得唔對路，已經開聲主動話補返隻蛋同雞肉比我地，但個大嬸侍應居然又帶住質疑既眼光補充一句：你地無食到丫嘛？我同朋友真係火都黎…堅燥底！你地比錯食物，我地禮貌向你查詢，但錯左連句最基本既對唔住/ 唔好意思/ 些少認錯都無，咁既服務態度同應對方法真係何其差！！！ 
總括黎講，呢間拉麵店屬貴價又量少，質素普通，並無令我地有驚嘆既感覺，米芝蓮既標準實在唔識欣賞。再者，發生左呢段小插曲，店舖再出名，但就係有位豬隊友累事！作為客人既我地已經無要求咩待客至上﹑專業既服務質素，不過呢位大嬸侍應連普通茶記侍應既服務態度同質素都比唔上，食完都一肚氣啊！！！

呢間由台灣開到香港既餐廳算係近期大熱，雖然店名叫麻麻地，但呢間餐廳由入門 ﹑裝修擺設﹑餐牌等都佈置得五顏六色，仲別具特色，牆身更有唔少玩味句子，就連菜式名都好搞笑，所以實際上應該落左唔少心機，並唔係所講既麻麻地，餐廳環境好適合影相打卡呢！ 普通到無得再普通既炸魷魚圈：魷魚圈厚身，炸得香脆可口，不錯！ Marco 今天的心情比薩：可以話係是日之選Pizza，餡料有青瓜﹑洋蔥﹑煙肉等，薄批烤得香脆，可以一試。 溫泉蛋明太子意大利扁麵：好一個足料既西日式意粉，面層有好多明太子同木魚碎，中間為蟹柳，破開溫泉蛋與意粉撈勻同吃，明太子醬掛滿每條意粉令到口感豐富，醬汁味濃，好惹味！

台灣藝人繼納豆來港開台飲店後，又有另一位台灣藝人NoNo開既花羨沐嵐到港。

尖沙咀屬於品牌既香港首間分店，店鋪提供一系列原茶、鮮奶、奶茶、果茶、奶蓋等等，同朋友打算今次先唔試招牌飲品，純粹根個人喜好去試店舖既其他出品，所以分別試左珍珠伯爵奶茶＆春桃紅茶。可惜，珍珠伯爵奶茶既茶味偏淡，珍珠淋身無咩口感，如果係珍珠控應該會失望；春桃紅茶方面，桃味算香，不過極其量都只係普通一杯蜜桃紅茶，不過不失吧，所以試過就足夠喇。

荔枝角居然難得有台灣過江龍茶飲店，所以去附近逛街後，特別去試一試恰迷紅茶。

店鋪有純茶、奶茶、果茶同鮮奶等等類別，不過首次光顧，當然要試下佢地既皇牌茶飲 - 招牌Q罩杯 (即芋圓珍珠奶茶)，用鮮奶同伯爵茶做茶底，香濃滑溜；配上煙韌既珍珠同有咬口既芋圓&地瓜圓，成杯飲品有差唔多三分一杯都係呢啲配料，啖啖都咬到珍珠夠哂爽歪歪，好適合煙韌控，而且茶底又唔錯，性價比高呢！下次有機會，一於再黎試下店舖既其他茶飲。

近來因為商場既聖誕佈置令到同層位置迫得水洩不通，而我都唔例外，同公仔大影特影後，來到旁邊既i CREMEIA  Cafe休息一下，不過店內/ 外都超多人，幸好友人趁我排隊買食物時佢就預早去等位，如果唔係應該食完雪糕都未有位坐… 北海道赤肉蜜瓜雪糕：店鋪皇牌之一，食材由日本直送，蜜瓜味好重，雪糕香濃又幼滑；而北海道赤肉蜜瓜非常清甜又多汁。不過，影完兩張相就立即要食喇，因為雪糕融化既速度何其快呢！ 高知縣沢度茶大福芭菲杯：抹茶雪糕甘香，與微甜既紅豆同吃，永遠的Perfect Match。另外，茶大福外皮厚厚，內裡為紅豆餡，口感煙煙韌韌幾得意。

店鋪位於上環既太平山街，上環出地鐵站後都要行一段路先到。來到周末，同朋友既既下午茶時間當然要chill下！呢間行文青風既Cafe分開幾個部分，客人要先到開放式厨房落單及自行領取飲品同食物，之後可以選擇到店外長櫈/ 或者到另外一間樓高兩層既房間安坐。 Orange and Fig Pancakes波斯香橙無花果班戟：薄薄既班戟配上新鮮香橙同無花果，味道酸甜開胃，好味道，不過份量多少少會更好。 Pumpkin Feta Quiche菠菜南瓜菲達起司乳蛋批：蛋批配上菠菜沙律，既足料又飽肚。 Green tea cheese cake綠茶芝士蛋糕：屬於店舖人氣招牌作，綠茶味甘香濃，芝士蛋糕幼滑，兩者平衡得好好，綠茶控必食推介！ Keemun Milk Tea祁門奶茶：茶香奶滑，可以一試。 Marsala Chai Tea印度香料奶茶：香料味強烈， 唔太習慣呢種味道，飲左一半就放棄了。

Cafe食物水準不錯，而且環境清幽，適合同朋友靜靜地暢談一番，在這裡可以完全感受到慢活同寫意……

唐宮小聚主打精緻既摩登中菜，荃灣店內環境寬敞又舒適 ，一入門口右邊係開放式廚房，見到點心師傅即場做包，玻璃櫃亦放左好多卡通造型包點作擺設；而門口左邊有張乒乓波枱餐桌，店鋪裝修以湖水藍色為主色，好適合影相打卡。 白玉王鴿：招牌燒乳鴿上枱時熱辣辣香噴噴，醃得入味，炸得香脆可口，皮脆肉嫩又多汁，的確出色！
鵝肝春卷：長春卷內有鵝肝粒，香脆可口！
黑金流沙：外層係黑色竹炭包，配上熱辣辣流沙奶黃餡，一咬開流心餡滿瀉，無得輸！
小小蘋果：感覺似將怏餐店既蘋果批餡搬到麵包裡頭，不過蘋果餡包係好食既！
小小楊梅：外型小巧的骰趣緻，不過味道又酸又甜，不是我杯茶。
冰皮壽桃：入面係榴槤饀同忌廉，可惜兩者比例不平均，而且外型鬆散，不推介。
陳皮燉梨：冬天乾燥，最適合食返個健康滋潤既甜品為呢餐畫上完美句號。

餐牌上有唔少食物/ 飲品選擇，改名有心思，整體食物好味有驚喜，值得一試！

數月前見到網上有媒體介紹呢間越南餐廳，到左今日經過見到依然有排隊人潮，證明餐廳站得住陣腳，即使等待時間超過30分鐘都決定要試一試。

招牌牛油雞翼：雞翼有濃濃既蒜蓉牛油味，而且炸得香脆可口，皮脆肉嫩又能夠保留肉汁！ 河內牛柳牛丸粉：湯底清澈濃郁，半生熟既牛柳嫩滑，牛丸爽口彈牙，河粉又滑溜；若果再加上油條、青檸汁同辣椒等配料，可以令到個湯底更加鮮甜，味道有所提升。雖然價錢唔平，不過值得一試！ 地道碳燒豬肉伴越南檬粉：店家將碳燒豬肉連湯，及檬粉分開另上。湯底帶甜味，檬粉另外分成一束束，好比你一束粉沾湯與豬肉同吃，感覺幾得意，就似食日式沾麵一樣。 雖然餐廳地方細細，座位不多又逼人，不過整體食物高質有水準，有誠意既心機小店都算值得排隊等候！

紐約街頭人氣漢堡包店Shake Shack已經在金鐘開了第二分店，不過都係中環店對住海景食得比較舒適，因為除左食物以外，環境都好重要呢！
餐廳既漢堡採用100%全天然安格斯牛肉﹑雞肉，招牌Shack Burger (Single) 的麵包鬆軟，牛肉味香濃，夾埋美國芝士、新鮮生菜、羅馬番茄同特製既ShackSauce醬汁，美味！漢堡當然要配上波浪紋厚切薯條，非常香脆熱辣，另有極度邪惡既特製車打及美國芝士醬薯條，要忍得口至好！