據元朗友話, 呢間冰室好耐之前已經係元朗紮根, 結業後今年又再重開. 
星期日下午茶時段, 好多人, 所以都係買返屋企慢慢食好過.
全部都要散叫, 冇餐係跟餐飲, 所以幾貴下. 叫左特大炸雞脾同紅豆冰
炸脾真係幾大隻下, 唔知係咪外賣o既關係, 外皮已經淋左, 並非一般茶記o既生炸雞脾味道
而帶點鹵水汁味, 油左少少之外, 其他都算唔錯
紅豆冰豆夠綿又不太甜, 唔錯, 只係冰好大舊, 都唔知真係食冰定食豆!

總結, 味道尚可, 價錢略貴

元朗最多食肆係咩? 係人都會答日本餐廳最多!剛搬黎不久, 咁岩又到中秋, 成班朋友黎新居聚聚
之前已經做定功課, 問定鄰居有咩好介紹, 可以買返屋企成班人齊齊食, 見最多人推介呢間, openrice 居然又冇人寫食評, 心大心細下都決定黎試下. 
首先店內環境光猛企理, 已經令好感值提升左, 鋪頭唔算太多野賣, 刺身睇岩邊碟就幫你即切, 感覺好新鮮! 壽司種類唔算少, 我地都揀左好耐下, 最終又壽司又刺身, 仲買埋清酒, 埋單都係千零蚊?! 
返屋企開餐個陣, 先係最令人有驚喜! 無需多講, 刺身壽司就係食佢夠新鮮, 呢餐絕對超值! 因為買得太多款壽司, 好難一一說明, 但最令我印象深刻, 就係吞拿魚壽司, $9蚊件可以食到中腩位, 香嫩入口無筋, 我開始懷疑老闆係咪俾錯貨我地食?! 
另外三文魚, 帶子, 燒鵝肝壽司都非常不錯! 可惜我地清得太快, 都冇機會餵下電話先,將來大把機會, 街坊果然識貨冇介紹錯, 我相信呢間鋪頭會成為我飯堂之一. 
唯一唔好係因為壽司即點即做, 等候真係需時, 就睇你要好食定係要快餐喇.  

半夜收工肚不太餓, 就係好痕想食D野, 就黎到呢間粥店
店內好多好多粥款選擇, 真係令人眼花瞭亂, 最終無揀經典雞粥, 而選擇泥孟粥
另外再加個酥炸魷魚鬚同炸蘿蔔糕.
先講泥孟粥, 粥煲到好綿, 味道適當, 內有3-4條泥孟, 可惜一條唔熟, 一條就劏壞了,
令條魚同粥都帶有苦澀味, 實為失敗之作.
炸蘿蔔糕卻令我有驚喜, 蘿蔔糕係一般出街食到o既"有味蘿蔔糕", 炸到外脆內軟,
又唔好油淋淋, 非常易入口, 食到冇停口!
酥炸魷魚鬚反而就冇咩特別, 略嫌炸得乾左少少, 唔知下次師傅會唔會對控制火喉有所改善呢?

岩岩搬去元朗, 想搵好野食就真係要聽下"元朗土著"介紹。
呢間係其中一間, 又新街附近食肆眾多, 成日淨係見泛后甜品, 同新B仔坐滿人, 呢間小甜屋人流相對之下就少好多。
一入店舖, 就知老闆用心經營, 店面同廁所都好乾淨, 值得一讚。
2個人叫左心太軟同芒果拿破侖。
心太軟朱古力味唔夠又唔香, 老婆仲嫌佢太甜添, 令人有點失望 ; 芒果拿破侖酥皮又脆又酥, 中間吉士又唔會太甜, 好味! 只係略嫌皮過薄, 減少左口感。 

以前係佐敦食過, 見佢係元朗新開, 又再試下先。
叫左個細狗仔粉, 細鴨絲碗仔翅, 黑白炸丸同辣魚旦。
狗仔粉如之前網友所講, 真係愈食愈鹹同油, 到後尾已經想放棄 ; 
相比之下, 碗仔翅味道濃而不膩, 但要19蚊得細細碗, 實確不便宜 ; 
魚旦醬汁非常惹味, 不過都係鹹架啦 ... 我絕對相信老闆主要係想d客幫襯多d 野飲囉 ; 
要幫阿姐平反下, 雖然唔見得係服務態度好好, 但絕不惡劣, 大家唔好要求太高啦!

據報呢間有個雙豬飯好特別, 今日有機會一試。叫左一個雙豬飯, 同咖哩雞扒飯。
雙豬係指燒豬頸肉同炸燒肉, 燒肉炸左之後比較乾同鞋身, 好彩有肉燥可以送下飯, 如果唔係真係乾珍珍。
不過整個飯味道都算唔錯, 未食過都可以試下。
雞扒都係燒過, 雞皮香口又不太油, 確實不錯, 不過個人比較鍾情榮式燒雞扒。咖哩汁鹹左少少, 如果淡D就非常好喇!`