餐廳感覺幾企理，座位都幾多，大部分以1人或2人枱為主。另外食物選擇亦唔少，牛肉嘅款式比較多。 A10 四重奏套餐 呢個套餐啱哂有選擇困難嘅我呀！入面牛、豚及雞都有齊，4款肉包括蔥燒牛胸花, 汁燒肩胛片, 味噌豬五花, 柚子胡椒雞腿肉。 牛肩胛肉肉質結實，雞腿肉好嫰滑，配柚子胡椒好香。 A11 北海道十勝黑毛和牛肩胛肉 和牛比想像中大塊，而且幾厚身，油脂豐富，燒到兩邊微微焦脆，肉質好嫰滑，nice! 兩個套餐都包咗前菜、白飯及味噌湯。加錢升級要咗牛繁蛋拌飯，飯素拌溫泉蛋，好送飯呀！另外都加錢要咗健康之選嘅蟹柳胡麻沙律撈麵，蟹柳份量好足，兩個都好食！ 而加仲做緊星期一限定優惠，用$8.8 就可以加點指定食材，好抵呀！

Cafe工業風全黑色設計裝潢，非常有格調。 雙重芝土炸薯條 薯條係粗身果種，半溶芝士醬好好味。 自家製忌廉蘑菇貓耳朵意粉配慢煮口水雞扒 忌廉蘑菇汁好濃郁而且幾稠身，貓耳朵意粉口感好煙韌，每粒都沾滿醬汁，而口水雞扒肉質嫩滑，帶少少辣好惹味。 提拉米蘇日式梳乎厘班戟 一份有2件，梳乎厘班戟蛋香味濃，質感幾綿密，上面嘅tiramisu cream好滑帶點酒香，唔錯喎。 整體幾喜歡餐廳嘅食物，意粉及甜品都好吃！同時Cafe嘅咖啡都幾出名，可惜當日無飲到，下次要再嚟過。

居酒屋和風滿滿，四圍放滿日式裝飾，而最特別一定係入口處嘅「千與千尋」無面男打卡位，另外仲有榻榻米卡位一樣咁igable！ 食物方面，餐廳幾多海膽主題菜式。 海膽甜蝦刺身杯 刺身杯賣相好精緻， 甜蝦一排排放好，上面再鋪上海膽，海膽幾甜，甜蝦size唔算大隻，但味道唔錯。😋 海膽大葉天婦羅 一份有4件，用紫蘇葉包住海膽一齊炸，炸漿好薄身炸得好脆身。 串燒 見串燒款式幾多，點咗幾款試試。 豚腩片白虎蝦卷比較少見，豬腩肉包住虎蝦一齊燒，虎蝦好爽口，整體口感幾特別。 牛舌好厚身，肉味濃郁，口感有嚼勁。 汁燒免治雞軟骨肉棒入面有啲軟骨，配埋蛋黃汁就perfect! 😋 明太子玉子燒 玉子燒蛋味香濃而且好鬆軟，味道甜甜，而明太子份量幾多，夾係玉子燒中間，咸咸香香嘅配搭又幾好食。 😉 整體居酒屋環境及食物質素唔錯，仲有可愛無面男打卡位好得意呀。😉

餐廳裝潢走工業風路線，幾有格調，同時有一大個open kitchen，另外餐廳面積幾大，座位夠闊落。 食物選擇幾多，要讚下本menu整得幾靚，有心思！ 新鮮波士頓龍蝦意粉 意粉係餐廳手工製，口感好煙韌，同時龍蝦汁好濃郁，配料有啲菇粒，另外龍蝦幾新鮮，肉質彈牙，如果再大隻少少就perfect! 炭燒安格斯封門柳配燒汁薯條 封門柳煎得好靚仔，外層煎得微微脆身，帶點炭香味，中間仲呈現粉嫩既粉紅色，肉味亦幾重，而薯條好脆身，調味剛好，好吃！ 提拉米蘇 甜品幾有驚喜，呢度嘅Tiramisu用mascarpone cheese做成，奶香味濃，亦唔會太甜，質感綿滑，底部嘅手指餅帶點咖啡香，配搭起嚟好夾好好食呀！ 整體餐廳環境及食物質素都幾好，每道菜式嘅水準都唔錯，餐廳仲有其他美食及雞尾酒都好吸引呀，有機會想再嚟食。

餐廳裝潢有點歐洲小鎮感覺，特別係一入去見到好大隻牛牛裝飾有點可愛，另外餐廳面積幾大，座位好闊落，坐得幾舒服。 蕃茄蓉芝士火鍋 今次特別啲揀咗蕃茄口味，帶點微微酸味，而芝士底係用傳統芝士，加入白酒提升香氣，個人覺得酒精感覺幾強烈，麵包粒配芝士咸咸香香，好有趣呀！😆 另外仲有其他配料可以配搭芝士火鍋，我地加點薯仔、蘑菇及西蘭花，蘑菇同芝士好夾呀！ 蘇黎世燴雞肉配蘑菇忌廉汁 呢個菜式係瑞士傳統菜式，燴雞肉好嫰滑，蘑菇忌廉汁幾香滑濃郁，旁邊配搭甜甜蕃薯及紫薯蓉，個人覺得雞肉份量再多啲更好。😝 蘋果金寶 最後仲點咗甜品蘋果金寶，面頭嘅crumble焗到好香脆，帶點肉桂香，而餡料嘅蘋果及提子乾份量幾多。

餐廳幾有人氣，當日去幾乎滿座，而裝潢幾有活力，牆上亦畫上有趣壁畫可以打打卡。😆 二世祖雞翼（秘製蛋黃香辣味）$78 一份有5隻，雞翼焗到外層帶點脆身，而蛋黃辣醬幾惹味。 避風塘魷魚鬚 $78 魷魚鬚炸漿幾薄身，炸得鬆脆，另外面頭撒上炸乾蔥令味道更香。👍 自家製冬陰功虎蝦闊麵 $178 呢個係餐廳新菜式，闊麵好彈牙，而冬陰功醬汁好香濃，辣度幾夠，另外虎蝦好大隻，肉質亦爽彈，唔錯喎。😋 二世祖特濃朱古力 $48 ＆ 牛油果奶昔 $52 兩款都係餐廳推介，特濃朱古力用玻璃樽裝住幾特別，而朱古力質感濃厚，味道夠濃，好飲! 另外牛油果奶昔唔會太甜，牛油果味亦幾出，飲完感覺幾飽肚。 整體幾喜歡餐廳環境及食物，餐廳同時有其他 新菜式都好吸引，有機會會再去。

餐廳裝潢以灰黑色為主調，帶點工業風，另外有露天用餐區，感覺幾chill，而且有火爐，冬天係戶外用餐都唔怕凍。😉 脆脆蝦多士配芥末乳酪醬 $88 一份有4件，蝦多士非常大件，而且炸到金黃色，非常脆口。 石斑魚柳海鹽墨魚麵 $138 墨汁麵幾彈牙，帶點橄欖油香，配料有菇同蘆筍片，石斑魚煎到外脆內軟。😋 冬蔭公鑽石大蜆 $108 大蜆幾鮮甜，完全無沙，冬蔭功味道酸酸辣辣好開胃，而且湯入面好多雜菇及車厘茄。 CLASSY PLAYER $138 ＆ BONANA $128 兩杯都係Signature Cocktail，Classy Player用上Rum及桂花陳酒調製，同時帶點香料及微微苦澀味道，而Bonana用柚子味gin酒加上梳打水，及加入檸檬、柚子、蘋果等，味道酸甜好清新。 整體餐廳環境及食物質素唔錯，可以約埋朋友一齊chill下。😉

餐廳有兩層，下層主要係吧檯，上層比較多座位，菜式選擇亦幾多，值得一讚係本menu幾精緻。😊 廣島蠔春卷 $108 呢個係餐廳新品，一客有3條，春卷炸得好脆身，入面係原隻廣島蠔，好juicy，同時加咗紫蘇葉令味道多個層次，配搭柚子醋好清新。 鮟鱇魚肝 $98 冬天食魚肝最肥美，魚肝整成碎碎，加入三文魚籽令口感更豐富。 極上鹽燒牛舌芯 $128 牛舌粒好厚身，而且燒得剛剛好，軟腍得嚟有啲咬口，個人幾喜歡配搭柚子胡椒及蔥花一齊食。😊 日式雞鎚花蝦 $118 雞鎚外層用櫻花蝦包住再炸，非常香口，入面仲釀咗墨魚滑，口感彈牙，呢個大推！👍🤤 鮮蟹肉粥 $168 蟹肉粥份量幾多，粥底幾綿，聞落好香柴魚湯味，另外有滿滿蟹肉絲同菇，好足料呀！ 整體餐廳食物質素幾好，仲有好多菜式都好吸引，遲啲再番嚟食過！😉

餐廳裝潢帶點懷舊風格，牆上掛滿台灣景點相片，好有feel呀。 半肉半筋麵 $78 牛肉麵份量幾大碗，牛肉及牛筋非常足料，而牛肉厚身且腍滑，配搭帶點辣嘅酸菜更開胃。 而牛肉麵湯底分別有紅燒湯、麻辣湯及蔥油乾拌3款選擇，我地揀咗紅燒湯底。牛肉湯底幾濃郁，同時帶點辣更惹味。 起司肉鬆蛋餅 $40 蛋餅外層煎得金黃色幾脆身，滿滿肉鬆餡料，配搭帶點蒜香嘅醬汁，唔錯。 海陸炸物拼盤 $82 拼盤好豐富，分別有鹹酥雞、魷魚、花枝丸、 甜不辣、四季豆及玉米筍。魷魚好彈牙，另外鹹酥雞帶強烈九層塔香氣，雖然好邪惡，但忍唔住食哂。😆

餐廳裝潢有點格調，座位好闊落，坐得舒服。 西班牙青椒 & 白毛豬火腿薯球 餐廳Tapas選擇幾多，青椒好大碟，口感爽脆，調味剛好，而薯球外層炸得好香脆，薯蓉幾綿密，加入火腳帶點咸香，唔錯。 西班牙黑毛火腿 & 三款芝士拼盤 拼盤分別有西班牙黑毛豬辣肉腸、豬肉腸及火腿，共4款。另外會配搭薄多士片，多士烘得好脆身，可以同蕃茄蓉一齊食。而芝士有3款(Manchego、Camembert & Saint Maure)，配搭松露蜂蜜好吃! 加利西亞八爪魚 八爪魚幾彈牙，份量都唔少，最底嘅薯蓉帶點芝士香，而面頭鋪咗沙律菜，幾清新。 招牌香烤脆乳豬 一切落去就feel到乳豬外層非常脆身，肉質好嫰滑，旁邊嘅炸薯亦好香脆，好好食呀！ 泡芙雪糕 & 巴斯芝士蛋糕 甜品幾有驚喜，泡芙幾酥脆，中間夾住雲呢拿雪糕，最頂沾上黑朱古力，好夾呀！而巴斯克芝士蛋糕好香滑，口感非常綿密，甜度亦剛好，好吃！ 仲點咗杯Red Sangria & White Sangria，兩款都充滿水果香，而且好易入口。 整體餐廳環境及食物質素唔錯，個人幾喜歡Tapas選擇夠多，好啱約埋朋友邊飲番杯邊傾計。