萬麗咖啡室 (灣仔)

舊年就到訪過「萬麗咖啡室」，睇番啲食評，原來剛好一年前嘅事，當時就為通番關嚟食餐好嘅。今次見到餐廳由依家到4月尾做緊西班牙主題自助餐，西班牙一向都頗有特色，加上又做緊啲優惠，所以，同老友嚟嘆番吓。
眨吓眼又一年，個環境當然無乜點變啦，柔和燈光加寬敞空間，依然予人感覺舒適，所以，整體感覺幾舒服。而食物區都喺二字左右排開，集中晌一個範圍，唔使左兜右轉，亦都比較方便。上文都講，今次自助餐以「西班牙」為主題，四周嘅牆上都貼有唔少西班牙嘅裝飾，而菜式方面就有唔少西班牙特色菜。星期一至四晚計，成人收$808，星期五至日及公眾假期成人收$848，另收10%服務費，晌官網網上商店預訂有75折優惠。如果想再食平啲，可以考慮自助午餐，同樣供應西班牙主題自助餐。冷盤
先講講冷盤同沙律，就晌食物區嘅頭位，選擇夠多喎，唔喺一般嘅凍切肉腸、莎樂美腸。有好多款都喺主題菜式，包括西班牙蕃茄凍湯、數款西班牙醃肉腸、一款牛奶芝士及一款羊奶芝士、西班牙沙甸魚、醋漬鯷魚、西班牙蕃茄麵包、煙三文魚，仲有啲橄欖呀、酸瓜……等配料。Joselito西班牙火腿
而一入門口就見到有侍肉師傅即場將西班牙火腿切片（限星期五、六先即場為客人切片），薄薄一片，仲要砌到好靚仔。唔講真喺唔知，原來「Joselito」呢個西班牙品牌已有150年歷史，單喺呢點，啲火腿理應已夠晒質素啦。沙律
沙律吧陣容夠晒鼎盛呀，4款沙律菜、大大少少近20款配料，如鮮蝦、煙肉碎、露筍仔，配以4款自家調製醬汁，唔鍾意嘅，可以簡簡單單淋啲油醋，但我就鍾情蜜糖芥末汁同牛油果醬。此外，仲有款預製好沙律，包括意粉沙律、煙鴨胸沙律、蕃茄水牛芝士沙律、烤和牛沙律、海鮮沙律，喺唔想煩嘅懶人之選。將最心水、最精選嘅沙律同冷盤放埋一齊，造就小弟呢碟超豐富頭盤，樣樣都有啲，夠晒多元化，色彩又夠繽紛，睇見都已經好醒神。幾款主題西班牙食材，果然有質素，尤其啲火腿，唔好見大片白色「肥膏」，出奇地無乜油膩感，反而有陣陣脂香，鹹鹹哋嘅味道，正呀喂！幾款預製好嘅沙律亦都好食，食完胃納大開。海鮮
食自助餐最回本嘅一定喺啲冰鎮海鮮啦，今次所見，就有法國麵包蟹、澳洲青口、長蟹腳、翡翠螺同凍海蝦，佐以幾款醬汁，如雞尾汁、辣芫荽汁、紅酒醋同蜜糖蕃茄汁，都幾特別。就目測所見，呢啲回本嘢好搶手，但成晚都見補貨甚快，完全無間斷供應。刺身、壽司、卷物
就晌近門口，凍海鮮傍，小弟平常比較少晌自助餐度食壽司，因為自助餐所提供嘅一般都喺啲大路貨色，但偶爾見到質素高嘅都會試試。今次就見啲帆立貝同八爪魚好靚，仲有一款炙燒和牛壽司好有興趣。冰鎮海鮮又喺樣樣試啲，拎滿一大碟，再加埋刺身嘅帆立貝同八爪魚，做成一份海鮮拼盤咁。每一款都有其獨特嘅鮮甜味，麵包蟹好多膏喎，蟹腳鹹鮮味十足，蝦肉同螺肉又爽，啲帆立貝果然喺刺身級，又大件，柔嫩鮮甜，真喺「鮮」入為主。老友原來都幾鍾意刺身、壽司，趁佢拎時我就搭單，再食啲帆立貝同八爪魚，但重點喺想試件炙燒和牛壽司，的確好正，壽司飯捏得緊致卻唔死實，燒和牛既有肉味，又帶點油香，正呀喂！湯品
呢度嘅湯品喺亮點，因為佢哋有提供是日燉湯，名稱就無講，但湯內睇得出有好多料，加上上次飲過確喺正，今回就當然翻兜。此外，仲有1中1西嘅「例湯」，前者寫住龍蝦菜湯，其實似喺加咗龍蝦肉嘅碗仔翅咁，後者就喺南瓜忌廉湯。覇氣咁一次過試咗3款湯，包括西班牙蕃茄凍湯、南瓜忌廉湯同燉湯，可謂各有賣點。凍湯好少飲，入口清爽感極強；個南瓜忌廉湯亦都打得好滑溜，滿滿南瓜香味，等至於個燉湯，絕對喺高質量出品，飲落非常之清潤，味道醇和，可以講喺飲得出真材實料無欺場。即煮粉麵
晌自助餐嘅即煮粉麵、即煮意大利麵……等等，都一律少試，因為太易飽肚，不過，偶有例外，就好似今晚咁，供應嘅喺馬來喇沙，仲要配半隻龍蝦，夠晒豪氣，又合晒小弟心水，就算易飽肚都想試試，好彩老友都鍾意，嗌一客兩個人「些牙」。個喇沙湯底入口真喺唔失禮，比一啲主打賣東南亞菜嘅餐廳所出品唔差得遠，香味四溢，而麵底可以揀油麵或米粉，識食當然梗喺揀摻摻啦，至於隻龍蝦啲蝦肉好爽口，充滿鮮甜味，加上成嚿蝦肉好易起出嚟，啖啖肉，食得超爽；此外仲有啲豆卜、芽菜同雞蛋作為配料，製作絕對唔馬虎。咖喱、熱盤、烤肉
另一個「長區」就喺擺放多種熱食嘅食物區，晌呢度有好多精彩美食，先講重點，就喺多款西班牙主題熱盤，包括最大亮點嘅西班牙乳豬、西班牙海鮮炒飯，以及西班牙香菇炸丸子、西班牙薯仔蛋餅、西班牙欖油蒜香蝦、香烤西班牙腸、香烤豬肉串，淨喺呢幾樣已好精彩，仲有新鮮蒸焗波士頓龍蝦。以其餘嘅 熱盤，一口氣介紹埋先，計有印度咖喱雞肉、印度皇飯、鑊炒和牛粒、烤爐魚、炒蜆、咕嚕肉、煙肉芝士焗蠔、紅燒鮑魚、烤牛肋排、焗薯、炒野菜、龍蝦茶碗蒸、海南雞、蒸大鱔……等等，都喺睇相寫返出嚟，可能都有遺漏，總之，可以講喺種類繁多。講真， 邊可能試得曬所有嘢， 所以去到呢個大類都喺重點出擊，揀3、5、7款心水嘢嚟試。雖然喺咁，都砌咗成大碟「主菜」，蒸龍蝦當然喺以回本心態拎嚟食，不過，啲龍蝦好食就值得再回味；而西班牙乳豬非常之脆口，肉質好爽，香菇丸子咬落唔油膩，外脆內軟，味道幾特別，蒜香蝦充滿香蒜味，自然惹味十足，西班牙炒飯都做得有水準，至於其他嘅熱盤，就都樣樣拎少少嚟試下。慢煮牛柳
晌熱盤類嘅篤篤最尾，仲有一個即做慢煮牛柳嘅檔口，點解要特別分開嚟講呢，因為，師傅會直頭好似啲高級餐廳咁做成一道主菜咁，墊上甘筍蓉再配烤青椒，賣相非常精緻。的而且確，牛柳入口肉質細緻嫩滑，肉味不俗，
而墊底嘅甘筍容 亦都打得柔滑非常，清甜好食。生果、甜品
食得幾飽都好，點都要留返10%空間進擊甜品嘅，呢度嘅甜品都好有亮點，擺到琳琅滿目，尤其今次更加咗數款西班牙主題甜品：西班牙油條、香橙米布甸、聖地牙哥杏仁蛋糕、巴斯克芝士蛋糕，此外，其他款式如朱古力紅莓慕絲蛋糕、天使蛋糕、香桃批、焦糖牛油蛋糕、桂花啫喱、意大利芝士餅、紅棗雪耳糖水、曲奇、蝴蝶酥、朱古力噴泉、糖果……等等，絕對滿足到所有甜魔嘅喜好。挑戰甜品時段就一口氣揀咗9款，砌成一大碟甜品大拼盤，老友睇見都覺得我瘋狂，唔喺講笑，小弟堅喺食得晒。好難逐一評價，但整體而言絕對無令人失望，滿足晒嗜甜嘅心癮。而個人最推薦就喺巴斯克芝士蛋糕、朱古力紅莓慕絲蛋糕、天使蛋糕、香桃批、意大利芝士餅，真心正呀！XTC Gelato、即做迷你窩夫
XTC呢個品牌嘅雪糕比較少接觸，進擊完個「甜品拼盤」，真喺差唔多到頂，但點都貪心哋想試埋個窩夫拼雪糕，再搭啲生果。窩夫雖然攤涼咗，但新鮮製作關係，仲好脆口，仲喺綠茶口味添。雪糕就揀咗芒果雪葩、港式奶茶同開心果，個人覺得奶味無咁重，但3款嘅本身味道都好突出。飲品
自助餐本身已包一杯果汁或汽水，然而，晌肉品自助區，就放置兩大部咖啡機，有多款意式咖啡供選擇，另一邊就放有檸檬片、鮮牛奶、數款茶包供自由取用。此外，另加$188 就可以無限暢飲果汁、汽水、精選啤酒、氣泡酒及紅白酒。由頭食到尾，食吓傾吓，抖吓又再食吓，今日狀態唔錯，夠持久力，所以，真喺食咗唔少嘢，可謂大滿足。順帶一提，呢度啲招呼幾好，侍應有禮，服務殷勤，收碗碟都好快手，補充食物又足。

萬麗網上商店 : https://bit.ly/3UUGeZW

彩福皇宴 (紅磡)

一班舊同事晌疫情幾年都無約齊過出嚟聚一聚，就趁農曆年咁就梗喺乘機出嚟食番餐啦！因為就番大家關係，所以，定喺星期五晚，然而，好多酒樓都會有時限，結果，偏少少搵到嚟「都會廣場」嘅「彩福」，無時限之餘，又就得到部分住喺新界東嘅老友。雖然成日聽到話啲人北上搵食，不過，今晚嚟到「彩福」都算喺幾爆場。因為我哋有排傾，坐咗成晚，眼見有啲細枱翻咗一、兩轉。至於呢度嘅環境，同傳統酒樓差唔多，燈火通明，唔好見張相以為地方得咁細，其實有一邊間咗俾人搞宴會。同枱嘅舊同事對食都無乜要求，所以，我哋都喺叫返啲慣常小炒，本應佢有一張大嘅點菜紙，不過，忘記影低。大家眼見呢幾張餐牌都喺當其時「求其」影，實際當然唔止咁少款式。片皮鴨 $288
呢道菜要預訂，唔訂未必無，訂咗就穩陣啲。由於我哋坐咗晌個角落位，所以，阿姐晌出面遠少少位置度片隻鴨，用咗隻「鴨仔」碟，配上大蔥、青瓜、甜麵醬，成份片皮鴨幾有睇頭。隻鴨燒得幾唔錯，皮脆肉嫩，油香豐腴，加埋啲配料以餅皮捲起嚟食，好有風味。不過，負責片皮嘅阿姐絕對好業餘，因為片到厚薄不一，有啲直情得層皮，有啲就連住嚿厚肉，多多少少都影響咗個口感。七彩炒鴨絲 $88
叫得片皮鴨，無理由唔加少少錢揀二食，不過，話就話「七彩」，應該改為「銀翠」，因為喺以銀芽同韮菜去炒鴨絲。實際嚟講，炒得夠鑊氣，都幾好食，而且，大大碟夠份量。上湯焗西澳龍蝦 $388
話晒當喺賀年，梗喺食豪少少，所以，揀咗一客龍蝦，並加埋伊麵底（+$30）。講明喺澳洲貨，又標明會有幾重，感覺都有信心啲，出嚟嘅成品亦都好唔錯，睇落絕對足秤，龍蝦肉非常之爽彈，而且好鮮甜，用咗上湯焗，無芝士咁「漏」，不過，略嫌啲伊麵有少少碎濕濕。鹹菜胡椒豬肚鯛魚片煲 $118
除咗個龍蝦，揀多個海鮮類菜式，就喺呢個魚片煲，最搞嘢喺襯埋個鹹菜胡椒豬肚湯，感覺好似一個價錢食兩度菜咁，更好嘅喺呢個煲熱住食，啱晒呢排天寒地凍嘅日子。本身個鹹菜胡椒豬肚湯已經幾好食，加上啲鯛魚片好嫩滑，份量亦唔少，呢道菜可以講喺性價比高。石鍋珍菌百福豆腐 $98
老友們食嘢都喺相對比較健康，所以多菜少肉，蔬菜類菜式都會揀多啲。先喺呢個石鍋豆腐。因為用上滾熱燙嘅石鍋盛上，所以由頭食到尾都夠晒熱焫焫，而裡面有好多菇菌，啲豆腐又夠滑，個醬汁調味道啱啱好，確喺唔錯。金銀蛋浸菜心 $96
另一度蔬菜菜式就要清淡啲嘅，就揀金銀蛋浸時蔬，時蔬就揀咗菜心，因為阿姐話今日啲菜心靚，又即管試下，食落又確喺幾甜，而金銀蛋大家都知喺乜唔多講。原個椰皇燉燕窩 $52
甜品方面呢度有好多選擇，不過，原個椰皇需要預訂，同樣地，無訂嘅話唔一定無，視乎當晚供應情況。我哋就預訂咗兩個，再加埋其他甜品一齊共享。講返個椰皇，打開蓋都睇得到非常足料，啲燕窩唔會碎濕濕，而下面嘅椰皇燉奶熱呼呼，好嫩滑，非常清甜，陣陣椰香，食完真喺好潤。紅豆桂花糕 $24
一般嘅桂花糕賣相都比較晶瑩，但呢份桂花糕外觀就比較沉實啲，因為加咗紅豆，又喺可以講一個價錢食到紅豆糕同桂花糕。啲紅豆煮得幾綿，而且夠香甜，加咗桂花所以滲出陣陣桂花香，味道都幾夾。金箔芝麻卷 $30
一碟有成6件，都只喺買$30，晌酒樓中都算抵食，再者加咗少少金箔，睇上去自然貴氣好多。而入口個人嚟講，都真喺算唔錯，口感夠挺身，咬落又帶點爽口，最重要就喺芝麻味夠濃郁。若非有啲老友住得遠，否則我哋仲有排傾，始終太耐無見，同埋今晚又喺最齊人，喺難得嘅機會。不過，依家已經復常番晒，相信第時出嚟再聚嘅日子都會多啲。

Taylor Shellfish Farms (西環)

平常食生蠔多數都喺晌食自助餐嘅時候，甚少去啲餐廳或者蠔吧度食，唔喺唔鍾意，只喺身邊少朋友喜歡單單食蠔。但今晚就同個老友，嚟到高街嘅「Taylor Shellfish Farms」嘆下生蠔之餘，並且講講旅行心得。 餐廳離西營盤站大概5分鐘步程，沿途都好多餐廳，加上周邊嘅舊樓多，有啲似去咗外國嘅小社區咁。而餐廳環境唔喺好大，裝修以碼頭做背景 ，非常有心思，加上柔和嘅燈光、輕音樂，三五知己喺到聚一聚，非常有氣氛。 鋪面嘅櫥窗玻璃已經印咗大大隻字「Oysters」，經過嘅人都知道佢主打喺生蠔，而入門口嘅左邊 就放咗好多唔同國家嘅生蠔，品種非常之多，仲見到有兩位開蠔師負責處理。 再睇一睇餐牌，就睇到蠔嘅品種實在非常之多，此外，仲提供好多其他唔同種類嘅海鮮菜，例如青口、馬拉蜆、翡翠螺、麵包蟹、小龍蝦、波士頓龍蝦……等等。其次仲供應湯品、沙律、小食、炸魚薯條、意大利麵、意大利飯、扒類、甜品。 飲品方面，同樣選擇多多，有紅白餐酒、氣泡酒 、生啤、手工啤、特飲、果汁、啡茶……一應俱全。另外更有一張餐酒跟海鮮食物配搭嘅餐牌，如果好酒嘅朋友，不妨晌度揀支心水嘅餐酒配搭你所點嘅食物。此外，為喜歡飲酒及愛食生蠔嘅朋友，餐廳仲特設3款配搭組合ABC，定價為$680、$880、$1480 ，以葡萄牙出產嘅白酒，配以唔同地區嘅生蠔，絕對喺懶人之選。 雖然蠔款甚多，但不得不介紹一吓店家獨家供應嘅英格蘭「惠特斯特布爾生蠔」（Whitstable Oyster），睇番佢哋嘅介紹，呢款蠔因為晌得天獨厚嘅海牀同水質，能孕育出含高營養價值及味道獨一無二的生蠔，亦被稱爲「被遺忘的寶藏」。最堅嘅喺獲得受歐盟「地理標示保護標籤」（PGI）同英國頒授嘅「地域原產保護標籤」 （Geographic Origin UK Protected），絕對喺信心嘅保證。店員補充，除咗晌西營盤或大坑嘅分店享用到之外，仲有晌作為香港獨家經銷商「一田超市」搵到佢哋嘅蹤影。 蘋果賓治 $58
食生蠔、凍海鮮就梗喺配白酒啦，不過，唔飲得酒嘅，不妨試吓呢杯「蘋果賓治」，入口清爽，帶蘋果嘅清甜味，又有啲青蘋果嘅酸香，一樣好襯啲凍海鮮。 隨即奉上咗4款生蠔，以檸檬角做起點，順時針方向數起：「惠特斯特布爾生蠔」（Whitstable Oyster）$59、「法國浪漫之蠔」（French Pinky Oyster）$69、「法國金箔皇御」（French Oyster Regal OR）$69、「荷蘭Krijn蠔」（The Netherlands Krijn Oyster）$69，單睇蠔嘅外觀已經非常吸引，隻隻飽滿有光澤，仲專登喺冰內加咗燈效，實在有心思。店員阿Mxxx亦都好細心介紹各種蠔嘅特性，有口感爽脆的，有口感柔滑的，海水味的鹹鮮味有淡有濃，是一次好好的體驗。香草烤大蝦 $88 
食完一輪生冷嘢，喺時候食返啲熱嘢，暖和番個胃納，餐廳提供好多特色小食，呢一款烤大蝦確喺幾唔錯，蝦肉起咗雙飛比較易食，同埋加咗好多蒜片、香草去製作，所以，惹味十足，而蝦肉本身爽口鮮甜，襯晒飲吓啤酒。 炸芝麻雞翼 $98 
再試多一款小食，就喺呢個芝麻雞翼，雞翼炸到外皮脆卜卜，本身已經醃到入味，加埋外皮黐滿黑白芝麻，所以，味道更芳香，而且，肉質嫩滑多汁，師傅嘅炸功幾了得。 美國藍青口（白酒煮）配蒜蓉包 $188 
原個小鍋上枱，份外有睇頭，除咗白酒煮，仲有其他煮法，如忌廉汁、冬陰功、黑松露醬……等等。藍青口向來喺上等貨色，咪睇佢哋細細隻，食落肉質好鮮嫩，而且，有陣陣酒香，配上蒜蓉包，可以最後沾上湯汁嚟食，別有一番風味。波士頓龍蝦薯條配蒜蓉牛油汁 $288 
聽店員講，呢個龍蝦配薯條有唔少客人都會嗌，的確，大大隻鉗波士頓龍蝦加埋大量薯條，實在好夠霸業。啲龍蝦肉好爽口，非常鮮甜，最正喺大大嚿肉咁放入口，爽到爆啦，沾上自家調製嘅蒜蓉牛油汁，更有提鮮之效，食味一流。此外，啲薯條炸到好脆口，又唔油膩，好食。 特濃芝士餅 $48 
最後來一點甜，個芝士餅淋咗唔少朱古力漿，食落更滋味，而芝士餅嘅質感挺實得嚟好柔滑，芝士味好香濃，實在有質素。餐廳除咗食物選擇款式多，又有各種唔同嘅海鮮，環境舒服又有氣氛，好適合朋友間嚟聚一聚。加上侍應阿Mxxx非常好禮，招呼熨貼，菜式講解細緻，真喺無咩挑剔位，有種賓至如歸之感。臨尾仲俾咗張9折卡，呢啲先喺用心做生意之道嘛。

金鳳大餐廳 (荃灣)

老婆一向食嘢喺偏素，偶爾食吓肉，不過，佢有體重過輕嘅問題，所以，家下要食番多少少肉，故此，今回佢就請我嚟「金鳳」鋸扒，認真難得，食完趁天氣涼涼哋順便去行吓山，減番啲卡路里。雖然過咗午市嘅最高峰，但都要等一等位，不過都喺三幾分鐘有得入。話時話，「金鳳」粗略估計小弟都應該有超過10年無幫襯過，呢間店都幾大，樓底又高，又有一排落地玻璃大窗，裝修就如懷式嘅豉油西餐廳嘅格局，感覺都幾舒服。牆上嘅霓虹燈數字「1969」，就喺餐廳成立嘅日子，即喺開咗超過半個世紀，主餐牌都有詳細介紹。今時今日，老店已經買少見少，屹立咁多年實在唔容易。值得一提嘅喺，啲地方無用到盡，枱櫈唔似茶記咁排到「密質質」，而且，亦盡量間開啲客人，好似我哋兩公婆同另一對客人，就安排坐晌張6人枱，中間就隔開咗一個位。午市方面，午市套餐嘅選擇唔多，只有4款，其中3款喺西式碟頭，平少少，定價$68-$82，淨番1款就喺招牌嘅鐵板扒餐，賣$138。幾款午市套餐老婆都麻麻地啱食，所以，就喺主餐牌度落手，有好多款鐵板餐供應，可謂各適其適，此外，散點嘢仲有沙律、湯品、小食、海鮮。全部餐都會有牛油餐包、餐湯同飲品、凍飲亦唔需要額外加錢，但就需收加一服務費。餐具、紙巾都放喺枱側，平常喺茶記都會放少少調味料，呢度唯一嘅調味就喺支大茄汁，因為嚟得呢度大部分人都食鐵扒餐，梗附送大量薯條，所以，茄汁喺必備調味料。牛油餐包、餐湯
呢一類小餐包喺港式西餐廳嘅經典，包身非常之軟熟，搽上少少牛油都好好食。餐湯可以揀羅宋湯或洋蔥粟米忌廉湯，我哋兩個人各叫一款試試
，似乎羅宋湯好飲好多，比較有味道，酸香又多雜菜，而個忌廉湯味道較淡，亦都比較寡，粟米粒更喺寥寥可數。歐陸鐵板餐 $138
上咗個餐湯無耐，都未飲夠1/4，就嚟個個鐵板，明顯喺因為午餐，較多人叫，完全喺整定晒。個餐寫明包咗豬扒、牛扒、法蘭克福腸、澳洲帶子，不過就唔會問你牛扒要幾成熟，亦唔會知喺咩部份，但確喺份量十足，堆到成個山咁。整體嚟講，以鋸扒而言，喺抵食嘅，不過，計埋味道就差咗少少，豬扒、牛扒調味都有少少過鹹，個黑椒汁亦都偏鹹，我啲牛部有份就較多筋，而帶子就算喺雪藏貨，算彈牙好食喎。招牌牛柳餐 $142
老婆嘅牛柳餐，又喺一大堆頭，有好多件，仲好厚身，落單時亦有問佢要幾成熟，選上7乘，都確喺煎到差不多。不過好搞笑，當淋上洋蔥汁時，塊鐵板無乜點響，只喺滋滋幾聲就完。講到啲牛柳，又真喺幾嫩滑，輕易就切得開，咬落軟腍鬆化，又幾有肉香，因為份量多，老婆食咗一半都叫飽，而下面墊有大量薯菜，不過，啲薯條咁樣墊底，被啲醬汁浸腍晒，有啲嘥料啫。熱咖啡、熱唂咕+$5
餐後一杯咖啡就啱我心水，而難得有唂咕供應，老婆就寧願加錢飲杯唂咕，比起朱古力味道更濃、更香。食得我哋兩個鬼咁飽，好彩預咗食完去行轉兩個鐘嘅短山，幫助消化，否則，真喺撐住肚皮返屋企，哈哈！

蘇山雞飯 (太子)

以前因緣有合作嘅機構同事，無見幾年，原來已經轉咗工，雖然跑道一樣，但比以往輕鬆咗。相約出嚟聚一聚，再詳細講吓近況，兼聽吓佢嘅旅遊經歷。相約一個中間點，太子就最合適，搵一搵就「蘇山雞飯」，因為一來幾鍾意食馬拉嘢，二來舊年年尾曾到訪過其長沙灣店，覺得好唔錯。 地方唔喺好大，但勝在四四正正，裝修亦都雅致，佔大部份都喺卡位，夠闊落，舒服好坐。正好晌外面有啲外賣單張拎，掃瞄晒出嚟俾大家參考菜式嘅選擇，由午餐、下午茶、招牌雞飯、推介、湯粉、蔬菜、小食、特色飲品到甜品，都充滿星馬風味，難得喺價錢貼地。 餐具、紙巾就放晌枱上，見到二維碼，就知又喺自助落單。當然，搞唔掂可以搵侍應幫幫手，不過，都喺趨勢，要習慣吓。 Susan雞翼 +$22
點主食可以以半價另點小食，所以，加配咗一客雞翼，以店主嘅名起名，應該有番咁上下。餐牌就話3隻，睇落唔止喎，有全翼，有雞鎚喎，半價咗真喺超抵。最正炸得甘香，卻唔乾身，一口咬落去皮脆肉嫩，調味啱啱好。 牛車水醬油雞飯 $85
主食揀咗一客雞飯，一客老鼠粉，先介紹呢個醬油雞飯，之前好似無嘅。份量都幾足，醬油雞幾似豉油雞，濃郁得嚟帶點甜味，而啲雞肉又幾嫩滑，外皮有點爽。 仲有埋啲鳳爪咬下，除酸薑片，仲有佐食嘅3款醬汁：秘製辣醬、薑蓉、黑醬油，夠晒傳統、地道。 個雞油飯有別平常所見，比較深色，問問店員，原來煮雞時，用上啲日本花菇、元貝、多種香料增味，加埋啲雞油、斑蘭汁，所以，個飯真喺色香味全。 個套餐本身跟冬瓜雞絲湯，但可以+$10轉為輕怡排骨茶，朋友就想試一試。白胡椒肉骨茶飲落陣陣白胡椒香，少咗朕藥材味，對好多人嚟講變得輕怡易入口，豬肋排亦炆到好腍、好鬆化，啲肉一咬就開。 地道白咖哩老鼠粉 $70
好似都好耐都無食過老鼠粉，所以，點都要試一試架喇，同樣又喺份量十足，而裡面豆卜、叉燒、魷魚、芽菜、通菜、蛋，好豐富架。啲粉仔幾有咬口，不過，白咖喱就無預期咁重味。 鮮油咖央多士 +$15
咖央多士都喺放晌小食類，所以，我哋又可以以半價選一客，唔喺講笑，中間件鮮牛油厚到呢，睇見就只想到兩個字：邪惡。多士烘得香脆，中間嘅咖央清甜，牛油溶咗少少，就更香滑，果然好食。 仙草椰奶冰 +$18
仙草賣晒，改咗珍珠，當然口感喺唔同晒，前者柔滑，後者煙韌，不過，朋友兩樣都OK。而椰奶嘅奶味幾重、幾香。 薄荷咖啡 +$18
我就膽粗粗試個薄荷咖啡，睇色澤就似喺咖啡加咗啲薄荷糖漿，而唔喺就咁用薄荷葉，因為色澤呈少少泥灰色，感覺無咁好睇，但味道又確唔錯喎，幾夾，咖啡中滲出陣陣薄荷涼意。再加埋一球雲呢拿雪糕，令杯咖啡更香滑。整體而言，再嚟食過啲嘢都晌番水準之內，無乜失威！