小林札幌拉麵 (大角咀)

地址: 大角咀博文街11號富貴大廈西座地下16號鋪
(以下圖片可以按圖放大作最佳輸出)
香港咩人都有...利申一: 有人 send message 黎話我係打手, hm...湯底用左幾多個鐘頭同用幾多斤豬骨煲, 食店既食材喺邊度運黎, 呢 d 我唔識寫, 我只寫我食完既感覺。
香港咩人都有...利申二: 拉麵味道好唔好, 係好睇個人口味! 拉麵既粗幼、湯汁既濃度、配料如何...各人食落都有唔既感受, 所以好難一概而論好唔好食。所以呢一篇拉麵食記, 純粹個人觀感。
好唔好食? 又睇落去? 黎緊我會為每次食既拉麵作一個連載, 名為 "好孩子香港日本拉麵道場小戰爭"! 個名夠哂低能! haha...而今次食既係...小林札幌拉麵大角咀博文街位置不太就腳, 不過附近有奧海城幾個屋苑, 亦有商業大廈, 所以亦有唔少中西日食市進駐呢區, 其中一間拉麵店係小林札幌拉麵!晚飯時段, 有二人餐, 亦有一人前, 後者 $78 同 $85 分別不大, 兩 set 都有小食選擇, 可配小食: 餃子/炒飯/雞軟骨/雞翼/咖哩飯/炸薯餅, $85 跟飲品。SET 送上薯仔沙津, 薯仔加洋蔥絲仲有蛋味, 幾甜, 好醒胃! 好味!點了招牌牛油拉麵, 上面黃色正溶解中既係牛油。賣相跟八八八拉麵同 Domon 札幌拉麵相似。湯對我個人喜好黎講豬骨味唔夠濃, 飲一啖無躍躍欲試再快快飲多一啖既感覺。嘗試將溶解緊既牛油撈暈全碗再試一口, 好一點! 再加少少七味粉先啱番個人口味。叉燒接近完全走肥。麵條煙韌係全碗麵最好一環!拉麵配餃子是王道!餃子絕對驚喜! 一定唔係包包雪藏餃子 STYLE, 半開口煎有肉汁唔乾! 即使餃子皮不脆亦好食! 咬下亦有一小點攻鼻感覺, 係多蔥還是有 WASABI? 好味!晚飯時段, 客人一兩枱 (我進場時一枱, 離場時兩枱)。
總結:
埋單 78 連加一 $85, 呢個價錢有拉麵加小食同沙津係相對抵食。至於味道方面拉麵唔能令好孩子有太深印象, 反而餃子確實同其他拉麵店唔同! 店處於大角咀地帶, 地方有點隔涉, 未至於為試食而去。
環境:♥♥♥
衛生:♥♥♥
服務:♥♥♥
味道:♥♥
抵食:♥♥♥♥
推薦:♥♥
以上: 旺角, 小林札幌拉麵, 好唔好食又睇落去, 好孩子香港日本拉麵道場小戰爭, 拉麵, 香港日本菜
 

拉麵台風 (荃灣)

好唔好食?又睇落去? 第345回: 香港日本拉麵道場小戰爭(10) 荃灣台風拉麵湯底水質與別不同! (哇! 咁抽像?)!
地址: 荃灣大河道81號寶成樓地下7號舖
(以下圖片可以按圖放大作最佳輸出)
拉麵味道好唔好, 係好睇個人口味! 拉麵既粗幼、湯汁既濃度、配料如何...各人食落都有唔既感受, 所以好難一概而論好唔好食。所以呢一篇拉麵食記, 純粹個人觀感呢! 好唔好食? 又睇落去? 黎緊我會為每次食既拉麵作一個連載, 名為 "好孩子香港日本拉麵道場小戰爭"! 個名夠哂低能! haha...而今次食既係... らーめん台風!
拉麵小戰爭集中銅鑼灣區尖沙咀區, 其他比較冷門既新界區例如呢次食既 "らーめん台風" 就位於荃灣。話說七點黎到門口有五六人坐喺門口排隊! 店員遞上一張點麵紙, 揀好進店開餐, 好唔好食?又睇落去?門 口用透明膠篷分隔開街外同食店, 因為對出面係小公園, 無玻璃門相隔其實衛生方面會有點兒那個...走入店內, 目測約可容納十多人, 反 "L" 字形座位。帶位店員非常殷勤細心, 全店職員亦好有熱誠, 真係感覺到! 值得一讚! 所有食客都踏上高凳既一級就座, 然後由店員推食客高凳進內, 因為地方淺窄, 有點壓迫感。店員再遞上吊鈎, 等客人可以將隨身物吊喺枱下, 日本好多拉麵店都有呢種做法啊!店內四款拉麵 (見圖), 其中豬軟骨骨膠原撈麵原來係"沒有湯的拉麵", 哈...我今次試 CLASSIC 既魚介豬骨湯拉麵, 好味既話, 日後再試"沒有湯的拉麵" 都未遲!可以選擇個人喜好既點菜紙, 揀適合個人口味既選擇, 通常覺得味道唔好既機會相對細 D。喺 ORDER 紙上其中一 PART 加配菜, 見到有半熟蛋揀, 問問店員本身碗麵原來係包半隻蛋。香港部分拉麵店本身係唔包蛋既, 呢點要留意啊。魚介豬骨湯拉麵 $78拉 麵上枱, 賣相擺位一般, 碗拉麵既外表我睇得好重...因為一碗拉麵有系統咁擺位, 湯汁唔會四淺, 整整齊齊, 大多數日本當地既拉麵外表上藝術性含量高。要令食客有正面既 "哇! 睇落好好味啊!", 你已經成功一半! ANYWAYS, 唔好好似亂放食材既車仔麵為合格指標。指 定動作, 用匙壓一壓欣賞漩渦裡的湯! 豬骨湯味濃, 很厲害既湯底! 我指既唔係個味道! 味道濃但層次感不高, 即係湯很單調, 但係個湯水質地好明顯同其他拉麵店唔同! 你可以笑 "哇! 你講咩? 咁抽像! 咪扮高深!" 簡單 D 黎講, D 水真係有 D 唔同!叉燒我純個人口味傾向咬下即化油脂多那種, 這塊叉燒肥脂不多。一碗麵跟半隻半熟蛋。麵條中粗麵, 選擇最硬度。有點似油そば!總結:
唔喺拉麵道場既地區競爭係 OK 的。整體拉麵唔算突出, 如果住得遠離荃灣, 不建議為去而去。
環境:♥♥
衛生:♥♥
服務:♥♥♥♥
味道:♥♥
抵食:♥♥♥
推薦:♥♥
以上: 拉麵台風, らーめん台風, 好唔好食又睇落去, 好孩子香港日本拉麵道場小戰爭, 拉麵, 荃灣, 香港日本菜

芽莊城越南牛肉粉 (深水埗)

話說喺深水埗食完新香園既蛋牛治, 行去另一邊試下另一間人氣食店: 芽莊城。哇! 喺街市上既熟食市場啊! 下午茶時段部分食店落場中, 無咩燈光暗暗地, 環境唔多乾淨, 會唔會中伏呢? "好唔好食? 又睇落去?"!
好唔好食?又睇落去? 第342回: 深水埗芽莊城三十元碗足料越南牛肉粉!
地址: 深水埗北河街市政大樓2樓熟食中心10號
(以下圖片可以按圖放大作最佳輸出)街市上層別有洞天。芽莊城係行到最篤篤角落頭位置。睇下餐牌, 價錢真係化算, 最貴既招牌湯河粉都係 $32! 今時今日租金咁貴, 想搵間食店 $30 一個飯真係好少見! 仲要最賺既加錢涷飲都係加一元!要個招牌湯河粉, 哇! 比想像中大碗好多啊! 食物擺法唔"拿西"!料有肥牛、牛展、雞肉絲、扎肉、芽菜。個湯香料幾濃烈, 飲一啖湯, 未至於天下無敵, 但係都唔差, 性價比特高!新鮮熱辣辣, 河粉同配料無將貨就價! 只可以講 $31 大大碗足料, 已經加分不少!
總結:
今 時今日香港有好多食店因為租金貴而偷工減料, 遇到性價比高既食店機會少左好多。當然 $30 一個飯絕對無可能要食店比到酒店式既服務同環境你, 呢樣野正常人都知道 (不過據我所知好多都唔係正常)。呢個招牌湯河粉唔係 100 分好味, 我覺得 70分好味, 但性價比值 $60, 即係高出自己願意比既價錢兩倍, 好抵食! 如果係因為為左味道而去食, 亦未至於; 但係如果為味道 OK 同飽肚同抵食, 呢間真係 GOOD CHOICE!
環境:♥
衛生:♥
服務:♥♥♥
味道:♥♥♥
抵食:♥♥♥♥
推薦:♥♥♥
以上: 好唔好食又睇落去,深水埗,芽莊城

新香園 (堅記) (深水埗)

呢句說話黎緊每次都會講架喇: 我唔係食家, 文筆唔好, 只係將自己覺得好唔好食既感覺寫出黎, 味道呢樣野好主觀, 喜好亦各人有各人既口味, 我係寫比自己睇, 你鍾意睇我會高興, 你唔同意亦無問題, 最後一句講哂: "好唔好食? 又睇落去?"!
地址: 深水埗桂林街38號A地下
好唔好食?又睇落去? 第341回: 深水埗新香園蛋牛治一招打天下!
(以下圖片可以按圖放大作最佳輸出)深水埗好多小食好出名, 咁啱整野經過, 今次試左兩間, 呢間名氣店叫新香園, 馳名蛋牛治。TEA TIME 時段, 店內坐滿人, 一個人食搭枱坐密 D 所以無問題。食野期間, 客人真係絡繹不絕, 大部分食客都係要蛋牛治!隻碟寫住おいしい啊! 試下?我鍾意個蛋有 D 蛋汁, 呢個就少 D...牛肉碎就幾好味。埋單 $17 (烘底加 $1)
總結:
蛋牛治味道 OK, 經過可以一試, 但就唔使特登為去食而去深水埗。收銀既係一個 TVB 既男藝員, 但我真係 UP 唔出名...
環境:♥♥
衛生:♥♥
服務:♥♥♥
味道:♥♥♥
抵食:♥♥
推薦:♥♥♥
以上: 好唔好食又睇落去,深水埗,新香園

麵鮮醬油房周月 (中環)

拉麵味道好唔好, 係好睇個人口味! 拉麵既粗幼、湯汁既濃度、配料如何...各人食落都有唔既感受, 所以好難一概而論好唔好食。所以呢一篇拉麵食記, 純粹個人觀感呢! 好唔好食? 又睇落去?
黎緊我會為每次食既拉麵作一個連載, 名為 "好孩子香港日本拉麵道場小戰爭"! 個名夠哂低能! haha...而今次食既係...
 
地址: 中環歌賦街5號地下
(以下圖片可以按圖放大作最佳輸出)來自四國既周月喺, 中環歌賦街, around 中環上環交界, 要到周月食拉麵, 要先有爬五分鐘斜路既決心! LUNCH TIME 等左十分鐘有位。menu 幾得意, 畫畫作為 menu。拉麵店既 menu, 有沾麵,撈麵和三款拉麵揀, 只要有つけ麵既選擇, 都會優先選擇 order!面向廚房, 睇住拉麵男煮拉麵; 其實都係一種享受, 周月都好有日本風!周月つけ麵既湯, 有超強烈醬油味, 有別於其他店既つけ麵。85元, 要加一。喝了一口湯, 那層醬油加上蔥揮發出既味道非常濃烈!肉既肥膏與肉比例也不錯, 一塊上可能太肥, 切粒就相對易入口, 唔錯的!麵 條是冷粗麵, 麵質剛好, 完全 match 我個人喜好! 以麵條黎講, 冷, 粗, 彈, 暫時我覺得最好既一間。3款麵條可供食客選擇, 分別係100克、200克及300克, 我揀 200克, 價錢一樣。我見到隔離食湯麵既麵條, つけ麵麵條係粗 d。原來呢間店喺麵條上處理幾細緻!麵唔難掛湯, 如果覺得咸, 落多幾注麵掛一掛就會體會到個醬油味道其實好好味!一碗麵跟半隻蛋, 反而覺得麻麻。食完個麵, 要求加湯, 味道無咁濃烈剛剛好。總結:
周月個魚介醬油湯, 上佢地既網頁睇有關資料, 原來個湯有來自熊本既鯖魚粉, 愛媛縣出產既醬油, 北海道既昆布, 還有瀨戶內海既鰯魚乾, 產生既味道令人深刻, 雖然以香港食客黎講, 未必接受到周月咁濃醬油既湯, 但係呢個特點真係可以喺香港既拉麵店群中 differentiate 到自己最特別既形象。我接受到呢款味, 但不至於大愛; 大愛既係佢地既麵條, 水準好高! 我會繼續喺搵最啱自己口味既湯底!
環境:♥♥♥♥
衛生:♥♥♥
服務:♥♥♥♥
味道:♥♥♥
抵食:♥♥♥
推薦:♥♥♥
以上: 好唔好食又睇落去, 好孩子香港日本拉麵道場小戰爭,中環,拉麵,周月,日本菜, 食評, 食記,ラーメン,ramen, 好孩子,好孩子PHILIP