能夠令我再次重投openrice寫食評，呢間餐廳真係不得了！

見呢間餐廳好評不少諗住試下，點知完全中伏：先黎個泰藉或菲藉女待應全程黑面落單，iced lamon tea又變左iced lemon water, 算啦可能人地受左氣所以拿埋塊面。（順帶一提，另一個講廣東話嘅女待應就好好服務）

泰國餐無泰式奶茶，又算啦，雖然好想飲但又真係未必間間泰國菜有。

個炒金邊粉一黎度，到我黑面！我認我嚴重歧視雪藏三色豆，無心機嘅餐廳最鐘意落三色豆整色整水，黎掩飾碟菜唔夠料、無配菜。再一次算啦，唔通成碟倒左去唔食咩。金邊粉入口乾身又偏硬，好明顯係用乾粉黎炒、而又處理得唔好。肉碎得少少、九層塔得少少，金邊炒亦唔多，最後食淨一大碟三色豆。另一碟大蝦焗飯黎度，又係三色豆，飯底應該係拎甜酸醬定冬蔭公湯底加三色豆撈飯。

講到呢度我都唔想浪費時間再繼續打落去。
簡單講，請我都唔會再黎！

同好多人一樣, 通常D餐廳一係有驚喜、一係差到好離譜,我先會login 打個食評。今次美心真係比到我「驚喜」, 原來以為食燒味飯穩穩陣陣, 點知......
唔知外賣唔洗排隊, 排個陣仲同個師父講, 义燒要半肥瘦, 點知個男仔答我: 全部义燒都差唔多!
FINE!
打開個飯盒, 嚇親, 豬肉打直切, 連基本切功都唔識, 一咬, 乾到趙柴皮咁。
油雞比雞翼, 斬到碎晒骨, 慘不忍睹。
結果今餐主要都係薑蓉撈飯。

有日係大圍睇完醫生, 就想食少少野番屋企, 6點幾, 腸粉、碗仔翅都已經賣晒! 心有不甘, 搵次睇醫生之前再黎食, 卒之都食到喇

腸粉真係好滑(不過唔夠深水埗滑)。 牛肉則太硬太實, 無牛味, 麻麻地。碗仔翅好足料, 打打下字又想再去食過.

行花墟前本來諗住前一點心, 點知好多人, 就求其走入新發, 點知中伏!

我地叫左個$53咖哩牛腩飯, 老公食兩啖已經大叫難食, (老公係超級咖哩迷, 唔太差嘅咖喱佢都會接受, 好少叫難食), 我望下D薯仔, 個邊乾到深啡色, 望到都唔開胃。

自己叫左個泰式雞絲河粉, 中規中舉, 唯一可取係河粉好滑, 但湯底咸, 加舊蘿蔔叫泰式, 檯面放左枝泰式酸汁, 試下啦, 點知只有白醋味

結論: 無下次!

我通常黎林記都係食燒賣、魚旦、牛肉、腸粉, 食左好多年前三者水準穩定, 但係腸粉真係難食左好多好多, 唔知係咪老闆同唔同供應商點解腸粉有香蕉味, 大約兩年前腸粉已經無之前咁滑, 最近再買腸粉外賣, 番到屋企一食, "點解腸粉有香蕉味?", 再食真D, 原來係甜醬改左, 充滿香精味, 超難食, 自此不再係林記買腸粉。

其實唔想比個喊公仔, 但真係好難食, 真心希望林記可以提昇番腸粉嘅水準。

新年前去西環買海味, 因為好想食蝦麵又唔想兜去灣仔咁遠, 就揀左上環嘅馬拉媽媽試下。

我淨係叫左一碗蝦麵, 3,4隻蝦而且好細隻, 唔緊要, 但係湯底完全無鮮味, 湯底理有蝦(蝦殼)同大地魚味, 但完全無, 得個咸字。

一個蝦麵湯底已見真章!唔會再去!

黃埔開新野, 街坊當然要去試下。

等位等左好耐, 到我地喇, 個位對住廚房, OK啦, 但一坐低已經好凍, 問待應有冇得調較下個冷氣,佢話去關細D, 但唔覺細風左。
我食野唔一定要D野食好熱辣辣, 但就一定唔鐘意D野食凍晒先食,個冷氣咁吹法, D野食幾好食都好, 死梗!

我叫左個蕃茄咖哩牛肉餐, 牛肉得2條牛肋條仔, 咖哩底其實OK的, 但我個係蕃茄咖哩, 蕃茄方面只食到係罐頭茄汁, 唔係新鮮蕃茄煮成嘅汁, 咖哩味仲比D茄汁蓋晒D味, 仲要因為個冷氣吹住, 我被迫超快速完全我嘅晚餐, 而且太貴喇, 我個餐要成$128+10%, 貴到飛起, 隔離MISO 都係用同一隻美國牛肋條做紅酒牛肋條, 起碼有3條, 賣$68, 雖然咖哩不能同紅酒汁比, 但單睇價錢真係大太對比鳥!

我好鐘意食譚仔米線, 初初見佢係黃埔開不知幾開心, 耐何食左2,3次, 呢間D質素真係強差人意。
我食米線鐘意酸辣底, 個種酸係應該由酸菜出黎個種酸, 但呢間譚仔三哥個隻酸, 係落左好多白醋個隻酸, 隻味好夾硬黎。

譚仔不論三哥唔三哥, D腐皮都唔係靚貨架喇, 但唔係靚貨之中, 都滾熟D滾林D, 等人咬到吖, 呢度D腐皮"UN"到硬膠紙咁。
杯檸茶淡過鬼, 完全冇茶味!

其實一路好少幫襯呢間, 因為行過都一陣鹼水味。
幾個月前食過一次, 麵真係好大陣鹼水味, NO GOOD。
雲吞, 蝦唔爽唔彈牙, 生發好過佢.
我最鐘意食河粉, 但佢質素最差, 唔滑, 鞋口嘅。

紅磡新開韓國餐, 見D位座都幾舒服, 本來係想去對面生發食野嘅, 改變主意黎木槿試下, 奈何一入店內, 已經留底 十分差印象。

講真,入得黎, 又唔係平價, 梗係想坐得舒服D啦, 個時都2點幾, 冇咩幾檯客, 我地2個人, 一行入去, 有個哥哥就叫我地坐埋好多人個邊, 我見個邊5-6檯人, 仲要我地坐人地隔離, 而我想靜靜地食野, 我就話"可唔可以坐另一邊?" 其實另一邊都有人, 不過少D人, 得2檯, 但我起碼唔洗同唔識嘅坐隔離先囉, 點知個位哥哥係都要我坐埋一邊, 即隔離伸手就掂到人嘅距離, 等佢中間留番4-6個吉位, 仲要即刻執番D碗筷走, 要我一定坐有人隔離嘅位。唉, 街坊生意, 好心以人為本啦, 你如果陣間都仲有4-6位大檯人入黎, 我一定調位讓比你, 唔會阻住你發達, 但個陣都2點幾, 而且佢餐廳中間仲有一張6-8人嘅大檯, 咁點解唔可以比我坐得鬆動D呢?!

講食物, 仲衰, 我叫左碗牛肋骨湯麵, 湯底完全冇味, 牛肋骨D味係OK, 但佢已經去埋骨比你, 係唔係牛肋骨, 冇人知.
老公叫雞肉炒飯/石鍋飯, 仲衰, 好少雞肉, 得D 雪藏豆、栗米, 而且淡而冇味, 我試左2啖都覺得十分唔掂, 最後要問佢攞碟鼓油黎撈飯。
而且唔平,食左2樣野, 最後百幾蚊埋單, 因為咁嘅服務仲要加一! 吹漲!