今嗰月係我個生日周, 又有朋友請食飯啦!
呢間餐廳前前後後來了數次, 今次特別啲, 無叫意大利粉, 無叫薄餅食, 全程衹係食海鮮, 無叫其他野食, 不過食完餐飯就已經好飽好飽啦!

頭盤,先嚟兩款青口, 分別用兩種煮法, 白酒煮同忌廉煮。白酒煮青口: 青口夠大隻, 肉質鮮美, 白酒煮帶出青口啲海洋鮮味!忌廉煮青口: 有一陣陣淡淡的忌廉香味, 青口夠新鮮, 用忌廉汁煮與白酒煮青口, 各有自家特色的味道,而且煮青口啲忌廉汁還可以用來點麵包吃。正! 一流! 麵包蟹: 據聞是飛機新鮮運到, 而且有季節性的, 唔係次次嚟到都有得食。一隻蟹相信有成幾斤重, 用清蒸的煮法, 不加醬料及其他香料來煮, 開好殼, 將手手腳腳分開, 再砌翻成一隻蟹, 原隻上碟, 再以沙律菜伴碟, 賣相一流, 未食都已經流晒口水啦! 麵包蟹 以清蒸的煮法引出蟹肉的鮮甜味, 因為蟹肉的份量不小, 所以一人食完一隻就已經飽飽啦。

一個星期辛勤的工作又過了, 又係星期日放鬆同家人及親友相聚搵野食的時候啦!

今天我們一行八人來到九龍城新三得火鍋館, 人多食火鍋就最好, 因為可以叫多啲不同種類的食物。本地手切肥牛: 有牛味, 夠淋, 鮮嫩。如果想要再小啲肥, 就落單時提一提廚房會更留意!南非鮑魚 + 紅蟹 : 鮑魚都算新鮮, 鮑魚如果可以切片上就更好, 一隻隻食咬落去啲口感無一片片咁好; 蟹可以不叫,好瘦,無咩肉食。蕃茄薯仔豬骨湯底: 材料十足, 蕃茄味好濃。瑤柱火腿冬瓜湯底: 由仿魚翅 + 冬瓜 + 火腿絲 +  雞腳 + 瑤柱絲姐成, 嗰湯好甜, 最後啲冬瓜煲淋晒入晒味好好食。 炸魚片頭: 餐前小食, 一定要叫, 伴啤酒一起吃更好!烏冬: 最受小朋友歡迎, 用冬瓜湯煮清啲, 夠爽滑! 而且有一個煮面茜附上, 把烏冬放入茜中再放落鍋煮, 唔洗等啲烏冬熟左後, 一條條夾上來咁麻煩, 老板都算有用心去諗野!蕃茄餃: 從來都唔知蕃茄可以做餃, 但食落又出奇咁好食, 所以而家次次去都會必叫蕃茄餃。象拔蚌: 大部份人都喜歡切片, 而我地就比較喜歡切條。切片因為可以切到好多片, 擺上台之時就比較好睇啲同大碟啲, 而切條因為有番咁上下厚度, 做成同一個重量的象拔蚌切好後,放上台之時看落比切片無咁多, 不過切條食嗰時, 咬落口, 口感就實在啲, 有彈性啲,其實切片切條都可以, 因人而異啦!山根: 我又係次次打邊燼, 我必叫的食物, 第一次係糖朝打邊爐嗰時食過, 之後, 就好似中左毒咁, 打親邊爐就一定要食, 唔食過唔安落。鱆紅魚: 一魚三吃: 刺身夠鮮味; 灼熟食又唔錯, 灼嗰時又唔會因魚肉熟左而散晒; 啲魚頭/魚骨/魚尾, 最後用來椒鹽, 又係伴酒美食之一。如果唔夠飽, 就食埋啲餃, 丸, 菜啦,心2保你肚滿腸肥咁走!

以往在朋友介紹下, 我第一次吃馬家莊是在塘尾道舊店。之從塘尾道舊店結業後搬至尖沙咀, 就再沒有品嚐遇馬家莊之美食。最近, 於長沙灣及塘尾道徘徊之際, 發現於長沙灣道有另一間馬家莊, 可能是馬家莊分店, 就膽粗粗走入內試下這餐廳的廚藝。首先來個酸辣湯, 有分大中細三個SIZE: 大的盛惠HK$116; 中的盛惠HK$58, 細的盛惠HK$38, 我們只有兩人就叫了一個細的, 其實細的份量也可以分成四豌左右, 如只有兩人吃就無需叫個中的, 除非一個人打算吃三至四碗以上, 如不是, 叫了中SIZE就只會做成浪費。

酸辣湯味道不錯,  材料十足, 不過要襯熱飲, 如果唔係就有啲漿住的感覺。雞絲冷麵: 雞絲根本就唔似係雞絲, 切得唔夠幼太粗, 粗到似雞肉或叫雞柳似乎合理啲, 附有麻醬。麵條不粗不幼, 彈牙有口感, 麵條爽滑, 再混上香濃的麻醬, 加上嗰麵冷冷地, 夏天吃最正!麻醬冷麵跟雞絲冷麵的不同之處, 只在於小了雞絲, 麵條, 麵質,, 味道及口感都一樣。蔥油餅: 夠薄, 不過唔夠香, 蔥味唔夠濃郁。秘制牛肉餡缾: 餅皮不厚不薄有小小脆, 牛肉有香味。食之時要小心, 因為如果沒留意, 一口就咬落去, 啲熱騰騰的牛肉汁就會咇出嚟燙傷個口腔, 所以食之時要注意一下。

今天和朋友在圓方露天酒吧 - 喝酒/聊天。傾左個多小時後, 個肚就係度叫, 餓餓地就想找下附近有咩食, 又唔想食中菜/西菜, 坐係酒吧度用 "OPENRICE" 搵下搵下, 就決定嚟 "百樂" 試下啲潮州菜。

八點幾到餐廳,無人排隊, 有空台, 但啲台剛剛在執要等兩三分鐘左右才入得。
兩個人叫左四個菜, 一個湯。

潮州菜最出名當然就係凍蟹啦。咁, 先嚟隻潮州凍蟹! 試試先! 涷蟹: 個人覺得隻蟹無嘜鮮味或蟹味, 唔係幾好食, 而且隻蟹細細隻, 收我八百幾蚊, 覺得唔係好值。鵝片: 肉味香濃而且啲肉又夠滑嫩, 無嘜肥膏, 唔錯! 唔錯!螺頭湯: 嗰湯幾濃味, 清甜可口! 啲湯料十足, 雖然煲左湯, 但好好味, 所以差不多食晒啲湯料。四季豆: 唔食唔可惜! 啲豆夾埋啲欖菜同肉碎食, 就太咸, 所以最後就挑晒啲豆食, 食剩啲欖菜同肉碎。菜甫蛋: 食落去, 就似食緊一塊煎蛋, 菜甫同肉碎唔夠多!

今日三隻餵食貓又出動去試新野食啦!今日我地選左The One呢間西班牙風味的"TAPAGRIA",以往係香港都試過搵西班牙菜食,但都唔係咁容易,更何況搵到間好食的就更難!之前,我都有跟朋友去試過一兩間西班牙菜,但都衹係覺得麻麻地,呢間我就真係覺得好食,所以日後如果我啲朋友仔想搵西班牙菜食,我一定會推介呢間比佢地!

地方同環境都幾好,內部裝修都幾幽雅,餐廳主要分成兩部份,有室內及室外,室內就有啲台仔同BAR台坐下,室外就有一個大露台,有啲圓台仔,可以係18樓,高高在上,望下維景,感受一下啲微風(食下西北風 ),欣賞下夜色都真係一件賞心樂事。室內雖然有啲台仔坐,但如果多過四個人嚟食,想搵張大台或方形台坐下都唔容易,因為大台及方平台唔多,而且有時就算四個人去,都有可能只可以被派到兩張細圓台仔坐,所以如果四條友係大食啲,點菜多啲,食得慢啲,再加上啲菜嚟得快啲,嗰台面就會好容易唔夠地方放食物,真係一大缺點 。燒豬(Sucking Pig), 一個ORDER兩件,盛惠$95, 單叫一件$50。
一個字:"正",好食到唔識形容。啲Mussel隻隻尺寸唔一樣,有啲大隻啲,有啲細隻啲,啲SIZE唔一致,盛憲惠: $145。
個Mussel都算幾好食,不過如果真係要推介,我就覺得喜來登間Oyster and Wine Bar 好食啲,但喜來登啲Mussel好似seasonal唔係次次去都有得食。呢個菜叫"V.I.C.",盛惠: HK$22一件。
係最上面係一片西班牙火腿,蓋住下面個忌廉波波,個忌廉波波炸得幾香脆可口,個波波好似用左啲忌廉,芝士同雞肉,混埋一齊做的,真係幾好吃!西班牙飯(Tapagria Paella),盛惠: HK$145。
個份量其實只係夠一個人份量,不過你如果只係想品嘗下嘜野叫西班牙飯,又想試多幾款西班牙小食,叫一個飯大家朋友share就好啦。個飯唔油膩,啲米唔知邊度嚟,唔似中國米,日本米或麥西哥米,嗰飯有口感得嚟又軟軟地幾好食。蝦就得一只,加埋有小小海鮮一齊煮。辣肉腸(Chroizo Wine), 盛惠: HK$65。
呢個辣肉腸有小小辣,如果完全唔食得辣的朋友就唔好叫啦,如果唔係,就要預備杯水係側邊啦!蕃茄麵包(Tomato Bread), 盛惠: HK$65,一個ORDER 三件。
呢個蕃茄面包都幾好食,唔好以為用蕃茄做,個包包就會有啲酸酸感覺,係無呢啲感覺的。個包包一邊係脆身,另一邊就軟軟地。有蕃茄味,唔酸!西班牙火腿(Joselito),盛惠;HK$285。
啲火腿薄過紙,又收得唔平,唔係好扺食!呢個小食,食到最尾都重有剩,無人想爭嚟食。其實唔係唔好食,只不過唔係好啱我地口味吧了,可能一邊飲酒一邊食,會好味啲。炸魷魚(Baby Squid),盛惠: HK$65。
我個人覺得唔好食,但我個朋友就話好正!如果你係一個喜歡食啲炸到脆晒魷魚的話,呢個菜一定唔係好啱你食啦!芒果甜品(Mango Brick),盛惠: HK$65元。
呢個甜品,我就無試過,因為甜品我唔多好。我朋友就話好食啦,你地想知,就自己去試下啦!Classic Red(用紅酒混成的),盛惠: HK$430。
Vrigin Sangria ,一JAR價錢盛惠: HK$250,如果半JAR就盛惠: HK$190。
上面左面個款飲料係無用酒精混合而成的,而右面嗰款就用左紅酒混成的,無酒精成份嗰款飲料反而好飲好多,而且價錢又平過有酒精的。
呢啲飲料每一個ORDER可以叫一JAR或半JAR,但就係無一杯杯咁叫。

時日星期天,工人休息,家又無人煮飯,阿大女又係寄宿學校放假回家跟我們吃飯,咁難得的日子,緊係又要出外覓食啦,我地一行四人又出動去九龍城搵野食啦。

太太提議去小曼谷餐廳,到達餐廳之時,已有十多人在排隊,因阿大女吃完飯又要趕時間回寄宿學校,所以就問問服務員要等多久,服務員回我地,如果我們願意坐室外,就即時有台,其實當天晚上並不是太熟,就算室外沒冷氣我們审認為問題不大,加上我地又趕時間的,所以我地就一口答應了他,服務員也即時讓我們入座。

我們點了八款食物: 大蝦, 椰菜苗, 蒜容包, 柚子沙律, 燒雞, 黃咖哩海鮮併盤, 炒金邊粉及椰汁飯。 呢隻燒蝦由蝦頭至蝦尾差不多有12寸長,蝦身大約有6-7寸肉左右,我一個人食左呢隻蝦都有半飽啦。蝦肉都幾軟冧冧,唔會因以燒的做法而令蝦肉蒸干水而太乾。蝦肉都算新鮮,有彈牙的感覺,但味道就一般。椰菜苗,蒜容包及柚子沙律去的速度最快,食物上台不消半刻,就已被四大蝗虫把它們"代為烏有",椰菜苗有點過油,份量不算多但好吃;蒜容包,皮硬內軟,而且剛好有四塊,能夠形平均分配;柚子沙律,蝦球有四至五隻.蝦肉鮮美,加上一些泰國香料,及花生及柚生,一併食,不油不辣,味道感覺不錯。燒雞: 因為了品嘗多幾款食物,所以我們只點了半隻燒雞,雞肉嫩滑,雞皮香脆,燒得剛剛好,骨位亦沒有鮮血流出。黃咖哩海鮮併盤: 咖哩汁香而不辣,適合不吃辣人士及小朋友吃,蒜容包配咖哩汁,味覺的一大享受。海鮮包括:- 大蜆,青口,魷魚等等。炒金邊粉: 金邊粉炒得軟身可口,泰式炒法味道與中國粉米粉不一樣,別具一格。槨汁飯: 好甜好甜,我食左兩啖就唔想食啦,但我個大女就話好好味,都唔知佢係咪由火星嚟,飯質軟綿綿,好似我地中國人煮飯加多左水咁,把飯混入頂部之椰醬來吃,感覺怪怪,而味覺就覺得嗰飯太甜,也許有些喜歡吃甜的人會鐘意呢個菜式吧,我就受不了。泰式咖啡及奶茶,有咖啡及奶茶味,不會太甜,亦不會因太多奶而把咖啡味及奶茶味覆蓋左。

今天與朋友一家人共聚晚餐,一行7人,四大三小,我朋友一早就已經訂左一個房間,可能是怕星期六晚,多人出街吃晚飯,又時近中秋節,所以他很早就為了這一餐飯訂了房間。

以往,我間中都有來新羅寶餐廳的,不過因新羅寶位於尖沙咀美麗華商場,而星期五六的晚上,該區都特別多人多車,想找一個停車位,有如登天一樣困難,所以漸漸就減小來此餐廳吃飯。呢一餐真係可以算得上是"久別重逢"啦。

這天晚上,我負責當司機,因需要去找停車位,所以我較遲才可到達餐廳。我走進房間之時,已看到整個飯局已佈好了陣,準備當我到來時,就可以即時一起大吃一頓。這款菜式是我朋友ORDER的,我這次是第一次嘗試,我起初看到牛肉中間紅紅的,有點像生牛肉,看到都有點怕怕,但我朋友叫我先嚐一片,我才膽粗粗吃了一片。朋友教我吃之時,要把青椒,紅椒,蒜,蔥,放在肉中間,卷起才好吃,我嘗了一口之後,就忍不住,吃過不停了,這道菜式的牛肉看似生肉,但吃的時候又沒有血腥味,可能是用了一些韓式特制之手法醃制,醃制過的肉可能已把腥味覆蓋了,再配上其他配料一起吃,就可能把腥味覆蓋了,吃進口中既鮮味亦可口。這款牛肉麵我也是第一次品嚐的,湯底本身包含了不小菇類及菌類,麵條不粗不幼,牛肉紅紅的感覺非常新鮮,當湯第一次沸騰之時,服務員就先把麵條放入窩內煮一會,等待水再沸騰之時,服務員才把牛肉放在窩中,不消一刻牛肉就已經熟了,服務員把這窩牛肉麵分成七小碗給我們,另外,服務員也在煮麵前,奉上一個調味架給我們,調味架內包括了四款調味料: 生蒜,胡椒,辣粉及芝麻,我最喜歡芝麻,所以在服務員分湯之前,我已在碗內灑上大量的芝麻了,我覺得在吃麵之時如加入大量芝麻,可以令到吃的感覺更美妙。其實牛肉面之份量大約只可分成四碗,但我們每個人都想品嚐一下,所以每個人也只能分到一啲啲,不過雖然只能嚐到一點點,但亦因此不會因吃了麵而太飽而不能品嚐更多其他的食物。韓式牛肉麵其實也是一大美食,我連湯也全部喝光呢。這個菜我都忘記了他的名字,在我記憶中,就只有兩個字: "好味"。燒烤的食物,基本上都是被三位小朋友仔吃光了,而且牛肋骨及牛脷還叫了兩個ORDER添,小朋友就是喜歡吃燒烤食物,我基本上只是吃了一片牛肋骨,一片牛脷,味道跟以往相比,其實也沒有什麼大分別,既然之前我都嚐過新羅寶之燒烤,,今次就主力來試試一些非燒烤式的韓國菜吧了,該些燒肉就留比小朋友去吃吧。1.人參梨: 有一些枝狀的人參在最上層,而下層的則是雪梨切絲,這個菜式都幾特別,雪梨絲幾好食,至於人參絲(條),我就無嘜意見。
2.炒粉絲: 一向都是我的至愛,不過這個ORDER的份量我覺得有點小,不過這樣也好,所謂"小吃多滋味",吃多了反而會怕吃厭了。
3.海鮮薄餅: 可能有太多美食的選擇,而且我們也都開始飽了,薄餅我沒法吃,而他們也吃剩了一半。
4.石頭窩飯: 味道因為需要遷就小朋友,而放小了辣醬,不過,小辣的石頭窩飯也一樣美味。我朋友一向知道我喜歡品嚐不同的酒精飲料,所以這次他特別為我ORDER了這款韓國米酒,這款酒精飲料,看似奶料飲品,飲落口,酒精味不重,酒精度數大約只6度左右(即比一枝普通啤酒高兩三度不等),如果酒放久了不喝,就像有一些奶白色的東西在沉底,味道帶點甜,對於我喝慣啤油及烈酒的人來說,這款酒給我一種怪怪的感覺,所以我只喝了一點點就喝不下去,而我朋友卻極其喜歡,他還叫了第二瓶呢,口味呢家野真的是"因人而異"。

第一次接觸 Greyhound Cafe 是在泰國旅遊之時,當時與家人以自由行方式到泰國旅遊,因聞說這裡的檸檬茶的冰塊是以檸檬茶製成,而不是像其它餐廳以水製冰,此一法是為了防止冰溶解後,把檸檬茶之味道沖淡,所以才以檸檬荼製成冰塊。自從在泰國旅行之時,嘗過此檸檬茶之後,就已被這檸檬茶的特式深深吸引著。

自 Greyhounh Cafe 於海運大廈開張之後,我又再一次有機會再去品嘗如此特式的檸檬茶,但當天整頓晚飯的感覺都跟泰國那邊的 Greyhound Cafe 不一樣,食物的味道及感覺都大不如前,所以我只幫襯了一次,就再沒有回此餐廳用膳。此次,再來 Greyhound Cafe, 全因老婆大人話,在家的附近又再開多了一間Greyhound Cafe, 而她是十分喜歡這餐廳的,雖然自己有點不願意,但既然老婆大人喜歡,當然就要陪她去一趟啦。

我們點了雞翼,牛河,漢堡仔,牛粒,軟殼蟹,Lemon Tea Greyhound Style 及 Pink Cooler。將雞中翼切開再炸,其實就等於炸雞翼,不過呢個做法就聰明及方便得多,唔怕炸太短時間,骨位未熟就把雞肉炸乾,另外又方便客人進食,唔洗客人死咬囒咬啲骨位部份,有時中間啲雞肉都幾考人食。叻!!! 呢隻軟殼蟹,炸得非常香口,底部的醬汁要特別留意。蟹的底部有生菜及一些醬汁墊底,生菜非常新鮮,而啲醬汁的味道亦非常有特式。我食完整隻軟殼蟹之後,還用啲生菜點啲醬汁來吃,啲醬汁真係可以同隻蟹一齊比併下,食食下有啲感覺,唔知呢碟菜式到底係隻蟹係主角呀,定係啲醬汁啦,呢啲都可能係個人口味問題,不過如果你地有叫軟殼蟹,記得一定要用啲生菜點啲醬汁試試,唔好以為只是一啲普通的生菜及醬汁。呢個牛粒都好好味,有成12粒咁多,不過我老婆大人只吃了一粒,而我個小朋友仔,又只係掛住吃晒成碟雞翼,我一個就要吃晒餘下嗰11粒牛粒啦,呢個牛粒在頂部有一些特式的醬汁跟軟殼蟹是不一樣,而底部墊住的是一片青瓜,最好的食法,就係一叉叉落去,連青瓜都叉埋上嚟一口吃光,唔好將啲肉同青瓜分開吃,又唔好把啲醬汁潑走,不過,個口就要開大啲啦, 呢個湯米粉其實係最先上的,我初初都有啲怕,食左個粉,會飽晒,跟住嚟嗰啲野就無餵口食,原來又唔係,個粉份量唔算多,(可能我嗰日特別餓???!!!),呢個粉有4粒牛丸同幾粒牛肉粒,啲牛丸幾彈口,而啲牛粒又夠軟,個泰式湯底幾好味,而唯一要彈的,就係個湯唔係好夠熱,點講呢,其實唔係唔熱,係我喜歡吃粉麵之時,個湯底要再熱啲,咁就好好味啦。另外,跟呢個牛肉粉同時上台的是一個調味架,一共有四款調味料: 包括糖,魚露,辣粉及辣油,而我覺得最辣的,係黃色嗰隻辣油,你地咪睇佢黃色以為好溫馴呀,我試左小小,辣到我跳舞。去到呢一刻我都飽左八九成啦,原本重想試一試個漢堡包仔得唔得,但個肚真係無晒位啦,要老婆大人食晒啦,自己就唯有等下一次啦。唔,飲埋呢杯檸檬茶,整個午餐就劃上一個完美的結局啦,抱住個飽飽滯滯的肚離開餐廳。

呢次嚟係因為有個朋友要暫時離開香港一段日子,去外國參加啲唔知叫嘜鬼的"Working Hoilday",為左同佢送行,怕佢去外國沒啖好食,所以就請佢食翻一餐好小小的。

基本上,我都唔係常來,但我知有隻"黑松露意米豬"好好味,所以早幾日就ORDER左。呢隻豬大約有12件左右, 好重黑松露味,隻豬燒得幾好,皮又脆而且啲肉又唔乾,加上係個豬肚內將啲黑松露同意米釀入去,令到食嗰陣時更香口及美味。其實每一件豬個份量都幾大件下,所以如果要食呢隻豬,一係就一大班人去,一係就食完隻豬,就唔洗ORDER其他食物啦。呢個菜叫"黑松露鴛鴦雞",又係用黑松露做配料的,個菜未上台已經聞到陣陣黑松露香味了。鴛鴦雞係指"田雞"同"雞",我地有個朋友唔知係嘜東東,但佢手又最快即時夾左隻田雞腿,當我話比佢知係田雞之時,佢即刻飛掉左隻田雞腿,其實隻田雞無得罪佢呀,而且佢隻腿重好好食添做嘜咁大仇口要即時掉佢上台面呢? 呢個菜叫做"鴛鴦素千層"主要成份都係菜,聽聞係米之連得獎名菜,我覺得個素千層就普普通通啦,反而我鍾意食旁邊伴碟嗰啲菇仔。

以下呢兩個菜式係個餐廳經理特別介紹的,估唔到咁好吃,我都有點喜出望外。呢個炸蝦比我預期的好味,原以為在ORDER之時,個人認為只是一個普普通通的蝦球菜式,但食落啲蝦又幾彈牙,質感又唔錯,加上連埋塊"脆脆"一齊食,又真係配搭得幾美味。 而呢個菜式,本身一個 ORDER只有4件,係個好好人的經理,為了我"何包"著想,又令我地唔好"分贓不均",所以就幫我以人頭計數,整多兩件比我,真係要好好感謝個經理提議。呢個菜式如果只睇相,你地可能以為係"玉子豆腐",其實呢個係"蛋白"做,個蛋白好滑,無蛋黃成份,食落肚時感覺又可以健康啲,加上啲出奇好味的醬汁,真係又一道"人間美食"。最後一道時令蔬菜,我問個經理,有嘜菜而家係最合時,最新鮮,最好味的,佢就介紹我叫芥菜膽,我初初都同個經理講有啲人怕芥菜膽啲苦味,但佢話而家係最新鮮,而且佢地煮出嚟係無苦味的,我就嘗試信佢一次啦。出左嚟又真係無嘜苦味,我幾個朋友都話好吃,但唔知係咪始終受到人的心理影響,有位人姊,就話有啲苦澀味,我就真係一啲都唔覺。

食完以上六道菜,我地一行六個人,都已經食到飽飽滯滯,連甜品都唔想叫,吃唔落啦!

自從大叻無左之後,呢個鋪位就開左間大蝦干撈面,新餐廳個叻沙啲色,香都同舊時大叻差唔多,湯底都唔錯,幾好味,但係我覺得啲油面份量多左,米粉就小左,配對上無咁好食,而且啲油面質感唔係幾好,唔知係咪轉左用料,唔好食。個粉都成HK$72一個,未計加一。

餐牌上有三款叻沙
1.叻沙
2.海鮮叻沙
3.大蝦叻沙
問個伙計三款叻沙有咩分別,佢就話其實第一款"叻沙"係有鮮蝦的,而只係個餐牌印漏左,但我又覺得奇怪,咁大蝦同鮮蝦又有咩分別呢?不過嗰時都幾肚餓,而且我只係想食叻沙,有無蝦都無所謂,所以就無再追問啦!另外,叫左杯椰汁冰,嗰椰汁冰好杰,我以為飲緊奶昔,唔係幾好飲。