農曆新年紅假最後一天，第二日就開始番工，加上情人節迫近，所以同屋企人提早食情人節飯☺️。雖然餐廳二人餐做緊六折，但我留意到用訂座平台 Book枱嘅話，主餐牌有五折😍，啱哂我地可以揀自己想食嘅野。

晚上5點半到達，當時客人唔多，被安排望街景嘅座位，我地四個人坐圓枱有少少逼夾。
我地叫左三個主食加一個小食，半價後連原價加一$500都唔駛，非常抵!!😏

16oz肉眼(五成熟) $448



牛扒大概1吋厚，肉質非常軟淋，牛味唔重但濃肉味同炭燒香。簡單用鹽調左味，所以唔沾個醬已經好夠鹹。
忌廉薯蓉質地細滑，好有奶油香。

廚師推介嘅意式辣肉腸薄餅 $158


呢個PIZZA外貎令我諗起之前喺中環食果間Fiata Pizza🤗，個批邊同樣焗到焦黑、脹卜卜、夠乾身。食落當然完全唔一樣啦!! 😅不過呢個批用料充足，批邊微焦脆、焦香，食落唔油膩。

炸魚薯條配他他醬 $158



炸魚大件又厚身，食落無腥味；不過醃料較中式，花雕酒味幾濃😂
最中意餐廳用有皮嘅粗薯條，灑左少少紅色粉，我估係另一款名叫澳式雞鹽薯條味，可惜唔熱又唔脆，估計係等埋炸魚所以放耐左。

由於我地係薯怪，所以最後加多個黑松露薯條 $58

呢個薯條新鮮炸出嚟，熱辣辣!! 外脆內軟!! 😋黑松露都比得幾慷慨，每條都沾上松露，食落淡淡松露香，唔會太煤氣，幾好🤤。

其實之前已經食過觀塘分店嘅LUNCH，但我只記得坐露台窗位，對食物零印象。今次嚟黃埔分店，印象最深刻係個PIZZA，材料簡單，但配搭出最經典亦最好嘅味道🤤。

自從食完聯和墟雅士餐廳之後，就一直都想試埋喺北區同樣有歷史背景嘅上水畢打奧餐廳😃。雖然去上水唔遠，但又唔想特登去食個飯就走，所以遲遲未有實現😆。 點知最近去聯和墟食飯，比我見到畢打奧居然喺度開左分店，仲要喺正雅士對面，有少少打對台Feel!!😏 2月14號平日星期三，約埋爸爸一齊去鋸扒🤓 我地上午11點半到達，唔駛等位可以直入。下午1點門外已經好多人等位，再對比下對面雅士門外只有幾個人等位😆，估計過多幾個月就會見真章，到底大家係中意試新野抑或真心覺得畢打奧好味架啦。😏 當日午市有兩款原價$119嘅套餐做特價，分別係鐵板美式什扒$99、新西蘭西冷牛扒$99 另外叫左畢打奧焗豬扒飯$89同埋寓意橫財就手嘅燒德國豬手$129，每個套餐都包餐包、餐湯、同熱飲。 餐包拎上手暖暖地，望落有黑芝麻，但食落無芝麻香。 餐湯要左羅宋湯，同埋加左$29轉酥皮龍蝦湯，前者唔辣偏酸，每碗湯都有好多蔬菜； 後者酥皮酥脆但唔係我中意嘅牛油酥皮，龍蝦湯蝦味濃但有少少澀，內裡有幾隻蝦仁。 新西蘭西冷牛扒配薯蓉$99 份量望落唔多，但牛扒比雅士厚身；雖然有筋，不過整體肉質唔錯，牛味一般但有肉香。薯蓉好有薯香，食唔太出牛油或忌廉味，感覺油分唔多，較健康。 畢打奧焗豬扒飯$89 好傳統嘅焗飯，唔會加芝士。茄汁偏甜；飯粒望落似白飯底，但其實細心望會留意到有蛋絲，但真係無乜存在感；豬扒係吉列豬，如果怕熱氣嘅人要留意；豬扒係用新鮮豬，所以食落肉質偏實，亦比較鞋，但感覺健康D。 燒德國豬手$129+$9配薯條 豬手炸到好脆，食落膠質好重、好黏口，可惜肉質太軟淋，有少少湯渣Feel。 鐵板美式什扒$99+$9配薯條 什扒有豬牛雞、腸仔同煙肉；最好食係雞扒，夠濕潤；牛扒好薄、豬扒實正。由於職員比錯左薯蓉，所以後來補番個炸薯條比我地。 整體環境唔錯，不過職員比較生手，當日有跌碟嘅情況出現，亦上錯薯蓉；特價套餐幾抵食，四個餐連加一共$541，可用信用卡付款。

唔少餐廳因為農曆新年而休息，就連自己一直都想試嘅陳公館都唔例外😣，所以沿路搵其他甜品店，最後嚟到呢間農曆年期收加一嘅糖水舖。 桂花綠豆仙草配芋薯雙圓$49 普通仙草都會配紅豆，但小店就配綠豆，兩款屬性都偏涼，一定好下火😂不過，其實唔駛擔心會涼過頭，因為仙草好細舊😐食落幾滑，但偏甜。 綠豆沙加入海帶絲同埋我最愛嘅臭草。芋圓三色口感煙韌，但食唔出芋/地瓜味。黑芝麻湯圓有三小粒，芝麻味濃，甜度可接受。另外仲有舊芋頭同雞蛋黃，用料豐富。 熱喳咋$22 由於屋企人唔中意椰奶，所以揀左加花奶。喳咋質地杰身，但唔係因為豆爆開嘅沙沙口感，而係店家加左西米，西米嘅澱粉令喳咋變杰，食落似埋左芡，我地麻麻地呢個質地😶。 楊枝甘露$35 小店用上大西粒，食落幾有口味，整體味道正常，但由於最近喺粉嶺聯和墟食左一碗幾高質嘅楊枝甘露，比較之下呢個有少少遜色。 牛奶桃膠椰皇燉奶$49 齋睇個名都覺得好滋補😏燉奶啱啱熟，好滑溜，奶味唔算好濃，甜度適中，我見好幾位食客都點佢。

每年年三十都會喺屋企食飯，今年嚟個不一樣嘅團年飯，決定去荃灣打邊爐，之後去埋附近個年宵。 由於我睇開嘅一位youtuber介紹呢間做開泰菜嘅餐廳，而家攪火鍋放題，見佢段片D食物質素唔錯😋，所以打電話BOOK左19:45。 星期五當晚全場爆滿，本以為BOOK左枱嘅我地，去到先發現，原來接聽電話果位職員無Mark低資料，即係無BOOK到枱😨 不過，有一位應該係經理嘅職員Nandom熱心幫忙，我地只係等左個零字就有枱，美中不足係要分兩枱坐😂 我地揀左最高等級嘅澳洲M7放題$298成人90分鐘，呢個套餐包一次性嘅海鮮桶，內有龍蝦尾、扇貝、熟蝦、青口、𠝹花魷魚、薯仔、粟米，但唔係按人頭量，因為我地兩枱嘅份量唔一樣之餘，有一枱更無龍蝦尾😂 海鮮係急凍貨，食落無鮮味，全靠個幾好味嘅泰式醬汁。 鴛鴦湯底唔駛加錢，我地揀左冬陰功拼椰汁雞，前者唔辣少少酸，後者椰味偏淡。 Nandom喺入座前已經問我地第一輪豬牛雞有無咩唔食，我地當然只要牛啦!!😏 所以圖中全部都係牛。我地一致認為M7牛胸腹肉質最好，煮到啱啱熟果陣肉質最嫩滑。帶點少油花嘅牛板鍵雖然明顯鞋少少，不過較有肉味。 另外我亦推介佢地嘅蝦滑同墨滑，用料幾足😋。至於餃子同丸我就無食到。 小食方面，QR可以落到豬雞串燒、豬頸肉、豬手、魚餅。我最中意嘅係串燒🤤，豬雞都好味，唔鞋唔乾又夠味。 自助區除左有醬料同蔬菜外，仲有少量椰汁糕、兩款小蛋糕、炸薯角、蝦餅、春卷、雞翼、酸辣鳳爪、泰式炒粉絲、木瓜沙律。 炸物有少少炸過龍，食落好乾好𠝹口；煙韌椰汁糕有班蘭同奶茶味，前者班蘭味濃唔算太甜，後者奶茶好香但甜左少少。 飲品方面可以QR點泰式特飲，經典嘅龍眼冰、梳打、奶茶都係免費，不過無得揀甜度，所以一律偏甜。 整體而言，如果同我最愛嘅牛大人比，呢度食物種類較少(無蝦無蜆)、湯底亦較遜色、M7牛胸腹亦不及牛大人嘅牛好味。不過，呢度嘅服務真係好好，特別係職員Nandom快速解決座位問題外，中途亦非常照顧我地兩枱，埋單果陣更主動比左9折我地作補償，令我地倍感興奮。

星期五晚同屋企人食完飯，興起想食埋糖水先番屋企😏。即刻上Openrice望下聯和墟有咩糖水舖，最終揀左呢間喺我腦海無記錄嘅小店，應該係新開嘅舖頭?!🤔 餐廳好光猛，所以喺街頭已經留意到佢，亦見到門外有好多人😮 晚上8點半到達，原來門外嘅人等緊外賣，我地唔駛等位可以直入。 雖然已經食過正餐，但見到隔離枱好滋味咁食緊小食拼盤😂，我地又忍唔住叫左個$40，另外叫多個炸薯條$25 兩款食物都新鮮炸出嚟，我自己特別中意拼盤裡面重香茅味嘅魚餅、仲有炸到外皮脆卜卜嘅司華力腸😋；至於薯條就麻麻地，好似炸得唔夠時間，外觀偏白，亦唔脆。 芋圓仙草紫米露$34 呢碗糖水質地幾啱我口味，紫米露夠杰身，食落好足料；芋圓只有橙色，食落幾有雞蛋黃蕃薯味。 豆腐花$20 揀左落黃糖，豆花幾滑，食落幾有豆香，不過個人覺得同百福果D唔會差太遠。 楊枝甘露$38 暫時係我喺香港近期食過最有料、最有誠意嘅楊枝甘露!! 🤤清甜嘅芒果大概有半個、配上大粒西米、未溶嘅芒果蓉沙冰，足料!!好味!!😋 紅豆粒仙草$30 紅豆比較細粒，睇得出唔係日本紅豆；另外食得出係自己煲，唔係罐頭紅豆；雖然偏甜，但配埋無乜糖嘅仙草，整體甜度可以接受。仙草幾滑，但味道不及我心目中第一嘅鮮芋仙嘅仙草😅。 埋單$187，小店好似只收現金。門外長期有一堆人等外賣，生意似乎都唔錯。如果我屋企附近有間咁好質素嘅糖水舖就正。

難得星期一放假，適蓬有個寒風襲港，最啱打邊爐烚下烚下~~🤓 旺角火鍋放題真係好多選擇，由於唔想食D已經食過嘅餐廳，所以挑選之後，BOOK左呢間位於兆萬嘅壹火鍋。我地食最早時段$189/位，可以食2.5小時。 餐廳玩法係客人可以揀1雞煲之後加清湯、2免費鴛鴦中式普通湯底、3一款特式湯底、4加$50百里香牛骨鍋/麻辣牛骨鍋(呢個連埋精選靚牛任食)；除左火鍋外，仲可以加$50任食刺身，又可以加$50食一次性海鮮拼盤，豐儉由人。而我同男朋友都唔餓，所以乜都無加，湯底就揀左沙嗲拼冬陰功。 沙嗲湯底少少甜、有花生香，但整體偏淡；冬陰功偏酸，但越食越辣。 餐廳提供嘅醬料除左一D常見款外，仲有XO醬、桂林辣醬、皇后同皇帝醬😮 入座後職員送上精選和牛拼盤，如果覺得啱食，客人可以加$50/位任點，不過我地覺得無呢個需要，所以無加。 呢個和牛拼盤最好味係極上牛板腱，肉質柔軟，有牛香!!😋 手切封門柳肉質較實，帶點牛內臟味；至於我自己最期待嘅SRF同安格斯牛小排表現就令人失望😥，前者肉質唔夠嫩滑，後者切到一條條、碎濕濕。 部分火鍋配料可以自取，部分就要用QR落單。 我個人推介甚少見嘅豬肝，煮完依然帶點爽🤤；洗得乾淨嘅長爽脆鵝腸🤤；唔會好肥嘅基本牛板腱🤤，我叫左兩輪，雖然帶點瘀紅色，不過以$189呢個價我收貨； 牛展濃牛內臟味；薄牛舌嫩滑爽脆。 是日海鮮係幾大隻下嘅蜆，不過限量供應，我點左4次，但只嚟左2次，共14隻😂。 基圍蝦雖然細隻，但肉幾甜。 蝦滑同墨魚滑都唔錯，前者食到有好多蝦仁； 飲品無而家大熱嘅自家製冷泡茶，不過有啤酒提供，凍櫃、暖櫃同常溫三個溫度供選擇；甜品選擇唔多雪糕係本地品牌COCOBERRY、韓式雪條、仲有雪米糍。 整體用餐體驗唔差，食物種類、質素同價錢成正比，無野可以投訴😏。

之前一直都好中意去太和一間泰式小店，全因佢價錢吸引，食物選擇多，而且份量大，套餐包主菜、3款前菜、冬陰功湯、2款小食、餐飲都唔過一百，可惜一年前執左😫估唔到喺粉嶺開左一間同佢類似嘅餐廳😯。星期日下午一點左右到達，好好彩唔駛等位就入得，無耐就見到門口有人等位。 海南雞飯拼冬陰功魚蛋河$105 細食嘅兩個人點呢個餐就啱啱好!!🤓黃飯份量好多，而且好有雞湯味，飯粒唔會好濕，長條型嘅米飯好好味!! 🤤 海南雞好滑有啫喱又無腥味，而且去哂骨，啱哂唔中意啃骨頭嘅我😋 至於個湯粉就正正常常，魚蛋偏軟，唔係我中意嘅潮州彈牙魚蛋；河粉較幼身而且好滑，但淋得制，一夾就斷；個湯底同跟餐個冬陰功湯一樣，有椰香味偏酸唔會好辣。 汁燒安格斯牛小排飯$105 濃牛味嘅牛小排大概有6塊，肉質又唔會好鞋，好好味!!😋 另外有一隻溫泉蛋，蛋香一般；略嫌醬汁唔夠，個飯底無汁香。 每個定食都跟一個湯、兩款小食同熱飲，小食揀左南瓜脆薯餅、炸蝦餅、炸雞軟骨、泰式魚餅。 南瓜餅外脆內粉無得輸、蝦餅好扁無咬口、雞軟骨新鮮炸出、魚餅偏硬重香料味。 小店無加一，兩個定食加$6一杯凍飲共$216，值得注意餐廳只收現金。

難得一堆朋友可以約齊腳，喺大家無意見嘅情況下，我就BOOK左呢間自己收藏已久嘅餐廳😆。星期五晚上7時嚟到，全場爆滿!! 😯記得一定要openrice BOOK枱，除左可以確保有座位之外，仲會有85%😏。 首先試潮州菜館必點嘅滷水拼盤、炸蠔餅 滷水拼盤有鵝件、肥瘦勻稱嘅腩肉、偏鹹嘅豆腐、唔知係鵝定鴨掌、鹹左D嘅豬大腸、同埋半隻無滷水味嘅烚蛋。個人覺得係腩肉比較好，其他就一般。 全餐我自己最中意係個蠔餅!! 🤤夠乾身、好脆、蠔大隻又飽滿😍、整體唔會好粉，輕輕灑上椒鹽，唔點魚露都好夠味。 其他非潮州小菜嘅有串燒拼盤、炸牛肋骨、豉椒花甲炒米粉、上湯豆苗、魷魚豉油皇炒麵 串燒拼盤印象三百幾蚊，蒜蓉扇貝大大隻好厚肉!! 🤤大蝦肉質彈牙!! 燒鱔厚肉有醬香，不過有細魚骨。 另外豬、牛、雞各兩串，雞同牛偏乾，豬因為有肥膏，所以食落口感最好。 炸牛肋條係餐廳推介人氣菜式之一，印象都係三百幾。 老實講啱啱上枱果陣望落唔多，但食落由於油膩感幾重，所以最後食唔哂😂 呢個一定要趁熱食，肉質會淋D、肥膏亦軟滑D。沾埋佢個酸酸地嘅汁食會更開胃、解膩。 豉椒花甲炒米粉，花甲飽滿，個豉椒汁調得好好，鹹甜適中。米粉煎到脆脆地，經典茶餐廳口味。 上湯豆苗，加入唔係人人都能接受嘅唐芹，輕微蓋過豆苗嘅香味。 魷魚豉油皇炒麵無影到相，份量幾多，不過無乜鑊氣；魷魚係急凍貨，無鮮味，個人覺得可以唔駛試。 埋單連飲品、酒精、加一，折後共$1380，人均$230。我覺得比較適合多人嚟食，因為食物單價唔平，多D人食除番開會抵D🙈。當晚我地六個坐卡位剛剛好自成一角。餐廳無限時，最終我地坐到人地收工先走😆

星期六晚上8點零嚟到，當時已經全場爆滿😮，好彩我地都唔係等左好耐就可以入座。小店傳統打冷格局，座位唔多，而且比較迫夾。 由於大食嘅我已經好飽😂，食唔落野，所以我地三個人只點左三樣野。 首先係潮州菜館必食嘅滷水鵝片$138 上枱果陣溫度適中，唔會放到凍哂。鵝片肉質比較鞋，不過連皮食真係幾有油香，點少少白醋汁更有升華效果。墊底嘅豆腐就太鹹。 酥炸蠔餅$98 其實我想食潮州煎蠔餅多D，因為前一晚已經食過炸蠔餅，但屋企人想食脆身版，所以揀左酥炸款。 蠔餅幾大份，大概有三大塊，蠔仔份量唔算多，但勝在唔會太細粒，亦無腥臭味。面頭灑左椒鹽粉，基本上唔點魚露都夠味。 不過我自己就中意前一晚喺尖沙咀食果間蠔餅多D🙈，口感偏乾脆，亦無咁油，同埋蠔仔係呢度嘅1.5倍SIZE。 蠔仔肉碎粥$58/碗 落柯打之前問職員一碗有幾多，佢話大概分到兩個碗仔左右。正合我地心意，因為我唔會食🤓 點知實際原來可以分到六碗仔😯我地懷疑職員有心報細數，想我地三個人叫一鍋🙈 個粥食落幾有方魚、芫茜香；蠔仔大概十粒內；比起廣東煲到綿嘅粥，我個人偏好呢款食到飯粒嘅粥。 最後仲叫左罐可樂$12，埋單$306。

難得平日星期三放假，約朋友去尖沙咀間Red Mr.唱LUNCH K，順路仲可以去呢間我收藏左一段時間嘅快餐小店🤤。經某APP訂枱下午4點有50%，身為慳妹嘅我又點會錯過呢個優惠?!😏 當時店內無客，言下之意即係食物全部都係即點即整🤓。等左兩個字，職員就送上兩個餐。 小店名叫Crusta，我地就當然要點個Crusta啦!! 套餐原價$59 配有一隻雞翼、薯仔餅、沙律、汽水 Crusta揀左牛肉味，外層食落似壓扁左再拎去焗嘅麵包，少少硬身，但又未去到餅乾咁硬，完全唔油膩。 面頭吱左層薯蓉，不過內餡蕃茄牛肉醬太濃味，所以食唔到薯仔味🤔。由於肉醬份量好多，所以食落偏鹹。 薯仔餅就係日式炸野菜，濃洋蔥味，但炸得較乾，比較界口。 沙律味道有D似KFC個椰菜沙律。 另外點左個Pizza套餐 $74 配有一隻雞翼、蕃薯條、甜醋沙律、汽水 Pizza都係揀左牛肉味，食落有D似不倒翁個牛肉Pizza，批底好似餅乾咁脆，非常好味!!🤤 個蕃薯條口感差D，唔知係未炸透定係蕃薯品質唔好🤔，食落唔粉又唔綿，但有「雞蛋黃蕃薯」(一款蕃薯嘅名)味。 甜醋沙律唔好撈太多汁會好D，因為個汁幾鹹下。 老實講，如果以原價嘅話，我未必會嚟食😅；但而家折後人均$33，食到咁多款食物，我同友人都覺得好正!!🙈