首先想講本人食野唔奄尖, 但親臨呢家月瀧天, 真係無辦法唔可以出庭作證參佢一本!

網上團購知道呢間野標榜有泰式生蝦刺生任食, 團購價$118, 但加一服務費$3x, 0630pm-0900pm再加$30, 計返數同Walk in $178 加一差不多, 難得共享天倫, 就一家人試下walk in 價.

我0700pm準時去到, 8成滿座, 不過即刻有位,  但竟然帶左我去半露天既地方, 冷氣唔足夠訂位時從來無問過我, 唔緊要, 一家人食飯要開心!

佢話限時兩個鐘, 咁梗係一坐低就剔野食啦, 相信食開放題既朋友仔第一樣野梗係會點刺身, 我地都一樣, 當然亦好期待佢既泰式生蝦刺身.

0700pm落order, 只係每五分鐘黎少少熱盤如燒物. 可能客人愈來愈多, 而樓面根本應付唔黎...咁又何必仲搞團購...? 試左燒多春魚, 雞翼, 雞軟骨, 肉丸, 菠蘿, 水準一般. 但依然未見刺身蹤影... 等到0720pm終於黎刺身, 我地六個人, 但份量我諗係通常放題既一半. 而且叫左北寄貝同泰式生蝦無到. 唔緊要, 一家人食飯要開心! 見到甜蝦連頭, 不過size都係細細隻, 最令人驚喜既係細細隻既甜蝦竟然隻隻連殼!!!!! 如果係大大隻, 我唔介意有殼自己剝殼, 我真係第一次食放題要自己剝殼, 又係細細隻既甜蝦. 唔緊要, 一家人食飯要開心!等到0745pm. 所謂既泰式生蝦刺身仲未黎, 仲有泰式鳳爪, 炸魷魚鬚, 冬蔭功湯, 泰式豬勁肉全部由坐低開始落order. 咁唯有好聲好氣同個staff講啦, 之後隔左陣黎左第二轉刺身, 果然有泰式生蝦, 但如果你唔點佢既醬汁, 你根本唔會知道自己食緊既原來係泰式生蝦!!! 呢點我地都有d失望...唔緊要, 一家人食飯要開心!
當再次追單後上述既野就慢慢黎到, 一睇個冬蔭功湯, 唔知以為係面豉湯, 我好肯定係滾水加冬蔭功粉而炸魷魚鬚就連食野鐘意有嚼頭既爸爸都話好硬...有個staff金毛仔, 每當客人交點菜紙俾佢, 佢會keep起大概10分鐘, 之後儲埋一疊再逐張望, 而唔會直接交去廚房或者入機... 呢個做法真係好有趣, 唔怪得45分鐘先黎得兩轉刺身...大家有無試過食放題台面係一樣送都無...漏單, 上菜慢既嚴重情度去到邊

途中本身跌左隻筷子, 舉左手好耐都無人理, 我見佢地忙, 就主動起身面對面問個staff請問筷子係邊度拎到, 唔知係咪佢時運高, 面對面都睇我唔道, 好似地鐵低頭族, 轉身行開左, 我唯有拍拍佢: 請問筷子係邊度拎, 佢一隻手指去遠處個櫃度, 繼續轉身走, 呢下我真係引爆左

本身想開開心心食既一餐, 竟然變成咁, 其實食物好唔好食可以話係次點, 一間餐廳有無心做好, 有無用心對客人先係最重要

已經係近排第二次黎啦...上一次我只係戴住3成肚餓黎小肥羊，所以唔係食左好多野，感覺好似好唔抵，依次不單有Coupon$100，仲戴住7成肚餓既戰意黎開飯，一於補償返上次既損失!!!　$148位，加一!

先要真係彈一彈 !!! 我上午已經BOOK左位八點，都無遲到，入到見到全部兩個人既都係坐四人台，反而我BOOK左位既就俾張兩人台我??? 仲要人地全部電池爐，我用GAS爐? 係咪傻左呀，咁我不如直接walk in 啦，BOOK位既用意係咩呀?

雖然係有d唔高興，但無阻我戰意，我見還掂有Coupon，就每位加$30蚊食d豪野，例如有珊瑚蚌，極品羊，青口，蝦，羔羊立卷肉，膳片....等，不過無元貝(賣哂><) 我堅持我原則，狂食d唔太飽又貴價d既野，好似珊瑚蚌，而個羔羊立卷肉亦好好食，完全唔似樣，切得又薄，最後叫左四碟!!!

其他既蝦滑，黑椒小羊柳，肥牛，脆肉鯇都幾好味，不過始終係清湯底，所以味就略微唔夠濃.但到最後個湯底就變到好正!!!

埋單本身$425, 減左$100 Coupon就平均$160, 算OK啦~

成日都會去西灣河, 亦成日會離遠望到依間 "爐爸打", 覺得個名幾得意, 亦知道佢係食D串燒日本野, 但可能因為個鋪位係後街, 始終多年黎都未吸引到我光顧. 直至今日真係諗唔到食咩, 就一於衝入去試試啦!

間鋪確實幾細, 我地兩個人坐正個電視位, 可能無咩客, 感覺都OK. 一入就俾牆上既紙火鍋吸引, 我地兩個要左一個豬骨湯底雞肉紙火鍋, d湯奶白色係一張紙上面, 又幾過癮, 而且個湯底亦唔錯. 但野食就一般, 普通打邊爐配料冬菇, 獅子狗, 芋絲...主角既雞肉亦廖廖可數. 而且份量亦異常小...好彩佢送個烏冬, 加上女友好細食, 如果唔係我一個人都未必夠食啦...

至於串燒就都幾多選擇, 個人比較鐘意明太子雞翼同牛脷, 價錢尚算合理啦, 仲有燒蠔, 雞腎......等.

P.S.食到最後先見到係牆角貼左廣島蠔紙火鍋, 可能一入黎的時候眼大睇過龍啦...唉, 算啦. 尚算OK既一餐, 我諗都會有下次!

見到笑臉既比例都算多，就一於搏一搏，點知HIGH左野. 已經好穩陣早四日BOOK位，電話度講定有人生日，接線生話有蛋糕送，用VISA埋單7折。咁再問佢有無生蠔，我清楚記得佢話有！
因為塞車所以差不多7點9先到，可以食到9點半，已經九乘坐滿。檯與檯之間唔算太多空間。先慢行一轉去海鮮區，只係得幾條幼幼蟹腳，一堆細細隻青口同一堆細細隻既螺....搵黎搵去，都唔見有生蠔，就問下個Waiter，佢話係無生蠔，我同佢講話之前電話問過係有，但佢就話生蠔已經無左好耐，咁經我分析只有兩個可能性: 1) 個接線生講大話 2) 生蠔於我打電話BOOK位個日仲有，但隔左幾日就無，所以 ' 幾日 = 無左好耐 '
講反其他食物，刺身得三款：八爪魚，吞拿，仲有一隻應該係鯛魚，竟然連三文魚都無.....而只有鯛魚叫OK
熟食方面，炒飯，鴨胸，羊肉，雞扒...都真係比較普通
最感興趣既長腳蟹等左好耐都無Refill,我就問Waiter ' 其實會唔會有Refill? 因為我較遲黎食唔到 ' 佢就話問下廚房，之後真係隔左三分鍾拎左一堆好長既出黎，大概有十二隻。我前面有個女人箭步上前，一起手已經唔見左一半。我驚連依個亮點都無埋，唯有伸埋隻擒拿手一齊夾，最後都血拚到三大隻，而跟住我個男人都有三隻...估唔到一次Refill只係夠三個人.....之後就再無Refill過，而我亦唔好意思再同Waiter要求啦!
而唔好甜品既我亦從女友口中得知非常一般，而雪糕就有牛奶公司杯裝任食。
最值得一讚既就只有我到場後同佢講蛋糕9點3先上，真係準時拎出黎。
總括黎講，食物真係好一般(所以影得一張相)，雖然二百幾蚊位唔算貴，但依個價錢絕對有好多其他選擇!

其實知道依間神廚館既存在好耐，今日剛要過大角咀做野一所以就試一試有個招牌飯有幾正，點解會有咁多笑面!

餐廳一眼見哂，得幾張台，店外都好似有一張方面食煙d人，一入黎當然叫左個招牌煎蛋海苔窩燒墨魚餅飯.

塊墨魚餅上面鋪左d紫菜，賣相幾靚仔，但一咬落去，根本就完全食唔出係墨魚餅，而且好薄，大家樂早餐塊牛扒都厚過佢...同埋個飯一d汁都無，食食下真係乾到入唔到口...咁大食既我竟然都食唔哂...

經過依次後，明白到未必多笑面既就一定好，始終都要試過先知.

之前聽朋友講尖沙咀個間都幾好食，依家灣仔都開左間，唔使過海，加上生日就快到，就兩個人食餐飯當慶祝下啦^^　2030pm 上到去唔算太多人，Book位時已經講明無三文魚,可能因為冰島火山事件啦，佢話會有八折平啲（但無左三文魚真係差好遠，算啦，照食)　
　好彩都無令我失望，至愛刺身既我最鐘意非赤貝莫屬。比其他食過既放題都大片同厚，而且都好新鮮，唔會有雪味。而且螺片亦好好食，但甜蝦就比較細隻左d
熟食方面例如燒物都唔錯，好似芝士燒蠔同墨魚仔都好食，但相對款式就好似少左d ，但整體黎講都唔錯。

對此店之認識嚟自三色台既某個飲食節目, 見到該節目介紹此店之德國鹹豬手非常吸引, 所以就上網搵下資料, 見到食評唔錯, 就決定出發
此店位置無疑絕好, 特別係OUTDOOR位, 遠眺海景, 而INDOOR就有駐場歌手唱歌, 亦無咁大風, 各有長短. 由於兩個人, 又想食多D款式(但一定要食鹹豬手), 所以惟有叫左個二人套餐.
頭盤 - 農夫包 & 希臘沙律配乾火腿片: 無咩特別, 但茶個包既醬就唔錯
湯 - 蘭度豆湯 : 好重豆味, 叫做OK
Main Course - 燴牛肉粒:牛肉粒夠淋, 好重椰汁味, OK
燒豬肘: 鹹豬手果然唔錯, 外皮燒到卜卜脆, 但稍為D肉就唔夠鹹同差咁D味
鮮蝦闊條麵:唯獨係D蝦夠大隻同夠爽, 醬汁同麵都一般
甜品: 都幾精緻, 唔錯
其實除左鹹豬手, 其他野食整體都係不過不失, 但環境就加好多分, 唯一遺憾就係無食到德國腸

女友住西灣河，咁耐都唔知有依間野，直至睇食評見到先有留意，雖然位於大街，但位置唔太起眼.

鋪入面唔算大，我地就坐最近門口位(絕對唔建議，因為多人出入，對門又關得好慢，十分滋擾)

一點就點左個招牌菜 "玫瑰花煙燻雞" (半隻$78)，連不嬲唔太好雞既我都食左好多件，食落有陣陣既香味，好特別.

金銀蛋浸娃娃菜($52) ，明明叫娃娃菜，但俾左白菜我地...同普通老茶無分別

叫小菜佢寫住加$15蚊跟飯同例湯. 我就話加一個. 佢黎就黎左兩個飯同兩個湯，我同個阿姐(老D個位)講要左一個咋，佢話送既，點知後尾睇張單計左$30蚊，個阿姐好唔老實!!

一大班同事去食晚飯, 地方比想像中少人, 問個侍應碗仔翅($33) 同煲仔翅($58)有咩分別, 佢就話其實一樣, 只不過煲仔翅等於碗仔翅一開二, 計落梗係煲仔翅抵D, 咁我地八個人, 就叫左四個翅同埋6,7個小菜

個煲仔翅我地兩個人分一煲, 真係有兩個碗既份量, 而且起碼我食同有螺同翅, 不過可能我食得咸, 有個同事話個翅好咸~

叫左好多個小棻 最正既一定係煎銀雪魚, 煎到成條魚金黃色, 食落口好鬆化, 正. 之後再叫埋蒸銀雪魚試下, 上面落左好多生蒜, 都唔錯!!!

茄汁豬扒, 咸魚蒸肉餅, 蒸排骨 - 同茶記無分別

蒸三寶 - 有魚乾, 蝦干同臘腸, 但食落都係好普通, 而且唔知係咪物價高漲, 得三塊仔臘腸

總括黎講, 以咁既價錢食到咁既翅係物有所值

依間金東大唔同時間黎有唔同景象.

午市好鬼多人...迫餐慒

晚市都係好鬼多人

只係宵夜, 就可以真係同朋友坐低飲茶吹下水. 佢間隔好得意, 有兩邊, 一邊就有幾張大圓台, 如果一大班人就OK. 另一邊就一條窄d既巷, 就攞多幾張台. 環境就真係麻麻

野食方面都幾多, 點心, 腸粉, 粥粉面飯, 小菜都有, 有時踢完波叫碗排骨飯加籠點心醫肚, 都係廿蚊左右, 抵!