第一次試呢間，因為比較少茶飲店係做花果草本茶。試咗佢嘅皇牌氣血茶，$38，加$20可以整多件餅，如果2個人分享件蛋糕就好抵。 配料有桂圓、紅棗、千日紅、康仙花、冰糖、金盞菊、玫瑰、黑枸杞，飲品嘅顏色深紅到接近黑色，眼見都有好多材料。我叫嘅係熱+微糖，總覺得呢啲茶飲要熱先有效。茶嘅味道唔錯，微糖甜度剛剛好(其實無糖都應該飲到)，問題係如果唔用飲管直接用杯蓋口飲，啲茶就會滴到全身都係，呢方面要留意。

店方聲稱呢杯茶有補血補氣、調經止痛嘅功效，不過係咪飲一杯就可以有效果就不得而知...

店內大約有20個座位，限聚令關係算係坐滿。付款後唔洗30秒杯飲品已經準備好。店員話等5分鐘會更好飲，於是我就逛咗佢牆邊嘅即沖茶飲套裝，約$12包，唔算特別平，但抵飲過喺店度買好多。佢另外仲有婚嫁回禮用嘅包裝，反而呢個就值得推廣吓。

想試宗像屋好耐，趁去黃金買嘢嗰陣順便行過去，餐廳距離嘉頓只有幾步路，睇完電腦去就最方便。星期六7:15PM去到，前面約有9人左右。門口有餐牌，可以諗定想食咩。等到7:45左右，侍應走出嚟請隊尾嘅客人同之後嚟嘅人講餐廳已經截咗單，所以雖然佢寫9PM last order，但最好都係早啲去。呢度只有4款丼飯揀，刺身山係一樣嘅。不同之處係: 最平嘅"梅": 有9種魚貝類刺身，包括吞拿魚、吞拿魚蓉、北寄貝、希靈魚、帶子、三文魚子、烏賊、油甘魚、鱲魚
"梅"加$40嘅"竹": 魚生份量增加
"竹"加$50嘅"松": 加蟹肉
"松"加$100嘅"特上": 加蟹肉同海膽 (份量都幾多)
我今次叫咗"竹"，因為對蟹肉碎嘅興趣不大 我地坐普通枱，但張枱有啲癡笠笠，唔知係抹得唔乾淨定係佢用咗有蘆薈嘅消毒液嚟抹。
吧枱嗰邊有兩盤赤貝同海膽，餐牌上面冇, 侍應亦唔會特別提起，想食要主動叫。睇其他食評，似乎呢兩樣嘅質素都唔錯。 等食期間最啱就係熟讀點樣一丼三食: 丼、手卷、茶漬湯飯。(其實仲有前菜嘅胡麻汁刺身，所以應該算四食)前菜：油甘魚刺身兩片，幾好食—記住只食其中一片，另一片要留返嚟整最後嘅湯飯（貼士：將淨返嗰片刺身完全沾滿胡麻汁，好似醃住佢咁，轉頭講點解）。香港人對胡麻汁點刺身可能唔係好熟識，其實日本人食刺身茶漬飯嗰陣會將魚沾上胡麻汁先再放茶/湯，甚至加wasabi。 刺身丼 - "竹"：好壯觀！食嘅時候先落豉油（餐廳建議你將豉油從山頂淋落去，但咁樣中間嘅刺身會吸唔到豉油，豉油直接經外圍流去啲飯度。我建議可以用湯匙或者蔥絲逐啲加豉油，就會比較均勻），然後刺身同飯一齊食。

刺身山除咗有魚貝刺身，其實仲有蔥、青瓜碎同橙皮碎。如果你唔食任何一樣食材，可以請師傅唔好落呢幾樣嘢。我自己就覺得個橙皮味幾特別，清新得嚟唔會有橙皮嘅苦澀味。刺身幾新鮮，北寄貝唔會好碎令口感更豐寕，但整體鮮味唔算太突出。不過刺身量真係好多，去到最後因為要淨返啲白飯嚟整湯飯，所以變咗淨食刺身另外，個飯熱到出煙，同我期望嘅中嘅凍壽司飯有少少落差。
侍應上個飯之前會俾兩片紫菜你，食飯食到咁上下就可以攞嚟包手卷（我唔記得影相...）。紫菜脆啲嘅話會好食啲（個飯$148咋仲想點!），如果叫咗有海膽嘅"特上"，相信會好正！湯飯最後食係有原因嘅。你要自己將竹筒嘅飯放落先前裝紫菜個碗，同埋將前菜片油甘魚放落去，侍應就會幫你加湯、芝麻、蔥花。加完湯後，最好盡快將片油甘魚拎起（咪掛住影相），咁先品嚐到佢半生熟/剛剛熟嘅味道。我一咬落去片魚度簡直驚為天人，因為有胡麻汁一直醃住嘅關係，魚嘅鮮味完完全全被醬汁提升，非常美味。個魚湯好好飲，亦都有暖胃作用。
食完哂所有嘢再飲茶，先發覺原來佢嘅茶都幾香。全晚兩個人食兩份"竹"，埋單$296，我地俾咗$300現金，但侍應冇打算找俾我地...見係$4就算啦。整體而言，味道唔錯而多元化，視覺大滿足再加埋自己落手嘅體驗，性價比算幾高，唔怪得成日咁多人排隊!

因為有朋友極力推薦呢間拉麵，所以落雨天都拉咗男朋友去試。
麺処一家由一位從事洋酒生意嘅香港人開。當年佢去日本尋找好食嘅拉麵，幾經辛苦搵到佢最滿意嘅拉麵店。佢邀請師傳來港開分店，師傅反建議佢學識拉麵然後自己開店。結果呢位香港人花咗幾個月時間來回日本好多次，最終喺香港自己開店做廚。

拉麵只有3款：妹妹、弟弟、料理長，全部係濃厚豚骨魚芥湯底（辣湯+$5），分別在於妹妹嘅叉燒係慢煮豬肩肉（２片），弟弟係燒豬腩肉（２片），料理長係兩樣都有（每樣２片）。

我同男朋友分別叫咗妹妹同弟弟（溏心蛋+$10），再自製肉量減半嘅翻版料理長：我選咗正常湯，湯底非常濃郁，充滿膠質，鹹度剛好，而且魚芥並唔係好似坊間咁用魚芥粉，所以飲哂啲湯都唔會口渴。男朋友叫咗辣湯，辣度比一般拉麵店嘅要高（不過未去到地獄level），所以侍應落單時都有提一提我地。叉燒上有一抹辣醬，就咁食會好辣，但加埋落個原味湯底度就令味道更豐富。 配料有日本筍、生洋蔥、蔥、紫菜。生洋蔥喺拉麵比較少見，但我自己本身都鍾意所以對我嚟講有加分。糖心蛋亦做得唔錯，而且隻蛋都幾大隻。
慢煮肩肉（右邊）非常軟滑，肥瘦適中。燒腩肉（左邊）都好食，如果燒得再香口的就更好。
麵質偏硬身，我覺得煮得剛剛好，不過男朋友鍾意食軟身啲嘅就嫌太硬。

我覺得可以再去，好味但未去到我會成日去嘅程度。未去過嘅值得一試。

今次已經係第二次食老表，兩次都係週末。鋪頭o係觀塘廣場地下既其中一條巷仔入面，都幾窄，中間穿過一兩間茶餐廳，行到盡頭就到。雖然呢間野打正旗號做雲南羊肉湯，但老闆其實係鬼佬（收錢o個個）。

呢度既米線有大碗同細碗揀，細碗都好大兜，男士食一個細碗都會夠飽；大碗就啱兩個女仔share。有皮既羊肉米線($32)，每件羊肉稍為大少少，望落都幾多，不過肉既份量就真係偏少。有層皮既話當然會滑啲，而中間既脂肪亦會令啲肉香啲，不過皮會帶少少毛，介意既話最好都係叫冇皮羊肉。個湯算唔錯，有少許羊既羶味，不過再羊味再突出啲就更好。第一次食冇皮既羊肉米線($32)覺得都OK多羊肉，但第二次就得返好少，食兩啖就冇哂。而且個羊本身應該冇乜調味，而個肉質偏實，所以整到細細條咁易食啲。總括黎講，其實冇乜驚喜。今次除咗羊之外，仲試咗牛腩米線($31)。牛腩出奇地大舊同多，顯得啲羊肉更加少。啲牛腩係連住少少脂肪同軟筋既部位，連埋一齊食口感豐富，味道更加濃烈，而且煮得比羊肉稔，所以我覺得牛反而好食過羊。湯底方面，顏色冇羊肉湯咁白，亦冇羊湯既羶味。我食開華姐清湯腩既湯底比較清，而老表就比較重味，有佢自家既特色風味。

佢另外仲有個小食係烚羊尾巴($10)，今日有3條，我12點幾去到已經冇左兩條，不過由於佢係烚既關係，感覺上不太吸引，所以冇試到。我如果俾我再去，我都係會捨羊取牛......

自從喺新加玻食過好好味嘅蝦麵之後，香港嘅蝦麵店就一直喺我個試食list上。上個月趁公眾假期去灣仔試，點知原來逢星期日同公眾假期係休息日！尋日公司老細突然講佢食咗呢度嘅喇沙，覺得幾好食，我即刻同個同事去食個即興嘅蝦麵晚餐。

門面普通到會俾隔離嘅茶餐廳同榮式燒雞扒比下去，入到去就覺得個燈光同setting都有啲東南亞熟食檔嘅風味。

餐牌主要分辣蝦湯、咖哩喇沙湯同豬骨湯，全部都係麵，一粒飯都唔會有。麵可以揀油麵、檬粉、米粉
等，但我地七點三去到已經得返米粉。我地兩個都叫咗咖喱喇沙湯麵，配料係海鮮，有大蝦、青口、魷魚蟹柳、炸魚片、豆卜 ($60)。

先講湯底。咖哩味唔算好重，絕對唔會遮蓋喇沙香料嘅味道，但就保持到咖哩嘅質感，唔會太稀。另外值得一讚嘅係佢冇其他喇沙嘅油膩感，基本上望落食落都唔覺得好油。順帶一提，隔離枱叫咗香辣蝦湯底，真係好香蝦味！

配料整體冇驚喜，青口殼大肉細，蝦肉亦因為煮得太耐而收縮同變老，係一路煲住而唔係即叫即整之故。相反魚片就幾好食，又厚又大塊，令人滿足得多。

至於米粉，其實好難好好食，不過食咗半個鐘都冇發到脹哂或林得好緊要，個人認為唔錯！

食食吓麵， 忽然聽到鋪頭啲人講笑話冇乜客不如早啲收鋪。點知過咗唔夠5分鐘，佢地就走過黎話就黎收鋪叫我地俾咗錢先。正當我地奇怪點解佢地話收鋪就收鋪之際，發現原 來個餐牌係寫住8點關門，唔怪得之啦....結果我地坐到收鋪，離開之後佢地隔離啲餐廳仲係燈火通明，唔通呢間店真係唔休做？

想去Bellini已經有差唔多一年既時間，因為唔係太多港島food buddies既關係，結果等到同屋企人食生日飯先有機會去。我用tablemap book枱，本來約7:30, 不過佢地打黎話每逢假日晚市分6:30同8:00場，想Book枱既朋友要注意。
第二樣要注意既係佢地有好多個menu：a la Carte, set dinner, tasting menu (其實只係個頭盤勁啲同甜品由Brownie變cheesecake, 唔算真正既tasting menu), 是日精選menu, 成4個咁多，互相有啲非常相似既菜式名，材料應該差唔多，只係煮法稍有不同，令食客睇得幾辛苦，個人認為需要搵人執執個menu。北海道帶子刺身燴大蝦，散叫。牛油汁真係全牛油咁滯，味道較單調。蝦有兩雙，經炭火燒過，味道OK，但新鮮度一般。帶子得三粒，比一般食開既帶子細隻，而 且 碟頭盤始終係熱既，究意加入帶子刺身係咪畫蛇添足呢？露筍我冇食到，但師傳似乎冇乜心機，切到又長又短咁，如果切到剛好一半既話賣相一定加分！頭盤仲加咗個鮮茄藍青口，數量唔多，五個人分每人大約食兩三隻。 青口都新鮮，汁可以再杰啲令青口可以沾多啲汁，而且食o個陣我地冇包冇飯，啲汁沾唔到落青口度就洒左。龍蝦湯單叫$58，跟餐加$38，味道尚算濃郁，質地唔算好稀，蝦肉有一兩粒，以呢個價錢黎講算係水準之作！呢個係跟餐既沙律。唔好以為個沙律係我地食咗幾啖先影相，其實佢真係一上菜已經係細到冇朋友！本身個份量已經少得可憐，佢可以選擇用個細碗裝住，但就偏偏用咗隻正常碟裝，令本來少既菜顯得更少....因為我唔太鍾情甜品，呢排又飲咗好多奶茶，所以冇叫餐，散叫咗呢個大蝦鮮茄海鮮意大利飯。蝦都係炭燒既，同前菜o個隻一樣味。海鮮都幾多，有蜆、魷魚等。意 大利飯應該照港人口味整得較“林”，不過各位食客可以叫佢整硬啲都得。整體味道冇乜驚喜，略賺有少少過鹹，鮮茄味不足。呢個係爸媽跟餐既美國安格斯牛扒同大蝦紅花忌廉意大利飯。牛扒都算幾有肉味，但因為脂肪唔夠所以質感較實。個意大利飯就有點失望，味道唔突出之餘，亦出現我碟飯一樣過鹹既情況，而且賣相較普通。
我地除咗以上兩碟意大利飯，仲叫咗兩碟意粉，但每隻碟邊都一樣灑上紅花粉，有時唔單止唔襯，亦會令人覺得沉悶，希望餐廳可以改善。
最後上咖啡同茶，我哥同爸都話個咖啡好香好濃郁，值得推介！（我唔飲咖啡所以唔評價了）
整體黎講食物同服務水平一般，飲既反而令人有驚喜，價位亦都適中。

山頭火係屋企附近比較有水準既餐廳之一，間唔中都會貪就手去食。湯底可以揀鹽味、豉油、麵豉、地獄，通常我都會叫最正常o個個豚內鹽味拉麵，不過今次就試咗佢既豬頸肉，都幾好食喎！啲豬頸肉似用甜豉油醃過，非常入味，而且切得又厚又大片，加上稔滑既口感令人非常滿足，仲足足有7至8塊，絕不欺場。不過啲肉有少少凍，最好放落麵度整返暖。個人每次食山頭火都會叫佢多䓤，今次都唔例外，仲記得第一次叫多䓤o個陣佢用豉油碟拎咗一大碟䓤俾我，真係嚇親，不過我都不負所託，趁熱將啲䓤加哂落碗麵度，減少辣味，食落口感唔錯。美中不足既係半熟蛋略欠蛋味，感覺普通，暫時都係覺得佐敦Ramen Champion o個6間既蛋比較特別同好味。呢個係男朋友叫既魚生飯，另外仲配左拉麵。其實魚生本身還可以，不過認真睇真啲隻蝦，原來得半邊！其實一隻蝦都唔係好貴啫...點解要咁寒酸俾半邊呢？

山頭火其他好食既食物仲有炸雞塊同薯餅。炸雞唔會好乾，加上適度既調味同鮮檸檬汁零舍開胃。薯餅一共有三款：牛肉、咖喱牛肉同埋忌廉蟹肉。最推介既係牛肉薯餅，薯蓉夠滑，炸得亦鬆脆。忌廉蟹肉就爭啲，因為蟹肉較少，好似食緊普通忌廉薯餅咁。

差唔多成年冇去萬豚屋，估唔到而家都仲有人排隊...結果排左超過半個鐘先入到去，仍然係一個鐘內要交枱。我叫咗沖澠風湯豚肉手打烏冬($78)，佢同石燒手打烏冬既分別係沖澠風既湯係比較濃味。今次啲菜苗夠哂多，令啲煙韌既烏冬更有口感。本來去期待佢打落去o個隻蛋，諗住趁個蛋黃未熟即刻撈上黎可以食到半熟蛋黃，但搵極都搵唔到...食到一半佢先出現但當然已經熟咗
其實萬豚屋不嬲都唔係驚為天人既好味，但係自己就點都有條癮要再去...因為幾鍾意佢個湯同埋佢啲入口即溶既肥豬肉。況且近排周圍都興食拉麵，比較鍾意食烏冬既我已經好難搵到人陪我食烏冬....不過呢次之後應該好一段日子都唔會再食萬豚屋喇。

中秋節翌日同好耐冇見既中學同學食飯，本來打算去蝦麵店，點知原來逢星期日同公眾假期唔開...結果沿住星街月街行就去咗呢間水木。
假日既午飯時間，入到去一個客都冇，非常靜。朋友叫左個$168任揀3款料理，約有8款選擇，雖然係套餐，但都係中環既小澤抵啲，$95免加一，10幾款任揀3款送雪糕。我就叫咗個燒(牛)肉配雙色刺身套餐 ($118)。蒸蛋水分較多，不過就好足料，確保啖啖都有其他料。沙律係醋汁，啲菜都幾新鮮開胃。小食係小魚漬，外層用脆漿炸過，再放落洋䓤汁，清清地幾好食，我連魚頭魚骨都食埋
吞拿魚同三文魚刺身都幾新鮮，吞拿魚一條筋都冇，非常稔滑，唔係隨手執條魚俾你。至於主菜燒牛肉飯雖然調味幾好，但就乾得滯，食落已經冇乜牛肉本身既肉汁，淨係食到調味汁。
餐茶只有咖啡有奶茶，如果好似我咁唔飲咖啡，可以揀食雪糕。
值得一讚既係店員對上菜同擺放食具都好用心，一定會擺得整整齊齊。不過就食物水準而言，午餐係唔洗再幫襯架喇...

中秋難得同朋友一聚，就去咗呢度食飯。呢間其實係朋友既朋友既屋企人開既，不過食評會保持中肯。食之前大家睇openrice仲覺得其他食評好似打手寫咁，但食落之後就覺得真係唔錯得黎幾抵食豉椒炒蟶子同豉椒炒鵝腸：好多豉汁，鍾意撈飯既人至啱。蟶子新鮮肥美，鵝腸較薄冇肥膏所以唔夠香同冇乜咬口，再肥返啲就更好。薑䓤鮑魚煲：鮮鮑魚鮮味彈牙，一啲都唔韌，每隻大約都有7cm長，叫咗7隻都只係$175，算係抵食夾大件！不過𠝹左花都唔係太入味，連埋䓤食好味啲。芝士焗龍蝦：呢個堅正！通常啲芝士焗龍蝦既龍蝦都冇乜點處理過就放上伊麵度，但呢度既龍蝦係輕輕炸香到金黃色，而啲肉質仲係爽嫰多汁，真係交足貨！另外，伊麵本身已經沾好多芝士汁，唔似出面o個啲乾麵一層，龍蝦一層，芝士一層，食落都gur好多，而且食落真係好多龍蝦...唔知係啲朋友唔係特別鍾意食龍蝦定點，食哂啲伊麵後竟然淨返龍蝦！大澳香蝦骨：呢度既招牌菜，望上去係平平無奇既炸豬扒，只係加一棵芫茜作點綴。食落去係肥瘦話適中均勻既豬扒，外層唔係太脆，但調味特別得嚟唔會太搶，正
干扁四季豆：好多肉碎，唔會過分濃味，味道唔錯，不過頗油。
啫啫通菜煲：朋友極力推薦呢個通菜煲，上枱時一打開真係勁香兼勁大煙，不過好快就消失。食落未至於好好食，但份量充足，唔算好油，$58係幾抵食。其實我到而家都唔明點解呢啲煲全部都冇菜葉，究竟啲葉去左邊呢？
手抓羊排：羊排有少少乾，辣椒切開大大粒好多銀但唔會好辣，有啲重慶風味。
炸大腸：正常野，肥度適中，脆！食咗咁多海鮮，足足成9碟餸，埋單每人都唔洗二百蚊，真係出乎意料咁抵食！