百份百餐廳 (何文田)

經常食呢間野，作為連鎖餐廳食物質素唔會有咩期，但其他野可以搞返好啲，例如衛生情況，成日塊抺枱布都有陣味；萬年餐牌出期不變；食物選擇好似好多，但黎黎去去只係街邊茶餐廳會出開嘅碟頭同炒野咁共冶一爐，最離譜嘅係最近為咗慳成本，竟然將凍檸茶嘅檸檬片轉做檸檬醬，聲稱一樣新鮮，鮮鬼咩啲味道唔同晒仲有陣苦澀味，連平時唯一比較可取嘅凍檸茶都無埋要叫其他野飲。


最緊要係，啲職員態度又「好」，想享受食餐飯連氣吞可以一試。

慢煮工業 (太子)

老婆前排同朋友去咗呢間食，早幾日同我講話掛住佢嘅白汁意粉😨於是就即日中午係openrice訂位再夜晚去食⋯

環境：幾好，位幾多但算窄，有唔同嘅枱設計eg圓枱，長枱，二人，四人，八人或再大啲都有；環境偏暗。另外唔知係咪咁岩多大枱客，啲傾計聲好大聲，但餐廳背景音樂係細聲的。

食物：唔多講，直接去相


-慢煮安格斯牛西冷8oz
快評：煮法好，調味適中，唯一想講係塊牛嘅來源應該差啲，類似金鳳果啲扒再差少少嘅肉質，但個人覺得仍然對得住個價錢，唔錯嘅


-黑松露野菌天使麵
快評：呢個價錢食到呢個質素嘅白汁，天使麵軟硬適中，白汁食得出唔係用平價忌廉，黑松露味道夠又唔會太搶，仲想點？唯一係份量只係一般


-炸蕃薯條
前言：：呢個其實係食完上面個兩個之後成15分鐘都未到，而諗住小食應該食唔飽，追咗店員而店員話整緊無漏單，於是堅持等到佢黎埋先決定仲加唔加野
快評：勁新鮮，應該真係岩岩炸好，超脆！而且唔厚身，變相條條都好香口，脆邊口感真係不得了，食到停唔到；個醬睇相都見到有成督黑松露，撈完之後好香而且份量仲好勁，食到超飽


-蘋果汽酒
快評：飲開唔同地方啤酒同手工啤嘅我表示有啲失望⋯可能係我飲唔慣

極速總結：呢個價位，呢個環境，已經好難得；之後會再黎試埋其他，就係咁😂

十六座車仔麵 (太子)

（題外話）本身都鍾意食車仔麵，因為貪變化多，想點食就點食，所以都會搵下唔同既舖頭食車記。

（正文）呢間店位於唔起眼既街上，店面不大，大概可坐廿人左右，座位空間算正常，未至於迫。

叫野食係用蠟筆畫上過膠紙的，款式大路，唔詳細介紹但重點推介：
牛爽：依佢講係牛舌芯，爽口而且不常見，第一次必試
冬菇：食幾次都炆得好入味
烏冬；煙un, 滑
辣汁：似乎係自制的，夠香，可叫另上自己「不」

仲有數款自家制茶品，其他不能盡錄，歡迎自己黎試試。

太爺雞 (筲箕灣)

係呢頭做野，所以間唔中會拎食下雞同燒味
已經食左好多次，佢係有燒味飯同小菜食既
平均分量好大，d碟頭飯直頭好似唔使錢咁超大碗飯底，有女士一齊食通常食到一半已經飽哂
叫餐仲有例湯送，好足料而且又係超大碗，飲完已經飽左一半

唔使講招牌一定必試太爺雞，係豉油雞黎既，
味道接近無可挑剔，豉油甜，雞滑，要講唯一不足就係雞少少肥，會有脂肪層，但唔算厚。
送飯一流

其他燒味黎講質素一般，燒肉麻麻，燻蹄OK，白切雞麻麻。

小菜比較少食，但整體都唔錯，係茶記之上菜館水平。

Our Wonderland (尖沙咀)

食開平野既我因同女友慶祝就上黎openrice搵食，之前聽過人講話呢間唔錯，
禁入黎睇見到其他朋友對呢間既服務水平上落好大，但見到食品質數好似唔錯，
同區黎講呢個價位搵左幾間，最終都係黎左呢間。

直去重點，叫左個set menu for 2

餐湯-磨菇忌薕湯：
唔係罐頭湯，足料既，但係俾湯入面放左既兩塊仔餅乾影響左ｄ味，頭淡湯係餅乾味 -_-

頭盤-小食拼盤 - 炸蝦x2 / 芝士餅x2 / 炸雞脾 x2：
正常水平，比茶記好食但唔算有驚喜
個芝士餅咬落幾煙un，唔錯
蝦幾新鮮，炸皮唔算厚
炸脾ｄ肉就鞋左少少

main-水牛芝士Pizza / 白汁海鮮意大利飯：
水牛芝士Pizza幾好食，熱辣辣既pizza係最好食既(唔只係暖，係熱辣辣)
材料好食，味道亦岩岩好，皮又夠脆
同埋幾鐘意佢切開左既pizza件係完全同其他pizza件完全分開
(即係唔係d芝士未斷尾...拎起一件時會痴住隔離果件，結果一拎上黎d材料就俾d芝士痴住跌到周圍都係)
白汁海鮮意大利飯既海鮮就唔好講喇，只係碎件，好細粒果d
但係個白汁就幾正，好重海鮮味，彌補番個味道
有兩隻大蝦跟，但唔係新鮮蝦

餐飲係凍士多啤利朱古力同熱Mocha
Mocha不過不失，同Starbxxxs差唔多
士多啤利朱古力就幾好飲，類似士多啤利糖咁既味，唔會酸亦唔會過甜，岩岩好

總括黎講今餐食得幾開心，食物質素真係唔錯，價錢亦合理
==============================
其實黎之前睇過其他食評，有人話服務質素差又趕客咁
而我自己呢次就覺得唔錯，waiter多數後生仔女，但幾有禮貌同幾細心
上菜既時候我電話放左係台面，佢有提醒我小心部電話
而且會換碟(cafe黎講真係好少見會主動換碟，抵讚)
走既時候亦提你拎齊野同笑住講拜拜，亦唔見趕客情況出現
不過佢類型係樓上cafe，環境偏暗，
現場亦有播放音樂，所以其他人傾計都會比較大聲，感覺上嘈左少少
如果唔鍾意嘈想靜靜地既話就可能唔係咁岩，
但一大班朋友黎就應該唔錯
menu亦見到有menu for 2 - 8位用既set

用餐時間係平日夜晚-8:30，原本book左9點，但8:15打上黎問可唔可以改早d(8:30)
佢地答話留就留唔到，不過而家有位可以walk-in