春葉好茶 (鰂魚涌)

公司附近新開張嘅珍珠奶茶舖，試過白葡萄烏龍茶，正常甜度都唔太甜，淡淡香甜葡萄味。但真正愛上的係芝麻嗰杯，濃濃芝麻香又有超濃芝麻味，有燕麥同芝麻粒好有口感，超推介。今日正式開張仲有小小台灣稯子送

星巴克咖啡 (銅鑼灣)

登登登登。。。約咗朋友嘅我，今日就早咗好多出到銅鑼灣利園中心。所以就搵左Starbucks坐低諗住一路食一路等個朋友。點知當我想叫嘢食嘅時候，發現居然係Starbucks食雪糕食喎！即刻雙眼發光，冇錯我即刻叫左嚟食，雲呢拿雪糕配上蜜糖脆脆再加埋杏仁片焦糖醬，再配埋一杯濃濃嘅特濃咖啡，perfect！將咖啡倒入去雪糕，當雪糕溶咗係咖啡入邊，再飲一啖雲呢拿雪糕咖啡嗰種感覺真係好難形容一個字"正"！除咗雲呢拿，同一款嘅食品，仲有朱古力口味，下次一定要試！

Cedele (大角咀)

今日小編嚟到呢一間細細嘅cafe。
為嘅其實係打發時間。。。
因為小編約咗個朋友，而朋友又未到喎，所以呢就諗住搵一間餐廳坐低等啦！點知就比我見到呢間細細以白色為主，牆上邊掛住幾幅色彩繽紛嘅畫，吸引咗行咗入去。


我叫左一個daily set。一個煙三文魚配番薯包，再加埋一杯熱嘅薄荷花茶。


但我點解揀蕃薯包呢？因為其實我都係一個小小嘅蕃薯控嚟嘅，咁見到有蕃薯包，自不然就會好想叫嚟試吓，因為市面上其實好少有蕃薯味道嘅麵包，而係無蕃薯蓉做配搭的，所以小編先好想試下。其實都有少少失望嘅，因為比我想像中番薯味係冇咁濃啦，唔知係咪因為冇番薯蓉，所以就感覺唔係咁重番薯味。不過整體來講成個包嘅味道係唔錯嘅，因為煙三文魚其實都無得輸。

MR & MRS FOX (鰂魚涌)

係公司附近開咗咁耐,今日終於可以去試吓!
講緊嘅就係呢一間 Mr & Mrs Fox
我本身係係雜誌度見到有食家介紹，俾佢嘅裝修吸引。一直一直都好想嚟，不過可惜無人陪所以一直都無機會嚟試吓。
今日終於親身來到，覺得呢度嘅裝修比我想像中更加舒服，大部份嘅傢俬裝修設計都係以木同貨倉為主，好有外國氣氛，店內亦都有好多外籍人士光顧。


餐具都好有外國小店嘅特色好靚好特別！




不過，可惜餐牌選擇唔多，因為得一個鐘頭lunch嘅關係，所以我只係揀咗個quick set。
個餐係唔包嘢飲嘅，不過就有麵包沙律同主菜。麵包係法式麵包，外脆內軟，熱辣辣，好好味！麵包仲配埋一個黑色醬(味似松露)，食落口好creamy 同麵包好夾。


沙律係蔬菜沙律配上blue cheese,芝士味濃！


而主菜我就叫咗個BBQ醬嘅豬仔骨！豬仔骨炆到好軟好入味，味道偏濃。初上枱嘅時候，感覺好似得好少咁，有種覺得一定食唔飽嘅感覺，但食完晒成個餐之後，居然唔覺得唔飽同油膩，反而覺得啱啱好都飽肚。
總括來講，我覺得呢一間餐廳俾我一種好舒服好輕鬆嘅感覺，我覺得好適合三五知己或者係happy hours飲下酒食下野咁，呢一度係一個好好嘅選擇。雖然價錢就有少少偏貴，不過食物味道，坐嘅舒適環境，就算貴少少我都覺得係值得嘅。

小甜谷 (尖沙咀)

食完飯就緊係要食甜品喇！
這是常識吧！
今日同好耐無見嘅舊同事係尖沙咀食飯聚聚，食完正餐同事就建議去食甜品。
附近正好有小甜谷，睇完餐牌就俾綠茶雪糕吸引咗行咗入去坐底。
我地一行三人，叫咗兩杯綠茶雪糕同一碗湯圓。
綠茶雪糕杯，配有薄脆碗，紅豆蓉同芝麻湯圓。
雪糕分量比睇餐牌仲要大仲要高，好大分好驚喜丫~~~~~綠茶配紅豆係無得輸，正！芝麻湯圓就略嫌皮太厚了。
朋友仔叫嘅淨湯圓都有同樣問題，湯圓細細，皮厚餡少。