細細間舖 但款式勁多 中西都有 我本著試吓佢既榴槤芒返 $48 配料十足 佢個底汁都係用榴槤打成 芒果又香又甜又大粒 西米大大粒 榴槤肉香甜好味 另買多一豌合桃露 香滑順喉 令人回味 食過之後 日日都想去買嚟食

朋友請食飯，咁啱公司附近開咗間flame，見有扒据同甜品，所以就揀佢試試 今日係中午嚟，已經好多人，冇影到室內相 地方舒適，好啱三五知己吹水飲杯 食物有質素，份量都適宜，叫咗兩個午餐 ½葡式香辣燒春雞 8安士紐西蘭肉眼扒配烤蔬菜或薯條 燒春雞夠入味，唔鞋，配沙律菜中和個濃味 肉眼扒五成熟，啱啱好，有肉汁，件扒吸晒啲炭燒味，正 薯條係我最鍾意嗰種，外脆內軟 最後緊係要試埋個甜品啦！ 藍莓芝士餅 朱古力慕絲餅 餅底夠牛油香同新鮮，唔係淋晒嗰啲，芝士既香配藍莓醬，絕對係啱晒口味，唔會漏 朱古力慕絲餅唔太甜，朱古力味香濃幼滑 其他午餐聽同事講都可以，下次再試

慶祝生日，特意嚟呢間試吓 我喺閒日下午去，所以冇人，即時頓覺有啲日本🇯🇵feel 坐低叫咗個最貴既和牛餐食 佢會送盤剌身，新鮮美味，可惜再叫就要付費 主角出場，和牛切好一片片上，入口即溶，牛味十足 其他食物都係要付費，整體食物質表高，喜歡狂牛既你可以試吓 但我食咗幾片就覺漏，始終都係油份多

上次睇佢有下午茶食，今日諗住嚟試吓，點知要2:30先有，咁就改食個常餐，有啲驚喜噃！ 一個係沙嗲牛肉公仔麵配牛油多士炒滑蛋飲熱咖啡 一個係豬扒公仔麵，配丹麥多士炒滑蛋飲熱柚子蜜 兩個茶餐食落去都覺得有懷舊嘅味道，尤其係咖啡，雖然係普通煮嘅咖啡唔係即磨咖啡，但飲落去好滑好香，柚子蜜都落足料開水，唔錯。豬扒公仔麵塊豬扒好大塊夠淋，冇用梳打粉醃過，好味😋會再嚟食

呢間餐廳開咗一陣子，見諗唔到食乜咪即管試試。 環境乾淨衛生，坐個卡位都舒服，係冷氣好大吹住個頭。 叫咗兩個意粉🍝 卡邦尼溫泉蛋意大利粉 味道有水準，配料就少d 紅菜頭軟殼蟹意大利粉 以為係有d紅菜頭食下，原來係個汁上落個意粉到，冇味 軟殼蟹有半隻，都叫做有兩啖食下

今次最後一次幫襯 初初都覺得d食物還可以，坐位寬敞，乾淨，主要係沙田冇日式放題食 雞軟骨串燒，鰻魚，芥蘭炒菜，榴連炸彈都部分食物都還可以 但刺身就真係冇鮮味，款款都唔掂

一向都鐘意食海南雞飯同肉骨茶，但多年都覺得冇一間係正宗，包括新城市嗰兩間出名既食肆（唔開名la） 呢間都係抱行街心態順便食個飯咁，點知出乎意料之外 海南雞飯夠滑有味無骨兼份量足，個湯夠味真材實料老火湯，連個飯個味都好味 肉骨茶夠晒正宗，湯底夠晒藥膳，豆腐卜淋滑，個一字骨剛好唔鞋 加咗個至愛榴連炸彈，滿足晒三個願望 跟餐有兩杯飲品，豆漿有豆味，唔係出面嗰啲水汪汪 我坐卡位，坐得舒服，乾淨，裝飾都幾特別 我好耐冇入嚟評價，呢間真係直得推介 希望可以保持水準，香港食肆靠你

生日食好d, 睇食評見呢間話幾好，折左唔駛$400，就試呢間。
山長水遠由大埔出去，再轉的士，生日對自己好d.
成晚既野食，唉……！

好食既野，一隻手加埋都冇
甜蝦，羊排

唔好食既，聽住
刺生：三文魚都可以冇味，其他既重難食，赤貝黑炆炆，全部都冇味
生蠔，每人限取兩隻，細隻過手指公，冇味
長腳蟹，之前個食評話唔喊，都唔知有冇攪錯，肯定做媒，連蟹咁鮮甜都可以冇味
嚮螺，扇貝，東風螺，青口，蒸完擺埋一邊，硬到死，魚都冇條，得一舊舊 ，好似人地食淨
其他都唔想講

甜品係我一心諗住食既野，係好多，但唔知係咩
芝士蛋糕最簡單，但食落去冇芝士味，重要係好多牛油整，攪到舊野好漏
芒果拿破崙望就幾似模似樣,食落去又係超甜
真係想靠害,血糖即刻爆燈啦,真係想人死咩

咁既質素要4百幾蚊,唔寫呢個食評真係對大家唔住
為免再有人好似我咁比人坤, 甚至係樓下做媒嗰d
大家唔好去食la.

今次親人返港,食餐好兼豪.
上次食過街口間酒樓,完全垃圾.
今次試埋邊細細間,係新款冬菇亭食肆.
唔敢抱太大期望,但反而有驚喜.
我地自己買咗野攞嚟煮:
大花竹蝦, 煎, 正
大賴尿蝦, 椒鹽炸, 正
白灼東風螺, 超好味
(以上唔記得影相, 因為太肚餓)

砵酒焗蠔, 超大隻, 如果再多d砵酒仲正
清蒸鮑魚, 太飽, 我冇食, 其他人食話好正
清蒸大花蟹, 嘩, 鮮甜美味
當然有我最鍾意既豉椒炒聖子, 真係好味到呢......

但d菜就唔得, 豆苗老, 白菜仔, 難食

食完有水果送, 雖然得好少, 是但啦!
侍應幾好服侍, 成日嚟換碟, 多到我嫌佢煩.
地方唔大, 新正, 好似有間房.

總結, 我好怕食有味精既野, 佢地應該冇乜點落, 呢點係我最恩惠!

埋單, 10個人, 料錢連茶錢加一 $1,200, 海鮮買咗$4,200

去完九記打冷, 行過嚟呢間老字號既糖水舖食糖水.

好耐無嚟呢間糖水舖食, 以前最出名係食生磨合桃糊, 屋企人話呢間d 糖水會穩陣d.

點知合桃糊落粉煮到杰撻撻, 又甜.

另外一碗合桃芝麻糊都係一樣.

真係唔掂, 食碗糖水仲貴過食碗雲吞麵, 仲要唔好食.

轉型後冇晒功夫.

到今日寫食評至知, 家陣差成咁, 唉, 早知上網check下先啦!